ଦ କୁଇଭର ବ୍ୟୁରୋ :- ଶ୍ରାବଣ ମାସ ଯୋଗୁଁ ମାସ ସାରା ପ୍ରାୟ ଲୋକେ ଆମିଷ ତ୍ୟାଗ କରିଥିଲେ l ରକ୍ଷା ବନ୍ଧନ ଶନିବାର ପଡ଼ିଥିବା ଯୋଗୁଁ ଆମିଷ ବ୍ୟବସାୟ ତଥା ଭୋଜନ ପ୍ରାୟ ନଥିଲା, ଆଜି ରବିବାର, ସକାଳୁ ସକାଳୁ ବିଭିନ୍ନ ଆମିଷ ବଜାରରେ ଜମିଛି ଲୋକଙ୍କ ପ୍ରବଳ ଭିଡ଼ । କାଉଡିଆ ଭକ୍ତମାନେ ଶିବଙ୍କ ବ୍ରତ ପାଳନରେ ଏକ ମାସ ଧରି ଆମିଷ ତ୍ୟାଗ କରିଥିଲେ, ସେଥିପାଇଁ ମାସକ ପରେ ଆଜି/ରବିବାର ସମସ୍ତେ ଛାଡଖାଇ ପାଳନ କରିଛନ୍ତି । ରାଜ୍ୟର ବିଭିନ୍ନ ସହରର ବିଭିନ୍ନ ଆମିଷ ବଜାରରେ ସକାଳୁ ସକାଳୁ ମାଛ, ମାଂସ, କଙ୍କଡ଼ା ଓ ଅଣ୍ଡା କିଣିବା ନିମନ୍ତେ ଲୋକଙ୍କ ଭିଡ଼ ଲାଗିଥିବା ଦେଖିବାକୁ ମିଳିଛି । ଦର ଯେତେ ହେଲେ ମଧ୍ୟ ସହରବାସୀ ନିଜର ସାମର୍ଥ୍ୟ ଅନୁସାରେ ଆମିଷ ଘରକୁ କିଣି ନେଉଛନ୍ତି । ଆଜି ଛାଡ଼ଖାଇ ଯୋଗୁଁ ବିଭିନ୍ନ ପ୍ରକାରର ମାଛ ମଧ୍ୟ ବିକ୍ରି ହୋଇଥିବାବେଳେ ମାଛ ଗୁଡ଼ିକର ସ୍ବାଦ ଓ ଚାହିଦାକୁ ନେଇ ଦର ମଧ୍ୟ ଭିନ୍ନ ଭିନ୍ନ ରହିଛି । ଗୋଟା ମାଛ କିଲୋ ପିଛା ୨୦୦-୨୨୦ ଟଙ୍କା ରହିଥିବା ବେଳେ କଟା ମାଛ କିଲୋ ପିଛା ୨୪୦ ଟଙ୍କା ରହିଥିଲା । ସେହିପରି କଙ୍କଡ଼ା କିଲୋ ପିଛା ୪୦୦ ରୁ ୬୦୦ ଟଙ୍କା ରହିଥିବା ବେଳେ ଚିଙ୍ଗୁଡ଼ି କିଲୋ ପିଛା ୪୫୦ ଟଙ୍କାରୁ ୬୦୦ ଟଙ୍କା ରହିଛି । ଛେଳି ମାଂସ କିଲୋ ପିଛା ୮୦୦ ଟଙ୍କା ରହିଥିବା ବେଳେ କୁକୁଡ଼ା ମାଂସ କିଲୋ ପିଛା ୨୪୦ ଟଙ୍କା ରହିଥିଲା । ଏକ ମାସ ହେଲା ବ୍ୟବସାୟ ମାନ୍ଦା ଥିବା ବେଳେ ଆଜି ବ୍ୟବସାୟ ବୃଦ୍ଧି ପାଇଛି ଏବଂ ବ୍ୟବସାୟିଙ୍କ ମହଲରେ ମଧ୍ୟ ଏକ ପ୍ରକାର ଖୁସି ଦେଖିବାକୁ ମିଳିଛି l
Join Us To Make A Difference
The Drops💧ଆଜି ଘରେ ଘରେ ଛାଡଖାଇ
Leave a Comment
Comments
No comments yet.
Best Biofloc Fish Farming
Read More
State
ଆଜି ଘରେ ଘରେ ଛାଡଖାଇ
ଦ କୁଇଭର ବ୍ୟୁରୋ :- ଶ୍ରାବଣ ମାସ ଯୋଗୁଁ ମାସ ସାରା ପ୍ରାୟ ଲୋକେ ଆମିଷ ତ୍ୟାଗ କରିଥିଲେ l ରକ୍ଷା ବନ୍ଧନ ଶନିବାର ପଡ଼ିଥିବା ଯୋଗୁଁ ଆମିଷ ବ୍ୟବସାୟ ତଥା ଭୋଜନ ପ୍ରାୟ ନଥିଲା, ଆଜି ରବିବାର, ସକାଳୁ ସକାଳୁ ବିଭିନ୍ନ ଆମିଷ ବଜାରରେ ଜମିଛି ଲୋକଙ୍କ ପ୍ରବଳ ଭିଡ଼ । କାଉଡିଆ ଭକ୍ତମାନେ ଶିବଙ୍କ ବ୍ରତ ପାଳନରେ ଏକ ମାସ ଧରି ଆମିଷ ତ୍ୟାଗ କରିଥିଲେ, ସେଥିପାଇଁ ମାସକ ପରେ ଆଜି/ରବିବାର ସମସ୍ତେ ଛାଡଖାଇ ପାଳନ କରିଛନ୍ତି । ରାଜ୍ୟର ବିଭିନ୍ନ ସହରର ବିଭିନ୍ନ ଆମିଷ ବଜାରରେ ସକାଳୁ ସକାଳୁ ମାଛ, ମାଂସ, କଙ୍କଡ଼ା ଓ ଅଣ୍ଡା କିଣିବା ନିମନ୍ତେ ଲୋକଙ୍କ ଭିଡ଼ ଲାଗିଥିବା ଦେଖିବାକୁ ମିଳିଛି । ଦର ଯେତେ ହେଲେ ମଧ୍ୟ ସହରବାସୀ ନିଜର ସାମର୍ଥ୍ୟ ଅନୁସାରେ ଆମିଷ ଘରକୁ କିଣି ନେଉଛନ୍ତି । ଆଜି ଛାଡ଼ଖାଇ ଯୋଗୁଁ ବିଭିନ୍ନ ପ୍ରକାରର ମାଛ ମଧ୍ୟ ବିକ୍ରି ହୋଇଥିବାବେଳେ ମାଛ ଗୁଡ଼ିକର ସ୍ବାଦ ଓ ଚାହିଦାକୁ ନେଇ ଦର ମଧ୍ୟ ଭିନ୍ନ ଭିନ୍ନ ରହିଛି । ଗୋଟା ମାଛ କିଲୋ ପିଛା ୨୦୦-୨୨୦ ଟଙ୍କା ରହିଥିବା ବେଳେ କଟା ମାଛ କିଲୋ ପିଛା ୨୪୦ ଟଙ୍କା ରହିଥିଲା । ସେହିପରି କଙ୍କଡ଼ା କିଲୋ ପିଛା ୪୦୦ ରୁ ୬୦୦ ଟଙ୍କା ରହିଥିବା ବେଳେ ଚିଙ୍ଗୁଡ଼ି କିଲୋ ପିଛା ୪୫୦ ଟଙ୍କାରୁ ୬୦୦ ଟଙ୍କା ରହିଛି । ଛେଳି ମାଂସ କିଲୋ ପିଛା ୮୦୦ ଟଙ୍କା ରହିଥିବା ବେଳେ କୁକୁଡ଼ା ମାଂସ କିଲୋ ପିଛା ୨୪୦ ଟଙ୍କା ରହିଥିଲା । ଏକ ମାସ ହେଲା ବ୍ୟବସାୟ ମାନ୍ଦା ଥିବା ବେଳେ ଆଜି ବ୍ୟବସାୟ ବୃଦ୍ଧି ପାଇଛି ଏବଂ ବ୍ୟବସାୟିଙ୍କ ମହଲରେ ମଧ୍ୟ ଏକ ପ୍ରକାର ଖୁସି ଦେଖିବାକୁ ମିଳିଛି l
State
ତାରାସିଙ୍ଗି ପୋଲିସ ପ୍ରଶାସନ ଦ୍ୱାରା ଦୁଇଜଣ ଯୁବକକୁ ଗିରଫ
ଗଞ୍ଜାମ( ଦ କୁଇଭର ):- ଗଞ୍ଜାମ ଜିଲ୍ଲା ତାରାସିଙ୍ଗି ପୋଲିସ ପ୍ରଶାସନ ଦୁଇଜଣ ଯୁବକକୁ ଗିରଫ କରିବାରେ ସଫଳ ହୋଇପାରିଛି । ଗିରଫ ଦୁଇଜଣଙ୍କ ପାଖରୁ ଗୋଟିଓ ମାଉଜେର ସହ ଦୁଇଟି ଜୀବନ୍ତ ଗୁଳି ଓ ମୋଟରସାଇକେଲକୁ ଜବତ କରାଯାଇଛି । ଗିରଫ ଦୁଇଜଣ ବିଭୂତି ଭୂଷଣ ରଥ ଓ ଅଜୁ ବିଷୋଇ ବୋଲି ଜଣାପଡିଥିବା ବେଳେ ରୁଢାପଦର ଘୋଗଡ଼ ଜଙ୍ଗଲ ଦଶପଲ୍ଲା - ଭଞ୍ଜନଗର ରୋଡ଼ରେ ପେଟ୍ରୋଲିଂ ବେଳେ ଧରାପଡିଥିବା ଜଣାପଡିଛି । ଗିରଫ ଅଭିଯୁକ୍ତ ମାନଙ୍କ ନାମରେ ଅ।ଗରୁ ବିଭିନ୍ନ ଥାନାରେ ବହୁ ମାମଲା ଥିବା ବେଳେ ସେମାନଙ୍କୁ କୋର୍ଟ ଚାଲାଣ କରାଯାଇଛି ।
International,National
ଟ୍ରମ୍ପଙ୍କ ଟାରିଫ୍ ମାଡ଼ର ପ୍ରଭାବ
ଦ କୁଇଭର ବ୍ୟୁରୋ :- ଭାରତ ଉପରେ ଟ୍ରମ୍ପ ଶୁଳ୍କର ପ୍ରଭାବ ପଡିବା ଆରମ୍ଭ କରିଛି । ଭାରତ ଉପରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ୫୦% ଶୁଳ୍କ ଲଗାଇବାକୁ ଘୋଷଣା କରିଛନ୍ତି । ଏହା ଫଳରେ ଭାରତ ଉପରେ ଏହାର ଗଭୀର ପ୍ରଭାବ ପଡିବା ଆଶଙ୍କା ସୃଷ୍ଟି ହେଲାଣି । ବିଶେଷକରି କପଡା ରପ୍ତାନୀ ଭୟଙ୍କର ପ୍ରଭାବିତ ହୋଇପାରେ ବୋଲି ଆଶଙ୍କା ପ୍ରକାଶ ପାଇଛି । ଆଉ ଦୁଇଦିନ ମଧ୍ୟରେ ଏହାର ପ୍ରଭାବ ବି ଦେଖିବାକୁ ମିଳିଲାଣି । ଆମେରିକା ୭ ଅଗଷ୍ଟରୁ ଭାରତ ଉପରେ ୨୫% ଶୁଳ୍କ ଲାଗୁ କରିଛି ଏବଂ ୨୭ ଅଗଷ୍ଟରୁ ୨୫% ଅତିରିକ୍ତ ଶୁଳ୍କ ଲାଗୁ ହେବ ବୋଲି କହିଛି । ଭାରତ ଉପରେ ଏହି ଶୁଳ୍କ ଲାଗୁ ହେବା ସହିତ, ରପ୍ତାନିରେ ହ୍ରାସ ହେବାର ସମ୍ଭାବନା ଅଛି, ଭାରତରୁ ଆମେରିକା ଯାଉଥିବା ସାମଗ୍ରୀର ମୂଲ୍ୟକୁ ମଧ୍ୟ ଏହା ପ୍ରଭାବିତ କରିପାରେ । ଫଳରେ ଆମେରିକାରେ ବିକ୍ରି ହେଉଥିବା ଭାରତୀୟ ଉତ୍ପାଦନ ଗୁଡ଼ିକର ମୂଲ୍ୟବୃଦ୍ଧି ହେବାର ଆଶଙ୍କା ମଧ୍ୟ ରହିଛି ।
ତାମିଲନାଡୁର କିଛି କପଡା କମ୍ପାନୀରେ ଉତ୍ପାଦନ ବନ୍ଦ
ତିରିପୁରର କିଛି କମ୍ପାନୀରେ ଉତ୍ପାଦନ ବନ୍ଦ,ଅନ୍ୟ କମ୍ପାନୀ ଉତ୍ପାଦନ ବନ୍ଦ ବିକଳ୍ପ ଉପରେ ବିଚାର କରୁଛନ୍ତି,ଅର୍ଡରର କ୍ରିୟାନ୍ୱୟନ ଉପରେ ବି ରୋକ,କପଡା ଶିଳ୍ପ ଅପେକ୍ଷା କରିବା ସ୍ଥିତିରେ ଅଛନ୍ତି,ଦେଖ ଓ ଅପେକ୍ଷା କର ସ୍ଥିତିରେ ଅଛନ୍ତି କପଡା କମ୍ପାନୀ,ବ୍ରିଟେନ ବଜାର ଉପରେ ଆଖି ରଖିଛନ୍ତି ତାମିଲନାଡୁ କମ୍ପାନୀ ନିକଟରେ ଭାରତ-ବ୍ରିଟେନ ମଧ୍ୟରେ ମୁକ୍ତ ବାଣିଜ୍ୟ ଚୁକ୍ତି ହୋଇଛି l ତିରିପୁର ଭାରତର ପ୍ରମୁଖ ଟେକ୍ସଟାଇଲ ହବ୍,ଏଠାରୁ ପ୍ରତ୍ୟେକ ବର୍ଷ ୪୫ ହଜାର କୋଟି ଟଙ୍କାର ରପ୍ତାନୀ ହୋଇଥାଏ,ଏଥିରୁ ୩୦ % ଅର୍ଥାତ ୧୨ହଜାର କୋଟି ଆମେରିକାକୁ ଯାଇଥାଏ l ଆମେରିକାର ରିଟେଲ ବିକ୍ରେତା ଭାରତରୁ ଆସୁଥିବା ଅର୍ଡରଗୁଡିକୁ ସ୍ଥିଗତ ରଖିଛନ୍ତି,ଭାରତୀୟ ରପ୍ତାନୀକାରୀଙ୍କୁ ଇ-ମେଲ ଆସିଛି l ରପ୍ତାନୀ ବନ୍ଦ ହେବା ଫଳରେ ବାଣିଜ୍ୟରେ ୪୦ରୁ ୫୦% ହ୍ରାସ ପାଇପାରେ l
State
ରାକ୍ଷୀରେ ୧ କୋଟି ମହିଳା ପାଇଲେ ସୁଭଦ୍ରା ତୃତୀୟ କିସ୍ତି
ଦ କୁଇଭର ବ୍ୟୁରୋ :- କୋରାପୁଟ ଜୟପୁରରୁ ସାରା ଓଡ଼ିଶାର ସୁଭଦ୍ରା ହିତାଧିକାରୀଙ୍କୁ ୩ୟ କିସ୍ତି ବାବଦକୁ ୫ ହଜାର ଟଙ୍କା ଲେଖାଏଁ ଦେଇଛନ୍ତି ମୋହନ ସରକାର । ଏହାସହ ମହିଳା ସଶକ୍ତିକରଣକୁ ପୂର୍ବ ସରକାର କେବଳ ସ୍ଲୋଗାନରେ ସୀମିତ ରଖିଥିବା ଘେରି ବିଜେଡିକୁ ଘେରିଛନ୍ତି ମୁଖ୍ୟମନ୍ତ୍ରୀ । ଲକ୍ଷପତି ଦିଦିଙ୍କୁ ସମ୍ମାନିତ କରି ସୁଭଦ୍ରା ସଫଳତାର ବାର୍ତ୍ତା ଦେଇଛନ୍ତି ମୋହନ । କୋରାପୁଟ ଜୟପୁରରେ ମହିଳାଙ୍କୁ ରାଖୀ ଉପହାର ଦେଇଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡାଙ୍କ ଉପସ୍ଥିତିରେ ଏକକାଳୀନ ୧ କୋଟି ସୁଭଦ୍ରା ହିତାଧିକାରୀଙ୍କ ଆକାଉଣ୍ଟକୁ ଆସିଛି ୫ ହଜାର ଟଙ୍କା । କୋଟିଆରେ ଆଦୌ ସୁଭଦ୍ରା ସହାୟତା ପାଇନଥିବା ହିତାଧିକାରୀଙ୍କୁ ଏକକାଳୀନ ମିଳିଛି ୩ଟି କିସ୍ତିର ଟଙ୍କା । ମୁଖ୍ୟମନ୍ତ୍ରୀ କହିଛନ୍ତି, ମା ମାନଙ୍କ ସ୍ବପ୍ନ ପୂରଣର ନୂଆ ମାଧ୍ୟମ ସାଜିଛି ସୁଭଦ୍ରା । ମହିଳା ସଶକ୍ତିକରଣକୁ ସ୍ଲୋଗାନରେ ସୀମିତ ନରଖି ମା ମାନଙ୍କୁ ସ୍ବାବଲମ୍ବୀ କରୁଛି ସୁଭଦ୍ରା । ଯାହାର ସବୁଠୁ ବଡ ପ୍ରମାଣ, ୧୭ ଲକ୍ଷ ଲକ୍ଷପତି ଦିଦି । ଉପ-ମୁଖ୍ୟମନ୍ତ୍ରୀ ପ୍ରଭାତୀ ପରିଡା କହିଛନ୍ତି, ମହିଳାଙ୍କୁ ସଶକ୍ତ ଓ ଆତ୍ମନିର୍ଭର କରିଛି ସୁଭଦ୍ରା । ସୁଭଦ୍ରାର ୩ୟ କିସ୍ତି ସହାୟତା ରାଶି ପ୍ରଦାନ ଭିତରେ ତେଜିଛି ରାଜନୀତି । ବିରୋଧୀ ବିଜେଡି କହିଛି, ମହିଳାଙ୍କୁ ଠକିଛି ବିଜେପି ସରକାର । ସୁଭଦ୍ରାର ତୃତୀୟ କିସ୍ତି ପ୍ରଦାନ ସହ ପ୍ରଥମ ୨ଟି କିସ୍ତିରେ ଟଙ୍କା ପାଇନଥିବା ହିତାଧିକାରୀଙ୍କ ଆକାଉଣ୍ଟକୁ ଟଙ୍କା ପ୍ରଦାନ ପ୍ରକ୍ରିୟା ଆରମ୍ଭ ହୋଇଛି । ଯାହାକୁ ନେଇ ଖୁସିବ୍ୟକ୍ତ କରିଛନ୍ତି ସୁଭଦ୍ରା ହିତାଧିକାରୀ ।
State,District,City
ବ୍ରହ୍ମପୁର ବିଶ୍ବବିଦ୍ୟାଳୟର ୨୬ ତମ ସମାବର୍ତ୍ତନ ଉତ୍ସବ
ବ୍ରହ୍ମପୁର( ଦ କୁଇଭର ):- ବ୍ରହ୍ମପୁର ବିଶ୍ବବିଦ୍ୟାଳୟର ୨୬ ତମ ସମାବର୍ତ୍ତନ ଉତ୍ସବ ଆଜି ବିଶ୍ବବିଦ୍ୟାଳୟର ବିଜୁପଟ୍ଟନାୟକ ପ୍ରେକ୍ଷାଳୟ ଠାରେ ଆୟୋଜିତ ହୋଇଥିଲା । ଏଥିରେ ମୁଖ୍ୟ ଅତିଥି ଭାବେ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ରାଜ୍ୟପାଳ ଡ଼କ୍ଟର ହରିବାବୁ କମ୍ଭମପାଟି ଓ ସମ୍ମାନିତ ଅତିଥି ଭାବେ ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ ଯୋଗ ଦେଇଥିଲେ । ବିଶ୍ବବିଦ୍ୟାଳୟର କୁଳପତି ପ୍ରଫେସର ଗୀତାଞ୍ଜଳି ଦାସଙ୍କ ନେତୃତ୍ୱରେ ଏହି ସମାବର୍ତ୍ତନ ଉତ୍ସବ ଆୟୋଜିତ ହୋଇଥିଲା । ଏହି ଅବସରରେ କୃଷି, ବିଜ୍ଞାନ ଓ ପ୍ରତିରକ୍ଷା କ୍ଷେତ୍ରରେ ଉଲ୍ଲେଖନୀୟ କାର୍ଯ୍ୟ କରିଥିବା ତିନି ଜଣ ବିଶିଷ୍ଟ ବ୍ୟକ୍ତିଙ୍କୁ ବିଶ୍ବବିଦ୍ୟାଳୟ ପକ୍ଷରୁ ସମ୍ମାନସୂଚକ ଡକ୍ଟରେଟ ପ୍ରଦାନ କରାଯାଇଥିଲା । ମିଲେଟ ଉତ୍ପାଦ ସଂରକ୍ଷଣ ଦିଗରେ ଉଲ୍ଲେଖନୀୟ ଅବଦାନ ପାଇଁ କୋରାପୁଟ ଜିଲ୍ଲାର ଡ.ରାଇମାତି ଘିଉରିଆ, ଆଣବିକ ବିଜ୍ଞାନ କ୍ଷେତ୍ରରେ ବିଶିଷ୍ଟ ବ୍ୟକ୍ତିତ୍ବ ମୟୂରଭଞ୍ଜର ଡଃ. ଅଜିତ କୁମର ମହାନ୍ତି ଏବଂ ମହାକାଶ ଓ ପ୍ରତିରକ୍ଷା ବିଜ୍ଞାନ କ୍ଷେତ୍ରରେ ବିଶେଷ ଅବଦାନ ପାଇଁ କେରଳର ଡ. କେହି ଥୋମାସ୍ ବ୍ରହ୍ମପୁର ବିଶ୍ଵବିଦ୍ୟାଳୟରୁ ସମ୍ମାନସୂଚକ ଡକ୍ଟରେଟ ଉପାଧି ପାଇଛନ୍ତି । ଏହି ସମାବର୍ତ୍ତନ ଉତ୍ସବରେ ସମସ୍ତ ବିଭାଗର ଟପ୍ପର ୩୮ ଜଣ ଛାତ୍ରଛାତ୍ରୀଙ୍କୁ ସ୍ବର୍ଣ୍ଣ ପଦକ, ୫୨ ଜଣଙ୍କୁ ପିଏଚଡ଼ି, ୪ ଜଣଙ୍କୁ ଡିଲିଟ୍ ପ୍ରଦାଳ କରାଯାଇଛି । ନାକ ପକ୍ଷରୁ ହୋଇଥିବା ମୂଲ୍ୟାଙ୍କନରେ ବିଶ୍ଵବିଦ୍ୟାଳୟକୁ ଏ ଗ୍ରେଡ଼ ମିଳିଥିବାରୁ ବିଶ୍ବବିଦ୍ୟାଳୟର ସମସ୍ତ ଶିକ୍ଷକ, କର୍ମଚାରୀ, ଛାତ୍ରଛାତ୍ରୀ ଓ ଉପସ୍ଥିତ ଅତିଥିମାନେ ଖୁସୀ ବ୍ୟକ୍ତ କରିଥିଲେ । ଏହି ଅବସରରେ ପିଏମ ଉସା ଯୋଜନାରେ ବିଶ୍ଵବିଦ୍ୟାଳୟକୁ ୧୦୦ କୋଟି, ରାଜ୍ୟ ସରକାରଙ୍କ ପକ୍ଷରୁ ୭୭ କୋଟି, ବିଜ୍ଞାନ ଓ ପ୍ରଯୁକ୍ତି ବିଦ୍ୟା ବିଭାଗରୁ ୧୦ କୋଟି ଓ ଅନୁସନ୍ଧାନ ରିସର୍ଚ୍ଚ ଫାଉଣ୍ଡେସନ ପକ୍ଷରୁ ୧୨ କୋଟି ଆସିଛି । ବ୍ରହ୍ମପୁର ବିଶ୍ଵବିଦ୍ୟାଳୟ ଆଗାମୀ ଦିନରେ ନୂତନ ନିଯୁକ୍ତି ସହ ଗବେଷଣା ଓ ଛାତ୍ରଛାତ୍ରୀଙ୍କ ଉନ୍ନତି ପାଇଁ ଅନେକ ପଦକ୍ଷେପ ନେବାକୁ ବିଶ୍ବବିଦ୍ୟାଳୟ ଯୋଜନା କରିଥିବା କହିଛନ୍ତି କୁଳପତି ।
State
ବନବିଭାଗ ପକ୍ଷରୁ ଅଜଗର ସାପ ଉଦ୍ଧାର
.jpg%3Falt%3Dmedia%26token%3D1b95d691-d871-4171-befe-232d30307524&w=828&q=75)
ମାଲକାନଗିରି(ଦ କୁଇଭର):-ମାଲକାନଗିରି ବନାଞ୍ଚଳ ଅଧିନସ୍ଥ ଏମଭି-୧୧ ଗ୍ରାମରୁ ବନକର୍ମଚାରୀ ଏବଂ ସାପ ଉଦ୍ଧାରକାରୀ ଦଳଙ୍କ ଉଦ୍ୟମରେ ଏକ ଅଜଗର ସର୍ପକୁ ଉଦ୍ଧାର କରାଯାଇଛି। ଗତ କାଲି ସନ୍ଧ୍ୟାରେ ମାଲକାନଗିରି ଅଞ୍ଚଳରେ ବର୍ଷା ଲାଗି ରହିଥିବା ବେଳେ ଏମଭି-୧୧ ଗ୍ରାମର ଜଣେ କୁକୁଡ଼ା ପାଳନ କରୁଥିବା ବ୍ୟକ୍ତି ଘରେ ଅଜଗର ସାପଟି କୁକୁଡ଼ା ଖାଇବା ଉଦ୍ଦେଶ୍ୟରେ ପ୍ରବେଶ କରିଥିଲା। ଏହି ଅଜଗର ସାପକୁ ଉଦ୍ଧାର କରିବା ପାଇଁ ଜନୈକ ବ୍ୟକ୍ତି ମାଲକାନଗିରି ବନାଞ୍ଚଳ ଅଧିକାରୀ ରମେଶ ଚନ୍ଦ୍ର ରାଉତଙ୍କୁ ଫୋନ୍ ମାଧ୍ୟମରେ ଜଣାଇବା ପରେ ବନପାଳ ମନତୋଷ ଦେଙ୍କ ନେତୃତ୍ୱରେ ଏମଭି-୧୧ ଗ୍ରାମରକୁ ଯାଇ ଅଜଗର ସାପକୁ ଗତ କାଲି ସନ୍ଧ୍ୟା ୮ ଘଟିକା ସମୟରେ
ଉଦ୍ଧାର କରାଯାଇଥିଲା।ସାପଧରାଳୀ ଡମ୍ବରୁ ହନ୍ତାଳ ଅଜଗରଟିକୁ ସୁରକ୍ଷିତ ଭାବେ କାବୁ କରି ଯନ୍ତାରେ ଆବଦ୍ଧ କରି ମାଲକାନଗିରି ବନାଞ୍ଚଳ କାର୍ଯ୍ୟାଳୟକୁ ଆଣିଥିଲେ। ଏହାକୁ ପ୍ରାଣୀ ଚିକିତ୍ସାଳୟରେ ସ୍ବାସ୍ଥ୍ୟ ପରୀକ୍ଷା କଲାପରେ ପରେ ଆଜି ଉକ୍ତ ଅଜଗରକୁ ଜଙ୍ଗଲରେ ମୁକ୍ତ କରାଯିବ ବୋଲି ଜଣା ପଡିଛି।ଏହି ଅଜଗର ଟି ୨୦ କେଜି ଓଜନ ହେବ ଏବଂ ଲମ୍ବ ପ୍ରାୟ ୮ ଫୁଟ ହେବ ବୋଲି କୁହାଯାଇଛି।
State
ଆଜି ଆସିବ ସୁଭଦ୍ରା ଟଙ୍କା
ଦ କୁଇଭର ବ୍ୟୁରୋ :- ଆଜି ଆସିବ ସୁଭଦ୍ରା ତୃତୀୟ କିସ୍ତି । ରାଖୀ ପୂର୍ଣ୍ଣିମା ଅବସରରେ କୋରାପୁଟ ଜିଲ୍ଲା ଜୟପୁରରେ ସୁଭଦ୍ରାର ତୃତୀୟ କିସ୍ତି ବାଣ୍ଟିବେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଏହି ଅବସରରେ ଆୟୋଜିତ ହେବାକୁ ଥିବା କାର୍ଯ୍ୟକ୍ରମରେ ୧୫ରୁ ଊର୍ଦ୍ଧ୍ବ ସୁଭଦ୍ରା ହିତାଧିକାରୀଙ୍କୁ ମୁଖ୍ୟମନ୍ତ୍ରୀ ଟଙ୍କା ବାଣ୍ଟିବେ । ପରେ ସମସ୍ତ ଆକାଉଣ୍ଟକୁ ଟଙ୍କା ଯିବ । ଆଜି ଏକକାଳୀନ ୧ କୋଟି ହିତାଧିକାରୀଙ୍କ ଖାତାକୁ ଯିବ ୫ ହଜାର ଟଙ୍କା । ତେବେ ଯେଉଁ ହିତାଧିକାରୀ ଭାବେ ପ୍ରଥମ ଦୁଇଟି କିସ୍ତିରେ ଟଙ୍କା ପାଇନାହାନ୍ତି, ସେମାନଙ୍କୁ ମଧ୍ୟ ଟଙ୍କା ପ୍ରଦାନ ପାଇଁ ପ୍ରକ୍ରିୟା ଆରମ୍ଭ ହେବ । ଏପର୍ଯ୍ୟନ୍ତ ୨ଲକ୍ଷ ହିତାଧିକାରୀ ବାଦ୍ ପଡ଼ିଛନ୍ତି । ସେମାନଙ୍କୁ ଯୋଡ଼ିବା ପାଇଁ ଆଉ ଥରେ ସର୍ଭେ ହେବ । ୯୩ ହଜାର ହିତାଧିକାରୀ ମହିଳାଙ୍କୁ ୬୦ ବର୍ଷ ପୂରିଥିବାରୁ ବିଭାଗ ସେମାନଙ୍କୁ ଭତ୍ତା ପାଇଁ ଏସଏସଇପିଡିକୁ ପଠାଇଛି । ସୂଚନାଯୋଗ୍ୟ ଯେ ସୁଭଦ୍ରା ଯୋଜନାରେ ୧ କୋଟି ୬୫ ହଜାର ୮୭୭ ଜଣ ମହିଳା ପ୍ରଥମ କିସ୍ତି ଟଙ୍କା ପାଇଛନ୍ତି । ସେହିପରି ୯୮ ଲକ୍ଷ ୮୨ ହଜାର ୯୨ ଜଣ ମହିଳା ଦ୍ୱିତୀୟ କିସ୍ତି ଟଙ୍କା ପାଇଛନ୍ତି । ପ୍ରଥମ କିସ୍ତି ଟଙ୍କା ଗତବର୍ଷ ସେପ୍ଟେମ୍ବର ୧୭ ତାରିଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଜନ୍ମଦିନରେ ପ୍ରଦାନ କରାଯାଇଥିଲା । ଏହା ପରେ ଚଳିତବର୍ଷ ମହିଳା ଦିବସରେ ଦ୍ବିତୀୟ କିସ୍ତି ଦିଆଯାଇଥିଲା । ପ୍ରତିବର୍ଷ ରାଖୀ ପୂର୍ଣ୍ଣିମା ଓ ମହିଳା ଦିବସରେ ସୁଭଦ୍ରା ଟଙ୍କା ଦେବାକୁ ସରକାର ନିଷ୍ପତ୍ତି ନେଇଛନ୍ତି । ସେହି ଆଧାରରେ ଆଜି ରାକ୍ଷୀ ପୂର୍ଣ୍ଣିମାରେ ହିତାଧିକାରୀଙ୍କ ଖାତାକୁ ଯିବ ଟଙ୍କା ।
State,Crime
ଯୌତୁକ ପାଇଁ ନବ ବଧୂକୁ ହତ୍ୟା
ଦ କୁଇଭର ବ୍ୟୁରୋ :- ବାହାଘରକୁ ବରଷେ ପୂରିନି କବରକୁ ଗଲା ଆଉ ଜଣେ ନବବଧୂ । ଝିଅଟି ଯୁବକଙ୍କ ହାତ ଧରି ଘରୁ ଲୁଚି ପଳାଇ ଆସିଥିଲା। ପରେ ଉଭୟ ଘର ଲୋକଙ୍କ ସହମତିରେ ବାହାଘର ହୋଇଥିଲା । ବାହାଘର ସିନା ହୋଇଗଲା ହେଲେ ଗଲାନି ଯୋତୁକ ଦୁଃଖ । କେତେ ସ୍ବପ୍ନ ନେଇ ସ୍ବାମୀ ହାତ ଧରି ସଂସାର କରିବେ ବୋଲି ଭାବିଥିଲେ । ହେଲେ ଝିଅଟିର ସବୁ ସ୍ବପ୍ନ ଭାଙ୍ଗିରୁଜି ଚୁରମାର୍ ହୋଇଗଲା । ବାହାଘରର କିଛି ଦିନ ଠିକ୍ ଠାକ୍ ଚାଲିଥିବା ବେଳେ ତା’ପରେ ଆରମ୍ଭ ହୋଇଯାଇଥିଲା ନିର୍ଯ୍ୟାତନା । ଯାହା ପରବର୍ତ୍ତି ସମୟରେ ନେଇଥିଲା ଭୟଙ୍କର ରୂପ । ଯୌତୁକ ପାଇଁ ଝିଅର ଜୀବନ ନେଇଯାଇଥିବା ଅଭିଯୋଗ କରି ନ୍ୟାୟ ପାଇଁ ଥାନାର ଦ୍ବାରସ୍ଥ ହୋଇଛନ୍ତି ବାପା ମା’।
ବେଗୁନିଆ ଶରଧାପୁର ଗାଁର ଶେଖ ସଲିମଙ୍କ ପୁଅ ସବିର୍ ଖାନ୍ । ଭଦ୍ରକ ଜିଲ୍ଲା ଧାମନଗର ବ୍ଳକ ଧୁଷୁରୀ ଥାନାର ଗୋଡିପୋଖରି ଗାଁର କାଦିର୍ ଖାନ୍ ଙ୍କ ଗୋଟିଏ ବୋଲି ଝିଅ ଦଶମ ଶ୍ରେଣୀରେ ପଢୁଥିବା ରୁହାନାକୁ ରାତାରାତି ଉଠାଇ ଆଣିଥିଲା । ରୁହାନାଙ୍କୁ ସେତେବେଳେ ୧୫ ବର୍ଷ ହୋଇଥିଲା । ସେତେବେଳେ ରୁହାନା ପରିବାର ତରଫରୁ ଧୁଷୁରୀ ଥାନାରେ ନାବାଳିକା ଅପହରଣ ଜନିତ ଅଭିଯୋଗ ହୋଇଥିଲା । ପରବର୍ତ୍ତି ସମୟରେ ପରିବାର ଲୋକ ଖୋର୍ଦ୍ଧା ଜିଲ୍ଲାର ବେଗୁନିଆ ବ୍ଲକ ଶରଧାପୁର ଗାଁରେ ଥିବା ଖବର ପାଇ ଏବଂ ଝିଅ ରୁହାନା ସବିରଙ୍କୁ ଭଲ ପାଇ ନିଜ ଇଚ୍ଛାରେ ପଳାଇ ଆସିଥିବା କହିବା ପରେ ଉଭୟ ପରିବାର ଲୋକ କିଛି ସମ୍ପର୍କୀୟଙ୍କ ସହାୟତାରେ ଉଭୟଙ୍କ ବିବାହ ଲୁଚାଇ କରିଦେଇଥିଲେ । ଏହା ଭିତରେ ନଅ ମାସ ବିତିଯାଇଥିବା ବେଳେ ସ୍ଵାମି ସବିର୍ ସ୍ତ୍ରୀ ରୁହାନା ଉପରେ ଯୌତୁକ ପାଇଁ ଚାପ ପକାଉଥିବା ଅଭିଯୋଗ ହୋଇଛି । ତେବେ ରୁହାନା ଗତକାଲି ଏସବୁ ଚାପ ସହି ନ ପାରି ସଂନ୍ଧ୍ୟାରେ ଘର ଲୋକଙ୍କୁ ଫୋନ କରି ଜଣାଇଥିଲା ପରେ ତାଙ୍କ ସ୍ବାମୀ ମୋବାଇଲ ଛଡ଼ାଇ ନେଇଥିଲେ । ତା କିଛି ସମୟ ପରେ ଏହି ଅଘଟଣ ଘଟିଥିଲା । ରୁହାନାର ଜୀବନ ଚାଲିଯାଇଛି ବୋଲି ଶାଶୂଘର ଲୋକେ ଫୋନ କରି ତାଙ୍କ ଘରକୁ ଜଣାଇଥିଲେ ।ଗତ ନଭେମ୍ବର ମାସରେ ରୁହାନାର ବିବାହ ହୋଇଥିଲା । ସବିର ଭିଣୋଇଙ୍କ ଦୋକାନରେ କାମ କରୁଥିବା ବେଳେ ସେଠାରେ ରୁହାନାଙ୍କ ସହ ପ୍ରେମ ହୋଇଥିଲା । ହେଲେ ବାହାଘରକୁ ବରଷେ ନ ପୂରୁଣୁ ମୃତ୍ୟୁ ଶଯ୍ୟାରେ ଶୋଇଗଲେ ରୁହାନା । ଗତକାଲି ସଂନ୍ଧ୍ଯାରେ ପୋଲିସ ଖବର ପାଇବା ପରେ ନବ ବିବାହିତାର ଶବ ଜବତ କରିଥିଲା । ପରେ ସ୍ଵାମୀ ସବିରକୁ ଅଟକ ରଖି ରୁହାନା ପରିବାରକୁ ଡକାଇବା ସହିତ ସେମାନେ ଆଜି ଆସି ପହଁଞ୍ଚିବା ପରେ ତଦନ୍ତ ଆରମ୍ଭ କରିଛି ପୋଲିସ ।
State
ସିକ୍ୟୁରିଟି ଗାର୍ଡଙ୍କୁ ପଚରାଉଚରା କରିଛି କ୍ରାଇମ୍ ବ୍ରାଞ୍ଚ : ଏଫଏମ ଛାତ୍ରୀ ଘଟଣା
ଦ କୁଇଭର ବ୍ୟୁରୋ :- ସତ ଖୋଲିବେ ସିକ୍ୟୁରିଟି ଗାର୍ଡ । କ୍ରାଇମବ୍ରାଞ୍ଚ ର ତଦନ୍ତର ସମ୍ମୁଖୀନ ହେଲେ ଏଫ୍ ଏମ କଲେଜର ସିକ୍ୟୁରିଟି ଗାର୍ଡ । କଲେଜ୍ ଫାଷ୍ଟ ଗେଟରେ କାର୍ଯ୍ୟରତ ସିକ୍ୟୁରିଟି ଗାର୍ଡଙ୍କୁ ଝାଳ ବୁହା ପଚରାଉଚରା କରିଛି କ୍ରାଇମ୍ ବ୍ରାଞ୍ଚ । ଘଟଣା ଦିନ କେତେବେଳେ କାର୍ଯ୍ୟରେ ଯୋଗ ଦେଇଥିଲେ ସିକ୍ୟୁରିଟି ଗାର୍ଡ ।ଛାତ୍ରୀ ଜଣକ କେଉଁ ସମୟରେ କଲେଜ୍ କ୍ୟାମ୍ପସ କୁ ପଶିଲେ । ଛାତ୍ରୀ ଙ୍କ ସାଙ୍ଗରେ କିଏ କିଏ ଥିଲେ । କେଉଁ ଛାତ୍ର ମାନେ ଛାତ୍ରୀଙ୍କ ସହ ଥିଲେ । କେତେ ଜଣ ଅଣଛାତ୍ର ଘଟଣା ଦିନ କ୍ୟାମ୍ପସ ମଧ୍ୟରେ ଥିଲେ । ସବୁ ଛାତ୍ର ମାନେ ୟୁନିଫର୍ମ ରେ ଥିଲେ ନା ନର୍ମାଲ ଡ୍ରେସ୍ ରେ ଥିଲେ ।ଏସବୁ ବିଷୟକୁ ନେଇ ବହୁ ସମୟଧରି ପଚରା ଉଚୁରା କରିଛି କ୍ରାଇମବ୍ରାଞ୍ଚ । ମେଇନ ଗେଟ୍ ସହ , ପ୍ରିଂସିପାଲ୍ ଚ୍ୟମ୍ବର ଓ କ୍ୟାମ୍ପସ ରେ ଡ୍ୟୁଟି କରୁଥିବା ୩ ଜଣ ସିକ୍ୟୁରିଟି ଗାର୍ଡ ଆଜି କ୍ରାଇମବ୍ରାଞ୍ଚ ଜେରାର ସମ୍ମୁଖୀନ ହୋଇଛନ୍ତି ।
Politics,State
ଓଡ଼ିଶାକୁ କରିବେ ଛେଳିମୟ
ଭୁବନେଶ୍ୱର(ଦ କୁଇଭର): ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ଗୋଟେ ବଡ଼ ଯୋଜନା କରିଛନ୍ତି । ଏତେଦିନ ପରେ ଏମିତି ଯୋଜନା ସେ ଆଣିଛନ୍ତି ଯେ, ପୂରା ରାଜ୍ୟର ମହିଳାଙ୍କ ସ୍ଥିତି ବଦଳାଇ ଦେବେ । ମୋହନ ସରକାର ରାଜ୍ୟର ପ୍ରତି ମହିଳାଙ୍କୁ ସ୍ୱାବଲମ୍ବୀ କରିବା ପାଇଁ ୫ବର୍ଷରେ ୫୦ହଜାର ଟଙ୍କା ପ୍ରଦାନ କରିବେ । ପ୍ରତିବର୍ଷ ୧୦ହଜାର କରି ସରକାର ମହିଳାଙ୍କୁ ଦେଉଛନ୍ତି । ଏହି ଟଙ୍କାରେ ମହିଳାମାନେ ଛେଳି କିଣୁଛନ୍ତି ବୋଲି କହିଛନ୍ତି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା । ତିନିଟି କିସ୍ତି ପାଇଥିବା ମହିଳାମାନେ ୩ଟି ଛେଳି କିଣିଲେଣି । ଆଗକୁ କିସ୍ତି ପାଇଲେ ପୁଣି ଛେଳି କିଣିବେ ବୋଲି ପ୍ରଭାତୀ କହିଛନ୍ତି ।
ପ୍ରଭାତୀଙ୍କ ଯୋଜନାକୁ ଯିବା ପୂର୍ବରୁ ତାଙ୍କ କଥା ଶୁଣିବା ।---
ଶୁଣିଲେ ତ ଉପମୁଖ୍ୟମନ୍ତ୍ରୀଙ୍କର ମହିଳାଙ୍କ ପାଇଁ ବଡ଼ ଯୋଜନା । ମହିଳାମାନେ ଛେଳି କିଣି ସ୍ୱାବଲମ୍ବୀ ହେବେ । ପ୍ରତିବର୍ଷ ୫ହଜାର ଲେଖାଏ ଦୁଇଥର ପାଇବେ, ସେଥିରେ ଛେଳି କିଣି ବ୍ୟବସାୟ କରିବେ । ୫ବର୍ଷରେ ୧୦ଟି ଛେଳି କିଣିଥିବେ ଓ ଏହାର ବ୍ୟବସାୟ ଭଲ ହେବ । କାରଣ ଛେଳିର ବଜାର ଚାହିଦା ବହୁତ ରହିଛି । ଉପମୁଖ୍ୟମନ୍ତ୍ରୀଙ୍କ ଏପରି ଯୋଜନା ଏବେ ସବୁଠି ଚର୍ଚ୍ଚା । ବିରୋଧୀ ଏହାକୁ ସମାଲୋଚନା କରୁଥିବା ବେଳେ ଏହାର ବାସ୍ତବତା ଯେ ଅନେକ ମହିଳାଙ୍କୁ ସ୍ୱାଲମ୍ବୀ କରିପାରିବ ତାହା ସ୍ପଷ୍ଟ ବୋଲି କେତେକ ଅଭିଜ୍ଞ କହୁଛନ୍ତି । ଦେଖାଯାଉ, ସୁଭଦ୍ରା ଟଙ୍କାରେ କେତେ ମହିଳା କେତେ ଛେଳି କିଣୁଛନ୍ତି ଓ କିଭଳି ଲାଭବାନ ହେଉଛନ୍ତି?
State
ଓଡିଶା ହସ୍ତତନ୍ତକୁ ବିଦେଶରେ ଚମକାଇବେ ଧକ୍ ଧକ୍ ଗର୍ଲ ମାଧୁରୀ ଦୀକ୍ଷିତ
ଦ କୁଇଭର ବ୍ୟୁରୋ :- ଦେଶରୁ ବିଦେଶ ସବୁଠି ଚମକିବ ଓଡିଶା ହସ୍ତତନ୍ତ । ଓଡ଼ିଆ ହସ୍ତକଳାକୁ ମିଳିବ ନୂଆ ପରିଚୟ । ବିଦେଶରେ ବଢିବ ଚାହିଦା । ଆମ ବୁଣାକାରମାନଙ୍କ ହାତ ତିଆରି କାରିଗରୀକୁ ନେଇ ବିଦେଶରେ ପ୍ରଚାର କରିବେ ଧକ ଧକ ଗର୍ଲ ମାଧୁରୀ ଦୀକ୍ଷିତ ।ବଲିଓଡ଼ର ଫ୍ୟାସନ ଆଇକନ ମାଧୁରୀ ଦୀକ୍ଷିତଙ୍କୁ ହସ୍ତତନ୍ତ ବିଭାଗର ବ୍ରାଣ୍ଡ ଆମ୍ବାସଡର ଘୋଷଣା କରି ମୁଖ୍ୟମନ୍ତ୍ରୀ ମୋହନ ମାଝୀ କହିଥିଲେ, ଅଭିନୟ ଓ ନୃତ୍ୟ ପ୍ରତିଭାରେ ମାଧୁରୀ ଯେଭଳି ସମସ୍ତଙ୍କୁ ପ୍ରଭାବିତ କରିଛନ୍ତି ଓ ଭାରତ ସମେତ ବିଶ୍ୱରେ ନିଜର ସ୍ୱତନ୍ତ୍ର ଚାପ ଛାଡିଛନ୍ତି, ଓଡ଼ିଶାର ହସ୍ତତନ୍ତକୁ ସେମିତି ନେଇ ବିଶ୍ୱରେ ପହଂଚାଇବେ ଓ ଓଡିଶାକୁ ଏକ ମଜଭୁତ ଫ୍ୟାସନ ରାଜ୍ୟ ଭାବେ ଗଢି ତୋଳିବେ । ଉଦ୍ଘାଟନୀ ସମାରୋହରେ ଯୋଗ ଦେଇ ବଲିଉଡ ଅଭିନେତ୍ରୀ ମାଧୁରୀ ଦୀକ୍ଷିତ ଆମ ବୁଣାକାରମାନଙ୍କର ହାତ ତିଆରି ହସ୍ତତନ୍ତର ପ୍ରଚାର କରିଥିଲେ। ସେ କହିଥିଲେ, 'ଓଡିଶା କଳାର ଏହା ଏକ ଅନନ୍ୟ ନିଦର୍ଶନ । ଏହାର ପ୍ରଚାରରେ ମୁଁ ସାମିଲ ହୋଉ ଓଡିଶା ପରମ୍ପରାର ଏହି ଆତ୍ମାକୁ ଅନୁଭବ କରିଲି। ଏହାର ପ୍ରଚାର ମୋର ଏକାନ୍ତ କାମ୍ୟ । ଏହା ଓଡ଼ିଶାର ଭବିଷ୍ୟତକୁ ଆଗକୁ ନେବ। କାରଣ ଓଡିଶା ହସ୍ତତନ୍ତର ପ୍ରତିଟି ଡିଜାଇନ ଗୋଟେ ଗୋଟେ କାହାଣୀ କୁହେ, ଯାହା ସହ ମୁ ଯୋଡି ହୋଇସାରିଛି। ତେଣୁ ଏହାର ପ୍ରଚାର ପ୍ରସାରର ମୁଁ ଗୋଟେ ଭାଗ ହୋଇଥିବାରୁ ଗର୍ବିତ ।'
ଜାତୀୟ ହସ୍ତତନ୍ତ ଦିବସ ଅବସରରେ ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ ଆଜି ସ୍ଥାନୀୟ ଜନତା ମୈଦାନ ଠାରେ ଆୟୋଜିତ ହସ୍ତତନ୍ତ ମେଳା "ଏକତା" କୁ ଉଦ୍ଘାଟନ କରିଛନ୍ତି । ମୁଖ୍ୟମନ୍ତ୍ରୀ କହିଛନ୍ତି, ଆମ ହସ୍ତତନ୍ତ ହେଉଛି ଓଡ଼ିଆ ଅସ୍ମିତାର ଏକ ପ୍ରମୁଖ ସ୍ତମ୍ଭ। ଆମର 'ହସ୍ତତନ୍ତ କ୍ଷେତ୍ର' କେବଳ ଏକ ଆର୍ଥିକ ସ୍ତମ୍ଭ ନୁହେଁ ବରଂ ଏହା ଜାତୀୟ ଗର୍ବ ଓ ଗରିମାର ପ୍ରତୀକ। ପ୍ରାଚୀନ ସାମୁଦ୍ରିକ ବାଣିଜ୍ୟରୁ ଆରମ୍ଭ କରି ବର୍ତ୍ତମାନର ବିଶ୍ୱ ଫ୍ୟାଶନ୍ ପ୍ଲାଟଫର୍ମ ପର୍ଯ୍ୟନ୍ତ, ଆମର ବୟନ ସର୍ବଦା ଉତ୍କର୍ଷତା, ଆଧ୍ୟାତ୍ମିକତା ଓ ସଂସ୍କୃତିର ଜୟଗାନ କରିଆସିଛି । ହସ୍ତତନ୍ତ ଉନ୍ନୟନ ଯୋଜନା ମାଧ୍ୟମରେ ବୁଣାକାରମାନଙ୍କ ସାମାଜିକ-ଆର୍ଥିକ ଅବସ୍ଥାକୁ ଉନ୍ନତ କରିବା ପାଇଁ ସରକାରଙ୍କ ଲକ୍ଷ୍ୟ ରହିଛି ବୋଲି ମୁଖ୍ୟମନ୍ତ୍ରୀ ଏହି ଅବସରରେ କହିଛନ୍ତି। ମୁଖ୍ୟମନ୍ତ୍ରୀ କହିଛନ୍ତି, ଓଡ଼ିଆ ଅସ୍ମିତାର ପ୍ରମୁଖ ସ୍ତମ୍ଭ ହେଉଛି ହସ୍ତତନ୍ତ । ମିଶନ ମୋଡରେ ଏହାର ବିକାଶ ହେବ। ଏକ ବର୍ଷ ପାଇଁ ମାଧୁରୀ ଦୀକ୍ଷିତଙ୍କୁ ବ୍ରାଣ୍ଡ ଆମ୍ବାସାଡର ଘୋଷଣା କରି ମୁଖ୍ୟମନ୍ତ୍ରୀ କହିଛନ୍ତି, ଗ୍ଲୋବାଲ ବ୍ରାଣ୍ଡିଙ୍ଗ ସହ ବିଶ୍ୱ ବଜାରରେ ସେ ଏହାର ପ୍ରଚାର ପ୍ରସାର କରିବେ । ବିଶ୍ୱ ବଜାରରେ ବଢିବ ଓଡିଶା କାରିଗରୀର ଚାହିଦା। ଗ୍ଲୋବାଲ ବ୍ରାଣ୍ଡିଙ୍ଗ ସହ ଓଡିଶାର ହସ୍ତତନ୍ତର ପ୍ରଚାର ପ୍ରସାର ହେବ । ଐତିହ୍ୟର ସୂତ୍ରଧାର ସାଜିଥିବା ଏହି ବିଭାଗକୁ ଆଗକୁ ନେବାକୁ ଆଜିଠାରୁ ବଡ ପଦକ୍ଷେପ ନେଇଛନ୍ତି ରାଜ୍ୟ ସରକାର। ଓଡିଶା ହସ୍ତତନ୍ତ ସାମଗ୍ରୀ ର ନକଲି ସାମଗ୍ରୀ ବଜାରରେ ସ୍ୱଳ୍ପ ଦରରେ ବିକ୍ରି ହେଉଛି ବୋଲି ଅଭିଯୋଗ ଆସୁଥିବା ବେଳେ ଏନେଇ ନେଇ ବିଭାଗ ସଚେତନ ରହିଛି। ଆଗକୁ ଯେଭଳି ଏହାର ଡୁପ୍ଲିକେଶି ନ ହୁଏ ବିଭାଗୀୟ ଅଧିକାରୀ ସେ ନେଇ କାମ କରୁଛନ୍ତି। ଡୁପ୍ଲିକେଟ୍ କରୁଥିବା ଲୋକଙ୍କ ବିରୁଦ୍ଧରେ ଆବଶ୍ୟକ ପଡ଼ିଲେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଖାଲି ସେତିକି ନୁଁହେ, ଯୁବ ବୁଣାକାରମାନେ କିଭଳି ଉତ୍ସାହିତ ହେବେ ସେଥିପାଇଁ ବ୍ଲୁ ପ୍ରିଣ୍ଟ ପ୍ରସ୍ତୁତ ହେଇଥିବା କହିଛନ୍ତି ମୁଖ୍ୟମନ୍ତ୍ରୀ । ଯୁବପିଢୀଙ୍କୁ ପ୍ରୋତ୍ସାହନଠୁ ଆରମ୍ଭ କରି ପ୍ରଶିକ୍ଷଣ, ଉନ୍ନତ ଜ୍ଞାନକୌଶଳ ସହ ନୂଆ ଡ଼ିଜାଇନ ପ୍ରଶିକ୍ଷଣ ପର୍ଯ୍ୟନ୍ତ ସବୁ ପ୍ରକାର ସହାୟତା ସରକାର ଯୋଗାଇଦେବେ ଓ ଯୁବ ବୁଣାକାରଙ୍କୁ ରୋଜଗାର ଦେବେ ବୋଲି ମଧ୍ୟ ପ୍ରତିଶ୍ରତି ଦେଇଛନ୍ତି।
Education,State
କେନ୍ଦ୍ରୀୟ ବିଦ୍ୟାଳୟରେ ନାହଁନ୍ତି ଓଡ଼ିଆ ଶିକ୍ଷକ
ବ୍ରହ୍ମପୁର (୦୮-୦୮-୨୦୨୫):- ବ୍ରହ୍ମପୁର ଆମ୍ବପୁଆ ସ୍ତିତ କେନ୍ଦ୍ରୀୟ ବିଦ୍ୟାଳୟରେ ବହୁ ମାସ ହେବ ଓଡ଼ିଆ ଶିକ୍ଷକ ନାହାଁନ୍ତି l ଯାହା ଫଳରେ ଏଠି ପଢ଼ୁଥିବା ଛାତ୍ରଛାତ୍ରୀ ବିନା ଓଡ଼ିଆ ଶିକ୍ଷକରେ ୧୦୦ ମାର୍କ ପରୀକ୍ଷା ଦେଉଛନ୍ତି l ଶୁଣିଲେ ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ କଥାଟା ନିରାଟ ସତ୍ୟ l ଦୀର୍ଘ ମାସ ହେବ, ବ୍ରହ୍ମପୁର କେନ୍ଦ୍ରୀୟ ବିଦ୍ୟାଳୟରେ ଓଡ଼ିଆ ଶିକ୍ଷକର ଅଭାବ ରହିଥିବା ବେଳେ, ଅଧ୍ୟୟନରତ ଛାତ୍ରଛାତ୍ରୀ ବହୁ ଅସୁବିଧାର ସମ୍ମୁଖିନ ହେଉଛନ୍ତି l ଯାହାଫଳରେ ଅଭିଭାବକ ମହଲରେ ମଧ୍ୟ ଏକ ପ୍ରକାର ଚିନ୍ତା ଦେଖାଦେଇଛି l ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପିଲାଙ୍କ ଉଚ୍ଚ ଭବିଷ୍ୟତ ପାଇଁ ଦେଶର ପ୍ରତ୍ୟକ ରାଜ୍ୟ, ଜିଲ୍ଲା ତଥା ବ୍ଲକ କୁ ଗୋଟିଏ ଲେଖାଏଁ କେନ୍ଦ୍ରୀୟ ବିଦ୍ୟାଳୟ କରିଛନ୍ତି ଯାହା ଫଳରେ ପିଲା କମ ଖର୍ଚ୍ଚରେ ଅଧିକ ଜ୍ଞାନ ଆହରଣ କରିପାରିବେ l ହେଲେ ଏଠି ନାନାଦି ସମସ୍ୟା ଦେଖେଇ ଦେଉଛି ଏବଂ ସ୍ପଷ୍ଟ ହେଉଛି ଯେ କେନ୍ଦ୍ରୀୟ ବିଦ୍ୟାଳୟ ମଧ୍ୟ ଅବ୍ୟବସ୍ଥା ଘେରରେ ଅଛି l ପ୍ରଧାନମନ୍ତ୍ରୀ ଆହୁରି ମଧ୍ୟ ନିର୍ଦ୍ଦେଶ ଦେଇଛନ୍ତି ଯେ ବିଦ୍ୟାଳୟର ପ୍ରତ୍ୟକ ବସ ହଳଦିଆ ରଙ୍ଗର ରହିବ, ବାହାରପଟେ ଜାଲି ଲାଗିବ, ବିଦ୍ୟାଳୟ ଫୋନ ନମ୍ବର ରହିବ l କିନ୍ତୁ ସେସବୁ କୌଣସିର ସୁବିଧା ନାହିଁ ଓଲଟା ରଙ୍ଗ ବେରଙ୍ଗର ଘରୋଇ ବସର ବ୍ୟବହାର ହେଉଛି ଏଠି l ଆମେ ଏଠି କହିବାର କାରଣ ମଧ୍ୟ ଅଛି, କିଛି ଦିନ ପୂର୍ବେ ଏହି ବିଦ୍ୟାଳୟର ଛାତ୍ରୀ, ବିଦ୍ୟାଳୟ ବସରେ ବିଦ୍ୟାଳୟକୁ ଆସୁଥିବା ସମୟରେ, ବସ ର ଅନିୟନ୍ତ୍ରିତତା ଯୋଗୁଁ ଜଣେ ଶିଶୁ ଗାଡ଼ିରୁ ତଳେ ପଡିଯାଥିଲେ, ଭାଗ୍ୟ ଭଲ ଥିଲା, ମାଟି ରୋଡ଼ ଥିବାରୁ ପିଲାଟିର ଅବସ୍ଥା ଠିକ ଥିଲା ନଚେତ କ'ଣ ଯେ ହେଇଥାନ୍ତା !
ଏସବୁ ଅଭିଯୋଗ ପରେ ଓଡ଼ିଆ ଭାଷା ଆନ୍ଦୋଳନର କର୍ମକର୍ତ୍ତା ଶୁକ୍ରବାର କେନ୍ଦ୍ରୀୟ ବିଦ୍ୟାଳୟର ଅଧ୍ୟକ୍ଷଙ୍କ ସହ ଆଲୋଚନା କରିବାପାଇଁ ବିଦ୍ୟାଳୟରେ ପହଞ୍ଚିଥିଲେ କିନ୍ତୁ ଅଧ୍ୟକ୍ଷ ବ୍ୟସ୍ତ ଅଛି କହି ସାକ୍ଷାତ ଦେଇନଥିଲେ, ଯାହାଫଳରେ ଅନ୍ୟ ଏକ ଶିକ୍ଷକଙ୍କୁ ଦାବିପତ୍ର ଦେବା ସହ ଯଦି ଏକ ମାସ ଭିତରେ ଓଡ଼ିଆ ଶିକ୍ଷକ ନିଯୁକ୍ତି ନହୁଏ ତାହେଲେ ବିଦ୍ୟାଳୟ ବାହାରେ ଧାରଣା ଦେବୁ ବୋଲି ଚେତାବନୀ ଦେଇଛନ୍ତି ଓଡ଼ିଆ ଭାଷା ଆନ୍ଦୋଳନର କର୍ମକର୍ତ୍ତା ଏବଂ କହିଛନ୍ତି ଯେ, ଆଗାମୀ ଭବିଷ୍ୟତରେ ଛାତ୍ରଛାତ୍ରୀଙ୍କ ଯେ କୌଣସି ଅସୁବିଧା ହେବ, ବିଦ୍ୟାଳୟ କତୃପକ୍ଷ ଦାୟୀ ରହିବ ବୋଲି କଡ଼ା ଭାଷାରେ ବର୍ଷିଛନ୍ତି l
Shree Jagannath
ଆଜି ରକ୍ଷା ବନ୍ଧନ
ଦ କୁଇଭର ବ୍ୟୁରୋ :- ଆଜି ପବିତ୍ର ରାଖି ପୂର୍ଣ୍ଣିମା ତଥା ରକ୍ଷା ବନ୍ଧନ । ଭାଇ ହାତରେ ରାକ୍ଷୀ ବାନ୍ଧି ଶୁଭ ମନାସିବ ଭଉଣୀ । ସବୁ ଦିନ ପାଇଁ ଭାଇ ପାଖରୁ ସୁରକ୍ଷା ଲୋଡିବ । ଧାର୍ମିକ ପରମ୍ପରା ଓ ରୀତିନୀତିରେ ଏହି ରକ୍ଷା ବନ୍ଧନ ସାରା ଦେଶରେ ଧୁମଧାମରେ ପାଳିତ ହେଉଛି । ଶ୍ରୀମନ୍ଦିରରେ ମଧ୍ୟ ରକ୍ଷାବନ୍ଧନ ଓ ବଳଭଦ୍ରଙ୍କ ଜନ୍ମୋତ୍ସ ନୀତି ପାଳିତ ହେବ । ସକାଳୁ ପ୍ରଭୁଙ୍କର ଦ୍ବାରଫିଟା, ମଙ୍ଗଳ ଆଳତୀ, ଅବକାଶ ନୀତି, ଭୋଗମଣ୍ଡପ, ସର୍ବାଙ୍ଗ ନୀତି ପରେ ରାଖି ଲାଗି ହେବ । ସେହିପରି ସନ୍ଧ୍ୟାଧୁପ ପରେ ବଳଭଦ୍ର ଜନ୍ମ ନୀତି ଅନୁଷ୍ଠିତ ହେବ ।
State
ଗୋପାଳପୁର ବେଳାଭୂମି ଗଣଦୁଷ୍କର୍ମ : ମାମଲା ଉପର କୋର୍ଟକୁ ଗଲା
ଗୋପାଳପୁର ( ଦ କୁଇଭର ):- ଗୋପାଳପୁର ବେଳାଭୂମି ଗଣଦୁଷ୍କର୍ମ ମାମଲାର ବିଚାରଣା ପ୍ରକ୍ରିୟା ଖୁବ୍ଶୀଘ୍ର ଆରମ୍ଭ ହେବ। ବର୍ତ୍ତମାନ ଜେଏମ୍ଏଫ୍ସି (ଗ୍ରାମାଞ୍ଚଳ) ରିତିକା ଜେନାଙ୍କ କୋର୍ଟରେ କମିଟ୍ମେଣ୍ଟ୍ ପରେ ବିଚାରଣା ପାଇଁ ଜିଲ୍ଲା ଦୌରାଜଜ୍ କୋର୍ଟକୁ ମାମଲା ସ୍ଥାନାନ୍ତର କରାଯାଇଛି। କିଛିଦିନ ମଧ୍ୟରେ ମାମଲାର ଅଭିଯୁକ୍ତଙ୍କୁ କୋର୍ଟରେ ହାଜର କରି ଚାର୍ଜଫ୍ରେମ୍ କରାଯିବ। ଏହାପରେ ବିଚାରଣା ଆରମ୍ଭ ହେବ ବୋଲି ସୂଚନା ମିଳିଛି। ସେହିପରି ଚାର୍ଜସିଟ୍ରୁ ବାଦ୍ ପଡ଼ିଥିବା ଅଭିଯୁକ୍ତର ନାଁ ମାମଲାରୁ କାଟିବା ପାଇଁ ଦାଖଲ ହୋଇଥିବା ଡିସ୍ଚାର୍ଜ ପିଟିସନ୍କୁ ଜେଏମ୍ଏଫ୍ସି ଖାରଜ କରିଛନ୍ତି। ଏହି ପିଟିସନ୍ର ଶୁଣାଣି ବେଳେ ଜେଏମ୍ଏଫ୍ସି କୋର୍ଟର ଏପିପି ଆଲୋକ କଦମ ମାମଲାରୁ ଅଭିଯୁକ୍ତର ନାଁ କାଟିବାକୁ ଦୃଢ଼ ବିରୋଧ କରିବା ସହିତ ବଳିଷ୍ଠ ଯୁକ୍ତି ଉପସ୍ଥାପନ କରିଥିଲେ। ଏଣୁ ସେହି ପିଟିସନ୍ ଖାରଜ ହୋଇଛି। ଗଞ୍ଜାମ ଜିଲ୍ଲା ଗୋପାଳପୁର ବେଳାଭୂମିରେ ଗତ ଜୁନ୍ ୧୫ ତାରିଖ ସଂଧ୍ୟାରେ ଜଣେ ଯୁକ୍ତତିନି ଶେଷବର୍ଷ ଛାତ୍ରୀଙ୍କୁ ତାଙ୍କ ପୁରୁଷ ବନ୍ଧୁଙ୍କ ଉପସ୍ଥିତିରେ ଗଣଦୁଷ୍କର୍ମ ହୋଇଥିଲା। ଏହି ଘଟଣାରେ ଗୋପାଳପୁର ଥାନା ପୁଲିସ ଘଟଣା ରାତିରେ ହିଁ ପୁଲିସ ବିଭିନ୍ନ ସ୍ଥାନରେ ଚଢ଼ଉ କରି ୬ଜଣ ଯୁବକଙ୍କୁ ଧରିଥିଲା। ପରବର୍ତ୍ତୀ ସମୟରେ ପୁଲିସ ଅନ୍ୟ ୪ଜଣ ନାବାଳକଙ୍କୁ ମଧ୍ୟ କାବୁ କରିଥିଲା। ୧୭ତାରିଖରେ ରାଜ୍ୟ ସରକାର ଏହି ମାମଲାର ତଦନ୍ତଭାର କ୍ରାଇମ୍ବ୍ରାଞ୍ଚକୁ ହସ୍ତାନ୍ତର କରିଥିଲେ। କ୍ରାଇମ୍ବ୍ରାଞ୍ଚ ୫ଜଣ ଯୁବକ ଓ ୪ଜଣ ନାବାଳକଙ୍କ ବିରୋଧରେ ଜୁଲାଇ ୨୮ତାରିଖରେ ଚାର୍ଜସିଟ୍ ଦାଖଲ କରିଥିଲା। କିନ୍ତୁ ଜଣେ ଅଭିଯୁକ୍ତ ବିରୋଧରେ ଚାର୍ଜସିଟ୍ ଦାଖଲ ହୋଇ ନଥିଲା।
State
ଛତ୍ରପୁର ଜାତୀୟ ରାଜପଥ ନିକଟରେ ଟ୍ରକରେ ଲାଗିଲା ନିଆଁ
ଛତ୍ରପୁର( ଦ କୁଇଭର ):- ଛତ୍ରପୁର ଜାତୀୟ ରାଜପଥ ନିକଟରେ ଟ୍ରକରେ ଲାଗିଲା ନିଆଁ l ଟ୍ରକରେ ଥିବା ୩୦ରୁ ଉର୍ଦ୍ଧ୍ବ ବ୍ୟାଟେରୀ ସ୍କୁଟି ଜଳିଯାଇଥିବା ସୂଚନା । ଗାଡିରେ ସର୍ଟ ସର୍କିଟ ପାଇଁ ନିଆଁ ଲାଗିଥିବା ଅନୁମାନ କରାଯାଉଛି। ଦିଲ୍ଲୀରୁ ଆନ୍ଧ୍ରପ୍ରଦେଶ ସମପେଣ୍ଡାକୁ ଗାଡି ନିଆଯାଉଥିବା ସୂଚନା।
ପ୍ରାୟ ଏକ ଘଣ୍ଟା ପରେ ନିଆଁକୁ ଆୟତ କଲେ ଦମକଳ ବାହିନୀ।ଛତ୍ରପୁର ଜାତୀୟ ରାଜପଥ ନିକଟରେ OLA ମୋଟର ସାଇକେଲ ବୋଝେଇ ଟ୍ରକ ରେ ଲାଗିଲା ନିଆଁ ଏହି OLA ମୋଟର ସାଇକେଲ ରୁ ନିଆଁ ବାହାରି ସମ୍ପୁର୍ଣ୍ଣ ଟ୍ରକ ଟି ଜଳିଯାଇଥିବା ଦେଖିବାକୁ ମିଳିଛି l
State
ବ୍ରହ୍ମପୁରରେ ଧର୍ମେନ୍ଦ୍ର ପ୍ରଧାନ
ବ୍ରହ୍ମପୁର( ଦ କୁଇଭର ):- ଦୁଇ ଦିନିଆ ଗଞ୍ଜାମ ଗସ୍ତରେ ଆସିଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଆଜି ବ୍ରହ୍ମପୁରରେ ପହଞ୍ଚିବା ପରେ ପ୍ରଥମେ ସହରର ଅଧିଷ୍ଠାତ୍ରୀ ଦେବୀ ମାଁ ବୁଢ଼ୀ ଠାକୁରାଣୀଙ୍କ ମନ୍ଦିରରେ ପହଞ୍ଚିଥିଲେ । ମାଙ୍କୁ ଦର୍ଶନ କରିବା ସହ ଧୂପଦୀପ ଦେଇ ପୂଜାର୍ଚ୍ଚନା କରିଥିଲେ । ଏହାପରେ ମନ୍ଦିରରେ ଚାଲିଥିବା ବିକାଶ ମୂଳକ କାର୍ଯ୍ୟକୁ ବୁଲି ଦେଖିଥିଲେ । ଏହାପରେ ମନ୍ଦିରର ପୂଜକ ମାନଙ୍କ ସହ ମନ୍ଦିରର କାର୍ଯ୍ୟକୁ ନେଇ ଆଲୋଚନା କରିଥିଲେ । ଦୀର୍ଘ ଦିନ ପରେ ମାଁ ବୁଢ଼ୀ ଠାକୁରାଣୀଙ୍କ ଦର୍ଶନ କରି ବେଶ ଆତ୍ମତୃପ୍ତି ଲାଗିଛି ।ମନ୍ଦିରର ଉନ୍ନୟନମୂଳକ କାର୍ଯ୍ୟ ମଧ୍ୟ ବେଶ ଜୋରସୋରରେ ଚାଲିଛି । ମନ୍ଦିରର କାର୍ଯ୍ୟ ଶେଷ ହେବା ପରେ ମନ୍ଦିରର ନୂଆ ରୂପ ଦେଖିବା ନିମନ୍ତେ ଭକ୍ତଙ୍କ ଆହୁରି ଭିଡ଼ ଲାଗିବ । ରାଜ୍ୟ ସରକାର ମଧ୍ୟ ମନ୍ଦିରର ଉନ୍ନତି ନିମନ୍ତେ ଆବଶ୍ୟକୀୟ ଅନୁଦାନ ଦେଇଥିବା ବେଳେ ତାହା ବର୍ତମାନ ପ୍ରତିପାଦିତ ହୋଇଛି ବୋଲି କହିଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଧର୍ମେନ୍ଦ୍ର ପ୍ରଧାନଙ୍କ ସହ ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ, ବ୍ରହ୍ମପୁର ସାଂସଦ ପ୍ରଦୀପ କୁମାର ପାଣିଗ୍ରାହୀ, ବ୍ରହ୍ମପୁର ବିଧାୟକ କେ.ଅନୀଲ କୁମାରଙ୍କ ସହ ଜିଲ୍ଲାର ବହୁ ବିଧାୟକ ମାନେ ଉପସ୍ଥିତ ଥିଲେ ।
ବାଇଟ୍- ଧର୍ମେନ୍ଦ୍ର ପ୍ରଧାନ, କେନ୍ଦ୍ର ଶିକ୍ଷାମନ୍ତ୍ରୀ
Politics,District
ନବରଂଗପୁରରେ ୧୨ ଘଣ୍ଟା ବନ୍ଦର ଡାକରା ଦେଲା ବିଜେଡି
ନବରଙ୍ଗପୁର( ଦ କୁଇଭର ):- ରାଇଘର ଡୁମରିମୁଣ୍ଡା ନର୍ସିଂ ଛାତ୍ରୀର ମୃତ୍ୟୁ ମାମଲାକୁ ବିଜୁ ଜନତା ଦଳ (ବିଜେଡି) ତୀବ୍ର ନିନ୍ଦା କରିଛି। ରାଜ୍ୟ ସରକାର ଓଡ଼ିଶାରେ ନାରୀକୁ ସୁରକ୍ଷା ଦେବାରେ ସମ୍ପୂର୍ଣ୍ଣ ବିଫଳ ହୋଇଛି ହୋଇଛି ବୋଲି କହିଛି। ନର୍ସିଂ ଛାତ୍ରୀ ମୃତ୍ୟୁ ମାମଲାରେ ସୋମବାର ଦିନ ନବରଂଗପୁର ଜିଲ୍ଲାରେ ୧୨ ଘଣ୍ଟା ବନ୍ଦ ଡାକରା ଦେଇଛି। ଫଳରେ ଜରୁରୀକାଳୀନ ସେବା ବ୍ୟତୀତ ସରକାରୀ ଏବଂ ବେସରକାରୀ ଅନୁଷ୍ଠାନ, ଦୋକାନ, ବଜାର, ସ୍କୁଲ୍ କଲେଜ୍, ଯାନବାହନ ସମ୍ପୂର୍ଣ୍ଣ ବନ୍ଦ ରହିବ। ନବରଂଗପୁର ବିଜେଡି ପକ୍ଷରୁ ସାମ୍ବାଦିକ ସମ୍ମିଳନୀରେ କୁହାଯାଇଛି ଯେ, ମହିଳା ଏବଂ ଶିଶୁ ବିକାଶ ମନ୍ତ୍ରୀ ତଥା ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ଇସ୍ତଫା ଦିଅନ୍ତୁ। ତା’ ସହିତ ସରକାର ରାଇଘର ନର୍ସିଂ ପୀଡ଼ିତାଙ୍କୁ ୧ କୋଟି ଟଙ୍କା କ୍ଷତିପୂରଣ ଦିଅନ୍ତୁ। ବିଜେଡି କହିଛି ଯେ, ଯେତେ ଦିନ ପର୍ଯ୍ୟନ୍ତ ଏହି ରାଜ୍ୟର ନାରୀ, ଛାତ୍ରୀ, ନାବାଳିକା ସୁରକ୍ଷିତ ହେବେ ନାହିଁ, ବିଜେଡି ସେମାନଙ୍କୁ ସୁରକ୍ଷା ଦେବା ପାଇଁ ସାରା ରାଜ୍ୟରେ ଆନ୍ଦୋଳନକୁ ବ୍ୟାପକ କରିବ। ନବରଙ୍ଗପୁର ଜିଲ୍ଲାବାସୀ ଏବଂ ରାଇଘରବାସୀଙ୍କୁ ବିଜେଡି ତରଫରୁ ଅନୁରୋଧ କରାଯାଉଛି କି ଆସନ୍ତାକାଲି ୧୨ ଘଣ୍ଟା ବନ୍ଦକୁ ସମ୍ପୂର୍ଣ୍ଣ ସହଯୋଗ କରନ୍ତୁ। ସରକାରୀ ଏବଂ ବେସରକାରୀ ଅନୁଷ୍ଠାନ, ଦୋକାନ, ବଜାର, ସ୍କୁଲ୍ କଲେଜ୍, ଯାନବାହନ ସମ୍ପୂର୍ଣ୍ଣ ବନ୍ଦ ରହିବ। ଜରୁରୀକାଳୀନ ସେବା ଯେପରିକି ‘ଅଗ୍ନିଶମ ସେବା, ଆମ୍ବୁଲାନ୍ସ୍ ସେବା ବନ୍ଦ ହେବ ନାହିଁ। ସୂଚନାଯୋଗ୍ୟ, ଛାତ୍ରୀ ଜଣକ ଗତମାସ ୧୩ ତାରିଖ ଦିନ ବଜାରକୁ ସଉଦା କିଣିବାକୁ ଯାଇଥିଲେ। ଏହି ସମୟରେ ଏକତରଫା ଭଲ ପାଉଥିବା ଅଭିଯୁକ୍ତ ସତ୍ୟଜିତ ସରକାର ସେଠାରେ ପହଞ୍ଚି ପୀଡ଼ିତାଙ୍କୁ ରାଜରାସ୍ତାରେ ମାରପିଟ କରିଥିଲାl ଆକ୍ରମଣର ଶିକାର ପୀଡ଼ିତାଙ୍କ ଆଖି ଓ ମୁହଁ ଫୁଲି ଯାଇଥିଲା। ରକ୍ତାକ୍ତ ଅବସ୍ଥାରେ ସେ ଥାନାରେ ପହଞ୍ଚି ଅଭିଯୋଗ କରିଥିଲେl ପୁଲିସ ସତ୍ୟଜିତକୁ ଅଟକ ରଖି ସର୍ତ୍ତମୂଳକ ଭାବରେ ଛାଡ଼ି ଦେଇଥିଲାl ଏଥିରେ ସେ ପ୍ରତିଶୋଧ ପରାୟଣ ହୋଇ ପୀଡିତା ଓ ତାଙ୍କ ପୁରୁଷ ବନ୍ଧୁଙ୍କ କିଛି ଫୋଟ ଓ ଭିଡିଓ ସୋସିଆଲ ମିଡ଼ିଆରେ ଭାଇରଲ କରିଥିଲା।
ନଜ ଫଟୋ ଓ ଭିଡିଓ ସାମାଜିକ ଗଣମାଧ୍ୟମରେ ଭାଇରାଲ ହେଲା ପରେ ପୀଡିତା ଲୋକାଲଜ୍ୟା ସହି ନପାରି ଜୁଲାଇ ୧୭ ତାରିଖରେ ଘାସମରା ଔଷଧ (ବିଷ) ଖାଇ ଆତ୍ମହତ୍ୟା ଉଦ୍ୟମ କରିଥିଲେl ଘରଲୋକ ଜାଣିପାରି ତାଙ୍କୁ ଉମରକୋଟ ମେଡିକାଲକୁ ନେଇ ଭର୍ତ୍ତି କରିଥିଲେ। ଅବସ୍ଥା ଗୁରୁତର ଥିବାରୁ ତାଙ୍କୁ କୋଣ୍ଡାଗାଁ ଓ ପରେ ରାୟପୁରକୁ ନେଇ ଯାଇଥିଲେl କିନ୍ତୁ ସ୍ୱାସ୍ଥ୍ୟବସ୍ଥାରେ କୌଣସି ଉନ୍ନତି ନହେବା ସହ ଡାକ୍ତର ହାତ ଟେକି ଦେଇ ଘରକୁ ନେଇ ଯିବାକୁ କହିଥିଲେl ଫଳରେ ଗତ ଜୁଲାଇ ୨୧ରେ ପରିବାର ଲୋକେ ପୀଡିତାଙ୍କୁ ଘରକୁ ନେଇ ଯାଇଥିଲେl ସେହି ଦିନ ଠାରୁ ପୀଡିତା ଘରେ ମରଣ ସହ ସଂଗ୍ରାମ କରି ଆସୁଥିବା ବେଳେ ରାଇଘର ଥାନାରେ ପୀଡିତାଙ୍କ ଦାଦା ଏକ ଲିଖିତ ଅଭିଯୋଗ କରିବା ପରେ ପୁଲିସ ପୀଡିତାଙ୍କ ବୟାନ ନେଇଥିଲା। ପ୍ରଶାସନ ପକ୍ଷରୁ ତତ୍ପରତା ପ୍ରକାଶ କରି ପୀଡ଼ିତାଙ୍କୁ ପ୍ରଥମେ ଉମରକୋଟ ଓ ପରେ ନବରଙ୍ଗପୁର ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ସେଠାରୁ ତାଙ୍କୁ ସ୍ଥାନାନ୍ତରିତ କରାଯାଇ ଭୁବନେଶ୍ୱର ଏମ୍ସରେ ଭର୍ତ୍ତି କରାଯାଇଥିଲା। ପୁଲିସ ଏହି ମାମଲାରେ ୨ଜଣ ଅଭିଯୁକ୍ତଙ୍କୁ ଗିରଫ କରିଛି।
Sports
ଆଜି ବିଶ୍ୱ କଣ୍ଟିନେଣ୍ଟାଲ ଆଥଲେଟିକ୍ସ ବ୍ରୋଞ୍ଜ ଲେବୁଲ ଚମ୍ପିୟନସିପ୍
ଦ କୁଇଭର ବ୍ୟୁରୋ :- ଆଜି ଭୁବନେଶ୍ବର କଳିଙ୍ଗ ଷ୍ଟାଡିୟମରେ ୱାର୍ଲଡ଼ କଣ୍ଟିନେଣ୍ଟାଲ ଆଥଲେଟିକ୍ସ ବ୍ରୋଞ୍ଜ ଲେବୁଲ ଚାମ୍ପିୟାନସିପ। ଗୋଟିଏ ଗ୍ରାଉଣ୍ଡରେ ଏକାଠି ହେବେ ୧୭ଟି ଦେଶର ୧୬୦ ପୁରୁଷ ଓ ମହିଳା ଆଥଲେଟ୍ । ଅଲିମ୍ପିଆନ ଶ୍ରାବଣୀ ନନ୍ଦ, ପ୍ରଜ୍ଞା ପାରମିତା, ଲାଲୁ ପ୍ରସାଦ ଭୋଇ ଓ ଅନିମେଷ କୁଜୁର ଏହି ଅନ୍ତର୍ଜାତୀୟ ଇଭେଣ୍ଟରେ ଓଡ଼ିଶା ପକ୍ଷରୁ ପ୍ରତିନିଧିତ୍ବ କରିବେ । ମୋଟ ୧୮ଟି ଇଭେଣ୍ଟରେ ହେବ ପ୍ରତିଦ୍ବନ୍ଦ୍ବିତା । ୨୦୧୭ ଏସିଆନ ଆଥଲେଟିକ୍ସର ସଫଳ ଆୟୋଜନ ପରେ ଓଡିଶାରେ ଟ୍ରାକ ଆଣ୍ଡ ଫିଲଡର ଏହା ଦ୍ଵିତୀୟ ଅନ୍ତର୍ଜାତୀୟ ପ୍ରତିଯୋଗିତା । ୯୩ଜଣ ଭାରତୀୟ ଆଥଲେଟ ବିଭିନ୍ନ ଇଭେଣ୍ଟରେ ଭାଗ ନେଇଛନ୍ତି । ଆଥଲେଟଙ୍କ ପାଇଁ ଏହି ଚାମ୍ପିୟାନସିପ ବେଶ ଗୁରୁତ୍ୱପୂର୍ଣ୍ଣ। ଭଲ ପ୍ରଦର୍ଶନ କଲେ ବିଶ୍ୱ ଚାମ୍ପିୟାନସିପ ପାଇଁ ଯୋଗ୍ୟତା ହାସଲ କରିବେ ଖେଳାଳି। ତେଣୁ ଭଲ ଟାଇମିଂ କରି କ୍ୟାରିୟରରେ ଅଧିକ ପଏଣ୍ଟ ଯୋଡିବାକୁ ଲକ୍ଷ୍ୟ ରଖିଛନ୍ତି ଆଥଲେଟ। କେବଳ ଆଥଲେଟ ନୁହଁନ୍ତି କଳିଙ୍ଗ ଷ୍ଟାଡିୟମରେ ପୁଣି ଏକ ସଫଳ ଆଥଲେଟିକ୍ସ ଚାମ୍ପିୟାନସିପ ଆୟୋଜନ ନେଇ ଆଶାବାଦୀ ଆଥଲେଟିକ୍ସ ଫେଡରେସନ ଅଫ ଇଣ୍ଡିଆ।
International,State
ଆଉ ଆମେରିକା ଯିବନି ଓଡ଼ିଶା ଚିଙ୍ଗୁଡ଼ି
ଦ କୁଇଭର ବ୍ୟୁରୋ :- ଆଉ ଓଡ଼ିଶା ଚିଙ୍ଗୁଡି ଯିବନି ଆମେରିକା । ବନ୍ଦ ହେବ ସି ଫୁଟ୍ ରପ୍ତାନୀ । ଓଡ଼ିଶାରେ ଟ୍ରମ୍ପ ଟାରିଫ ପ୍ରଭାବ। ରାଜ୍ୟର ସି ଫୁଡ୍ ସେକ୍ଟର ଭୟଙ୍କର ପ୍ରଭାବିତ ହେବାକୁ ଯାଉଛି । ଏହା କହିଛନ୍ତି ଶିଳ୍ପପତି ତାରା ପଟ୍ଟନାୟକ। ଆମେରିକା ୨୫ ପ୍ରତିଶତ ଟାରିଫ ସହ ଅତିରିକ୍ତ ୨୫ ପ୍ରତିଶତ ପେନାଲ୍ଟି ଟାରିଫ ଲଗାଇଛି ।ଏହା ସହ ଅନ୍ୟାନ୍ୟ ଟିକସ ମିଶାଇଲେ ପ୍ରାୟ ୬୦ ପ୍ରତିଶତ ଶୁଳ୍କ ଲାଗିବ। ଯାହା ଫଳରେ ଓଡ଼ିଶାର ସାମୁଦ୍ରିକ ଉତ୍ପାଦ ମହଙ୍ଗା ହେବ ଏବଂ ଆଉ ରପ୍ତାନୀ ହେବ ନାହିଁ। ଶିଳ୍ପପତି ତାରା ପଟ୍ଟନାୟକ କହିଛନ୍ତି, ୨୫ ପ୍ରତିଶତ ଟାରିଫ ଲାଗିବା ପରେ ଆମେରିକାକୁ ରପ୍ତାନୀ ଏକପ୍ରକାର ଅସମ୍ଭବ ଥିଲା ।ଏଭଳିସ୍ଥିତିରେ ବ୍ୟବସାୟ କରିବା ଅସମ୍ଭବ । ଭାରତରୁ ସି ଫୁଡ୍ ମହଙ୍ଗା ହେଲେ ଆମେରିକା ଇକ୍ୟୁଡର, ଇଣ୍ଡୋନେସିଆ ଏବଂ ଭିଏତନାମରୁ ଶସ୍ତାରେ ସି ଫୁଡ୍ ଆମଦାନୀ କରିବ। ସେହି ଦେଶଗୁଡିକ ଉପରେ ଟାରିଫ କମ୍ ରହିଛି । ତେଣୁ ସେହି ଦେଶଗୁଡିକ ସହ ଭାରତ ଆଦୌ ପ୍ରତିଯୋଗିତା କରିପାରିବ ନାହିଁ ।ବର୍ତ୍ତମାନ ଓଡ଼ିଶାରୁ ବାର୍ଷିକ ୨୨ ହଜାର କୋଟି ଟଙ୍କାର ଚିଙ୍ଗୁଡି ଆମେରିକାକୁ ଯାଉଛି । ଓଡ଼ିଶାର ପ୍ରାୟ ୧୫ରୁ ୨୦ ଲକ୍ଷ ଚାଷୀ ଚିଙ୍ଗୁଡି ରପ୍ତାନୀ ଉପରେ ନିର୍ଭର କରନ୍ତି । ଏବେ ଆମେରିକାକୁ ଭାରତର ସି ଫୁଡ୍ ରପ୍ତାନୀ ଏକ ପ୍ରକାର ବନ୍ଦ ହୋଇଯିବ। ଏହା ଦ୍ଵାରା ଓଡ଼ିଶା ଚିଙ୍ଗୁଡି ଚାଷୀଙ୍କଠାରୁ ଆରମ୍ଭ କରି ଚିଙ୍ଗୁଡି ବ୍ୟବସାୟୀ ବହୁଳ ଭାବେ ପ୍ରଭାବିତ ହେବେ ବୋଲି କହିଛନ୍ତି ଶିଳ୍ପପତି ତାରା ପଟ୍ଟନାୟକ ।