ଭୀମକୁଣ୍ଡ ଠାରେ ହଜାର ହଜାର ଆଦିବାସୀ ସାନ୍ତାଳିଙ୍କ ଅସ୍ତି ବିସର୍ଜନ

ଦ କୁଇଭର ବ୍ୟୁରୋ :- ରାଜ୍ୟର ଆଇନଶୃଙ୍ଖଳା ପରିସ୍ଥିତି ଉପରେ ଏକ ଉଚ୍ଚସ୍ତରୀୟ ବୈଠକ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ଲୋକସେବା ଭବନରେ ଅନୁଷ୍ଠିତ ହୋଇଯାଇଛି । ଆଇନଶୃଙ୍ଖଳା ପରିସ୍ଥିତି ଏବଂ ପୁଲିସ ବିଭାଗରେ ରହିଥିବା ବିଭିନ୍ନ ସମସ୍ୟାର ସମାଧାନ ସମ୍ପର୍କରେ ଆଲୋଚନା ହୋଇଥିଲା। ଓଡ଼ିଶା ପୁଲିସ ପାଇଁ ଥିବା ତିନିଟି ପ୍ରମୁଖ ଆହ୍ୱାନ ସଡ଼କ ଦୁର୍ଘଟଣା କମ୍ କରିବା, ସାଇବର ଅପରାଧ ଏବଂ ଗଞ୍ଜେଇ ଚାଷକୁ ରୋକିବା ଦିଗରେ ଆଲୋଚନା ହୋଇଥିଲା। ରାଜ୍ୟରେ ବର୍ତ୍ତମାନ ୨୧୯୮ ଜଣ ଟ୍ରାଫିକ ପୁଲିସ କାର୍ଯ୍ୟରତ ଅଛନ୍ତି। ସଡ଼କ ସୁରକ୍ଷା କ୍ଷେତ୍ରରେ ପ୍ରମୁଖ ଭୂମିକା ନେଉଥିବା ଟ୍ରାଫିକ୍ ବ୍ୟବସ୍ଥା ପାଇଁ ଚଳିତ ବର୍ଷ ଆଉ ୨୦୦୦ ନୂତନ ପଦବି ସୃଷ୍ଟି କରି ସେଗୁଡ଼ିକୁ ସମ୍ପୂର୍ଣ୍ଣ ସ୍ୱଚ୍ଛତାର ସହ ପୂରଣ କରିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଥିଲେ। ସେହିପରି ରାଜ୍ୟରେ ୨୦୨୪ରେ ୨୬୩୩ଟି ସାଇବର ଅପରାଧ ମାମଲା ରୁଜୁ ହୋଇଛି। ସାଇବର ଅପରାଧ ନିୟନ୍ତ୍ରଣ ପାଇଁ ରାଜ୍ୟରେ ବର୍ତ୍ତମାନ ୧୪ଟି ଥାନା କାର୍ଯ୍ୟରତ ଅଛି। ସାଇବର ଠକେଇରେ ସାଧାରଣ ଲୋକମାନେ ବହୁତ କ୍ଷତିଗ୍ରସ୍ତ ହେଉଛନ୍ତି। ଏହାକୁ ଦୃଷ୍ଟିରେ ରଖି ରାଜ୍ୟର ସମସ୍ତ ଜିଲ୍ଲାରେ ସାଇବର ଥାନା କାର୍ଯ୍ୟକ୍ଷମ କରିବା ପାଇଁ ଆଉ ୨୦ଟି ନୂତନ ସାଇବର ଥାନା ଖୋଲିବା ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଥିଲେ। ଏଥିସହିତ ପୂର୍ବରୁ କାର୍ଯ୍ୟକ୍ଷମ ଥିବା ଥାନାଗୁଡ଼ିକୁ ଅଧିକ ସୁଦୃଢ଼ କରିବା ଉପରେ ଗୁରୁତ୍ବାରୋପ କରାଯାଇଥିଲା।

ଦ କୁଇଭର ବ୍ୟୁରୋ :- ବହୁଚର୍ଚ୍ଚିତ ଆରଜି.କର ମେଡିକାଲ କଲେଜରେ ଜଣେ କନିଷ୍ଠ ମହିଳା ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ମାମଲାରେ ମୁଖ୍ୟ ଅଭିଯୁକ୍ତ ସଞ୍ଜୟ ରାୟକୁ ଆଜୀବନ ଜେଲ ଦଣ୍ଡାଦେଶ ଶୁଣାଇଛନ୍ତି କୋର୍ଟ । ଶନିବାର ଅଭିଯୁକ୍ତ ସଞ୍ଜୟକୁ କୋର୍ଟ ଦୋଷୀ ସାବ୍ୟସ୍ତ କରିଥିବା ବେଳେ ସୋମବାର ଦଣ୍ଡବିଧାନ କରିଛନ୍ତି । ତାକୁ ଆଜୀବନ କାରା ଦଣ୍ଡାଦେଶ ସହ ୫୦,୦୦୦ ଟଙ୍କା ଜରିମାନା ଦେବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି । ଆଇନଜୀବୀ ରେହମାନ କହିଛନ୍ତି, "ସଞ୍ଜୟ ରାୟଙ୍କୁ ମୃତ୍ୟୁ ପର୍ଯ୍ୟନ୍ତ ଆଜୀବନ କାରାଦଣ୍ଡ ଦିଆଯାଇଛି। ଦୋଷୀ ଉପରେ ଭାରତୀୟ ନ୍ୟାୟ ସଂହିତାର ୩ଟି ଧାରା ଅନୁଯାୟୀ ଜରିମାନା ମଧ୍ୟ ଲାଗୁ କରାଯାଇଛି। କୋର୍ଟ ପୀଡିତାଙ୍କ ପରିବାରକୁ ୧୭ ଲକ୍ଷ ଟଙ୍କା କ୍ଷତିପୂରଣ ଦେବାକୁ ରାଜ୍ୟକୁ ନିର୍ଦ୍ଦେଶ ଦେଇଛନ୍ତି। ସିବିଆଇ ଏହି ମାମଲାରେ ଦୋଷୀକୁ ମୃତ୍ୟୁଦଣ୍ଡ ଦାବି କରିଥିଲା। ବିଚାରପତି କହିଛନ୍ତି ଯେ, ଏହା ବିରଳ ମାମଲା ନୁହେଁ, ତେଣୁ ମୃତ୍ୟୁଦଣ୍ଡ ଦିଆଯାଇନାହିଁ । ''

ଅନ୍ୟପଟେ ଏନେଇ ପୀଡିତାଙ୍କ ବାପା ମାଆ ସିଆଲଦା କୋର୍ଟ ବିଚାରପତିଙ୍କ ନିକଟରେ କହିଛନ୍ତି ଯେ, ଆମେ କ୍ଷତିପୂପରଣ ନେବାକୁ ଚାହୁଁନାହୁଁ ବରଂ ନ୍ୟାୟ ଚାହୁଁଛୁ । ଶନିବାର ଦିନ ଏହି ମାମଲାରେ କୋଲକାତା ସିଆଲଦା କୋର୍ଟରେ ଶୁଣାଣି ହୋଇଥିଲା । ମୁଖ୍ୟ ଅଭିଯୁକ୍ତ ସଞ୍ଜୟ ରାୟକୁ ଦୋଷୀ ସାବ୍ୟସ୍ତ କରିଥିଲେ କୋର୍ଟ। ଛାତିଥରା ଘଟଣାର ୬ ମାସ ପରେ ଭାରତୀୟ ନ୍ୟାୟ ସଂହିତାର ଧାରା 64, 66 ଏବଂ 103 (1) ଅନୁଯାୟୀ ରାୟ ଶୁଣାଇଥିଲେ ସିଆଲଦା କୋର୍ଟ । ଘଟଣାର ପରଦିନ ରବିବାର ପଡୁଥିବାରୁ ୪୮ ଘଣ୍ଟା ପରେ ଅର୍ଥାତ ସୋମବାର ଦଣ୍ଡାଦେଶ ଶୁଣାଇଛନ୍ତି କୋର୍ଟ ।

ଦ କୁଇଭର ବ୍ୟୁରୋ :- ଆମେରିକାର ୪୭ତମ ରାଷ୍ଟ୍ରପତି ଭାବରେ ଶପଥ ଗ୍ରହଣ କରିବା ପରେ ଡୋନାଲ୍ଡ ଟ୍ରମ୍ପ ଅନେକ କାର୍ଯ୍ୟନିର୍ବାହୀ ନିର୍ଦ୍ଦେଶରେ ଦସ୍ତଖତ କରିଛନ୍ତି। ତାଙ୍କ କାର୍ଯ୍ୟକାଳର ପ୍ରଥମ ଦିନରେ ଟ୍ରମ୍ପଙ୍କ ଦ୍ବାରା ଦସ୍ତଖତ ହୋଇଥିବା ନିର୍ଦ୍ଦେଶରେ ପ୍ୟାରିସ୍ ଜଳବାୟୁ ଚୁକ୍ତିରୁ ପ୍ରତ୍ୟାହାର, ଟିକ୍‌ଟକ୍ ଉପରେ ପ୍ରତିବନ୍ଧକ ଛାଡ, କ୍ୟାପିଟାଲ୍ ହିଲ୍ ମାମଲାରେ କ୍ଷମା ପ୍ରାର୍ଥନା ଏବଂ ଫେଡେରାଲ୍ କର୍ମଚାରୀଙ୍କୁ ପୂର୍ଣ୍ଣକାଳୀନ କାମକୁ ଫେରିବା ଆବଶ୍ୟକତା ଆଦି ରହିଛି। ଶପଥ ଗ୍ରହଣ କରିବାର କିଛି ଘଣ୍ଟା ମଧ୍ୟରେ ଟ୍ରମ୍ପ ବହୁ ସଂଖ୍ୟକ କାର୍ଯ୍ୟନିର୍ବାହୀ ନିର୍ଦ୍ଦେଶରେ ଦସ୍ତଖତ କରିଛନ୍ତି।

ପ୍ୟାରିସ୍ ଜଳବାୟୁ ଚୁକ୍ତିରୁ ଆମେରିକା ପ୍ରତ୍ୟାହାର କରିଛି। ଏହି ପଦକ୍ଷେପ ବିଷୟରେ ଆମେରିକା ମିଳିତ ଜାତିସଂଘକୁ ସୂଚନା ଦେଇଛି। ୬ ଜାନୁଆରି ୨୦୨୧ରେ ଆମେରିକାର କ୍ୟାପିଟାଲ ଉପରେ ହୋଇଥିବା ଆକ୍ରମଣ ପାଇଁ ଦୋଷୀ ସାବ୍ୟସ୍ତ ହୋଇଥିବା ୧୫୦୦ ଲୋକଙ୍କୁ ଡୋନାଲ୍ଡ ଟ୍ରମ୍ପ କ୍ଷମା କରିଛନ୍ତି। ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ 'ମୁକ୍ତ ବକ୍ତବ୍ୟକୁ ପୁନଃସ୍ଥାପିତ କରିବା' ଏବଂ 'ସରକାରୀ ସେନ୍ସରସିପ୍' ରୋକିବା ପାଇଁ ନିର୍ଦ୍ଦେଶ ଦେଇଛନ୍ତି। ଡୋନାଲ୍ଡ ଟ୍ରମ୍ପ ଟିକ୍‌ଟକ୍‌କୁ ୯୦ ଦିନ ପର୍ଯ୍ୟନ୍ତ କାର୍ଯ୍ୟକ୍ଷମ କରିବାକୁ ନିର୍ଦ୍ଦେଶ ଦେଇଛନ୍ତି। ଆମେରିକାରେ ଟିକ୍‌ଟକ୍‌କୁ ଶନିବାର ବନ୍ଦ କରାଯାଇଥିଲା। ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇ ଟ୍ରମ୍ପ ଆମେରିକାକୁ ବିଶ୍ୱ ସ୍ୱାସ୍ଥ୍ୟ ସଂଗଠନରୁ ବାହାର କରିଛନ୍ତି। ଆମେରିକା ଏହାର ଏକ ଅଂଶ ହେବ ନାହିଁ । ପୂର୍ବତନ ରାଷ୍ଟ୍ରପତି ଜୋ ବାଇଡେନଙ୍କ ୭୮ଟି ନିର୍ଦ୍ଦେଶକୁ ମଧ୍ୟ ଡୋନାଲ୍ଡ ଟ୍ରମ୍ପ ବାତିଲ କରିଛନ୍ତି। ବାଇଡେନ ୨୦୨୦ରେ ରାଷ୍ଟ୍ରପତି ହୋଇଥିଲେ। ଡୋନାଲ୍ଡ ଟ୍ରମ୍ପ କୌଣସି ନୂତନ ନିୟମ ଉପରେ ପ୍ରତିବନ୍ଧକ ଲଗାଇଛନ୍ତି। ଏହା ବ୍ୟତୀତ ଫେଡେରାଲ୍ ନିଯୁକ୍ତି ଉପରେ ପ୍ରତିବନ୍ଧକ ଲଗାଇବାକୁ ମଧ୍ୟ ନିଷ୍ପତ୍ତି ନିଆଯାଇଛି। ଟ୍ରମ୍ପଙ୍କ ନୂତନ ଆଦେଶରେ ଫେଡେରାଲ କର୍ମଚାରୀମାନେ ଘରୁ କାମ କରିବା ପରିବର୍ତ୍ତେ ଅଫିସକୁ ସମ୍ପୂର୍ଣ୍ଣ ଫେରିବାର ଆବଶ୍ୟକତା ରହିଥିବ‌େ କୁହାଯାଇଛି। ପୂର୍ବ ପ୍ରଶାସନର ରାଜନୈତିକ ବିରୋଧୀଙ୍କ ବିରୋଧରେ ସରକାରଙ୍କୁ ଅସ୍ତ୍ରଶସ୍ତ୍ର ବନ୍ଦ କରିବାକୁ ଟ୍ରମ୍ପ ନିର୍ଦ୍ଦେଶ ଦେଇଛନ୍ତି।ଆମେରିକାର ରାଷ୍ଟ୍ରପତି ଭାବରେ ତାଙ୍କର ଦ୍ୱିତୀୟ କାର୍ଯ୍ୟକାଳ ମଧ୍ୟରେ ଡୋନାଲ୍ଡ ଟ୍ରମ୍ପ ତାଙ୍କର ପ୍ରଥମ ବ୍ୟାଚ୍ କାର୍ଯ୍ୟନିର୍ବାହୀ ନିର୍ଦ୍ଦେଶରେ ଦସ୍ତଖତ କରିଛନ୍ତି। ପ୍ରମୁଖ ନୀତି ଏଜେଣ୍ଡା ସ୍ଥିର କରିବାରେ କାର୍ଯ୍ୟନିର୍ବାହୀ ନିର୍ଦ୍ଦେଶ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ବୋଲି କୁହାଯାଉଛି। କ୍ୟାବିନେଟର ଅନୁମୋଦନ ବିନା ଆମେରିକାର ରାଷ୍ଟ୍ରପତିଙ୍କ ଦ୍ବାରା କାର୍ଯ୍ୟନିର୍ବାହୀ ନିର୍ଦ୍ଦେଶ ଜାରି କରାଯାଇପାରିବ, ଯଦିଓ ରାଷ୍ଟ୍ରପତି ବିନା ଆଦେଶରେ ଏହି ନିର୍ଦ୍ଦେଶ କାର୍ଯ୍ୟକାରୀ କରିପାରିବେ ନାହିଁ।

ପୁରୀ( ଦ କୁଇଭର ):- ଶ୍ରୀମନ୍ଦିର ଗର୍ଭଗୃହ ଭିଡିଓ ଭାଇରାଲ୍‌ ଘଟଣା ପରେ ଶ୍ରୀମନ୍ଦିରରେ ମୋବାଇଲ୍‌ କଟକଣା ଉପରେ ସଚେତନତା ସୃଷ୍ଟି କରାଯାଇଛି। ଚାରିଦ୍ବାରରେ ସୂଚନା ଫଳକ ଓ ପୋଷ୍ଟର୍‌ ଲଗାଯାଇଛି। ମୋବାଇଲ୍‌ ଜଗିବାକୁ ଚାରିଦ୍ବାରରେ ୪ଟି ସ୍ବତନ୍ତ୍ର ଟିମ୍‌ ନିୟୋଜିତ ହୋଇଛନ୍ତି। ଅପରପକ୍ଷେ ଗତକାଲି ପଶ୍ଚିମଦ୍ବାରରେ ଡ୍ରୋନ୍‌ ଉଡ଼ାଇ ପୁରୀର ଜଣେ ଯୁବକ ଧରାପଡ଼ିଛନ୍ତି ଓ ତାଙ୍କୁ ଥାନାରେ ଅଟକ ରଖାଯାଇଛି। ଡ୍ରୋନ୍‌ ମାଲିକ ପେଣ୍ଠକଟା ଅଞ୍ଚଳର ବୋଲି ଜଣାପଡ଼ିଛି। ଦୁଇଦିନ ତଳେ ଶ୍ରୀମନ୍ଦିର ଗର୍ଭଗୃହର ଭିଡିଓ ଭାଇରାଲ୍‌ ହୋଇଥିଲା। ଶ୍ରୀମନ୍ଦିର ଜଣେ ଜଣାଶୁଣା ସେବକ ବାହାର ରାଜ୍ୟର ଭକ୍ତଙ୍କୁ ନେଇ ଏହି ଭିଡିଓ ଉତ୍ତୋଳନ କରାଇଥିଲେ। ଏହି ଭିଡିଓ ବାଙ୍କେ ବିହାରୀ ନାଥ ନାମକ ବ୍ୟକ୍ତିଙ୍କ ଇନ୍‌ଷ୍ଟାଗ୍ରାମ୍‌ରେ ଛଡ଼ାଯାଇଥିବା ଦେଖିବାକୁ ମିଳିଥିଲା। ଏହି ଘଟଣା ପରେ ପୁରୀ ପୁଲିସ ଭକ୍ତଙ୍କ ସୂଚନା ଉଦ୍ଦେଶ୍ୟରେ ଶ୍ରୀମନ୍ଦିର ସିଂହଦ୍ବାର, ଉତ୍ତରଦ୍ବାର, ପଶ୍ଚିମ ଦ୍ବାର ଓ ଦକ୍ଷିଣଦ୍ବାରରେ ପ୍ରବେଶ ପଥରେ ‘ଶ୍ରୀମନ୍ଦିରରେ ମୋବାଇଲ୍‌ ନିଷେଧାଦେଶ’ ସମ୍ପର୍କରେ ସୂଚନା ଲଗାଇଛି। ଚାରିଦ୍ବାରରେ ଭକ୍ତଙ୍କ ଧାଡ଼ି ପାଖରେ ସାଇନ୍‌ଏଜ୍‌ ଲଗାଇଛି।

ଏସ୍‌ପି ବିନୀତ ଅଗ୍ରୱାଲ୍ କହିଛନ୍ତି, ଭକ୍ତ ଓ ଅନ୍ୟମାନଙ୍କୁ ଅନୁରୋଧ କରୁଛୁ, ମୋବାଇଲ୍‌ ନେଇ କେହି ଶ୍ରୀମନ୍ଦିର ଭିତରକୁ ପ୍ରବେଶ କରନ୍ତୁ ନାହିଁ। ଯେ କେହି ଏହାର ଉଲ୍ଲଂଘନ କରିବେ, ତାଙ୍କ ବିରୋଧରେ ଆମେ କଡ଼ା କାର୍ଯ୍ୟାନୁଷ୍ଠାନ ନେବୁ। ସଚେତନତା ଉଦ୍ଦେଶ୍ୟରେ ଆମେ ଚାରିଦ୍ବାରରେ ସୂଚନା ଫଳକ ମାରିଛୁ। ପୁଲିସର ସୁପର୍‌ଭାଇଜିଂ ଅଫିସରଙ୍କୁ ଛାଡ଼ି ଅନ୍ୟ କେହି ମୋବାଇଲ୍‌ ନ ନେବାକୁ ନିର୍ଦ୍ଦେଶନାମା ଜାରି ହୋଇଛି। ଡ୍ରୋନ୍‌ ସମ୍ପର୍କରେ ଶ୍ରୀ ଅଗ୍ରୱାଲ୍ କହିଛନ୍ତି, ଗର୍ଭଗୃହ ଭିଡିଓ ଭାଇରାଲ୍‌ ଘଟଣାରେ ପୁଲିସ ସିଂହଦ୍ବାର ଥାନାରେ ନିଜ ଆଡ଼ୁ ମାମଲା ରୁଜୁ କରିଛି। ଭିଡିଓ ଉତ୍ତୋଳନ ଓ ଭାଇରାଲ୍‌ ଘଟଣାରେ ଯିଏ ସଂପୃକ୍ତ ଅଛନ୍ତି, ତାଙ୍କୁ ଧରିବାକୁ ବିଭିନ୍ନ ଟିମ୍‌ ଲାଗିଛନ୍ତି। ଗତକାଲି ଶ୍ରୀମନ୍ଦିର ପାଖରେ ଏକ ଡ୍ରୋନ୍‌ ଉଡ଼ୁଥିଲା। ଏହି ଘଟଣାରେ ସଂପୃକ୍ତ ବ୍ୟକ୍ତିଙ୍କୁ ଅଟକ ରଖାଯାଇଛି ଓ ଡ୍ରୋନ୍‌ ଜବତ କରାଯାଇଛି। ଯୁବକ ଓ ଡ୍ରୋନ୍‌ ମାଲିକଙ୍କ ବିରୋଧରେ ମାମଲା ରୁଜୁ କରିଛୁ। ସିଟି ଡିଏସ୍‌ପି ପ୍ରଶାନ୍ତ କୁମାର ସାହୁ କହିଛନ୍ତି, ମୋବାଇଲ୍‌ ଜଗିବାକୁ ପୂର୍ବ ବ୍ୟବସ୍ଥା ଜାରି ରହିଛି। ଏଥିସହ ଚାରିଦ୍ବାରରେ ୪ଟି ଟିମ୍‌ ନିୟମିତ ଯାଞ୍ଚ ପାଇଁ ରହିବେ।

ଦ କୁଇଭର ବ୍ୟୁରୋ :- ୧୨ ନୁହେଁ ୧୮ ମାଓବାଦୀ ନିହତ ହୋଇଛନ୍ତି । ଗତ ଗୁରୁବାର ଛତିଶଗଡ଼ ବିଜାପୁର ଓ ସୁକମା ଜିଲ୍ଲାର ପୂଜାରୀ କାଙ୍କେର ଠାରେ ଯବାନଙ୍କ ଗୁଳିରେ ୧୨ ଜଣ ନକ୍ସଲଙ୍କ ମୃତ୍ୟୁ ହୋଇଥିଲା। ଯାହାକି ପୋଲିସକୁ ୧୨ ମାଓବାଦୀଙ୍କ ଶବ ମିଳିଥିଲା। କିନ୍ତୁ ଶନିବାର ଦିନ ମାଓ ସଂଗଠନ ପକ୍ଷରୁ ଏକ ପ୍ରେସ୍ ରିଲିଜ୍ ଜାରି କରି କହିଛନ୍ତି ଯେ, ଏନକାଉଣ୍ଟରରେ ୧୨ ନୁହେଁ ୧୮ ମାଓବାଦୀ ନିହତ ହୋଇଛନ୍ତି ।

ଏହି ଏନକାଉଣ୍ଟରରେ, ୫୦ ଲକ୍ଷ ଟଙ୍କା ପୁରସ୍କାର ରାଶି ବିଶିଷ୍ଟ ମୋଷ୍ଟ ୱାଣ୍ଟେଡ୍ ନକ୍ସଲ କମାଣ୍ଡର, ରାଜ୍ୟ କମିଟି ସଦସ୍ୟ ଏବଂ ତେଲେଙ୍ଗାନା ରାଜ୍ୟ କମିଟି ମୁଖ୍ୟ ଦାମୋଦର ଓରଫ ଚୋଖା ରାଓ ମଧ୍ୟ ନିହତ ହୋଇଛନ୍ତି। ଏହା ବ୍ୟତୀତ, ପିପିସିଏମ୍ ହୁଙ୍ଗି, ଦେବେ, ଜୋଗା ଏବଂ ନରସିଂହ ରାଓଙ୍କର ମଧ୍ୟ ମୃତ୍ୟୁ ଘଟିଛି । ଏନକାଉଣ୍ଟର ସମୟରେ ନକ୍ସଲମାନଙ୍କ ଦ୍ୱାରା ନିହତ ୬ ଜଣ ନକ୍ସଲ ସାଥୀଙ୍କ ମୃତଦେହକୁ ନେଇଯିବାରେ ସଫଳ ହୋଇଥିଲେ । ଏନେଇ ସ୍ପଷ୍ଟ କରିଛନ୍ତି ନକ୍ସଲ ସଂଗଠନର ଦକ୍ଷିଣ ବସ୍ତର ଡିଭିଜନାଲ କମିଟିର ସଚିବ ।

ବିଜାପୁର ଜିଲ୍ଲାର ପୂଜାରୀ କାଙ୍କେର ଗାଁରେ ଜାନୁଆରୀ ୧୬ ତାରିଖରେ ହୋଇଥିବା ଗୁଳିବିନିମୟରେ ସୁରକ୍ଷା ବାହିନୀ ୧୨ ଜଣ ନକ୍ସଲଙ୍କୁ ମାରିବାରେ ସଫଳ ହୋଇଥିଲେ । ଯାହାଙ୍କ ମୃତଦେହ ବିଜାପୁରକୁ ଅଣାଯାଇ ଚିହ୍ନଟ ମଧ୍ୟ କରାଯାଇଛି । କିନ୍ତୁ ମାଓବାଦୀଙ୍କ ଦ୍ୱାରା ଜାରି ପ୍ରେସ୍ ରିଲିଜ୍‌ରେ ୧୮ ଜଣ ସାଥୀଙ୍କୁ ହରାଇବା କଥା ଉଲ୍ଲେଖ କରିଛନ୍ତି । ଏଥିସହିତ ଚିଠିରେ ସରକାର ଆଦିବାସୀଙ୍କ ଜମି ହଡ଼ପ କରିବା ଏବଂ ପ୍ରାକୃତିକ ସମ୍ପଦ ଲୁଟୁଥିବା ଅଭିଯୋଗ କରିଛନ୍ତି ମାଓ ସଂଗଠନ । ଯେଉଁଥିପାଇଁ ସୁରକ୍ଷା ବାହିନୀ ସରକାରଙ୍କ ପ୍ରତିଶୋଧମୂଳକ କାର୍ଯ୍ୟାନୁଷ୍ଠାନରେ କ୍ଷତି ସହିଥିବା ଉଲ୍ଲେଖ କରିଛନ୍ତି । ନିରୀହ ଗ୍ରାମବାସୀଙ୍କ ଉପରେ ହେଉଥିବା ଅତ୍ୟାଚାରର ପ୍ରତିବାଦ କରିଛନ୍ତି ମାଓ ସଂଗଠନ ଏବଂ ଏହି ଅତ୍ୟାଚାରର ପର୍ଦ୍ଦାଫାସ କରିବାକୁ ବୁଦ୍ଧିଜୀବୀମାନଙ୍କୁ ନିବେଦନ କରିଛନ୍ତି ମାଓବାଦୀ ।

ଦ କୁଇଭର ବ୍ୟୁରୋ :- ରାଜ୍ୟରେ ଏଣିକି ସ୍କୁଲରେ ନାମ ଲେଖାଇବା ପାଇଁ ପିଲାଙ୍କୁ ଅତିକମରେ ୬ ବର୍ଷ ହେବା ଜରୁରୀ । ଚଳିତ ଶିକ୍ଷାବର୍ଷ (୨୦୨୪-୨୫) ଠାରୁ ଏହି ନୂଆ ନିୟମ ଲାଗୁ କରିଛନ୍ତି ରାଜ୍ୟ ସରକାର । ଜାତୀୟ ଶିକ୍ଷା ନୀତି-୨୦୨୦ କାର୍ଯ୍ୟକାରିତା ଆଧାରରେ ଏହି ବୟସ ସଂଶୋଧିତ ନିୟମ ଲାଗୁ କରାଯାଇଛି । ଏନେଇ ‘ବିଦ୍ୟାଳୟ ଓ ଗଣଶିକ୍ଷା ବିଭାଗ’ ପକ୍ଷରୁ ସୋମବାର ବିଧିବଦ୍ଧ ବିଜ୍ଞପ୍ତି ମଧ୍ୟ ପ୍ରକାଶ ପାଇଛି ।

ପ୍ରଥମ ଶ୍ରେଣୀରେ ନାଁ ଲେଖାଇବା ପାଇଁ ସରକାର ଧାର୍ଯ୍ୟ କରିଛନ୍ତି ବୟସ ସୀମା । ୬ ବର୍ଷରୁ ଅଧିକ ନ ହେଲେ ପ୍ରଥମ ଶ୍ରେଣୀରେ ନାମ ଲେଖାଇ ପାରିବେ ନାହିଁ । ୨୦୨୫-୨୬ ଶିକ୍ଷା ବର୍ଷରୁ ଏହା ଲାଗୁହେବ । ସେହି ଶିକ୍ଷା ବର୍ଷର ସେପ୍ଟେମ୍ବର ୧ରେ ଯେଉଁ ପିଲାଙ୍କର ବୟସ ୬ ବର୍ଷରୁ ଉର୍ଦ୍ଧ ହୋଇଥିବ ସେହି ମାନେ ହିଁ ପ୍ରଥମ ଶ୍ରେଣୀରେ ନାମ ଲେଖାଇ ପାରିବେ । ଏଭିଳି ନିଷ୍ପତି ଜାତୀୟ ଶିକ୍ଷା ପଲିସୀକୁ ନଜରରେ ରଖି ସରକାର କରିଛନ୍ତି ।

କେବଳ ସେତିକି ନୁହେଁ ପ୍ରତେକ ପ୍ରାଥମିକ ବିଦ୍ୟାଳୟରେ ସରକାର ପ୍ରି ସ୍କୁଲ ଖୋଲିବେ, ଯାହାର ନାମ ହେବ ଶିଶୁ ବାଟିକା । ଏଠାରେ ୫ରୁ ୬ ବର୍ଷର ପିଲାମାନଙ୍କ ନାମ ଲେଖା ହେବ ଏବଂ ସେମାନେ ସେହିଠାରେ ହିଁ ପାଠ ପଢ଼ିବେ । ଏଭଳି ନିଷ୍ପତି ନେଇଛି ଗଣଶିକ୍ଷା ବିଭାଗ । ଗଣଶିକ୍ଷା ବିଭାଗ ପକ୍ଷରୁ ଏ ନେଇ ବିଜ୍ଞପ୍ତି ପ୍ରକାଶ ପାଇଛି । ଏ ବିଜ୍ଞପ୍ତି ଅନୁଯାଇ ଏବେ ପ୍ରଥମ ଶ୍ରେଣୀ ପିଲାମାନଙ୍କ ନାମ ଲେଖା ବୟସ ୬ ବର୍ଷରୁ ଅଧିକ ରହିବ ।

ପୁରୀ( ଦ କୁଇଭର ):- ପୁଣି ଭାଇରାଲ ହେଲା ଶ୍ରୀମନ୍ଦିର ଭିତରର ଫଟୋ ଓ ଭିଡିଓ । ଏଥର ସିଧା ଗର୍ଭଗୃହର ଫଟୋ ଓ ଭିଡିଓ ଭାଇରାଲ ହୋଇଛି । ଭାଇରାଲ ଭିଡିଓରେ ରତ୍ନସିଂହାସନରେ ମହାପ୍ରଭୁ ଶ୍ରୀଜଗନ୍ନାଥଙ୍କ ଅବସ୍ଥାନ ମଧ୍ୟ ସ୍ପଷ୍ଟ ଭାବେ ଦୃଶ୍ୟମାନ ହେଉଛି । କେବଳ ଗର୍ଭଗୃହ ନୁହେଁ ବରଂ ୨୨ ପାହଚ, ଭିତରବେଢା ଓ ମନ୍ଦିର ଅନେକ ସମ୍ବେଦନଶୀଳ ସ୍ଥାନରେ ଭିଡିଓ ଉତ୍ତୋଳନ କରାଯାଇଛି । ଏହି ଫଟୋ ଓ ଭିଡିଓକୁ ବାଙ୍କ ବିହାରୀ ଅନନ୍ତ ନାମକ ଜଣେ ବ୍ୟକ୍ତି ନିଜ ଇନଷ୍ଟାଗ୍ରାମ ଓ ଫେସବୁକରେ ଅପଲୋଡ କରିଛନ୍ତି । ଯାହାକୁ ନେଇ କୋଟି କୋଟି ଜଗନ୍ନାଥ ପ୍ରେମୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି । ଶ୍ରୀମନ୍ଦିର ଓ ଜିଲ୍ଲା ପ୍ରଶାସନର କାର୍ଯ୍ୟଶୈଳୀ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି ।

ସୂଚନା ଅନୁସାରେ, ଶନିବାର ରାତିରେ ଏହି ବ୍ୟକ୍ତି ଜଣକ ନିଜ ଇନଷ୍ଟାଗ୍ରାମ ଓ ଫେସବୁକ ପେଜରେ ଏହି ଭିଡିଓ ଅପଲୋଡ଼ କରିଛନ୍ତି । ଭାଇରାଲ ଭିଡିଓରେ ମନ୍ଦିରର ବିଭିନ୍ନ ଆଭ୍ୟନ୍ତରୀଣ ସ୍ଥାନ ରହିଛି । ସିଂହଦ୍ବାର, ବାଇଶି ପାହାଚ, ଭିତରବେଢା ସମେତ ସିଧା ଗର୍ଭଗୃହ ଓ ରତ୍ନସିଂହାସନରେ ଚତୁର୍ଦ୍ଧାମୂର୍ତ୍ତିଙ୍କର ଅବସ୍ଥାନ ମଧ୍ୟ ଭିଡିଓରେ ରେକର୍ଡ କରାଯାଇଛି । ତେବେ ଶ୍ରୀମନ୍ଦିର ବାହାରେ ଏବଂ ଭିତରେ ପୋଲିସର କଡ଼ା ସୁରକ୍ଷା ବ୍ୟବସ୍ଥା ସତ୍ତ୍ୱେ ଏହି ବ୍ୟକ୍ତି ଜଣକ ମୋବାଇଲ୍ ଫୋନ୍ କିଭଳି ନେଲେ ଏବଂ ସମ୍ବେଦନଶୀଳ ଗର୍ଭଗୃହ ଓ ଭିତରବେଢ଼ାରେ କିପରି ଭିଡିଓ ଉତ୍ତୋଳନ କରିବାକୁ ସକ୍ଷମ ହେଲେ, ସେନେଇ ପ୍ରଶ୍ନ ସୃଷ୍ଟି ହୋଇଛି । ସେହିପରି ଶ୍ରୀମନ୍ଦିର ଭିତରେ ଶ୍ରୀମନ୍ଦିର ପ୍ରଶାସନର ମାଳ ମାଳ କର୍ମଚାରୀ, ସେବାୟତ, ଜଗନ୍ନାଥ ମନ୍ଦିର ପୋଲିସ (ଜେଟିପି) ଉପସ୍ଥିତ ରହୁଥିବା ସତ୍ତ୍ବେ ମଧ୍ୟ ଏପରି ଘଟଣା ଘଟିବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।

ଦ କୁଇଭର ବ୍ୟୁରୋ :- ଆସନ୍ତା ୨୪ ତାରିଖରୁ ଆରମ୍ଭ ହେବ ପିଏମ ଆବାସ ସର୍ଭେ। ଏନେଇ ସୂଚନା ଦେଇଛନ୍ତି ପଞ୍ଚାୟତରାଜ ମନ୍ତ୍ରୀ ରବି ନାରାୟଣ ନାୟକ। ସେ କହିଛନ୍ତି, ଏଥିଲାଗି ଉଭୟ ଅଫଲାଇନ ଏବଂ ଅନଲାଇନରେ ଆବେଦନ କରିପାରିବେ ହିତାଧିକାରୀ। ୨୪ରେ ଆବାସ ପୋର୍ଟାଲର ବିଧିବଦ୍ଧ ଲଞ୍ଚ କରିବେ ରାଜ୍ୟ ସରକାର| ଦେଢ଼ରୁ ୨ ମାସ ଚାଲିବ ଆବାସ ସର୍ଭେ। ଏଥିପାଇଁ ବିଭାଗ ସଂପୂର୍ଣ୍ଣ ପ୍ରସ୍ତୁତ ରହିଛି।ମନ୍ତ୍ରୀ ରବି ନାରାୟଣ ନାୟକ ଆହୁରି କହିଛନ୍ତି, ବିଜୁ ପକ୍କାଘର ଆଉ ନାହିଁ। ବିଜୁ ପକ୍କାଘରର ଛାପା ବା ସିଲଟ ଘର ଆଗରେ ଅଛି, ଖୁବଶୀଘ୍ର ଲୋକେ ତାକୁ ହଟେଇଦେବେ। ବିଜୁ ପକ୍କା ଘର କୋଉଠି ଥିଲା ? ୩ ଲକ୍ଷ ୧୨ ହଜାର ଦେଇଥିଲେ, କିନ୍ତୁ ବାହା ବାହା ନେଉଥିଲା ପୂର୍ବ ସରକାର। ପୂର୍ବ ସରକାରର ଆନ୍ତରିକତା ନଥିଲା। ବିଜୁ ପକ୍କାଘରର ତାଲିକା ଆମ ପାଖରେ ନାହିଁ। ଆମେ ଓଡ଼ିଆ ହତଭାଗା ହେଲୁ ତାଲିକା ନାହିଁ। ବିଜୁ ପକ୍କା ଘର ନାହିଁ, କିନ୍ତୁ ଛାପା ଅଛି, ଲୋକେ କାଢିବେ , ଛାପା ବା ଘରେ ସିଲଟ ଲଗେଇଛନ୍ତି, ସେ ସିଲଟ ଉଠିବ।

ପୂର୍ବରୁ ବାଇକ୍‌, ଫ୍ରିଜ୍‌ ଓ ଲ୍ୟାଣ୍ଡଲାଇନ ଫୋନ୍‌ ଥିଲେ ଆବାସ ଘର ମିଳିବନି ବୋଲି ନିୟମ ଥିଲା। କିନ୍ତୁ ଏହାକୁ ବଦଳା ଯାଇଛି । ଏ ସବୁ ଥିଲେ ବି ଆବାସ ଘର ଦିଆଯିବ। ପୂର୍ବରୁ ପରିବାରର ମାସିକ ଆୟ ସୀମା ସର୍ବାଧିକ ୧୦ ହଜାର ରହିଥିଲା । ଏହାକୁ ୧୫ ହଜାର କରାଯାଇଛି ବୋଲି ପଞ୍ଚାୟତିରାଜ ମନ୍ତ୍ରୀ କହିଛନ୍ତି। ଏହି ଯୋଜନାରେ ଦିବ୍ୟାଙ୍ଗ ଓ ବିଧବାମାନଙ୍କୁ ଅଗ୍ରାଧିକାର ଦିଆଯିବ। ୨ ମାସ ମଧ୍ୟରେ ଏହାର ରି-ସର୍ଭେ କରାଯିବ। ଏହି ଅବଧି ମଧ୍ୟରେ ଆବେଦନ ଓ ଅନଲାଇନ୍ ମାଧ୍ୟମରେ ସେସବୁର ଯାଞ୍ଚ୍ କରାଯିବ। ଆବାସ ଘର ବଣ୍ଟାରେ ଏଣିକି ରାଜନୈତିକ ହସ୍ତକ୍ଷେପ ହେବ ନାହିଁ। ଯୋଗ୍ୟ ହିତାଧିକାରୀକୁ ଆବାସ ଘର ଦେବାରୁ କେହି ଚାହିଁଲେ ବି ଅଟକାଇ ପାରିବେ ନାହିଁ ବୋଲି ମନ୍ତ୍ରୀ କହିଛନ୍ତି।

ଭୁବନେଶ୍ୱର( ଦ କୁଇଭର ):- ଆସନ୍ତାମାସ ଅର୍ଥାତ ଫେବୃଆରୀ ୧୩ ତାରିଖରୁ ବିଧାନସଭାର ବଜେଟ ଅଧିବେଶନ ଆରମ୍ଭ ହେବ । ଏହା ସପ୍ତଦଶ ବିଧାନସଭାର ତୃତୀୟ ଅଧିବେଶନ ହେବାକୁ ଯାଉଛି । ଫେବୃଆରୀ ୧୩ ତାରିଖରୁ ଆରମ୍ଭ ହୋଇ ଏପ୍ରିଲ ୫ ତାରିଖରେ ଏହି ଅଧିବେଶନ ଶେଷ ହେବ l ୨୦୨୫ର ପ୍ରଥମ ଅଧିବେଶନ ହୋଇଥିବା କାରଣରୁ ରାଜ୍ୟପାଳ ହରିବାବୁ କୁମ୍ଭମପତି ଗୃହକୁ ସମ୍ବୋଧିତ କରି ଅଧିବେଶନ ଆହୁତ କରିବେ । ଏହି ଅଧିବେଶନ ଏପ୍ରିଲ୍ ୫ତାରିଖ ପର୍ଯ୍ୟନ୍ତ ଜାରି ରହିବ । ଏହି ଅଧିବେଶନରେ ମୋଟ୍‍ ୨୯ଟି କାର୍ଯ୍ୟଦିବସ ରହିବ । ବିଧାନସଭା ସଚିବାଳୟ ଦ୍ବାରା ଜାରି ବିଜ୍ଞପ୍ତି ଅନୁଯାୟୀ ଫେବୃଆରୀ ୧୪ ଏବଂ ୧୫ ରେ ରାଜ୍ୟପାଳଙ୍କ ଅଭିଭାଷଣ ଉପରେ ଆଗତ ଧନ୍ୟବାଦ ପ୍ରସ୍ତାବ ଉପରେ ଆଲୋଚନା ହେବ । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଫେବୃଆରୀ ୧୭ ରେ ୨୦୨୫-୨୬ ବର୍ଷ ପାଇଁ ବାର୍ଷିକ ବଜେଟ୍ ଉପସ୍ଥାପନ କରିବେ ଏବଂ ମାର୍ଚ୍ଚ ୨୯ ରେ ଆପ୍ରୋପ୍ରାଇଜେସନ୍ ବିଲ୍ ଉପସ୍ଥାପିତ କରାଯିବ ବୋଲି ବିଜ୍ଞପ୍ତିରେ ପ୍ରକାଶ କରାଯାଇଛି । ବଜେଟ୍‌ ସମ୍ପର୍କୀୟ ଆଲୋଚନା ଫେବୃଆରୀ ୨୦ ଏବଂ ୨୧ ରେ ଅନୁଷ୍ଠିତ ହେବାକୁ ଥିବାବେଳେ ଧାର୍ଯ୍ୟ ଅନୁଦାନ ଉପରେ ଆଲୋଚନା ମାର୍ଚ୍ଚ ୧୦ ରୁ ଆରମ୍ଭ ହୋଇ ମାର୍ଚ୍ଚ ୨୮ ପର୍ଯ୍ୟନ୍ତ ଜାରି ରହିବ ।

ମାର୍ଚ୍ଚ ୭ ତାରିଖରେ ବିଭିନ୍ନ ବିଭାଗୀୟ ଷ୍ଟାଣ୍ଡିଂ କମିଟିର ରିପୋର୍ଟ ଗୃହ ସମ୍ମୁଖରେ ଉପସ୍ଥାପିତ କରାଯିବ। ବିରୋଧୀ ଦଳ ଶାସକ ଦଳକୁ ଘେରିବାକୁ ରଣନୀତି ପ୍ରସ୍ତୁତ କରୁଛନ୍ତି । ଧାନ ମଣ୍ଡିରେ ଧାନ କିଣା ଅବ୍ୟବସ୍ଥା, ଚାଷୀ ଆତ୍ମହତ୍ୟା, ନବ ଦାସ ହତ୍ୟା ମାମଲା ପ୍ରସଙ୍ଗକୁ ସରକାର ବିରୋଧରେ ମୁଦ୍ଦା କରିପାରନ୍ତି ବିରୋଧୀ । ସେହିପରି ସରକାର ମଧ୍ୟ ବିରୋଧୀଙ୍କୁ ଉତ୍ତର ଦେବାକୁ ରଣନୀତି ପ୍ରସ୍ତୁତ କରିବେ । ଅଧିବେଶନ ଆରମ୍ଭ ହେବା ପୂର୍ବରୁ ବାଚସ୍ପତି ସର୍ବଦଳୀୟ ବୈଠକ ଆହୁତ କରିବେ । ସମସ୍ତ ଦଳର ସହଯୋଗରେ ଗୃହକାର୍ଯ୍ଯ ଓ ଶୃଙ୍ଖଳିତ ଆଲୋଚନା ପାଇଁ ବାଚସ୍ପତି ସମସ୍ତଙ୍କ ସହଯୋଗ ଲୋଡିବେ ।

ଝାରସୁଗୁଡ଼ା(ଦ କୁଇଭର): ପୂର୍ବତନ ସ୍ୱାସ୍ଥ୍ୟମନ୍ତ୍ରୀ ସ୍ୱର୍ଗତ ନବ ଦାସଙ୍କ ହତ୍ୟାକାଣ୍ଡ ତଦନ୍ତରେ ଲୁଚିଛି ଅନେକ ଗୁମର । ସେଥିରୁ ବହୁ ସମ୍ବେଦନଶୀଳ ତଥ୍ୟକୁ କ୍ରାଇମବ୍ରାଞ୍ଚ ଗିଳି ଦେଇଛି । କିଛି ତଥ୍ୟକୁ ଲୁଚାଇଛି ତ ଆଉ କିଛିକୁ ନଷ୍ଟ କରିଥିବା କୁହାଯାଉଛି । ଯଦି ଏସବୁ ସତ୍ୟ, ତେବେ ଏତେ ଜଘନ୍ୟ କାରନାମା କ୍ରାଇମବ୍ରାଞ୍ଚ କାହା ନିଦେ୍ର୍ଦଶରେ କରିଛି? କାହାକୁ ସୁରକ୍ଷା ଦେବାକୁ ଏସବୁ କରାଯାଇଛି । କାହିଁକି ନବଦାସ ହତ୍ୟା କାଣ୍ଡ ତଦନ୍ତରେ ଏତେ ବଡ଼ ବଡ଼ ପ୍ରଶ୍ନ ଛାଡ଼ି ଯାଇଛି କ୍ରାଇମବ୍ରାଞ୍ଚର ପୂର୍ବତନ ନିଦେ୍ର୍ଦଶକ ଅରୁଣ ବୋଥ୍ରା? ଗୋଟିଏ ଗୋଟିଏ ତଥ୍ୟରୁ ପରଦା ହଟିବା ବେଳକୁ ଏହା ପଛରେ ନବୀନ ସରକାରର କାରସାଦି ଥିବା ଅଭିଯୋଗ ବଢ଼ୁଛି । ଏବେ ସେହି ସବୁ ଗୁମର ପଦାକୁ ଆସୁଥିବାରୁ ବିଜେଡି ଛନ୍ଦି ହୋଇ ପଡ଼ିବ ବୋଲି କୁହାଯାଉଛି ।

ନବଙ୍କ ହତ୍ୟାକାଣ୍ଡ ତଦନ୍ତ ପୋଲିସ କରୁଥିଲା । ହଠାତ ନବୀନ ସରକାର ଅରୁଣ ବୋଥ୍ରାଙ୍କୁ ଦାୟିତ୍ୱ ଦେଲେ । ବୋଥ୍ରା ପାତାଳରୁ ପ୍ରମାଣ ଖୋଳିବା ଭଳି ପାଇଖାନା ଟାଙ୍କି ଭିତରୁ ଅଭିଯୁକ୍ତ ଗୋପାଳଙ୍କ ଲେଖା ଧରି ଆଣିଲେ । କେବଳ ସେତିକି ନୁହେଁ, ହତ୍ୟାକାଣ୍ଡର ପ୍ରଥମ ସାକ୍ଷୀ ନବ ଦାସ ବୋଲି ଲେଖିଥିଲେ । ଏହାବ୍ୟତୀତ ନବଙ୍କ ଗୁଳିବିଧ ସାର୍ଟ ମିଳୁନାହିଁ । ତାଙ୍କ ଟାୱେଲକୁ କାଳେ ତଦନ୍ତକାରୀ ବାବୁମାନେ ନଷ୍ଟ କରିଛନ୍ତି । ନବଙ୍କ ଦେହରେ ବାଜିଥିବା ଗୁଳିର ପତ୍ତା ନାହିଁ । ଏବେ କଥା ଆସିଲାଣି ନବଙ୍କ ଗାଡ଼ି ପଛରେ ଥିବା ଗାଡ଼ିକୁ ୫ ରାଉଣ୍ଡ ଗୁଳି ବାଜିଛି ।

ଥରେ ଏସବୁକୁ ସମୀକ୍ଷା କଲେ କାର୍ପଟଦାର ବା ପୁରୁଖା ଆଇପିଏସ ଅରୁଣ ବୋଥ୍ରାଙ୍କ ତଦନ୍ତରେ ଗୋପାଳ ଦାସ ନିଦେ୍ର୍ଦାଷରେ ଖଲାସ ହେବା ନିଶ୍ଚିତ । କେବଳ ସେତିକି ନୁହେଁ, ବୋଥ୍ରା କିପରି ଜାଣି ପାରିଲେ ନାହିଁ ନବ ଦାସଙ୍କୁ ପ୍ରଥମ ସାକ୍ଷୀ କରାଯାଇଛି । ମୃତ ବ୍ୟକ୍ତି କେବେ ସାକ୍ଷୀ ହୁଅନ୍ତି କି? ପୋଲିସ ମାମଲା କରିବା ବେଳକୁ ନବଙ୍କର ଦେହାନ୍ତ ହୋଇ ସାରିଥିଲା । ତଥାପୀ ଏତେବଡ଼ ଭୁଲ କିପରି କଲେ । ସେତିକି ନୁହେଁ, ଏହି ଘଟଣାରେ ଗୋପାଳଙ୍କୁ ଗିରଫ କରି ରହିଗଲା କ୍ରାଇମବ୍ରାଞ୍ଚ । ଏବେ ୫ ଗୁଳି ମାଡ଼ ହୋଇଥିବା ଖବର ଆସିଲାଣି । ଯଦି ଏହା ସତ । ତେବେ ସେତେବେଳେ ସରକାରୀ ଗାଡ଼ିର ଚାଳକ ବା ସେଥିରେ ବସିଥିବା ପିଏସଓମାନେ କାହିଁକି ଏତଲା ଦେଲେ ନାହିଁ?

ଏତିକିରେ ସରୁନାହିଁ । ଗୋପାଳଙ୍କ ପିସ୍ତଲରେ ୬ରାଉଣ୍ଡ ଗୁଳିଥିଲା । ଜବତ ବେଳକୁ ୩ ରାଉଣ୍ଡ ଗୁଳି ମିଳିଲା । ସେ ଯଦି ୩ଟି ଗୁଳି ଚଳାଇଥିଲେ, ତେବେ ଆଉ ୩ଟି ଗୁଳି କିଏ ଚଳାଇଲା । ଏହାର ଅର୍ଥ ଏଥିରେ ଏକାଧିକ ଅଭିଯୁକ୍ତ ଥିବା ସ୍ପଷ୍ଟ ହେଉଥିବା ବେଳେ କ୍ରାଇମବ୍ରାଞ୍ଚ ଏସବୁକୁ ଧ୍ୟାନ ଦେଲା ନାହିଁ କାହିଁକି? ଏସବୁକୁ ଧ୍ୟାନ ନଦେଇ ତଦନ୍ତକୁ ତରବରିଆ ଭାବେ କରି ମାମଲା ଚାପି ଦେବାକୁ ଯୋଜନା ଥିଲା କି? ଯଦି ତଦନ୍ତରେ ବାଟବଣା କରାଯାଇଛି, ତେବେ ଏଥିପାଇଁ କାହାର ଚାପ ଥିଲା? କାହିଁକି ଚାପ ପଡ଼ୁଥିଲା? ନବଙ୍କ ହତ୍ୟାକାଣ୍ଡର ଫାଇଦା କାହାକୁ ହେଉଛି । ଏସବୁ ଯଦି ସିବିଆଇ ଖୋଳତାଡ଼ କରିବ, ତେବେ ଅନେକ ଗୁମର ଖୋଲିଯିବ । ହୁଏତ ବିଜେଡି ଓ ବିଜେପିର ବଡ଼ ମୁଣ୍ଡିମାନେ ଫସିଯାଇ ପାରନ୍ତି ବୋଲି କୁହାଯାଉଛି । ଦେଖାଯାଉ ଏପରି ସମ୍ବେଦନଶୀଳ ମାମଲାକୁ ତଦନ୍ତ ପାଇଁ ମୋହନ ସରକାର ସିବିଆଇକୁ ଦେଉଛନ୍ତି ନା ଚୁପ ରହିଯାଉଛନ୍ତି?

ଦ କୁଇଭର ବ୍ୟୁରୋ :- ଆଜି ସର୍ବ-ଶକ୍ତିଶାଳୀ ଦେଶ ଆମେରିକା ଉପରେ ସମଗ୍ର ବିଶ୍ବର ନଜର ରହିବ । ୪୭ତମ ରାଷ୍ଟ୍ରପତି ଭାବେ ଶପଥ ଗ୍ରହଣ କରିବେ ନବ-ନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ରାଷ୍ଟ୍ରପତି ନିର୍ବାଚନରେ ବିଜୟୀ ହେବା ପରେ ଦ୍ବିତୀୟ ଥର ପାଇଁ ହ୍ବାଇଟ ହାଉସରେ ପ୍ରବେଶ କରିବେ ଟ୍ରମ୍ପ । ଏନେଇ ବିଶାଳ ଆୟୋଜନ କରାଯାଇଛି । ସାରା ବିଶ୍ବରୁ ବହୁ ବିଶିଷ୍ଟ ବ୍ୟକ୍ତିବିଶେଷ ଏହି ସମାରୋହରେ ସାମିଲ ହେବାକୁ ନିମନ୍ତ୍ରିତ ହୋଇଛନ୍ତି । ଆମେରିକୀୟ ସାମ୍ବିଧାନିକ ପରମ୍ପରା ଅନୁସାରେ, ରାଜଧାନୀ ଓ୍ବାଶିଂଟନ-ଡିସିରେ ଥିବା କ୍ୟାପିଟାଲ୍‌ ବିଲ୍ଡିଂ ସାମ୍ନାରେ ଏହି ଶପଥ ସମାରୋହ ହୋଇଥାଏ । ମାତ୍ର ଚଳିତଥର ଏଥିରେ ସାମାନ୍ୟ ବ୍ୟତିକ୍ରମ ଦେଖିବାକୁ ମିଳିବ । ତୁଷାରଝଡ ଜନିତ ପ୍ରତିକୂଳ ପାଗ କାରଣରୁ ବାହାରେ ନୁହେଁ ବରଂ କ୍ୟାପିଟାଲ ବିଲ୍ଡିଂ ଭିତରେ ଏହି କାର୍ଯ୍ୟକ୍ରମ ଆୟୋଜନ କରାଯିବାକୁ ନିଷ୍ପତ୍ତି ହୋଇଛି । ପ୍ରାୟ ୪୦ ବର୍ଷ ପରେ ଆମେରିକା ରାଜନୀତି ଇତିହାସରେ ଏପରି ବ୍ୟତିକ୍ରମ ଦେଖିବାକୁ ମିଳିବ ।

ସୂଚନା ପ୍ରକାରେ,ଭାରତୀୟ ସମୟ ପ୍ରାୟ ରାତି ୧୦. ୩୦ ଟାରେ ଏହି କାର୍ଯ୍ୟକ୍ରମ ଆରମ୍ଭ ହେବ । ‘ବାଇବେଲ’ ଛୁଇଁ ଟ୍ରମ୍ପ ସର୍ବୋଚ୍ଚ ସାମ୍ବିଧାନିକ ପଦ ପାଇଁ ଶପଥ ପାଠ କରିବା ପରେ ଦେଶବାସୀଙ୍କୁ ସମ୍ବୋଧିତ କରିବେ । ଏହି କାର୍ଯ୍ୟକ୍ରମକୁ ଜାତୀୟ ଗଣମାଧ୍ୟମ ଜରିଆରେ ପ୍ରସାରିତ କରାଯିବ । ଏଥିରେ ବିଭିନ୍ନ ଦେଶର ରାଷ୍ଟ୍ରମୁଖ୍ୟ, ରାଷ୍ଟ୍ରଦୂତ, ବିଶିଷ୍ଟ ଶିଳ୍ପପତି, ବ୍ୟବସାୟୀ, ସେଲିବ୍ରିଟିଙ୍କୁ ନିମନ୍ତ୍ରଣ କରାଯାଇଛି । କାର୍ଯ୍ୟକ୍ରମରେ ବିଦାୟୀ ରାଷ୍ଟ୍ରପତି ଜୋ.ବାଇଡେନ ମଧ୍ୟ ଉପସ୍ଥିତ ରହିବେ । ଶାନ୍ତିପୂର୍ଣ୍ଣ ଭାବେ କ୍ଷମତା ହସ୍ତାନ୍ତର କରିବେ ବୋଲି ପୂର୍ବରୁ ବାଇଡେନ ସ୍ପଷ୍ଟ କରିସାରିଛନ୍ତି । କାର୍ଯ୍ୟକ୍ରମ ଶେଷରେ ଟ୍ରମ୍ପଙ୍କ କାରକେଡ ରାଷ୍ଟ୍ରପତି ଭବନ ହ୍ବାଇଟ ହାଉସରେ ପ୍ରବେଶ କରିବ ।

ମୟୁରଭଞ୍ଜ( ଦ କୁଇଭର ):- ବିଭିନ୍ନ ସମ୍ପ୍ରଦାୟର ଲୋକମାନେ ନିଜ ପୂର୍ବ ପୁରୁଷଙ୍କ ମୋକ୍ଷ ପ୍ରାପ୍ତି ପାଇଁ ଗଙ୍ଗା ରେ ଅସ୍ତି ବିସର୍ଜନ କରୁଥିବା ବେଳେ ଆଦିବାସୀ ସାନ୍ତାଳୀ ସମ୍ପ୍ରଦାୟ ର ଲୋକମାନେ ଓଡିଶାର ଗଙ୍ଗା କୁହା ଯାଉଥିବା ବୈତରଣୀ ନଦୀରେ ହଜାର ହଜାର ଆଦିବାସୀ ସମ୍ପ୍ରଦାୟ ର ଲୋକମାନେ ନିଜ ପୂର୍ବ ପୁରୁଷଙ୍କ ମୋକ୍ଷ ପ୍ରାପ୍ତି ପାଇଁ ଅସ୍ତି ବିସର୍ଜନ କରିଥିବା ଦୃଶ୍ୟ ଦେଖିବାକୁ ମିଳିଛି । ତେବେ ଏପରି ଦୃଶ୍ୟ ଦେଖିବାକୁ ମିଳିଛି ମୟୁରଭଞ୍ଜ ଜିଲ୍ଲା ଠାକୁରମୁଣ୍ଡା ବ୍ଲକ ଅନ୍ତର୍ଗତ ଭୀମକୁଣ୍ଡର ସ୍ୱାତି ଘାଟରେ ,ତେବେ ଏଥିରେ ଆଦିବାସୀ ସାନ୍ତାଳ ସମ୍ପ୍ରଦାୟ ରାଜ୍ଯ ତଥା ରାଜ୍ୟ ବାହାରୁ ହଜାର ହଜାର ଶ୍ରଦ୍ଧାଳୁଙ୍କ ସମାଗମ ହୋଇଯାଇଛି। ପରିବାରର କେହି ମୃତ୍ୟୁ ହେଲେ ତାଙ୍କ ଅସ୍ଥି ଗଙ୍ଗା ରେ ବିସର୍ଜନ କଲେ ମୋକ୍ଷ ପ୍ରାପ୍ତି ହୁଏ। ତେବେ ସମସ୍ତଙ୍କ କ୍ଷେତ୍ରରେ ତାହା ସମ୍ଭବ ନୁହେଁ। କାରଣ ଗଙ୍ଗା ଯିବା ଏବଂ ଅସ୍ଥି ବିସର୍ଜନ କରିବା ବ୍ୟୟ ବହୁଳ ସେଥିପାଇଁ ଗୋଟିଏ ଗରିବ ସମ୍ଭବପର ହୋଇନ ଥାଏ। ଏଣୁ ଆଦିବାସୀ ସାନ୍ତାଳ ସମ୍ପ୍ରଦାୟ ଲୋକେ ପ୍ରତେକ ବର୍ଷ ପୁଣ୍ୟ ତୟା ବୈତରଣୀ ନଦୀ ର ସ୍ଵାତୀ ଘାଟରେ ରାଜ୍ଯ ତଥା ରାଜ୍ୟ ବାହାରୁ ଶ୍ରଦ୍ଧାଳୁ ଆସି ଆତ୍ମୀୟଙ୍କ ଅସ୍ଥି ବିସର୍ଜନ କରି ମୋକ୍ଷ ପ୍ରାପ୍ତି ପାଇଁ ପୂଜା ଅର୍ଚ୍ଚନା କରି ତିଳ ତର୍ପଣ ଅର୍ପଣ ମାରାଙ୍ଗ ବୁରୁ ମନ୍ଦିର ଦର୍ଶନ କରି ପରିବାରର ମଙ୍ଗଳ ମନାସି ଥାନ୍ତି। ତେବେ ଚଳିତ ବର୍ଷ ସ୍ବାତୀଘାଟରେ ୧୭୩୨ ରୁ ଉର୍ଦ୍ଧ୍ବ ଅସ୍ଥି ବିସର୍ଜନ ହୋଇଥିବା ନେଇ ଦାମୋଦର ମେଳା ଆୟୋଜକ ମାରାଂ ବୁରୁ କମିଟି ପକ୍ଷରୁ ଜଣାପଡ଼ିଥିବା ବେଳେ ମେଳା କୁ ଦୃଷ୍ଟିରେ ରଖି ଶାନ୍ତି ଶୃଙ୍ଖଳା ରକ୍ଷା ପାଇଁ , ଠାକୁରମୁଣ୍ଡା ଓ ଆଇ ସି ସାବିତ୍ରୀ ଦଳେଇ ଙ୍କ ନେତୃତ୍ୱରେ ପୋଲିସ ମୁତୟନ କରାଯାଇଥିଲା ଏବଂ ଅଗ୍ନିଶମ ବିଭାଗ ଓ ପ୍ରଶାସନ ପକ୍ଷରୁ ମଧ୍ଯ ବ୍ୟାପକ ବନ୍ଦୋବସ୍ତ କରାଯାଇ ଶାନ୍ତିଶୃଙ୍ଖଳା ସହିତ ସମାପନ ହୋଇଥିଲା ।

ନୂଆପଡା( ଦ କୁଇଭର ):- ଛତିଶଗଡ଼ରେ ସୁରକ୍ଷାକର୍ମୀଙ୍କ ବଡ଼ ଅପରେସନ୍ । ସୁରକ୍ଷାକର୍ମୀଙ୍କ ଏନ୍‌କାଉଣ୍ଟରରେ ୧୪ ମାଓବାଦୀ ମୃତ । ନୂଆପଡ଼ା ଜିଲ୍ଲା ସୀମାନ୍ତ ଛତିଶଗଡ଼ ଗରିଆବନ୍ଧରେ ଏନ୍‌କାଉଣ୍ଟର। ଗତକାଲି ଏନ୍‌କାଉଣ୍ଟରରେ ୨ ମହିଳା ମାଓବାଦୀଙ୍କ ମୃତ୍ୟୁ ହୋଇଥିଲା । ଅପରେସନରେ ଓଡ଼ିଶା ଓ ଛତିଶଗଡ଼ ପୋଲିସ ସହ ସିଆରପିଏଫ୍ ସାମିଲ ।

ଓଡିଶାର ନୂଆପଡ଼ା ସୀମାଠାରୁ ୫ କିଲୋମିଟର ଦୂର ଛତିଶଗଡ଼ର କୁଲାରୀଘାଟ ସଂରକ୍ଷିତ ଜଙ୍ଗଲରେ ବହୁ ସଂଖ୍ୟାରେ ମାଓବାଦୀ ଲୁଚି ରହିଥିବା ନେଇ ବିଶେଷ ସୁତ୍ରରୁ ଖବର ପାଇଥିଲେ ସୁରକ୍ଷାକର୍ମୀ । ଏହାପରେ ଓଡ଼ିଶା-ଛତିଶଗଡ଼ ପୁଲିସ୍ ପକ୍ଷରୁ ହୋଇଥିଲା ଆରମ୍ଭ ହୋଇଥିଲା ମିଳିତ ଅପରେସନ୍। ସୁରକ୍ଷାକର୍ମୀଙ୍କ ମିଳିତ ଅପରେସନ ନେଇ ଜାଣିପାରିଥିଲେ ମାଓବାଦୀ । ଏହାପରେ ଗତକାଲି ମାଓବାଦୀ ଓ ସୁରକ୍ଷା କର୍ମୀଙ୍କ ମଧ୍ୟରେ ଗୁଳିବିନିମୟ ହୋଇଥିଲା । ସୁରକ୍ଷାକର୍ମୀଙ୍କ ଗୁଳିରେ ଗତକାଲି ୨ ମହିଳା ମାଓବାଦୀ ନିହତ ହୋଇଥିଲେ। ତଥାପି ଥମି ନଥିଲା ଅପରେସନ ।ଅପରେସନ ଜାରି ରହିଥିବା ବେଳେ ଗତକାଲି ବିଳମ୍ବିତ ରାତିରେ ପୁଣି ସୁରକ୍ଷା କର୍ମୀ ଓ ମାଓବାଦୀ ମୁହାଁମୁହିଁ ହୋଇଥିଲେ। ଆଜି ପୁଣି ସକାଳେ ଆଉ ୧୨ ଜଣ ନକ୍ସଲଙ୍କ ମୃତଦେହ ଉଦ୍ଧାର ହୋଇଥିବା ଖବର ମିଳିଛି । ସର୍ଚ୍ଚ ଅପରେସନ ଜାରି ରହିଥିବା ବେଳେ ଘଟଣାସ୍ଥଳରୁ ଗୋଟିଏ ଏସଏଲଆର ବନ୍ଧୁକ, ବିପୁଳ ପରିମାଣର ଇଆଇଡି ଜବତ ହୋଇଛି।

ଦ କୁଇଭର ବ୍ୟୁରୋ :- ଜଳୁଛି ଲସ୍ ଆଞ୍ଜେଲେସ । ଏହା ପ୍ରକୃତିର କୋପ ନା ପ୍ରକୃତି ରୂପରେ ଭଗବାନଙ୍କର ରୋଷ? ଏହା ଭଗବାନଙ୍କର ତାଣ୍ଡବ ନୁହେଁ ତ? କାହିଁକି ଏପରି ପରିସ୍ଥିତି ସୃଷ୍ଟି ହେଲା? ହଲିଉଡ଼ ପାଇଁ ତ ସାରା ବିଶ୍ୱ ଲସ୍ ଆଞ୍ଜେଲେସକୁ ଆଦରୁଥିଲା କିନ୍ତୁ ଏବେ? ଦେଶର ସବୁଠାରୁ ବଡ଼ ଜଙ୍ଗଲ ଜଳୁଛି ହେଲେ ନିଆଁକୁ ଆୟତ୍ତ କରିପାରୁନି ବିଶ୍ୱର ଧନୀ ଦେଶ ଆମେରିକା । ହେଲେ କାହିଁକି? କ’ଣ ପ୍ରକୃତି ଆଗରେ ବିଜ୍ଞାନ ଫେଲ ମାରିଗଲା ନା ଭଗବାନଙ୍କ ଇଛା ଆଗରେ ଆମେରିକାର କଳାକୈାଶଳ ଚପିଗଲା ।

ଘଟଣା ହେଉଛି କାଲିଫର୍ନିଆର । କାଲିଫର୍ନିଆର ଲସ୍ ଆଞ୍ଜେଲେସ ସହରର ପାସିଫିକ ପଲିସେଡ୍‌ରୁ ହିଁ ଆରମ୍ଭ ହୋଇଥିଲା ନିଆଁ । ଜାନୁଆରି ୭ ତାରିଖ ମଙ୍ଗଳବାର ସକାଳ ୧୦.୩୦ରେ ମାଲିବୁର ପୂର୍ବରେ ଥିବା ଲସ୍ ଆଞ୍ଜେଲେସ ପଡ଼ିଆର ପାସିଫିକ ପଲିସେଡ୍‌ରେ ଏହି ଅଗ୍ନିକାଣ୍ଡ ଘଟିଥିଲା । ପରବର୍ତ୍ତୀ ସମୟରେ ଏହା ଧିରେ ଧିରେ ସହରର ବିଭିନ୍ନ ଅଞ୍ଚଳକୁ ବ୍ୟାପିଥିଲା । ଯାହା ଏ ଯାଏଁ ବି ଜଳୁଛିି । ଦିନକୁ ଦିନ ନିଆଁର ପ୍ରଭାବ ବଢ଼ିବାରେ ଲାଗିଛି । ନିଆଁ ଯେତିକି ବଢ଼ୁଛି ମୃତ୍ୟୁ ସଂଖ୍ୟା ବି ସେତିକି ବଢ଼ୁଛି । ଯେଉଁଆଡ଼େ ଦେଖିଲେ ଖାଲି ପୁଳା ପୁଳା ପାଉଁଶ ଆଉ ପଶୁପକ୍ଷୀଙ୍କ ଦରପୋଡ଼ା ଶରୀର । ହଲିଉଡ଼ ହିଲ ମଧ୍ୟ ଏଥିରୁ ବାଦ୍ ପଡ଼ିନି । ହଲିଉଡ଼ ହିଲ ଚାରିପଟେ ଥିବା ବଡ଼ ବଡ଼ ସେଲିବ୍ରିଟିଙ୍କ ଘର ଜଳିପୋଡ଼ି ପାଉଁଶ ହୋଇଯାଇଛି । ପ୍ରକୃତିର ଏହି ତାଣ୍ଡବ ଆଗରେ ଅସହାୟ ସାଜିଛି ମଡର୍ନ ଟେକ୍ନୋଲୋଜି ଓ ମଣିଷ । ଜଙ୍ଗଲ ନିଆଁର ପ୍ରକୋପ ଆଗରେ ଆମେରିକାର କଳାକୈାଶଳ ବି ତା’ର ଚମତ୍କାର ଦେଖାଇ ପାରିଲାନି । ଏହା ଆମେରିକା ଇତିହାସର ସବୁଠାରୁ ବଡ଼ ବିପର୍ଯ୍ୟୟ । ବୁଦ୍ଧିମାନ ମଣିଷ ପାଖରେ ନିଆଁକୁ ଆୟତ୍ତ କରିବାର ସବୁ ବାଟ ଯେମିତି ବନ୍ଦ ହେଇଯାଇଛି । ପ୍ରକୃତିର ନିଷ୍ଠୁରତା ଆଗରେ ଆମେରିକା ଭଳି ଏକ ଉନ୍ନତ ଦେଶ ମଧ୍ୟ ହାର ମାନିଯାଇଛି । ପାଗ ଶୁଷ୍କ ଥିବାରୁ ପବନ ପ୍ରବାହିତ ହୋଇ ନିଆଁ ଏପରି ବ୍ୟାପୁଛି ନା ଭଗବାନଙ୍କୁ ନିନ୍ଦା କରିବାର ପରିଣାମ ଇଏ । ଭଗବାନଙ୍କୁ ଏ କି ପ୍ରକାର ପରିହାସ? ଏଠି ଦୋଷୀ ସହ ନିର୍ଦ୍ଦୋଷ ବି ଦଣ୍ଡ ପାଉଛି ।ଯଦି ଏବେଠୁ ନିଆଁକୁ ଆୟତ୍ତ କରା ନଯିବ ତେବେ ସ୍ଥିତି ଆହୁରି ସଙ୍ଗୀନ ହୋଇଯିବ ।

ଗଜପତି( ଦ କୁଇଭର ):- ପୁଣି ଜନନୀ ଯନ୍ତ୍ରଣା,ଗାଁ କୁ ରାସ୍ତା ନଥିବା ଯୋଗୁଁ ଯାଇପାରିଲାନି ଆମ୍ବୁଲାନ୍ସ,ଫଳରେ ଜଣେ ଗର୍ଭବତୀ ମହିଳାଙ୍କୁ ପ୍ରାୟ ୨ କିଲୋମିଟର ଷ୍ଟ୍ରେଚର ରେ ବୋହି ଆଣିଲେ ଆମ୍ବୁଲାନ୍ସ କର୍ମଚାରୀ l ଏଭଳି ଅଭାବନୀୟ ଦୃଶ୍ୟ ଦେଖିବାକୁ ମିଳିଛି ଗଜପତି ଜିଲ୍ଲା ଅଡବା ଥାନା ପଦେର୍ମା ଗାଁରେ l ଗାଁର ଲକ୍ଷ୍ମୀ ମଲିକ ଙ୍କ ପ୍ରସବ ଯନ୍ତ୍ରଣା ହୋଇଥିଲା l ପରିବାର ଲୋକେ 108 ଆମ୍ବୁଲାନ୍ସ କୁ ଖବର ଦେଇଥିଲେ l ତେବେ ରାସ୍ତା ନଥିବା ଯୋଗୁଁ ଆମ୍ବୁଲାନ୍ସ ଗାଁ ଠାରୁ ପ୍ରାୟ ୨ କିଲୋମିଟର ପୂର୍ବରୁ ରହିଯାଇଥିଲା l ଆମ୍ବୁଲାନ୍ସ ଫାର୍ମାସିଷ୍ଟ ବିଦ୍ୟାଧର ସାହୁ ଓ କର୍ମଚାରୀ ଷ୍ଟ୍ରେଚର ଧରି ଚାଲି ଚାଲି ଗାଁ ରେ ପହଞ୍ଚିଥିଲେ l ପରିବାର ଲୋକଙ୍କ ସହାୟତା ରେ ଗର୍ଭବତୀ ମହିଳା ଲକ୍ଷ୍ମୀ ଙ୍କୁ ଷ୍ଟ୍ରେଚର ରେ ବୋହି ଆମ୍ବୁଲାନ୍ସ ପାଖକୁ ଆଣିଥିଲେ l ସେଠାରୁ ଆଣି ଅଡବା ମେଡିକାଲ ରେ ଭର୍ତ୍ତି କରିଥିଲେ l କିଛି ସମୟ ପରେ ଏକ ପୁତ୍ର ସନ୍ତାନ କୁ ଜନ୍ମ ଦେଇଥିଲେ ଲକ୍ଷ୍ମୀ l ବର୍ତମାନ ଉଭୟ ମା ଓ ନବଜାତ ଶିଶୁ ପୁତ୍ର ସୁସ୍ଥ ଥିବା ଜଣାପଡିଛି l

ଝାରସୁଗୁଡ଼ା(ଦ କୁଇଭର): ପୂର୍ବତନ ସ୍ୱାସ୍ଥ୍ୟମନ୍ତ୍ରୀ ସ୍ୱର୍ଗତ ନବ ଦାସଙ୍କ ହତ୍ୟା ପଛରେ କୋଲ ବ୍ଲକ ରାଜନୀତି ରହିଥିବା ଏବେ ପଦାକୁ ଆସିଲାଣି । କୋଲବ୍ଲକ ରାଜନୀତି ନେଇ ନବଙ୍କୁ ହତ୍ୟା କରାଯାଇଥିଲା ଦ କୁଇଭର ହିଁ କହିଥିଲା । ୮ମାସ ପୂର୍ବେ କୋଇଲା ବେପାରୀଙ୍କ ହାତ ଥିବା ବି ଦର୍ଶାଇଥିଲା କୁଇଭର ନୁ୍ୟଜ । ତଦନ୍ତକୁ ଦିଗହରା କରିବାକୁ କ୍ରାଇମବ୍ରାଞ୍ଚ ତକ୍ରାଳୀନ ନିଦେ୍ର୍ଦଶକଙ୍କ ଭୂମିକା ଉପରେ ପ୍ରଶ୍ନ ବି କରିଥିଲା । ଯାହା ଏବେ ରାଷ୍ଟ୍ର ହେଲାଣି । କୋଇଲା ବ୍ଲକ ପଛରେ କେଉଁ ଆଇଏଏସଙ୍କ ବନ୍ଧୁ ଥିବା କଥା ବି ପ୍ରଶ୍ନ ଉଠାଇଥିଲା । କୋଇଲା ବ୍ଲକ ଚାନ୍ଦା ଏବଂ ଆଇଏଏସଙ୍କ ବନ୍ଧୁଙ୍କୁ ନେଇ ପୂର୍ବତନ ସରକାରଙ୍କ ମୁଣ୍ଡିଆଳ ମାନଙ୍କ ସହ ହୋଇଥିଲା ବଡ଼ ଡିଲ । ଏହାରେ ନବଙ୍କୁ ହଟାଇବାକୁ କାଳେ କରାଯାଇଥିଲା ଯୋଜନା । ବମ୍ବେରୁ ସୁଟର ଡକାଯାଇଥିବା ବି ଚର୍ଚ୍ଚା ହୋଇଥିଲା ।

ନବ ଦାସଙ୍କ ହତ୍ୟା ଘଟଣାକୁ ଟିକେ ନିରୀକ୍ଷେଇ ଦେଖିଲେ ବହୁ ବଡ଼ ବଡ଼ ମୁଣ୍ଡଙ୍କ ଷଡ଼ଯନ୍ତ୍ର ଥିବା ସ୍ପଷ୍ଟ ହୋଇଯିବ । କୋଇଲା ବେପାରରୁ ଆସୁଥିବା ଚାନ୍ଦାରେ ନବଙ୍କର କାଳେ ଥିଲା ବଡ଼ ଭାଗ । ରାଜ୍ୟ ବାହାରର ଯେଉଁ ବି ବେପାରୀ ପଶୁଥିଲେ ନବ ହିଁ ଚାନ୍ଦା ନେଉଥିଲେ । ୨୦୨୦-୨୧ରେ ମହାରାଷ୍ଟ୍ରର ଏମିତି ଚାନ୍ଦା ନେବା ଭିତରେ ମହାରାଷ୍ଟ୍ରର ଜଣେ ବେପାରୀ କୋଇଲା ବେପାର ପାଇଁ ଆସିଥିଲେ । ତାଙ୍କ ଠାରୁ ୮୦କୋଟି ଟଙ୍କାର ଚାନ୍ଦା ପାଇଁ କାଳେ ଦାବି କରିଥିଲେ ନବ । ସମ୍ପୃକ୍ତ ବେପାରୀ ତକ୍ରାଳୀନ ତୃତୀୟ ମହଲା କୋଟେରୀର ଖାସ ଆଇଏଏସଙ୍କ ବନ୍ଧୁ ଥିଲେ । ସେଠାର କଥା ପହଞ୍ଚିବା ପରେ ହଲଚଲ ହେଲା ତୃତୀୟ ମହଲା ।

ନବଙ୍କ କୋଇଲା ଚାନ୍ଦାର ପରିମାଣ ନଜରକୁ ଆସିଲା । ତୃତୀୟ ମହଲାର କିଛି ବାବୁ ଓ ତାଙ୍କ ବୋକଚା ବୁହା ଯୁବ ନେତା ଦୌଡ଼ିଲେ ଝାରସୁଗୁଡ଼ା । ନବଙ୍କ ସହ କଥା ବାର୍ତ୍ତା ବେଳେ ଗରମା ଗରମି ହେଲା । ପରେ ନବ ଆସିଲେ ରାଜଧାନୀ । ଏଠାରେ ଭିତିରି ଆଲୋଚନା ହେଲା । କଥା କାଳେ ନବୀନ ନିବାସ ଯାଏ ବି ଯାଇଥିଲା । ଶେଷରେ ବେପାରୀଙ୍କ ଠୁ ଚାନ୍ଦା ନନେବାକୁ ନବଙ୍କୁ କୁହାଗଲା । ନବ ବି ରୋକ ଠୋକ ଶୁଣାଇ ଦେଲେ ଯଦି ଚାନ୍ଦା ନେବିନି, ତେବେ ପାଟିରୁ ଫେଡ଼ି ଦେବି । କଥା ପୂରା ଟକ୍କରକୁ ଆସିଗଲା । ତୃତୀୟ ମହଲାକୁ ନବଙ୍କ ଚ୍ୟାଲେଞ୍ଜ ମଞ୍ଜ ଦୋହଲାଇ ଦେଇଥିବା ସେତେବେଳେ ଚର୍ଚ୍ଚା ହେଲା ।

ଏହାପରେ ନା ନବ ଚୁପ ବସିଲେ, ନା କୋଟେରୀ । ନବ ବିଜେଡିକୁ ବିଭାଜନ କରି ପଶ୍ଚିମ ଓଡ଼ିଶା ଗୋଷ୍ଠୀ ଗଠନରେ ଲାଗିଥିବା କୁହାଗଲା । ଏପରିକି ବିଜେଡିର ପଶ୍ଚିମ ଓଡ଼ଶାକୁ ଭାଗ କରି ସେ ବିଜେପିକୁ ଡେଇଁବେ ବୋଲି ବି ଚର୍ଚ୍ଚା ହେଲା । ସେ ପୂରା ଜୋରରେ ଲାଗିଗଲେ । ଏ ଖବର ବି କୋଟେରୀ ପାଖରେ କାଳେ ପହଞ୍ଚିଲା । ବେପାର ଓ ରାଜନୀତି ଦୁଇ ଆଡ଼ୁ ନବ ବିପଦ ହେଉଥିବାରୁ ରାସ୍ତା ସଫା ପାଇଁ ଯୋଜନା ହୋଇଥିବା ଚର୍ଚ୍ଚା ହେଲା । ରାସ୍ତା ସଫା କରିବା ପୂର୍ବରୁ ତଦନ୍ତକୁ କିପରି ସଫା କରାଯିବ ତାହାର ଯୋଜନା ଆଗ ହେଲା । କିଛି ବରିଷ୍ଠ ଆଇଏଏସ ଓ ଆଇପିଏସ କାଳେ ସବୁ ପ୍ଲାନ କରିଥିଲେ । ଏହାପରେ ବେପାରୀଙ୍କ ଲିଙ୍କରେ ମହାରାଷ୍ଟ୍ରରୁ ଆସିଥିଲା ସାର୍ଫ ସୁଟର । ଏଏସଆଇ ଗୋପାଳ ଦାସଙ୍କୁ କେବଳ ମୋହରା କରାଯାଇଥିଲା । ପୂରା ପ୍ଲାନ ଅନୁଯାୟୀ କାମ ହୋଇଗଲା । ତଦନ୍ତକୁ ବାଟବଣା କରିବା ପାଇଁ ମୃତ ନବଙ୍କ ଅପରେସନ ଠାରୁ ପ୍ରମାଣ ନଷ୍ଟ ଏବଂ ଅନ୍ୟାନ୍ୟ କାମ ସବୁ କରିଦିଆଗଲା ।

ଏବେ କଂଗ୍ରେସ ନେତା ସନ୍ତୋଷ ସିଂ ସାଲୁଜା କୋଇଲା ବ୍ଲକ କଥା କହିଲେଣି । ସ୍ୱର୍ଗତ ନବ କାଳେ ତାଙ୍କୁ କୋଇଲା ବ୍ଲକରୁ ହଟିବାକୁ କୁହାଯାଉଥିବା କହିଥିଲେ । ଯାହା ୮ମାସ ପୂର୍ବେ କୁଇଭର ନୁ୍ୟଜ କୋଇଲା ବେପାର କଥା ଉଠାଇଥିଲା । ମାତ୍ର ସେତେବେଳେ ସମସ୍ତେ ଚୁପ ରହିଗଲେ । ତୃତୀୟ ମହଲାର ଚାପ ସମସ୍ତଙ୍କ ପାଟି ବନ୍ଦ କରିଥିଲା । ନୀରପେକ୍ଷ ସ୍ୱର ଉଠାଉଥିବା ଦ କୁଇଭର ହିଁ ଅସଲ କଥା କୋଲିଥିଲା । ଯାହା ଏବେ ସାଲୁଜା କହିଛନ୍ତି । ତଦନ୍ତରେ କୋଇଲା ବେପାର ଓ ଆଇଏଏସ ଏବଂ ରାଜନେତା ମାନଙ୍କୁ ସମ୍ପୃକ୍ତ କରିଥିଲେ ଅନେକ ରହସ୍ୟ ପଦାକୁ ଆସିଥାନ୍ତା । ଦେଖାଯାଉ ସରକାର ଏସବୁ ଅସାମଞ୍ଜସ୍ୟକୁ ଦେଖି ସିବିଆଇ ତଦନ୍ତ ନିଦେ୍ର୍ଦଶ ଦେଉଛନ୍ତି ନା କଥାକୁ ଗୋଳେଇ ଦେଉଛନ୍ତି?

ଦ କୁଇଭର ବ୍ୟୁରୋ :-:ଭାରତର ୭୬ତମ ସାଧାରଣତନ୍ତ୍ର ଦିବସ ପାଖଇେ ଆସୁଛି। ହାତରେ ଆଉ ୪ ଦିନ ସମୟ ଥିବାରୁ ଏହି ଗଣପର୍ବ ପାଇଁ ସରକାର ଓ ପ୍ରଶାସନ ପ୍ରସ୍ତୁତିକୁ ଜୋରଦାର କରିଦେଇଛନ୍ତି। ଜାତୀୟ ପର୍ବ ପାଇଁ ଦିଲ୍ଲୀରୁ ପଲ୍ଲୀ ଯାଏଁ ପ୍ରସ୍ତୁତି ଚାଲିଛି। ସାଧାରଣତନ୍ତ୍ର ଦିବସକୁ ମହାସମାରୋହରେ ପାଳନ କରିବାକୁ ଓଡ଼ିଶା ସରକାର ମଧ୍ୟ ପ୍ରସ୍ତୁତି ଜାରି ରଖିଛନ୍ତି। ଭୁବନେଶ୍ବରରେ ଆୟୋଜିତ ରାଜ୍ୟସ୍ତରୀୟ ସମାରୋହରେ ରାଜ୍ୟପାଳ ପତାକା ଉତ୍ତୋଳନ କରିବେ। ଜିଲ୍ଲା ମୁଖ୍ୟାଳୟରେ କେଉଁମାନେ ପତାକା ଉତ୍ତୋଳନ କରିବେ ସେନେଇ ରାଜ୍ୟ ସରକାର ବିଜ୍ଞପ୍ତି ପ୍ରକାଶ କରିଛନ୍ତି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କଟକରେ ଆୟୋଜିତ ସାଧାରଣତନ୍ତ୍ର ଦିବସରେ ପତାକା ଉତ୍ତୋଳନ କରିବେ। ଏହି ଅବସରରେ ସେ ସାଧାରଣ ଜନତାଙ୍କୁ ସମ୍ବୋଧିତ କରିବେ। ପୁରୀରେ ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ ଏବଂ ଖୋର୍ଦ୍ଧାରେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ପତାକା ଉତ୍ତୋଳନ କରିବେ।

ସେହିପରି ସୁନ୍ଦରଗଡ଼ରେ ରାଜସ୍ବ ମନ୍ତ୍ରୀ ସୁରେଶ ପୂଜାରୀ, ସୁବର୍ଣ୍ଣପୁର ଜିଲ୍ଲା ସଦର ମହକୁମା ‌ସୋନପୁରରେ ପଞ୍ଚାୟତିରାଜ ମନ୍ତ୍ରୀ ରବି ନାରାୟଣ ନାଏକ, କୋରାପୁୁଟରେ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ, ଜଗତସିଂହପୁୁରରେ ଖାଦ୍ୟ ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର, ଯାଜପୁରରେ ଆଇନ୍‌ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ, ରାୟଗଡ଼ାରେ ସ୍ବାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ, ଗଜପତିରେ ଖଣିମନ୍ତ୍ରୀ ବିଭୂତି ଭୂଷଣ ଜେନା, ବାଲେଶ୍ବରରେ ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର, କେନ୍ଦୁଝରରେ ଶ୍ରମମନ୍ତ୍ରୀ ଗଣେଶ ରାମ ସିଂ ଖୁୁଣ୍ଟିଆ, ନୂଆପଡ଼ାରେ ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ, ଢେଙ୍କାନାଳରେ ସମବାୟ ମନ୍ତ୍ରୀ ପ୍ରଦୀପ ବଳ ସାମନ୍ତ, ମାଲକାନଗିରିରେ ମତ୍ସ୍ୟ ଏବଂ ପଶୁ ସମ୍ପଦ ବିକାଶ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ ଓ ନୟାଗଡ଼ରେ ଶିଳ୍ପମନ୍ତ୍ରୀ ସମ୍ପଦ ଚନ୍ଦ୍ର ସ୍ବାଇଁ ପତାକା ଉତ୍ତୋଳନ କରିବେ। କେନ୍ଦ୍ରାପଡ଼ା, ବ୍ରହ୍ମପୁର ଓ ରାଉରକେଲରେ ଆରଡିସି ପତାକା ଉତ୍ତୋଳନ କରିବେ। ସେହିପରି ଅନୁଗୁଳ, ବାରିପଦା, ବରଗଡ଼, ଗଦ୍ରକ, ବଲାଙ୍ଗୀର,, ବୌଦ୍ଧ, ଦେବଗଡ଼, ଛତ୍ରପୁର, ଝାରସୁଗୁଡ଼ା, କଳାହାଣ୍ଡି, ନବରଙ୍ଗପୁର, ସମ୍ବଲପୁର ଓ ଫୁଲବାଣୀରେ ଉକ୍ତ ଜିଲ୍ଲାର ଜିଲ୍ଲାପାଳମାନେ ପତାକା ଉତ୍ତୋଳନ କରିବେ।

ବ୍ରହ୍ମପୁର( ଦ କୁଇଭର ):- ବ୍ରହ୍ମପୁର ବନଖଣ୍ଡ ଅଧିନସ୍ଥ କୁକୁଡାଖଣ୍ଡି ବ୍ଲକ ଦକ୍ଷିଣପୁର ଜଳ ଭଣ୍ଡାରରେ ପ୍ରଥମ କରି ବିଦେଶାଗତ ପକ୍ଷୀଙ୍କ ଆଗମନ ହୋଇଛି l ବିଦେଶାଗତ ପକ୍ଷୀଙ୍କ ମଧ୍ୟରେ ଇଉରେସିଆନ କୁଟ ବା ଜୁଇ କଇମ,ରେଡ କ୍ରିଏଷ୍ଟାଡ ପୋଚାର୍ଡ ବା ରଙ୍ଗା ଗେଣ୍ଡି,ଗଡ଼ ୱାଲ ବା ମାଟିଆ ଗେଣ୍ଡି ଥିବା ଚିହ୍ନଟ ହୋଇଛି l ସାଇବେରିଆ ବିଦେଶାଗତ ପକ୍ଷୀ ମାନେ ଦଳ ଦଳ ହୋଇ ଖାଦ୍ୟ ଅନ୍ୱେଷଣରେ ଜଳ ଭଣ୍ଡାରରେ ବୁଲୁଛନ୍ତି l

ପୂର୍ବରୁ ଦକ୍ଷିଣପୁର ଜଳ ଭଣ୍ଡାରରେ ବ୍ରହ୍ମପୁରକୁ ଜଳ ଯୋଗାଣ ନିମନ୍ତେ ବର୍ଷ ସାରା ଜଳ ପରିପୂର୍ଣ୍ଣ ରହୁଥିଲା କିନ୍ତୁ କିଛି ବର୍ଷ ହେବ ଯାନିବିଲରୁ ପାଇପ ଯୋଗେ ଜଳ ଯୋଗାଣ ହୋଇଥିବାରୁ ଅପେକ୍ଷାକୃତ ଜଳ ସ୍ତର କମ ରହୁଛି ତେଣୁ ଶୈବାଳ ଓ ଜଳଜ କୀଟ ବୃଦ୍ଧିରେ ସହାୟକ ହେଉଛି ଯାହାକି ବିଦେଶୀ ପକ୍ଷୀଙ୍କୁ ଆକୃଷ୍ଟ କରୁଛି ବୋଲି ପରିବେଶପ୍ରେମୀ ତଥା ଆଞ୍ଚଳିକ ବିକାଶ ପରିଷଦର ସଭାପତି ସାଗର କୁମାର ପାତ୍ର ପ୍ରକାଶ କରିଛନ୍ତି l

ପୂର୍ବରୁ ଏହାର ନିକଟବର୍ତ୍ତୀ ଅଞ୍ଚଳରେ ଗ୍ଲୋସି ଆଇବିଶ ଓ ବ୍ଲାକ ହେଡେଡ ଆଇବିଶ ଦେଖିବାକୁ ମଧ୍ୟ ମିଳିଛି ଯାହାକି ଅଞ୍ଚଳବାସୀଙ୍କ ପାଇଁ ଖୁସି ଖବର l ତେବେ ଆସୁଥିବା ପକ୍ଷୀଙ୍କ ସୁରକ୍ଷା ପାଇଁ ବନ ବିଭାଗ ପେଟ୍ରୋଲିଂ ସହ ଲୋକଙ୍କୁ ସଚେତନତା କଲେ ଆସନ୍ତା ବର୍ଷ ଏମାନଙ୍କ ସଂଖ୍ୟା ବୃଦ୍ଧି ପାଇବ ବୋଲି ସ୍ଥାନୀୟ ବାସିନ୍ଦା ନଳିନୀ କାନ୍ତ ପରିଡା କହିଛନ୍ତି l

ଦ କୁଇଭର ବ୍ୟୁରୋ :-:ଓଡ଼ିଶା ବାହାରର ମହିଳାଙ୍କୁ ମିଳିବ ସୁଭଦ୍ରା ଯୋଜନା । ଏନେଇ ରାଜ୍ୟ ସରକାର ଯୋଜନା କରିଛନ୍ତି । ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡାଙ୍କ ସୂଚନା । ରାଜ୍ୟ ବାହାରେ ଥିବା ମହିଳାମାନେ ବି ସୁଭଦ୍ରା ଯୋଜନାରେ ସାମିଲ ହେବେ । ଅନେକ ଓଡ଼ିଆ ମହିଳା ରାଜ୍ୟ ବାହାରେ ଅଛନ୍ତି । ସେମାନେ ସୁଭଦ୍ରା ଯୋଜନାରେ ଆବେଦନ କରିପାରିନାହାନ୍ତି । ଜିଲ୍ଲା ସ୍ଥରୀୟ ସମୀକ୍ଷାରେ ଏଭଳି ତଥ୍ୟ ଆସିଛି । ଓଡ଼ିଶା ବାହାରେ ଯେତିକି ମହିଳା ଅଛନ୍ତି ବା ସୁଭଦ୍ରା ପାଇଁ ଯୋଗ୍ୟ ହିତାଧିକାରୀ ଅଛନ୍ତି । ଆବେଦନ ସେତିକି କରିନାହାନ୍ତି । ତଥ୍ୟର ଅନୁସରଣ ପରେ ଜଣା ପଡୁଛି ରାଜ୍ୟ ବାହାରେ ଥିବା ଓଡ଼ିଆ ମହିଳା ମାନେ ସୁଭଦ୍ରା ଯୋଜନାରେ ଆବେଦନ କରିନାହାନ୍ତି । ସେମାନଙ୍କୁ ଅନୁରୋଧ କରାଯାଉଛି ସେମାନେ ଏହି ଯୋଜନାରେ ଆବେଦନ କରନ୍ତୁ । ଆଉ ସୁଭଦ୍ରା ଯୋଜନାର ସହାୟତା ନିଅନ୍ତୁ । ରାଜ୍ୟ ବାହାରେ ଯାଇ ମୂଲ ମଜୁରୀ ଲାଗିବା ପରିବର୍ତ୍ତେ ସୁଭଦ୍ରା ଅର୍ଥରେ ଯଦି ଉଦ୍ୟୋଗୀକ ବିକାଶ କରିପାରିବେ ତାହା ରାଜ୍ୟ ଏବଂ ମହିଳାମାନଙ୍କର ବିକାଶକୁ ତ୍ୱରାନ୍ୱିତ କରିପାରିବ । ସେଥି ପାଇଁ ଉପମୁଖ୍ୟମନ୍ତ୍ରୀ ରାଜ୍ୟ ବାହାରେ ଥିବା ଓଡ଼ିଆ ମହିଳାମାନଙ୍କୁ ସୁଭଦ୍ରା ଯୋଜନାରେ ସାମିଲ କରିବା ପାଇଁ ପଦକ୍ଷେପ ନେଇଥିବା କହିଛନ୍ତି ।