ଗୋପାଳପୁର( ଦ କୁଇଭର ):- କାର୍ତ୍ତିକ ପୂର୍ଣ୍ଣିମାକୁ ନେଇ ଆଜି ଗୋପାଳପୁର ସମୁଦ୍ର ବେଳାଭୂମିରେ ଭୋରରୁ ଲାଗିଥିଲା ଲୋକଙ୍କ ଭିଡ଼ । କାର୍ତ୍ତିକ ଏକ ମାସ ଧରି ସାତ୍ତ୍ୱିକ ଭୋଜନ ଖାଇ ବ୍ରତ ରଖିଥିବା ବେଳେ ଆଜି ସମୁଦ୍ର ବେଳାଭୂମିରେ ଲକ୍ଷ୍ମୀ ନାରାୟଣ ଓ ରାଧାକୃଷ୍ଣଙ୍କୁ ପୂଜାର୍ଚ୍ଚନା କରି ସୂର୍ଯ୍ୟଙ୍କୁ ଦର୍ଶନ କରି ବ୍ରତକୁ ଉଦଯାପିତ କରିଛନ୍ତି । ଏହାପରେ ସମୁଦ୍ରରେ ଡଙ୍ଗା ଭସାଇ ବାଣ ମଧ୍ୟ ଫୁଟାଇଥିଲେ । ସେପଟେ ଚଳିତବର୍ଷ ବେଶ ଆଡମ୍ବର ସହକାରେ ଜିଲ୍ଲା ପ୍ରଶାସନ ପକ୍ଷରୁ ବୋଇତ ବନ୍ଧାଣ ଉତ୍ସବ ପାଳିତ ହୋଇଥିଲା । ଏଥିରେ ମୁଖ୍ୟ ଅତିଥି ଭାବେ ଗଞ୍ଜାମ ଜିଲ୍ଲାପାଳ ଭି.କୀର୍ତ୍ତି ଭାସନଙ୍କ ସହ ବ୍ରହ୍ମପୁର ଏସପି ଏବଂ ବହୁ ଜିଲ୍ଲା ପ୍ରଶାସନର ଅଧିକାରୀମାନେ ଯୋଗ ଦେଇ ନୈବାଣିଜ୍ୟର ସେହି ପୁରାତନ ପରମ୍ପରାକୁ ସମସ୍ତେ ମନେ ପକାଇଥିଲେ ।
ଆକାମାବୈ ପାନଗୁଆ ଥୋଇ, ପାନଗୁଆ ତର ମାସକ ଧର୍ମ ମୋର । ଏଭଳି ପାରମ୍ପରିକ ଗୀତରେ ପ୍ରକମ୍ପିତ ହୋଇ ଉଠିଥିଲା ଆଜି ଗୋପାଳପୁର ସମୁଦ୍ର ବେଳାଭୂମି । କାର୍ତ୍ତିକ ପୂର୍ଣ୍ଣମୀ ଅବସରରେ ଭୋର ୩ଟାରୁ ଗୋପାଳପୁର ସମୁଦ୍ର ବେଳାଭୂମିରେ ଆରମ୍ଭ ହୋଇଥିଲା ଭକ୍ତଙ୍କ ଭିଡ଼ । ବିଶେଷ କରି ମହିଳା ମାନେ ଏକ ମାସ ଧରି କାର୍ତ୍ତିକ ବ୍ରତ ପାଳନ କରୁଥିବା ବେଳେ ବ୍ରତକୁ ଆଜି ଉଦଯାପିତ କରିଛନ୍ତି । ଭୋରରୁ ବେଳାଭୂମିରେ ପହଞ୍ଚିବା ପରେ ବାଲିରେ ଲକ୍ଷ୍ମୀ ନାରାୟଣ ଓ ରାଧାକୃଷ୍ଣଙ୍କୁ ସ୍ଥାପନ କରି ପୂଜାର୍ଚ୍ଚନା କରିଥିଲେ । ଏହାପରେ କଦଳୀ ପଟୁଆରେ ଡଙ୍ଗା କରି ତାହାକୁ ସମୁଦ୍ରରେ ଭସାଇବା ସହ ବାଣ ଫୁଟାଇଥିଲେ । ଶେଷରେ ସୂର୍ଯ୍ୟଙ୍କୁ ଦର୍ଶନ କରି ଫେରିଥିଲେ ଶ୍ରଦ୍ଧାଳୁମାନେ । ଆଜିର ଦିନରେ ପୌରାଣିକ ନୈବାଣିଜ୍ୟର ପରମ୍ପରାକୁ ସମସ୍ତେ ମନେ ପକାଇଥିଲେ । ଦୀର୍ଘ ବର୍ଷ ଧରି ଏଭଳି କାର୍ତ୍ତିକ ବ୍ରତ ପାଳନ କରୁଥିବା ବେଳେ ଚଳିତ ବର୍ଷ ସେହି ନିଷ୍ଠାର ସହ ବ୍ରତ ପାଳନ କରି ବେଶ ଆନନ୍ଦିତ ଲାଗିଥିବା କହିଛନ୍ତି ଶ୍ରଦ୍ଧାଳୁ ।
ଚଳିତ ବର୍ଷ ବେଶ ଆଡ଼ମ୍ବର ସହକାରେ ଜିଲ୍ଲା ପ୍ରଶାସନ ପକ୍ଷରୁ ଗୋପାଳପୁର ସମୁଦ୍ର ବେଳାଭୂମିରେ ବୋଇତ ବନ୍ଧାଣ ଉତ୍ସବ ପାଳିତ ହୋଇଯାଇଛି । ଏଥିରେ ମୁଖ୍ୟ ଅତିଥି ଭାବେ ଗଞ୍ଜାମ ଜିଲ୍ଲାପାଳ ଭି.କୀର୍ତ୍ତୀ ଭାସନ ଯୋଗ ଦେଇଥିଲେ । ଗୋପାଳପୁର କଲେଜର ଛାତ୍ରୀମାନଙ୍କୁ ନେଇ ସାଧବ ମାନେ କିଭଳି ପୂର୍ବରୁ ନୌବାଣିଜ୍ୟ କରୁଥିଲେ ତାହାକୁ ସୁନ୍ଦର ନାଟକ ମାଧ୍ୟମରେ ପ୍ରଦର୍ଶନ କରାଯାଇଥିଲା । ଛାତ୍ରୀ ମାନେ ସାଧବ ବେଶରେ ସଜ୍ଜିତ ହୋଇଥିବା ବେଳେ ତାଙ୍କୁ ସେମାନଙ୍କ ପତ୍ନୀ ମାନେ ବନ୍ଧାପନା କରିବା ପରେ ଡଙ୍ଗାରେ ନୌବାଣିଜ୍ୟ ନିମନ୍ତେ ବାହାରିଥିଲେ । ଏହାପରେ ଜିଲ୍ଲାପାଳଙ୍କ ସହ ବ୍ରହ୍ମପୁର ଏସପି, ବିଇଏମସି କମିଶନରଙ୍କ ସହ ଉପସ୍ଥିତ ଅନ୍ୟ ଅତିଥି ମାନେ ମଧ୍ୟ ଡଙ୍ଗାରେ କିଭଳି ନୌବାଣିଜ୍ୟର ହେଉଥିଲା ସେ ନେଇ ମଧ୍ୟ ଡଙ୍ଗାରେ ବୁଲି ଦେଖିଥିଲେ । ନୌବାଣିଜ୍ୟର କରି ଫେରିବା ପରେ ସାଧବ ପୁଅ ମାନଙ୍କୁ ସେମାନଙ୍କ ବୋହୁ ମାନେ ବନ୍ଧାପନା କରି ପାଛୋଟି ନେଇଥିଲେ । ଏହାପରେ ନୌବାଣିଜ୍ୟର ପରମ୍ପରାକୁ ନେଇ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହୋଇଥିଲା । ଜିଲ୍ଲା ପ୍ରଶାସନ ପକ୍ଷରୁ ଚଳିତଥର ତିନି ଦିନ ଧରି ବୋଇତ ବନ୍ଧାଣ ଉତ୍ସବ ପାଳନ ହେବା ସହ ପଲ୍ଲୀଶ୍ରୀ ମେଳା ଆୟୋଜନ କରାଯାଇଛି । ସେପଟେ କିଭଳି ଶାନ୍ତି ଶୃଙ୍ଖଳାର ସହ ତିନି ଦିନ ଧରି କିଭଳି ଉତ୍ସବ ପାଳନ ହେବ ସେ ନେଇ ପୋଲିସ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିବା ସୂଚନା ଦେଇଛନ୍ତି ବ୍ରହ୍ମପୁର ଏସପି ।
ଆଜି କାର୍ତ୍ତିକ ପୂର୍ଣ୍ଣିମା ଯୋଗୁଁ ଗୋପାଳପୁର ସମୁଦ୍ର ବେଳାଭୂମିରେ ଭୋରରୁ ଶ୍ରଦ୍ଧାଳୁଙ୍କ ଭିଡ଼ ଲାଗିଥିବା ଯୋଗୁଁ କୌଣସି ଅଘଟଣ ନ ଘଟେ ସେ ନେଇ ଲାଇଫ ଗାର୍ଡ, ଓଡ୍ରାଫ ଟିମର ବହୁ କର୍ମଚାରୀ ମାନେ ବେଳାଭୂମିରେ ମୁତୟନ ହୋଇଥିଲେ ।
