ଦିଶିଲେଣି ସାଧବ ବୋହୁ : ଆରମ୍ଭ ହେଲାଣି ଚାଷ

ବ୍ରହ୍ମପୁର( ଦ କୁଇଭର ):- ବ୍ରହ୍ମପୁର ଏମକେସିଜି ମେଡିକାଲ ରୁ ଲଗାତାର ଭାବେ ଚୋରି କରୁଥିବା ମୋବାଇଲ ଚୋର କୁ ଗିରଫ କରିଛି ବୈଦ୍ୟନାଥପୂର୍ ଥାନା ପୋଲିସ । ତା ପରେ ନିକଟରୁ ୩୪ଟି ଚୋରି ମୋବାଇଲ କୁ ଜବତ କରିଛି ପୋଲିସ। ଗିରଫ ଯୁବକ ଜଣକ ହେଲେ ଦିଗପହଣ୍ଡି ଥାନା ଅନ୍ତର୍ଗତ ଗୋକର୍ଣାପୁର ଗ୍ରାମର ଏଲ୍ ଶିବା ରେଡ୍ଡୀ। ଶିବା ଏମକେସିଜି ହସ୍ପିଟାଲ ର ଶିଶୁ ବିଭାଗ କୋଠା ରୁ ଜଣେ ସମ୍ପର୍କୀୟ ଙ୍କ ମୋବାଇଲ ଚୋରି କରୁଥିବା ବେଳେ ପୋଲିସ ହାତରେ ଧରା ପଡ଼ିଥିଲା । ଶିବା ବିଭିନ୍ନ ସମୟରେ ଏମକେସିଜି ହସ୍ପିଟାଲର ବିଭିନ୍ନ ବିଭାଗ କୋଠରୀରୁ ରୋଗି ଓ ତାଙ୍କ ସମ୍ପର୍କୀୟ ଙ୍କ ମୋବାଇଲ ଚୋରି କରି ନେଉଥିଲା । ଚୋରି କରିବା ପରେ ସେହି ମୋବାଇଲ ଗୁଡ଼ିକୁ ମେଡିକାଲ୍ କଲେଜ ଖେଳ ପଡିଆ ନିକଟରେ କମ୍ ଦରରେ ବିକ୍ରୟ କରୁଥିଲା ବୋଲି ବ୍ରହ୍ମପୁର ଏସ ପି ଡ଼ା, ଶ୍ରବଣା ବିବେକ ଏମ୍ ସୂଚନା ପ୍ରଦାନ କରିଛନ୍ତି।

ବ୍ରହ୍ମପୁର( ଦ କୁଇଭର ):- ବ୍ରହ୍ମପୁର ସ୍ଥିତ ସରକାରୀ ଆଇଟିଆଇ ହଷ୍ଟେଲ ଛାତ୍ରୀଙ୍କ ସନ୍ଦେହ ଜନକ ମୃତ୍ୟୁ। ଛାତ୍ରୀ ଜଣକ ଗଞ୍ଜାମ ଜିଲ୍ଲା ସୋରଡ଼ା ନିକଟସ୍ଥ ଗୋଛାବାଡ଼ି ଅଞ୍ଚଳ ର ରୂପାଲି ନାୟକ। ସରକାରୀ ଆଇଟିଆଇ ର କମ୍ପ୍ୟୁଟର ବିଭାଗର ଡିପ୍ଲୋମା ଛାତ୍ରୀ ଭାବେ ପଡ଼ୁଥିବା ବେଳେ ପଲିଟେକନିକ୍ ଲେଡିସ ହଷ୍ଟେଲ ରେ ରହୁଥିଲେ। ଆଜି ସନ୍ଧ୍ୟାରେ ଅସୁସ୍ଥତା ଅନୁଭବ କରିବା ଯୋଗୁଁ ରୂପାଲି ଙ୍କୁ ଏମ୍ କେ ସି ଜି ମେଡିକାଲ ରେ ଭର୍ତ୍ତି କରାଯାଇଥିଲା। ତେବେ ରାତିରେ ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି।

ଦ କୁଇଭର ବ୍ୟୁରୋ :- ଆସନ୍ତା ମାସ ୩ ତାରିଖରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଭୁବନେଶ୍ବରରେ ପହଞ୍ଚିବେ। ନୂଆଦିଲ୍ଲୀରୁ ଏକ ସ୍ବତନ୍ତ୍ର ବିମାନ ଯୋଗେ ଆସି ୩ ତାରିଖରେ ସେ ଭୁବନେଶ୍ବର ବିଜୁ ପଟ୍ଟନାୟକ ବିମାନ ବନ୍ଦର ଅବତରଣ କରିବେ ବୋଲି ତାଙ୍କ ଗସ୍ତ ସୂଚୀରୁ ଜଣାପଡ଼ିଛି। ୩ରୁ ୭ ତାରିଖ ଯାଏ ସେ ଓଡ଼ିଶା ଗସ୍ତରେ ରହିବେ। ୪ ତାରିଖ ଦିନ ରାଷ୍ଟ୍ରପତି ଦ୍ରୌପଦୀ ମୁର୍ମୁ ନେଭି ଡେ କାର୍ଯ୍ୟକ୍ରମରେ ଯୋଗ ଦେବେ। ୫ ତାରିଖରେ ରାଷ୍ଟ୍ରପତି ଭୁବନେଶ୍ବର କୋର୍ଟର ନୂଆ ବିଲ୍ଡିଂ ଉଦଘାଟନ କରିବାର କାର୍ଯ୍ୟକ୍ରମ ରହିଛି।ଡିସେମ୍ବର ୬ ତାରିଖରେ ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଗସ୍ତରେ ଆସିବେ ରାଷ୍ଟ୍ରପତି ଦ୍ରୌପଦୀ ମୁର୍ମୁ। କାର୍ଯ୍ୟକ୍ରମ ସୂଚନା ଅନୁସାରେ, ଭୁବନେଶ୍ବର ଓ ପୁରୀରେ ବିଭିନ୍ନ କାର୍ଯ୍ୟକ୍ରମରେ ୩ ଦିନ ଧରି ରାଷ୍ଟ୍ରପତି ଶ୍ରୀମତୀ ମୁର୍ମୁ ଯୋଗଦେବା ପରେ ୬ ତାରିଖରେ ବିଜୁ ପଟ୍ଟନାୟକ ବିମାନ ବନ୍ଦରରୁ ବିମାନ ଯୋଗେ ପଶ୍ଚିମବଙ୍ଗରେ ଥିବା ପ୍ରତିରକ୍ଷା ବିଭାଗ କଲେଇକୁଣ୍ତା ବିମାନ ବନ୍ଦରରେ ପହଞ୍ଚିବେ। ସେଠାରୁ ସେ ସ୍ବତନ୍ତ୍ର ହେଲିକେପ୍ଟର ଯୋଗେ ମୟୂରଭଞ୍ଜ ଜିଲ୍ଲା କୁସୁମୀ ବ୍ଲକ୍ ରଙ୍ଗାମାଟିଆ ଅସ୍ଥାୟୀ ହେଲିପ୍ୟାଡ୍ରେ ଅବତରଣ କରି ସଡ଼କ ପଥରେ ନିଜ ଜନ୍ମମାଟି ଉପରବେଡ଼ା ଗାଁକୁ ଯିବେ। ୭ ତାରିଖ ସକାଳେ କିଛି ଭିତ୍ତିପ୍ରସ୍ତର ସ୍ଥାପନ କରିବା ପରେ କଲେଇକୁଣ୍ତା ବିମାନ ବନ୍ଦରରୁ ସ୍ବତନ୍ତ୍ର ବିମାନ ଯୋଗେ ଦିଲ୍ଲୀ ଫେରିଯିବାର କାର୍ଯ୍ୟକ୍ରମ ରହିଛି।

ନୂଆଦିଲ୍ଲୀ(ଦ କୁଇଭର): ପ୍ରଦୂଷଣ ପାଇଁ ଜବାହାରଲାଲ ନେହେରୁ ବିଶ୍ୱବିଦ୍ୟାଳୟ ବା ଜେଏନୟୁର ପ୍ରତ୍ୟେକ୍ଷ ପାଠପଢ଼ା ବନ୍ଦ କରାଯାଇଛି । ଛାତ୍ରଛାତ୍ରୀମାନେ ଅନଲାଇନରେ କ୍ଲାସ କରିବେ । ସ୍କୁଲ ବନ୍ଦ କରାଯାଇଛି । ଯାନବାହନ ଚଳାଚଳରେ କଡ଼ା କଟକଣା ଲାଗିଛି । ଏଭଳି ସ୍ଥିତି ହେଉଛି ଭାରତର ରାଜଧାନୀ ବା ମୁଣ୍ଡ କୁହାଯାଉଥିବା ଦିଲ୍ଲୀରେ । ଦିଲ୍ଲୀକୁ ଅଣନିଶ୍ୱାସୀ କରିଦେଲାଣି ପ୍ରଦୂଷଣ । ପୂରା ଦେଶର ମୁଣ୍ଡ ବିନ୍ଧା ବି ବାହାର କରିଦେଲାଣି । କେବଳ ସେତିକି ନୁହେଁ, ପ୍ରଦୂଷଣ ଯୋଗୁ ହରିଆଣାର ଅନେକ ସ୍ଥାନରେ ସ୍କୁଲ ବନ୍ଦ କରାଯାଇଛି । ପଞ୍ଜାବ ସ୍ଥିତି ବି ଗମ୍ଭୀର । ଉତ୍ତରପ୍ରଦେଶ ଆଲିଗଡ଼ରେ ଏପରି ଧୂଆଁ ଛାଇଛି ଯେ, ଦିନ ବି ରାତି ଭଳି ଲାଗୁଛି । ପୂରା ସ୍ଥିତି ଗମ୍ଭୀର ହେଲାଣି । କେବଳ ସେଠି ନୁହେଁ, ଓଡ଼ିଶାର ସ୍ଥିତି ବି ସୁରକ୍ଷିତ ନୁହେଁ । ରାଜଧାନୀରେ ପ୍ରଦୂଷଣ ମାତ୍ରା ଯଥେଷ୍ଟ ଅଧିକ । ଅନୁଗୁଳ, ଯାଜପୁର, ଝାରସୁଗୁଡ଼ା, ସୁନ୍ଦରଗଡ଼, କେନ୍ଦୁଝର, ଜଗତସିଂହପୁର ଭଳି ଜିଲ୍ଲା ସ୍ଥିତି ଗମ୍ଭୀର ।

ପ୍ରଦୂଷଣ ନେଇ ବେଶ କିଛିବର୍ଷରୁ ଅନେକ କହୁଥିଲେ । ପ୍ରଦୂଷଣର ଭୟ କଥା କହୁଥିଲେ । ହେଲେ ଆମେ ଏତେ ଖାମଖିଆଲି ହେଲେ ଯେ, ସେସବୁକୁ ନଜର ଦେଲେ ନାହିଁ । ଏବେ ବି ନଜର ଦିଆଯାଉ ନାହିଁ । ପ୍ରଦୂଷଣ ନିୟନ୍ତ୍ରଣ ପାଇଁ ଥିବା ପ୍ରଶାସନିକ ବ୍ୟବସ୍ଥା ପ୍ରଦୂଷଣକାରୀଙ୍କ ଆଗରେ ବିକି୍ର ହୋଇ ସାରା ଦେଶକୁ ବରବାଦ କରୁଛନ୍ତି । ଅନଭିଜ୍ଞ ରାଜନେତା ଓ ଟଙ୍କା ଗିଳା ଅଫିସରଙ୍କ ପାଇଁ ସବୁ ବ୍ୟବସ୍ଥା ଠପ ହୋଇଗଲାଣି । ଘର ବୁଡ଼ି ଏବେ ପାଣି ଆଣ୍ଠୁଏ ହେଲାଣି । ପୂରା ଦେଶର ମୁଣ୍ଡ ବିନ୍ଧିଲାଣି । ଦଲାଲ ଅଫିସର ଓ ନେତା ମାନଙ୍କ ପାଇଁ ସବୁ ସ୍ଥିତି ବିଗିଡ଼ି ଗଲାଣି ।

ଦିଲ୍ଲୀ ଯାହାକୁ ଭାରତର ମୁଣ୍ଡ କୁହାଯାଏ, ସେଠାରେ ସ୍ଥିତି ସଂଗୀନ । ଲୋକେ ବାହାରକୁ ବାହାରିବାକୁ ବି ଡରୁଛନ୍ତି । ପବନର ମାନ ସବୁଠାରୁ ଖରାପ ହେଲାଣି । ବିଗତ ୫/୭ବର୍ଷ ଧରି ଦିଲ୍ଲୀର ଏହି ସ୍ଥିତି ରହିଥିଲା । ଏବର୍ଷ ଦିଲ୍ଲୀର ଏୟାର କ୍ୱାଲିଟି ଇଣ୍ଡେକ୍ସ ୫୦୦ ଅତିକ୍ରମ କଲାଣି । ଏବେ ଏହା ହରିଆଣା, ପଞ୍ଜାବ, ଉତ୍ତରପ୍ରଦେଶ, ମଧ୍ୟପ୍ରଦେଶକୁ ମାଡ଼ିଗଲାଣି । ଧିରେ ଧିରେ ପୂରା ଦେଶକୁ ଗିଳିବାକୁ ଯାଉଛି । ଓଡ଼ିଶା ସ୍ଥିତି ନକହିବା ଭଲ । ପ୍ରଦୂଷଣ ନିୟନ୍ତ୍ରଣ ବୋର୍ଡର ଦଲାଲ ଅଧିକାରୀମାନେ ଟଙ୍କା ଗିଳି କାଗଜପତ୍ରରେ ପ୍ରଦୂଷଣ ନିୟନ୍ତ୍ରଣରେ ରହିଥିବା କହୁଛନ୍ତି । ମାତ୍ର ବାସ୍ତବ ସ୍ଥିତି ଅତି ଭୟଙ୍କର । ନେତା ମାନେ ଟଙ୍କା ଖାଇ ଶିଳ୍ପ ମାନଙ୍କୁ ସୁରକ୍ଷା ଦେଉଛନ୍ତି ଅଫିସରମାନେ କାଗଜପତ୍ରରେ ରାଜ୍ୟ ସୁରକ୍ଷିତ ବୋଲି କହୁଛନ୍ତି ।

ଓଡ଼ିଶା ଉପରେ ନଜର ପକାଇଲେ ସ୍ଥିତି ଗମ୍ଭୀର ବୋଲି ସ୍ପଷ୍ଟ ହେଉଛି । ଥରେ ରାଜ୍ୟରେ ଥିବା ଶିଳ୍ପ ମାନଙ୍କର ପ୍ରଦୂଷଣ ନେଇ ବାସ୍ତବ ମାପ କରାଗଲେ, ସବୁ ସ୍ଥିତି ପଦାକୁ ଆସିଯିବ । ରାଜଧାନୀର ପ୍ରଦୂଷଣ ଗମ୍ଭୀର । ଭୁବନେଶ୍ୱର ଏୟାର କ୍ୱାଲିଟି ଇଣ୍ଡେକ୍ସ ୩୦୦ ଅତିକ୍ରମ କରି ଯାଉଛି । ଅନୁଗୁଳ, ଢ଼େଙ୍କାନାଳ, ଝାରସୁଗୁଡ଼ା, ସମ୍ବଲପୁର, ସୁନ୍ଦରଗଡ଼, କେନ୍ଦୁଝର, ଜଗତସିଂହପୁର, ଖୋର୍ଦ୍ଧା, ଯାଜପୁର ଭଳି ଜିଲ୍ଲାର ଲୋକେ ପ୍ରତି ମୁହୂର୍ତ୍ତରେ ବିଷ ପିଉଛନ୍ତି । ଏବେଠୁ ଏ ଟଙ୍କାଖିଆ ପ୍ରଦୂଷଣ ବୋର୍ଡର ବାବୁ ମାନଙ୍କୁ ଉଚିତ ଶିକ୍ଷା ନଦେଲେ ଭୁବନେଶ୍ୱର ତଥା ରାଜ୍ୟର ପ୍ରତିଟି ସହର ଓ ଗାଁରେ ଦିଲ୍ଲୀ ଭଳି ସ୍ଥିତି ହେବା ନିଶ୍ଚିତ । ଦେଖାଯାଉ ପ୍ରଦୂଷଣକୁ ନେଇ କଡ଼ା ଆଭିମୁଖ୍ୟ ରଖୁଥିବା ମୋହନ ସରକାର ଏଦିଗରେ ସତର୍କ ହେଉଛନ୍ତି ନା ରାଜ୍ୟକୁ ବିଷ ବଳୟ ଭିତରକୁ ଠେଲୁଛନ୍ତି?

କଳାହାଣ୍ଡି( ଦ କୁଇଭର ):- କଳାହାଣ୍ଡି ଜିଲ୍ଲା ଧର୍ଗଗଡ ଗ୍ରାମ୍ୟ ଉନ୍ନୟନ ବିଭାଗର ଦୁର୍ନିତୀ ଚର୍ଚ୍ଚା ପରିସରକୁ ଆସିଛି। କଳାହାଣ୍ଡି ଜିଲ୍ଲା ଜୟପାଟଣା ବ୍ଲକ ଅନ୍ତର୍ଗତ ବଡ ଟେମରି, ଭାଲୁବୁଟୁରା ରାସ୍ତା ଏହାର ଏକ ଉଦାହରଣ। ରାସ୍ତା ନିର୍ମାଣ ର ୫ ମାସରେ ପିଚୁ ସବୁ ଉଠିଗଲାଣି। ଏହି ରାସ୍ତା କୁ ମୁଖ୍ଯମନ୍ତ୍ରୀ ସଡକ ଯୋଜନାରେ ସାମିଲ୍ କରାଯାଇ ୪ କିଲୋମିଟର ୧୦୦ ମିଟର ଦୁରତା ପାଇଁ ୨କୋଟି ୧୭ ଲକ୍ଷ୍ଯ ୬୩ ହଜାର ୯୬୨ ଟଂକା ରେ କାମ ହୋଇଥିଲା। ୨୮.୧୧.୨୦୨୩ରେ କାର୍ୟ୍ଯ ଆରମ୍ଭ ହୋଇ ୨୭.୫.୨୦୨୪ରେ ନିର୍ମାଣ କାର୍ଯ୍ୟ ଶେଷ ହୋଇଛି। ହେଲେ କାର୍ଯ୍ୟ ଆରମ୍ଭରୁ ଅତି ନିମ୍ନ ମାନର କାମ ହେବା ସହ ଅତି ନିମ୍ନମାନର ପିଚୁ, ମେଟାଳ, କଙ୍ଗକ୍ରିଟ ବ୍ୟବହାର ହୋଇଥିବା ନେଇ ସ୍ଥାନୀୟ ଲୋକେ ବିଭାଗର ଦ୍ରୁଷ୍ଟି ଆକର୍ଷଣ କରିଥିଲେ। ନିମ୍ନମାନର କାମ ଯୋଗୁଁ ରାସ୍ତା ନିର୍ମାଣର ଅଳ୍ପ ଦିନ ପରେ ସେଥିରୁ ପୁଳା ପୁଳା ପିଚୁ ଉଠିଯାଉଛି । ଏପରିକି ହାତରେ ଗୋଡରେ ଆଡେଇଲେ ପିଚୁ ସବୁ ଖୋଳି ହୋଇ ବାହାରି ଆସୁଛି। ହେଲେ ଆରଡି ବିଭାଗ ତାହାର ତଦାରଖ କରିବା ବଦଳରେ ଠିକାଦାର ଓ ଯନ୍ତ୍ରୀଙ୍କ ମଧୁ ଚନ୍ଦ୍ରିକାରେ ଦିନ ବଦଳରେ ରାତିରେ କାମ କରିବା ପାଇଁ ଠିକାଦାରକୁ ସହାନୁଭୂତି ଦେଖାଇ ଚୁପ୍ ରହିଥିଲେ। ଏହାପରେ ଠିକାଦାର ଜଣକ ନିଜ ମନ ମୁତାବକ କାମ ଆଗେଇ ନେଇଥିଲେ। ଏଣୁ ଅଳ୍ପ ଦିନ ମଧ୍ଯ ରେ ରାସ୍ତା ଫାଟି ଆଁ କଲାଣି। କେଉଁଠି ପିଚୁ ଉଠି ସାରିଥିବା ବେଲେ କେଉଁଠି ପିଚୁ ଫାଟି ଛୋଟବଡ଼ ଗାତ ସ୍ରୁଷ୍ଟି କରି ଦୁର୍ଘଟଣା ମାନ ହେଲାଣି। ତେବେ ବିଭାଗର ଅବହେଳା ଯୋଗୁ ବିଭାଗୀୟ ଅଧିକାରୀ ଯନ୍ତ୍ରୀ ଓ ଠିକାଦାର ଙ୍କ ମଧୁ ଚନ୍ଦ୍ରିକା ଯୋଗୁଁ ରାସ୍ତା ଏବେ ଅସ୍ତିତ୍ଵତ୍ୱ ହରାଇଥିବା ଅଂଚଳବାସୀ ଅଭିଯୋଗ କରିଛନ୍ତି। ଏନେଇ ଧର୍ଗଗଡ ଗ୍ରାମ୍ୟ ଉନ୍ନୟନ ବିଭାଗର ରାସ୍ତାରେ ଏଭଳି ଦୁର୍ନୀତି ସବୁଆଡ଼େ ଚର୍ଚ୍ଚାର ବିଷୟ ହୋଇଛି। ତେଣୁ ତୁରନ୍ତ ଜିଲ୍ଲା ପ୍ରଶାସନ ଏହି ରାସ୍ତା ପ୍ରତି ଦ୍ରୁଷ୍ଟି ଦେବାକୁ ଅଂଚଳବାସୀ ଦାବୀ କରିଛନ୍ତି।

ମାଲକାନଗିରି(ଦ କୁଇଭର): ପୋଲାଭରମ ପ୍ରକଳ୍ପକୁ ନେଇ ବେଶ ଉତ୍ସାହୀ ଆନ୍ଧ୍ର । ଉଭୟ ଆନ୍ଧ୍ର ସରକାର ଓ ଜନତା ଏଥିରୁ ପର୍ଯ୍ୟାପ୍ତ ଲାଭ ପାଇବେ ବୋଲି ଖୁସି ହେଉଛନ୍ତି । ହେଲେ ଆନ୍ଧ୍ର ଖୁସିରେ ବଳି ପଡ଼ିଯାଉଛି ଓଡ଼ିଆଙ୍କ ଜୀବନ ଜୀବିକା । ପୋଲାଭରମ ପ୍ରକଳ୍ପ ପାଇଁ ଓଡ଼ିଶାର ୭୩ଖଣ୍ଡ ଗାଁରେ ବିନାଶ ଆସିବା ନିଶ୍ଚିତ । ଏକଥା ଓଡ଼ିଶାର ସବୁ ଦଳର ନେତା ଜାଣନ୍ତି । ତଥାପି ଗରିବ ଆଦିବାସୀଙ୍କ ପାଇଁ ଦରଦ ନାହିଁ । ନା କେହି ପ୍ରଭାବିତ ଗାଁ କଥା ମନେ ପକାଉଛନ୍ତି ନା ପ୍ରତିକାର ପାଇଁ ଚିନ୍ତା କରୁଛନ୍ତି । ନବୀନ ୨୪ବର୍ଷ ଧରି କେବଳ ରାଜନୈତିକ ସୁବିଧା ପାଇଁ ବିରୋଧ ଓ ନୀରବ ରହି ଚାଲିଗଲେ । ଏବେ ମୋହନ ସରକାର ବି ନୀରବ ଅଛନ୍ତି । ଫଳରେ ଆନ୍ଧ୍ର ଉତ୍ସବ ପାଳନ କରୁଛି ଓ ଓଡ଼ିଆ କାନ୍ଧୁଛି ।

ଗୋଦାବରୀ ନଦୀ ଉପରେ ଆନ୍ଧ୍ର ନିର୍ମାଣ କରୁଛି ପୋଲାଭରମ ପ୍ରକଳ୍ପ । ଏହି ପ୍ରକଳ୍ପ ଦ୍ୱାରା ଓଡ଼ିଶାର ଗରିବ ଆଦିବାସୀଙ୍କର ବ୍ୟାପକ କ୍ଷତି ହେଉଛି । ଅନେକ ଘରଦ୍ୱାର, ଚାଷ ଜମି ବୁଡ଼ିବା ଥୟ । ଏକଥାକୁ ରାଜ୍ୟ ସରକାର ଜାଣିଛନ୍ତି । ହେଲେ କିଛି କରି ନାହାନ୍ତି । ରାଜ୍ୟରେ ଥିବା ପୂର୍ବତନ ନବୀନ ସରକାରଙ୍କ ନୀରବତା ପାଇଁ କେନ୍ଦ୍ରରେ ଥିବା କଂଗ୍ରେସ ସରକାର ଜାତୀୟ ପ୍ରକଳ୍ପ ଭାବେ ଅନୁମୋଦନ କରିଦେଇଛି । ଏହି ପ୍ରକଳ୍ପ ପାଇଁ ମୋଟ ୫୦ହଜାର କୋଟି ଟଙ୍କା ଖର୍ଚ୍ଚ ହୋଇଛି । ପ୍ରକଳ୍ପର ପୂରା ଲାଭ କେବଳ ଆନ୍ଧ୍ର ପାଇବାକୁ ଯାଉଛି । ହେଲେ କ୍ଷତି ସହିବ ଓଡ଼ିଶା ।

ଏହି ପ୍ରକଳ୍ପକୁ ନେଇ ଆନ୍ଧ୍ରର ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାୟିଡ଼ୁ ବେଶ ଉତ୍ସାହୀ । ଏହି ପ୍ରକଳ୍ପ ଦ୍ୱାରା ଆନ୍ଧ୍ରର ପ୍ରାୟ ସାଢ଼େ ୪ଲକ୍ଷ ହେକ୍ଟର ଚାଷ ଜମି ଜଳସେଚିତ ହେବ । ଏହାବ୍ୟତୀତ ଜଳବିଦୁ୍ୟତ ଉତ୍ପାଦନ ଦ୍ୱାରା ରାଜ୍ୟର ବିଜୁଳୀ ଚାହିଦା ବି ପୂରଣ ହେବ । ଏହି ପ୍ରକଳ୍ପ ଆନ୍ଧ୍ର ବିକାଶର ଚାବିକାଟି ବୋଲି କହିଛନ୍ତି ନାୟିଡ଼ୁ । ଏପରି ପ୍ରକଳ୍ପକୁ ନେଇ ପୂରା ଆନ୍ଧ୍ର ଏବେ ଖୁସି ଅଛି । ସମସ୍ତ ରାଜନୈତିକ ଦଳ ବି ବେଶ ଉତ୍ସାହି । ହେଲେ ଓଡ଼ିଶାର କ୍ଷତି କଥା କେହି ଉଠାଉ ନାହାନ୍ତି ।

କିଛିଦିନ ପୂର୍ବେ ବିଜେଡି ଓ କଂଗ୍ରେସ ଭିନ୍ନ ଭିନ୍ନ ଭାବେ ଯାଇ ପ୍ରଭାବିତ ଅଞ୍ଚଳ ପରିଦର୍ଶନ କରିଥିଲେ । ସମ୍ଭାବ୍ୟ କ୍ଷତିର ଆକଳନ କରି ରିପୋର୍ଟ ପ୍ରସ୍ତୁତ କରିଥିଲେ । ବିଜେଡି ତ ଏତେ ଅଲାଜୁକ ହୋଇଯାଇଥିଲା ଯେ, ୨୪ବର୍ଷ ଧରି ଶାସନ କରିଥିବା ନବୀନଙ୍କୁ ନେଇ ସମ୍ଭାବ୍ୟ କ୍ଷତିର ରିପୋର୍ଟ ପ୍ରଦାନ କରିଥିଲା । କଂଗ୍ରେସ ବି ରିପୋର୍ଟ ପ୍ରସ୍ତୁତ କରି ରଖିଛି । ହେଲେ ଏହି ପ୍ରସଙ୍ଗରେ କିଛି ବି ଆଉ ଆଗଉନାହିଁ । ଆନ୍ଧର ଏହି ପ୍ରକଳ୍ପ କାର୍ଯ୍ୟକ୍ଷମ ହେଲେ ଓଡ଼ିଶାର ମାଲକାନଗିରିରେ ଅନେକ ଗାଁ ପାଣିରେ ବୁଡ଼ିଯିବ । ପ୍ରତି ମୁହୂର୍ତ୍ତରେ ବିପଦ ଓଡ଼ିଶା ଉପରେ ରହିବ । ହେଲେ ଲାଭ ପାଇବ ଆନ୍ଧ୍ର । ଏପରି ସ୍ଥିତିରେ ଓଡ଼ିଶାର ସରକାର ଓ ବିରୋଧୀ ନୀରବ ରହିବା ଅତ୍ୟନ୍ତ ଚିନ୍ତାଜନକ ହୋଇ ପଡ଼ିଛି । ଦେଖାଯାଉ ଲୋକଙ୍କ ସରକାର କହୁଥିବା ମୋହନ ସରକାର ଏଦିଗରେ କିଛି କରୁଛନ୍ତି ନା ବିରୋଧୀ ଥିବା ବିଜେଡି ଓ କଂଗ୍ରେସ କିଛି ପଦକ୍ଷେପ ନେଉଛନ୍ତି?

ଭୁବନେଶ୍ୱର(ଦ କୁଇଭର): ରାଜ୍ୟର ପରିଚିତ ପ୍ରଶାସିକା ସୁଜାତା ଆର କାର୍ତ୍ତିକେୟନଙ୍କୁ ନେଇ ଏବେ ବଡ଼ ଚର୍ଚ୍ଚା ଚାଲିଛି । କେବଳ ପାୱାର କରିଡର ନୁହେଁ, ପ୍ରଶାସନିକ ସ୍ତରରେ ବି ଟୁପୁରୁ ଟାପର ଚାଲିଛି । ଆଉ ୭ ଦିନରେ ସୁଜାତାଙ୍କର ଛୁଟି ସରିବ । ଏହାପରେ ସେ କାର୍ଯ୍ୟରେ ଯୋଗଦେବା କଥା । ହେଲେ ସେ ଆସିବେ ତ? ଯଦି ଆସିବେ କେଉଁ ରୁପରେ ପ୍ରଶାସିକା ହୋଇ ଆସିବେ ନା ବିଜେଡିର ଅଫିସିଆଲ ନେତ୍ରୀ ହୋଇ ଆସିବେ? ଏ ଚର୍ଚ୍ଚା ଏବେ ଭିତରେ ଭିତରେ ଗୁମୁରୁଛି ।

ସୁଜାତା ଆର କାର୍ତ୍ତିକେୟନ ବା ବିଜେଡି ନେତା ଭିକେ ପାଣ୍ଡିଆନଙ୍କ ପତ୍ନୀ ସୁଜାତା ରାଉତ । ଦୀର୍ଘଦିନରୁ ସେ ବେଶ ବିବାଦୀୟ ହୋଇ ରହିଥିଲେ । ତାଙ୍କ ବିରୋଧରେ ସଂଗୀନ ଅଭିଯୋଗ ଆଣିଥିଲା ବିଜେପି । ନିର୍ବାଚନ ବେଳେ ସେ ପକ୍ଷପାତିତା କରୁଛନ୍ତି, ତାଙ୍କ ପ୍ରଶାସିକା କ୍ଷମତାକୁ ବିଜେଡି ପାଇଁ ନିୟୋଜିତ କରୁଛନ୍ତି । ଏମିତି ଅନେକ ଅଭିଯୋଗ ଆଣି ସୁଜାତାଙ୍କ ପ୍ରଶାସନିକ ଭାବମୂର୍ତ୍ତୀକୁ କଳଙ୍କମୟ କରିଦେଇଥିଲେ । ଏପରିକି ଅଭିଯୋଗ ସମ୍ପର୍କରେ ଯଥେଷ୍ଟ ପ୍ରମାଣ ପାଇବା ପରେ ନିର୍ବାଚନ କମିସନ ତାଙ୍କୁ ଦାୟିତ୍ୱରୁ ହଟାଇ ବିନା ଦାୟିତ୍ୱରେ ରଖିଥିଲେ । ମିଶନଶକ୍ତି ସଚିବ ପଦରୁ ହଟାଇ ଅର୍ଥ ବିଭାଗର ସ୍ୱତନ୍ତ୍ର ସଚିବ କରିଦେଲେ ସରକାର ।

ଏହାପରେ ତାଙ୍କ ପ୍ରତି ଅଡ଼ୁଆ ବଢ଼ିବା ସେ ବାସ୍ନା କାଳେ ବାରି ପାରିଲେ । ତେଣୁ ବିନା ବାଦଲରେ ବର୍ଷା ଭଳି ମାଟି୍ରକ ପରୀକ୍ଷା ସମୟ ହୋଇ ନଥିଲେ ମଧ୍ୟ ସେ ତାଙ୍କ ଝିଅର ପରୀକ୍ଷା ପ୍ରସ୍ତୁତି ଦର୍ଶାଇ ୧୮୦ଦିନ ଛୁଟିରେ ଚାଲିଗଲେ । ବିଜେଡି ସରକାର ଥିବା ବେଳେ କେହି କିଛି ଜାଣିବା ପୂର୍ବରୁ ସୁଜାତାଙ୍କର ଛୁଟି ୨୦୨୪ ମେ ୩୧ ତାରିଖ ଠାରୁ ୨୦୨୪ ନଭେମ୍ବର ୨୬ ପର୍ଯ୍ୟନ୍ତ ଅନୁମୋଦିତ ହୋଇଯାଇଥିଲା । ସର୍ବଭାରତୀୟ ସେବା ରୁଲ ୧୯୫୫ର ଧାରା ୧୮-ଘ ଅନୁଯାୟୀ ତାଙ୍କୁ ଏହି ଛୁଟି ଅନୁମୋଦନ କରାଯାଇଥିଲା । ତାଙ୍କ ଛୁଟି ସମ୍ପର୍କରେ ଜଣାପଡ଼ିବା ବେଳକୁ ସେ ଭାରତ ଛାଡ଼ି ଇଟାଲୀରେ ଥିଲେ । ବେଶ ଘଣ୍ଟା ଚକଟା ହେଲା ରାଜ୍ୟରେ । ଗଣମାଧ୍ୟମ ଜୁନ ୭ ତାରିଖ ଖବର ପାଇବା ପରେ ନାନା ଖବର ପ୍ରଚାର ହେଲା ।

ଏବେ ସବୁ କିଛି ଥମି ଯାଇଛି । ଆଉ କିଛି ସୋର ଶବ୍ଦ ନାହିଁ । ଇତିମଧ୍ୟରେ ସୁଜାତାଙ୍କର ଛୁଟି ସରି ସରି ଆସିଲାଣି । ନଭେମ୍ବର ୨୭ ତାରିଖ ଦିନ ସେ ପୁଣି ଓଡ଼ିଶା ପ୍ରଶାସନିକ କ୍ଷେତ୍ରରେ ଯୋଗଦେବେ ବୋଲି ନିଦେ୍ର୍ଦଶନାମା କହୁଛି । ହେଲେ ସେ ଆସିବେ କି ନାହିଁ ସେନେଇ ଏବେ ବି ଦ୍ୱନ୍ଦ ଲାଗି ରହିଛି । ନବୀନଙ୍କ ସରକାରରେ ଯଦି ଦଳୀୟ ସମର୍ଥନ କରି ସବୁଠୁ ବିବାଦୀୟ ହୋଇଥାନ୍ତି, ତେବେ ସେ ହେଉଛନ୍ତି ସୁଜାତା । ଏବେ ମୋହନ ସରକାରରେ ସେ ଆସି କାର୍ଯ୍ୟରେ ଯୋଗଦେବେ ନା ଭିନ୍ନ ଭିନ୍ନ କାର୍ଯ୍ୟପନ୍ଥା ନେବେ?

ଏମିତି ଚର୍ଚ୍ଚା ଏବେ ଆଇଏଏସ ମହଲରେ ଚାଲିଛି । ପଦ ମର୍ଯ୍ୟାଦାକୁ ଭୁଲି ନବୀନଙ୍କ ପ୍ରତି ଆନୁଗତ୍ୟ ଦେଖାଇଥିବା ଡିଏସ କୁଟ୍ଟେ ଓ ଆଶୀଷ ସିଂଙ୍କ ସ୍ଥିତି ସମସ୍ତେ ଦେଖୁଛନ୍ତି । କେବଳ ସେତିକି ନୁହେଁ ଆହୁରି ଅନେକ ବରିଷ୍ଠ ଅଧିକାରୀଙ୍କ ସ୍ଥିତି ବି ଦେଖାଗଲାଣି । ଅନେକ ଆଇଏଏସ ବି ପଦ ମର୍ଯ୍ୟାଦା ହରାଇ ଏବେ ଘାଣ୍ଟି ହେଉଛନ୍ତି । ଏଭଳି ସ୍ଥିତିରେ ସୁଜାତା ଆସିବେ ନା ନାହିଁ ସେହି ଚର୍ଚ୍ଚା ଚାଲିଛି । ଦୁଇଟି କଥା ଏବେ ଚର୍ଚ୍ଚାରେ ଅଛି, ଭିକେ ପାଣ୍ଡିଆନ ବିଜେପି ସହ ଡିଲ କରି ସୁଜାତାଙ୍କୁ ଭଲ ସ୍ଥାନରେ ରଖି ପାରିବେ, କିମ୍ବା ଭିଆରଏସ ପର୍ଯ୍ୟନ୍ତ ଥଇଥାନ କରିପାରିବେ । ଅନ୍ୟଟି ହେଲା ପୂର୍ବରୁ ସୁଜାତା ବିଜେଡିରେ ଯୋଗଦେବେ ଓ ମୁଖ୍ୟମନ୍ତ୍ରୀ ପ୍ରାର୍ଥୀ ହେବେ ବୋଲି କୁହାଯାଉଥିଲା । ହେଲେ ସବୁ କିଛି ଅଙ୍କ ଓଲଟପାଲଟ କରିଦେଲେ ଓଡ଼ିଶାବାସୀ । ପାଣ୍ଡିଆନଙ୍କୁ ବିରୋଧ କରି ପୂରା ଗେମ ଓଲଟି ଗଲା ।

ଏବେ ବି ବିଜେଡି ପାଖରେ ପରପିଢ଼ୀର ନେତା ନାହାନ୍ତି । ବିଜେଡିକୁ ସମ୍ଭାଳିବା ପାଇଁ ନେତା ମିଳୁ ନାହାନ୍ତି । ପାଣ୍ଡିଆନ କାଳେ ପାଣ୍ଠି ମାଡ଼ି ବସିଛନ୍ତି । ତେଣୁ ଅନ୍ୟ କେହି ଚାହିଁଲେ ବି ଦଳକୁ ଚଳାଇବା କଷ୍ଟ ହେବ । ସୁଜାତା ଯଦି ଚାକିରୀକୁ ନଆସନ୍ତି, ତେବେ ପାଣ୍ଡିଆନ ପଛରେ ରହି ତାଙ୍କୁ ଆଗରେ ରଖି ବିଜେଡି ରାଜନୀତି କରିବେ ବୋଲି ଚର୍ଚ୍ଚା ହେଉଛି । ଏଭଳି ସ୍ଥିତିରେ ସୁଜାତାଙ୍କ ଆଗାମୀ ପନ୍ଥା ନେଇ ଆଇଏଏସ ମହଲରେ ଚର୍ଚ୍ଚା ଚାଲିଛି । ସୁଜାତା ଅଫିସର ହେବେ ନା ନେତ୍ରୀ?

ବ୍ରହ୍ମପୁର( ଦ କୁଇଭର ):- ନିର୍ବାଚନ ସମୟରେ ଦେଇଥିବା ପ୍ରତିଶ୍ରୁତି ପାଳନ ନିମନ୍ତେ ଏବେ ଘନ ଘନ ଏମକେସିଜି ଗସ୍ତ କରୁଛନ୍ତି ଵ୍ରହ୍ମପୁର ବିଧାୟକ କେ.ଅନିଲ କୁମାର। ସୂଚନା ପ୍ରକାରେ, ଦିନକୁ ଦିନ ଵ୍ରହ୍ମପୁର ବଡ଼ ମେଡିକାଲରେ ରୋଗୀ ମାନଙ୍କ ଚିକିତ୍ସା ଠାରୁ ଆରମ୍ଭ କରି ବ୍ଲଡ ବ୍ୟାଙ୍କରେ ଦେଖା ଯାଉଥିବା ସମସ୍ୟା ,ଆମ୍ବୁଲାନ୍ସ ସେବାରେ ସମସ୍ୟା ଏହିପରି ପ୍ରତିଦିନ ରୋଗୀ ମାନେ ବିଭିନ୍ନ ସ୍ଥାନରୁ ଚିକିତ୍ସା ନିମନ୍ତେ ବ୍ରହ୍ମପୁର ଆସି ବିଭିନ୍ନ ସମସ୍ୟର ସମ୍ମୁଖୀନ ହେଉଥିବା ନେଇ ଅଭିଯୋଗ ପରେ ଵ୍ରହ୍ମପୁର ବିଧାୟକ ଦେଖାଇଛନ୍ତି ତତ୍ପରତା। ବାରମ୍ବାର ଗସ୍ତ କରି ମେଡିକାଲ ଡାକ୍ତର ଓ ଅଧିକାରୀଙ୍କୁ ନେଇ କରୁଛନ୍ତି ବୈଠକ ।ଏହି ପରିପ୍ରେକ୍ଷୀରେ ସୋମବାର ଓ ମଙ୍ଗଳବାର ଲଗାତାର ଦୁଇ ଦିନ ଏମକେସିଜି ଗସ୍ତ କରି ସମାଧାନ ନିମନ୍ତେ କତୃପକ୍ଷଙ୍କ ସହଆଲୋଚନା କରିବା ପରେ ଅଚାନକ mkcg ବ୍ଲଡ଼ ବ୍ୟାଙ୍କ, କାଜୁଅଲଟି, ବିଭାଗ ଗସ୍ତ କରି ରୋଗୀଙ୍କ ସମସ୍ୟା ବୁଝିବା ସହ କାର୍ଯ୍ୟରେ ଅବହେଳା କରୁଥିବା କର୍ମଚାରୀଙ୍କୁ ତାଗିତ କରିଥିଲେ ଓ ଏହି ଗସ୍ତ ସମୟରେ, କାଜୁଅଲଟି ମେନେଜେରଙ୍କ କାର୍ଯାଳୟ ବନ୍ଦ ଥିବା ଦେଖି ପ୍ରତିକ୍ରିୟା ପ୍ରକାଶ କରିଥିଲେ।

ଭୁବନେଶ୍ୱର(ଦ କୁଇଭର): ରାଜ୍ୟରେ ପ୍ରଦୂଷଣକୁ ନେଇ ସ୍ଥିତି ଗମ୍ଭୀର ହେଉଛି । ଏକଥା ନୁହେଁ ଯେ, ପ୍ରଦୂଷଣ ହଠାତ ବଢ଼ିଛି । ମାତ୍ର ପ୍ରଦୂଷଣ ବିରୋଧରେ ସ୍ୱର ତୀବ୍ର ହେଉଛି । ସରକାରରେ ବାରଭାଇ ଆଖଡ଼ା ଯୋଗୁ ରାଜ୍ୟର ବିଭିନ୍ନ ସ୍ଥାନରେ ଏବେ ବିରୋଧ ବଢ଼ିଲାଣି । ପ୍ରଦୂଷଣକୁ ବିରୋଧ କରି ରାଜ୍ୟ କଂଗ୍ରେସ ତ ପ୍ରଦୂଷଣ ନିୟନ୍ତ୍ରଣ ବୋର୍ଡ କାର୍ଯ୍ୟାଳୟ ଭିତରେ ପଶିଯାଇଥିଲା । ଅଫିସ ଭିତରେ ନାରାବାଜି ବି କଲା । ଏବେ ପ୍ରଦୂଷଣକୁ ନେଇ ରାଉରକେଲା ସେକ୍ଟର ୩ରେ ଜଙ୍ଗଲ ମନ୍ତ୍ରୀ ଗଣେଶ ରାମ ସିଂଙ୍କୁ ବିରୋଧ କରାଗଲା । କେବଳ ସେତିକି ନୁହେଁ, ବେଦାନ୍ତ ପାଉଁଶ ପାଇଁ ମୋହନ ସରକାରର ମନ୍ତ୍ରୀଙ୍କ ୧୦୦କୋଟିର ଡିଲ ମୋହନଙ୍କ ମୁଣ୍ଡରେ କଳଙ୍କ ବୋଳିଛି । ଯାହା ସ୍ପଷ୍ଟ କରୁଛି ସ୍ଥିତିକୁ ମ୍ୟାନେଜ କରିପାରୁ ନାହାନ୍ତି ମୋହନ ସରକାର ।

ରାଜ୍ୟରେ ପ୍ରଦୂଷଣର ସ୍ଥିତି ଭୟଙ୍କର । ଶିଳ୍ପସଂସ୍ଥା ଗୁଡ଼ିକ ଚଳାଇଛନ୍ତି ଆତଙ୍କରାଜ । ପାଣି ହେଉ କି ପବନ ବା ମାଟି ସବୁଠି ଏମାନଙ୍କର ଦୌରାତ୍ମ୍ୟ ଚାଲିଛି । ଚାଲାକ ବେପାରୀ ଦଲାଲ ଅଫିସରଙ୍କୁ ହାତ କରି ରାଜ୍ୟ ପରିବେଶକୁ ଧ୍ୱଂସ କରି ଚାଲିଛନ୍ତି । ଏକଥା ନୁହେଁ ଯେ, ଏସବୁ ଦୌରାତ୍ମ୍ୟ ଗତ ୬ମାସ ମଧ୍ୟରେ ବଢ଼ିଛି । ନବୀନ ସରକାର ସମୟରେ ବି ପ୍ରଦୂଷଣ ଥିଲା, ମାତ୍ର ସେ ମ୍ୟାନେଜ କରିନେଉଥିଲେ । କାରଣ ନବୀନ ସରକାରରେ ନବୀନଙ୍କ ତୃତୀୟ ମହଲା ହିଁ ଥିଲା ସର୍ବେସର୍ବା । ସେଠାରେ ନବୀନ ହୁଅନ୍ତୁ କି ଭିକେ ପାଣ୍ଡିଆନ ନେଉଥିଲେ ନିଷ୍ପତ୍ତି । ତାଙ୍କ ବିନା କେହି ବି ମୁଣ୍ଡ ପୂରାଇ ପାରୁନଥିଲେ । କାହାର ସ୍ୱର ଶୁଭୁ ନଥିଲା । ତେଣୁ ଦୁର୍ନୀତି ହେଲେ ବି ଚପି ରହୁଥିଲା । ପ୍ରଦୂଷଣକୁ ଚାପି ଦିଆଯାଉଥିଲା । ଲୁଟକୁ ନଜର ଦିଆଯାଉ ନଥିଲା । ସବୁର ହିସାବ କେବଳ ଗୋଟିଏ ସ୍ଥାନରେ ରହୁଥିଲା । ଲାଗୁଥିଲା ସରକାର ଚାଲିଛି ।

ହେଲେ ଏବେ ବିଜେପିରେ ଚାଲିଛି ବାର ଭାଇ ଆଖଡ଼ା । ଏଠି ମୁଖ୍ୟମନ୍ତ୍ରୀ ମୋହନ ମାଝୀ, ହେଲେ ନିଦେ୍ର୍ଦଶ କାଳେ ଚାଲିଛି ଅନ୍ୟଠୁ । ଏଠି ଅଧାରୁ ଅଧିକ ଅଫିସର କାଳେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଦ୍ୱାରା ପରିଚାଳିତ । ତେଣୁ ମୋହନଙ୍କ ନିଦେ୍ର୍ଦଶରେ କିଛି ବି ଚାଲୁନାହିଁ । ମୋହନଙ୍କ ଜାଣିବା ପୂର୍ବରୁ ଅନେକ କାମ କାଳେ ହୋଇଯାଉଛି । ମନ୍ତ୍ରୀମଣ୍ଡଳରେ ଶୃଙ୍ଖଳା ନାହିଁ । ଏହାର ନମୂନା ହେଉଛି ଧାନ କିଣା ପ୍ରସଙ୍ଗ । ଏଥିରେ ଯୋଗାଣ ମନ୍ତ୍ରୀ ବି କହିବେ, ପୂର୍ତ୍ତ ମନ୍ତ୍ରୀ ବି କହିବେ, ରାଜସ୍ୱ ମନ୍ତ୍ରୀ ବି କହିବେ ଆଉ କୃଷିମନ୍ତ୍ରୀ ବି କହିବେ । ବାସ୍ତବରେ ଧାନ କିଣାର ଉତ୍ତରଦାୟିତ୍ୱ କାହାର ତାହା ଲୋକେ ଏବେ ଦ୍ୱନ୍ଦରେ ।

ସେହିପରି ରାଜସ୍ୱ ମନ୍ତ୍ରୀ ବେଦାନ୍ତ ପାଉଁଶ ବା ଶିଳ୍ପ ପ୍ରଦୂଷଣ କଥା ଉପରେ କହିବେ, ପ୍ରଦୂଷଣ ବୋର୍ଡର କାମ କଥା ବି ସେ କହିବେ ଆଉ ଶିଳ୍ପ ପ୍ରଦୂଷଣର ପ୍ରତିକାର ବି ସେ କହିବେ । ଏସବୁ ପ୍ରକ୍ରିୟା ସ୍ପଷ୍ଟ କରୁଛି ବିଜେପି ସରକାରରେ ମୁରବୀ ବୋଲି କେହି ନାହିଁ । କିଏ ମୋହନଙ୍କ କଥାରେ ଚାଲିଛି ତ ଆଉ କିଏ ଧର୍ମେନ୍ଦ୍ରଙ୍କ କଥାରେ । ଦଳର ଅଧିକାଂଶ ବିଧାୟକଙ୍କୁ କାଳେ ଧର୍ମେନ୍ଦ୍ରଙ୍କ ସମର୍ଥନ ଥିବାରୁ ସେମାନେ ମନଇଚ୍ଛା ବୟାନବାଜି ଚଳାଇଛନ୍ତି । ଏହି ବିଶୃଙ୍ଖଳାରୁ ବେଶ ଲାଭ ଉଠାଇବାକୁ ବସିଲେଣି ବିରୋଧୀ । ରାଜ୍ୟରେ ପ୍ରଶାସନ ବି ଢ଼ିଲା ହୋଇଗଲାଣି । ସରକାରଙ୍କ ପ୍ରତି ଡର କାହାର ରହୁନାହିଁ । ଯେଉଁଥିପାଇଁ କଂଗ୍ରେସ ନେତାମାନେ ପ୍ରଦୂଷଣକୁ ବିରୋଧ କରି ପ୍ରଦୂଷଣ ନିୟନ୍ତ୍ରଣ ବୋର୍ଡ କାର୍ଯ୍ୟାଳୟ ଭିତରେ ପଶି ହଙ୍ଗାମା କଲେ । ଏବେ ରାଉରକେଲାରେ ଜଙ୍ଗଲ ଓ ପରିବେଶ ମନ୍ତ୍ରୀଙ୍କୁ ଲୋକେ ବିରୋଧ କଲେ । ସେହିପରି ବେଦାନ୍ତ ପ୍ରଦୂଷଣ ନେଇ ଲୋକେ ମୋହନଙ୍କ ରାଜସ୍ୱ ମନ୍ତ୍ରୀ ସୁରେଶ ପୂଜାରୀଙ୍କୁ ବିରୋଧ କଲେଣି । ସେଠି କାଳେ ପ୍ରଦୂଷଣ କରିବା ପାଇଁ ୧୦୦କୋଟିର ଡିଲ ନେତାଙ୍କ ସହ ହୋଇଛି । ଏପରି ଅନେକ ପ୍ରସଙ୍ଗ ଏବେ ମୋହନ ସରକାରଙ୍କ ଭାବମୂର୍ତ୍ତୀକୁ କ୍ଷୁର୍ଣ୍ଣ କଲାଣି । ଯାହାର ଫାଇଦା ବିରୋଧୀ ବିଜେଡି ନେବାକୁ ବସିଛି ।

ବିଜେଡି ବିରୋଧରେ ଅନେକ ପ୍ରସଙ୍ଗ ଥିଲେ ମଧ୍ୟ ସେଥିରେ ନୀରବ ରହିଛି ବିଜେପି । ଏବେ ମନ୍ତ୍ରୀ ଓ ବିଧାୟକମାନେ କେଉଁଠି କି ଲାଭ ପାଇବେ ସେହି ଚିନ୍ତାରେ ଘୁରି ବୁଲୁଥିବାରୁ ସରକାରୀ ବ୍ୟବସ୍ଥା ଚୁଲିକି ଗଲାଣି । ଏଥିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ହସ୍ତକ୍ଷେପ ନଆସିଲେ, ସରକାର ଖୁବଶୀଘ୍ର ବଦନାମ ହେବ ଓ ବିଜେପି କ୍ଷତି ସହିବ ବୋଲି କୁହାଯାଉଛି । ଦେଖାଯାଉ ରାଜ୍ୟ ବିଜେପି ସଂଗଠନ ମୁଖିଆ ଏସବୁକୁ ଧ୍ୟାନ ଦେଇ ପ୍ରତିକାର କରୁଛନ୍ତି ନା ନୀରବ ହୋଇ ସରକାରକୁ ବଦନାମ ହେବାକୁ ଛାଡ଼ି ଦେଉଛନ୍ତି?

ଯାଜପୁର( ଦ କୁଇଭର ):- ଯାଜପୁର ଜିଲ୍ଲା ଧର୍ମଶାଳା ବିଧାୟକ ହିମାଂଶୁ ଶେଖର ସାହୁଙ୍କୁ ଆକ୍ରମଣ ଅଭିଯୋଗ ହୋଇଛି । ସଦର ଥାନା ବୁଢ଼ାଘାଟ ନିକଟରେ ଧାରଣା ସ୍ଥଳରେ ତାଙ୍କ ଗାଡି ଉପରକୁ ଆକ୍ରମଣ ହୋଇଥିବା ସୂଚନା ରହିଛି । ତେବେ ଏହି ଆକ୍ରମଣ ପ୍ରଣବ ପ୍ରକାଶ ଦାସ (ବବି)ଙ୍କ ସମର୍ଥକମାନେ କରିଥିବା ନିଜେ ବିଧାୟକ ଶ୍ରୀ ସାହୁ କହିଛନ୍ତି । ଘଟଣା ସମ୍ପର୍କରେ ବିଧାୟକ ହିମାଂଶୁ ସାହୁ ପୋଲିସ ଆଗରେ ଅଭିଯୋଗ କରିଛନ୍ତି ।

ଆକ୍ରମଣ ସଂପର୍କରେ ଗଣାମାଧ୍ୟମକୁ ଶ୍ରୀ ସାହୁଙ୍କ ପ୍ରତିକ୍ରିୟା ଦେଇଛନ୍ତି । ସେ କହିଛନ୍ତି ଯେ, ‘ବିରଜା ହାଟ ଖୋଲିବା ପ୍ରସଙ୍ଗକୁ ନେଇ ସ୍ଥାନୀୟ ଲୋକଙ୍କ ଦ୍ଵାରା ଧାରଣା ଓ ରାସ୍ତାରୋକ ଚାଲିଥିଲା । ଏହି ସମୟରେ ମୋ ଗାଡ଼ି ଲମ୍ବା ଧାଡ଼ିରେ ଛିଡ଼ା ହୋଇ ରହିଥିଲା । ହଠାତ୍ କିଛି ଲୋକ ଠେଙ୍ଗା ଓ ଟେକା ପଥରରେ ମୋ ଉପରେ ଓ ମୋ କାର ଉପରେ ମରଣାନ୍ତକ ଆକ୍ରମଣ କରିଥିଲେ । ଏହାପରେ ଆକ୍ରମଣକାରୀ ମାନେ ବବି ଦାସଙ୍କ ନାଁ ନେଇ ମୋ ଉପରେ ଆକ୍ରମଣ କରିଥିଲେ’।ପିଏସ୍‌ଓ ଠାରୁ ପିସ୍ତଲ ଛଡ଼ାଇ ମୋତେ ଫାୟାରିଂ କରିଥାନ୍ତେ । ଲୋକମାନେ ଆସିନଥିଲେ ସେମାନେ ମୋତେ ମାରିଦେଇଥାନ୍ତେ । ମୋତେ ମାରି ବାଇ ଇଲେକ୍ସନ କରିବା ଯୋଜନାରେ ଥିଲେ’ ।

ଯାଜପୁର ମାଇନର ମିନେରାଲ ବିଭାଗର ଡିଡିଏମ୍ ଅଫିସକୁ କାରରେ ଯାଉଥିଲେ ବିଧାୟକ । ଯାଜପୁର ଏସପି ଘଟଣା ସ୍ଥଳରେ ପହଞ୍ଚି ଘଟଣାର ଅନୁସଂନ୍ଧନ ଜାରି ରଖିଛନ୍ତି । ଅନ୍ୟପକ୍ଷରେ ଏନେଇ ବିଜେଡ଼ି ନେତା ପ୍ରଣବ ପ୍ରକାଶ ଦାସଙ୍କ ପ୍ରତିକ୍ରିୟା ସାମ୍ନାକୁ ଆସିଛି । ସେ କହିଛନ୍ତି, ଘଟଣା ଘଟିବା ସମୟରେ ମୁଁ ସେ ସ୍ଥାନରେ ନଥିଲି । ବିଧାୟକଙ୍କୁ ବବିଙ୍କ ଭାଇ ଆକ୍ରମଣ କରିଥିବା ପ୍ରଶ୍ନରେ ସେ ପ୍ରତିକ୍ରିୟା ଦେଇ କହିଥିଲେ ଯେ, ‘ଭାଇକୁ କହିଛି ଥାନାରେ ଯାଇ ବସିବାକୁ, ଦୋଷ ଥିଲେ କାର୍ଯ୍ୟାନୁଷ୍ଠାନ ହେଉ।’

ଭୁବନେଶ୍ୱର( ଦ କୁଇଭର ):- ଓଡ଼ିଆ ସିନେମା ଜଗତର ବର୍ଷୀୟାନ କଳାକାର ଜୟୀରାମ ସାମଲଙ୍କୁ ସମ୍ମାନିତ କରାଯାଇଛି। ରାଜ୍ୟ ଚଳଚ୍ଚିତ୍ର ପୁରସ୍କାର ପ୍ରଦାନ ସମାରୋହରେ ଓଡ଼ିଆ ସିନେମାକୁ ନୂଆ ପରିଚୟ ଦେଇଥିବା କିମ୍ବଦନ୍ତୀ ଅଭିନେତାଙ୍କୁ ସମ୍ମାନ ପ୍ରଦାନ କରାଯାଇଛି । ଓଡ଼ିଆ ସିନେମାର ସର୍ବଶ୍ରେଷ୍ଠ ହାସ୍ୟ ଅଭିନେତା ଜୟୀରାମ ସାମଲଙ୍କୁ ଜୀବନବ୍ୟାପୀ ସାଧନା ପାଇଁ ପୁରସ୍କୃତ କରାଯାଇଛି ।ଜୟୀରାମ ସାମଲଙ୍କ ବ୍ୟତୀତ ଅନନ୍ତ ମହାପାତ୍ରଙ୍କ ମୋହନ ସୁନ୍ଦର ଦେବ ଗୋସ୍ୱାମୀ ପୁରସ୍କାରରେ ସମ୍ମାନିତ କରାଯାଇଛି । ସେହିପରି ଶ୍ରୀନିବାସ ମହାପାତ୍ରଙ୍କୁ ମଧ୍ୟ ଏହି ସମ୍ମାନରେ ସମ୍ମାନିତ କରିଛି ଓଡ଼ିଆ ସିନେ ଜଗତ । ୨୦୨୧ ବର୍ଷ ପାଇଁ ଶ୍ରୀନିବାସଙ୍କୁ ଏହି ପୁରସ୍କାର ପ୍ରଦାନ କରାଯାଇଛି । ଏହି କାର୍ଯ୍ୟକ୍ରମରେ ରାଜ୍ୟପାଳ ରଘୁବର ଦାସ, ଉପ-ମୁଖ୍ୟମନ୍ତ୍ରୀ ଶ୍ରୀମତୀ ପ୍ରଭାତି ପରିଡ଼ା ଏବଂ ସଂସ୍କୃତି ମନ୍ତ୍ରୀ ସୂର୍ଯ୍ୟବଂଶୀ ସୁରଜ ଉପସ୍ଥିତ ରହି ଓଡ଼ିଆ ସିନେମାର ମହାନ କଳାକାରମାନଙ୍କୁ ସମ୍ମାନିତ କରିଛନ୍ତି । ୨୦୨୦, ୨୦୨୧ ଏବଂ ୨୦୨୨ ବର୍ଷ ପାଇଁ ଏହି ପୁରସ୍କାର ପ୍ରଦାନ କରାଯାଇଛି ।

ନୂଆଦିଲ୍ଲୀ( ଦ କୁଇଭର ):- ଆଜିଠୁ ବନ୍ଦ ରହିବ ସମସ୍ତ ସ୍କୁଲ । ଅନଲାଇନରେ ପାଠପଢା ଜାରି ରହିବ । ଦିଲ୍ଲୀରେ ବାୟୁ ପ୍ରଦୂଷଣକୁ ନେଇ ସୋମବାର ସୁପ୍ରିମକୋର୍ଟରେ ଶୁଣାଣି ହୋଇଛି । ଏହି ଶୁଣାଣିରେ କୋର୍ଟ ସରକାରଙ୍କୁ କଡ଼ା ନିନ୍ଦା କରିଛନ୍ତି । ଦିଲ୍ଲୀ ସରକାର ରବିବାର ଦିନ ନବମ ଶ୍ରେଣୀ ପର୍ଯ୍ୟନ୍ତ ସମସ୍ତ ସ୍କୁଲକୁ ବନ୍ଦ କରିବା ଏବଂ ଅନଲାଇନ କ୍ଲାସ କରିବାକୁ ନିର୍ଦ୍ଦେଶ ଦେଇଛନ୍ତି । ସରକାର ଏକାଦଶ ଏବଂ ଦ୍ୱାଦଶ ଶ୍ରେଣୀର ପିଲାମାନଙ୍କୁ ସ୍କୁଲ ଯିବା ନେଇ କୌଣସି ପ୍ରତିବନ୍ଧକ ଲଗାଇ ନାହାନ୍ତି । ହେଲେ କୋର୍ଟଙ୍କ ନିର୍ଦ୍ଦେଶ ପରେ ସୋମବାର ଦିଲ୍ଲୀର ମୁଖ୍ୟମନ୍ତ୍ରୀ ଆତିଶୀ କହିଛନ୍ତି ଯେ, ସହରରେ ପ୍ରଦୂଷଣ ମାତ୍ରା ବଢୁଥିବାରୁ ୧୦ମ ଏବଂ ଦ୍ୱାଦଶ ଛାତ୍ରଛାତ୍ରୀଙ୍କ ପାଇଁ କ୍ଲାସ ଅନଲାଇନ ମାଧ୍ୟମରେ କରାଯିବ । ଦିଲ୍ଲୀ ମୁଖ୍ୟମନ୍ତ୍ରୀ ଆତିଶି ଟ୍ୱିଟରରେ ଏକ ପୋଷ୍ଟରେ କହିଛନ୍ତି ଯେ, ଆସନ୍ତାକାଲି ଠାରୁ ଦଶମ ଏବଂ ଦ୍ୱାଦଶ ଶ୍ରେଣୀ ପାଇଁ ଫିଜିକାଲ କ୍ଲାସ ମଧ୍ୟ ସ୍ଥଗିତ ରଖାଯାଇଛି ଏବଂ ସମସ୍ତ ପାଠ ପଢା ଅନଲାଇନରେ କରାଯିବ।

ଦ କୁଇଭର ବ୍ୟୁରୋ :- ଆଜି ମାର୍ଗଶୀର ମାସର ପ୍ରଥମ ମାଣବସା ଗୁରୁବାର l ମା ଲକ୍ଷ୍ମୀଙ୍କ ପୂଜା ପାଇଁ ଗାଁ ଠାରୁ ସହର ସବୁଠି ଚଳ ଚଞ୍ଚଳ l ପ୍ରତ୍ୟେକ ଓଡ଼ିଆ ଘରେ ଏହି ମାଣବସା ଗୁରୁବାର ପାଳନ କରାଯାଇଥାଏ l ଏହି ଦିନ ମା ଲକ୍ଷ୍ମୀଙ୍କ ପୂଜା କରାଯାଇଥାଏ l ପ୍ରତ୍ୟେକ ଓଡ଼ିଆ ଘର ର ବୋହୁ ଭୋର ସମୟରୁ ସ୍ନାନ ସାରି ନୂଆ ବସ୍ତ୍ର ପରିଧାନ କରି ମାଁ ଲକ୍ଷ୍ମୀ ଙ୍କୁ ନିଷ୍ଠାର ସହିତ ପୂଜା କରିଥାନ୍ତି l ତା ପୂର୍ବ ଦିନ ଅର୍ଥାତ ବୁଧବାର ଦିନ ରାତିରୁ ଘର ଦ୍ୱାର ସଫା ସୁତୁରା କରି ଦେଇଥାନ୍ତି l ମା ଲକ୍ଷ୍ମୀଙ୍କ ପୂଜା ନିଷ୍ଠାର ସହିତ ପାଳନ କଲେ ଧନ ଧାନ୍ୟ ରେ ଅଭାବ ରହେ ନାହିଁ ବୋଲି ବିଶ୍ୱାସ ରହିଛି l ମାର୍ଗଶୀର ମାସରେ ପ୍ରଥମ ଧାନ ଅମଳ ଆରମ୍ଭ ହୋଇଥାଏ l ଚାଷୀ ତାର ଖଳାକୁ ଧାନ ଆଣିଥାଏ l ଧାନ ର ଶିଶାରେ ବେଣୀ ବାନ୍ଧି କରି ଶୁଖାଇ ଯତ୍ନ ସହକାରେ ରଖିଥାଏ l ଧାନକୁ ଲକ୍ଷ୍ମୀ ଙ୍କର ଆଶିଷ ବୋଲି ମାନି ଏହି ଓଷା ପାଳନ କରାଯାଇଥାଏ l ଗାଁ ମାନଙ୍କରେ ମହିଳା ମାନେ ମାଟିଘରକୁ ଗୋବର ରେ ଲିପା ପୋଛା କରି ନୂଆ ଚାଉଳ ( ଅରୁଆ ) ପିଠାଉ ରେ ଝୋଟି ଏବଂ ଲକ୍ଷ୍ମୀ ପାଦ ଚିତ୍ର ଆଙ୍କନ୍ତି l ଏହି ମାଣବସା ଗୁରୁବାର ସମଗ୍ର ଓଡିଶା ସହିତ ବୌଦ୍ଧ ଓ ସୁବର୍ଣ୍ଣପୁର ଜିଲ୍ଲା ରେ ପାଳନ କରାଯାଉଛି l ପୂଜା କାଳରେ ଧୂପ, ଦୀପ ଓ ନୈବେଦ୍ୟ ଆଦି ଅର୍ପଣ କରାଯାଏ l ପିଠା ପଣା ଓ ଫଳ ମୂଳ ଭୋଗ ଲକ୍ଷ୍ମୀ ଙ୍କ ପାଖରେ ଲଗାଯାଏ l ବିଭିନ୍ନ ପାଳିରେ ଭିହ୍ନ ଭିହ୍ନ ପିଠା ପଣା ମାଁ ଲକ୍ଷ୍ମୀ ଙ୍କ ପାଖରେ ଭୋଗ ଲଗାଯାଇଥାଏ l ମଧ୍ୟାହ୍ନ ସମୟରେ ଅନ୍ନ ଭୋଗ ଲଗାଯାଏ l ଏହି ଦିନ ମା ଲକ୍ଷ୍ମୀ ଙ୍କ ପାଖରେ ଲକ୍ଷ୍ମୀ ପୁରାଣ ବୋଲାଯାଇଥାଏ l ଏହି ଦିନର ଭୋଗ ଘର ର ସମସ୍ତ ସଦସ୍ୟ ଖାଇଥାନ୍ତି l ଏହା ଅନ୍ୟ କାହାକୁ ଦେବାର ନିୟମ ନାହିଁ l

ଭୁବନେଶ୍ୱର(ଦ କୁଇଭର): ମହାପ୍ରଭୁଙ୍କ ପ୍ରିୟ ତୁଳସୀକୁ ଅସମ୍ମାନ କରାଯାଉଛି । ଜଣେ ଶିଶୁଙ୍କୁ ଭଗବାନ କହି ତାଙ୍କରି ପାଦ ତଳେ ତୁଳସୀ ଦିଆଯାଉଥିବା ଅଭିଯୋଗ ପରେ ଉତ୍ତେଜନା ବଢ଼ିଲାଣି । ଖଣ୍ଡଗିରି ସ୍ଥିତି ଶ୍ରୀ ବୈକୁଣ୍ଠ ଧାମ ନାମକ ଏକ ଆଶ୍ରମରେ ହିନ୍ଦୁ ଭାବନା ପ୍ରତି ଆଘାତ ଦିଆଯାଉଥିବା କୁହାଯାଉଛି । ଏହାକୁ ନେଇ ସେଠାରେ ଉତ୍ତେଜନା ଲାଗିଛି । ସ୍ଥାନୀୟ କିଛି ଯୁବକ ଏହାକୁ ବିରୋଧ କରି ଆଶ୍ରମ ନିକଟରେ ହୋ ହଲ୍ଲା କରିଥିଲେ । ପରେ ପୋଲିସ ପହଞ୍ଚି ଘଟଣାକୁ ଅନୁଧ୍ୟାନ କରୁଛି ।

ପୂର୍ବରୁ କେନ୍ଦ୍ରାପଡ଼ାର ସାରଥୀ ନିଜକୁ ଭଗବାନ କହି ପାଦରେ ତୁଳସୀ ରଖୁଥିଲେ । କିଛି ଭଣ୍ଡ ଓ ପାଖଣ୍ଡ ତାଙ୍କୁ ସମର୍ଥନ କରୁଥିଲେ । ମିଥ୍ୟା ପ୍ରଚାର ଯୋଗୁ ଅନେକ ଅନ୍ଧବିଶ୍ୱାସୀ ତାଙ୍କୁ ଭଗବାନ ଭାବି ପୂଜା କରୁଥିଲେ । ନାନା ଲୀଳା ଖେଳା କରୁଥିଲେ । ତାଙ୍କ ଅସଲ ଚେହେରା ପଦାକୁ ଆସିବା ପରେ ଜେଲ ଯିବାକୁ ପଡ଼ିଥିଲା । ଏହାପରେ ଅନେକ ବିବାଦ ଉଠିଥିଲା । ଏବେ ସାରଥୀଙ୍କର ଆଉ ଚିହ୍ନବର୍ଣ୍ଣ ନାହିଁ ।

ଏବେ ବଜାରକୁ ଆସିଛନ୍ତି ଆଉ ଜଣେ ବାଳୁତ ବାବା । ତାଙ୍କୁ ସାମ୍ନାରେ ରଖି ହିନ୍ଦୁ ଭାଗାବେଗ ସହ ଖେଳ ଖେଳାଯାଉଛି । ଭଗବାନ ଦର୍ଶାଇ ଲୋକଙ୍କୁ ଭକୁଆ କରାଯାଉଥିବା ଅଭିଯୋଗ ହୋଇଛି । ଆଶ୍ରମରେ ବାଳୁତ ବାବାଙ୍କ ପାଦ ତଳେ ତୁଳସୀ ରଖାଯାଉଛି । ତୁଳସୀ ଯିଏ ମହାପ୍ରଭୁଙ୍କ ଶ୍ରୀମସ୍ତକରେ ଲାଗି ହୁଏ, ତାହା ହିନ୍ଦୁ ମାନଙ୍କ ପାଇଁ ବେଶ ପବିତ୍ର । ସେହି ପବିତ୍ର ତୁଳସୀକୁ ଧାରଣ କରିବାର କ୍ଷମତା ଆଉ କାହାର ନାହିଁ । ହେଲେ ଏଠି ବାଳୁତ ବାବା ତୁଳସୀ ପାଦରେ ରଖୁଥିବାରୁ ପ୍ରତିକ୍ରିୟା ବଢ଼ୁଛି । ଦେଖାଯାଉ ଏପରି କାର୍ଯ୍ୟରୁ ବାଳୁତ ବାବା ଦୂରଉଛନ୍ତି ନା ପୁଣି ପାଖଣ୍ଡ ନଟକ କରୁଛନ୍ତି?

ଝାରସୁଗୁଡ଼ା(ଦ କୁଇଭର): ପୂର୍ବତନ ବିଧାୟିକା ଦୀପାଳୀ ଦାସଙ୍କ ଅକଲ ଗୁଡ଼ୁମ ହୋଇଗଲାଣି । ବାପା ସ୍ୱର୍ଗତ ନବ ଦାସଙ୍କ ଦେହାନ୍ତ ପରେ ଭାବିଥିଲେ ଉଭୟ ରାଜନୈତିକ ଓ ବ୍ୟବସାୟିକ ସାମ୍ରାଜ୍ୟକୁ ସୁରକ୍ଷିତ ରଖିଦେବେ । ହେଲେ ସବୁ ଫସର ଫାଟିଗଲା । ବିଧାୟକ ଟଙ୍କଧରଙ୍କ ମାଡ଼ରେ ଦୀପାଳୀଙ୍କ ଗଡ଼ ଛାରଖାର ହୋଇଗଲା । ରାଜନୈତିକ ସାମ୍ରାଜ୍ୟ ଧୂଳିସାତ ହେବା ପରେ ଏବେ ଦୀପଳୀଙ୍କ ପରିବାରର ବେପାର ଚିନ୍ତା ଘାରିଛି । ସେପଟେ ଟଙ୍କଧର ଲଗାତର ମାଡ଼ ମାରି ଚାଲିଛନ୍ତି । ରାଜନୀତିରେ ଦୀପଳୀଙ୍କୁ ଶୂନ କରିବା ପରେ ଏବେ ତାଙ୍କ ବେପାର ସାମ୍ରାଜ୍ୟକୁ ଧୂଳି କରିବାକୁ ଲାଗିଛନ୍ତି । ପ୍ରଥମ ମାଡ଼ ଦେଇଛନ୍ତି ପାଉଁଶ ପାଣ୍ଠି । ମାସିକ କୋଟି କୋଟି ଟଙ୍କାର ପାଣ୍ଠିକୁ ହଠାତ ମାଡ଼ କରିଦେଇଛନ୍ତି । ଯାହା ଦୀପାଳୀଙ୍କ ବେପାର ସାମ୍ରାଜ୍ୟର ମେରୁଦଣ୍ଡକୁ ଦୋହଲାଇ ଦେଇଛି । ଏବେ ଟ୍ରାନ୍ସପୋର୍ଟ ବେପାର ଉପରେ ମାଡ଼ ହେବ ବୋଲି ଯୋଜନା ଚାଲିଛି ।

ଟଙ୍କଧର ଏବଂ ନବଙ୍କ ବିରୋଧୀ ମାନଙ୍କର କ୍ରମାଗତ ମାଡ଼ରେ ଏବେ ଛାନିଆ ହେଲେଣି ଦୀପାଳୀ ଓ ତାଙ୍କ ଭାଇ ବିଶାଲ ଦାସ । ହଜାର ହଜାର କୋଟିର ମାଲିକ ଥିବା ଏହି ଦୁଇଜଣ ଏବେ କାଳେ ଥଳକୂଳ ପାଉ ନାହାନ୍ତି । କେମିତି ବି ହେଲେ ନିଜ ସାମ୍ରାଜ୍ୟ ବଞ୍ଚାଇବାକୁ ଜୀ ଜାନ ଲଗାଇ ଦେଇଛନ୍ତି । ବିଜେଡି ତ ସୁରକ୍ଷା ଦେଇ ପାରିବ ନାହିଁ, ବିଜେପି ତାଙ୍କୁ ଅପଣଉ ନାହିଁ । ଏପରିକି ବିଜେପିରେ ପ୍ରଭାବ ରଖୁଥିବା ବିଶାଲଙ୍କ ଶ୍ୱଶୁର ବି ଏପର୍ଯ୍ୟନ୍ତ ସହଯୋଗ କରି ନାହାନ୍ତି । କୌଣସି ପ୍ରକାର ରାଜସ୍ୱ ମନ୍ତ୍ରୀ ସୁରେଶ ପୂଜାରୀଙ୍କ ସମର୍ଥନ ଟିକେ ପାଇ ଏପର୍ଯ୍ୟନ୍ତ ରହିଛନ୍ତି । ହେଲେ ସୁରେଶଙ୍କ ସହଯୋଗ କାଳେ ବେଶୀଦିନ ରହିବ ନାହିଁ । ତେଣୁ ସେମାନେ ଏବେ ଭାଳି ହେଉଛନ୍ତି କେଉଁ ରାସ୍ତା ଆପଣେଇବେ?

ରାଜନୀତିରେ ଥିବା ବେଳେ ଦୀପାଳୀ କିମ୍ବା ବିଶାଲ ଇନ୍ଦ୍ରଚନ୍ଦ୍ର ମାନୁ ନଥିଲେ । ସବୁ ତାଙ୍କ ପାଦତଳେ ବୋଲି ଭାବୁଥିଲେ । ନା ସାମାଜିକ ଦାୟିତ୍ୱ ତୁଲାଇଥିଲେ ନା କୌଣସି ସଂଗଠନ ଗଢ଼ିଥିଲେ । କେବଳ ପାଣ୍ଠି ସଂଗ୍ରହରେ ଲାଗିଥିଲେ । ଏହି ପରିବାର ପାଖରେ ଟଙ୍କା ତ କାଳେ ପ୍ରଚୁର ଅଛି, ହେଲେ ଏବେ ସୁରକ୍ଷା ଦେବାକୁ କେହି ନାହିଁ । ଏଣେ ତେଣେ ବୁଲୁଛନ୍ତି । ଅଯଥାରେ ମୁଣ୍ଡ ପିଟି ଟଙ୍କା ଢ଼ାଳୁଛନ୍ତି । ଯେମିତି ଟଙ୍କଧରଙ୍କ ବିଧାୟିକ ହେବାକୁ କୋର୍ଟରେ ଚ୍ୟାଲେଞ୍ଜ କରିଛନ୍ତି । ହାଇକୋର୍ଟରେ ମାମଲା ଲଢ଼ୁଛନ୍ତି । ଭାବିଛନ୍ତି ହାଇକୋର୍ଟ ଭୟ ଦେଖାଇ ସେ ତାଙ୍କ ସାମ୍ରାଜ୍ୟକୁ ସୁରକ୍ଷିତ ରଖିପାରିବେ । ହେଲେ ଦୀପାଳୀ ଭୁଲି ଯାଇଛନ୍ତି ସେ ଟଙ୍କଧରଙ୍କ ବିରୋଧରେ ନୁହେଁ ବିଜେପି ଭଳି ଜାତୀୟ ଦଳ ବିରୋଧରେ ଲଢ଼ୁଛନ୍ତି । ସରକାର ବିରୋଧରେ ଲଢ଼ି ଠିକଣା ସମୟରେ ଜିତିବାର ରେକର୍ଡ ଆଜି ପର୍ଯ୍ୟନ୍ତ ନାହିଁ । ବରଂ ଟଙ୍କଧରଙ୍କ ସହ ଲଢ଼େଇ ତାଙ୍କୁ କାଳେ ମହଙ୍ଗା ପଡ଼ିବା ଆରମ୍ଭ କଲାଣି । ପାଉଁଶ ମାଡ଼ ପରେ ଏବେ ଟ୍ରାନ୍ସପୋର୍ଟ ଓ ପରେ ତାଙ୍କ କମ୍ପାନୀ ଉପରେ ମାଡ଼ କରିବାକୁ ଯୋଜନା ପ୍ରସ୍ତୁତ ହୋଇଛି ।

ଦୀପାଳୀ ତାଙ୍କ ସୁରକ୍ଷା ପାଇଁ ଯେତେ ବି ପ୍ଲାନ କରୁଛନ୍ତି ତାହା ଫେଲ ମାରୁଛି । ପରିପକ୍ୱତା ନଥାଇ ପ୍ରଚୁର ଧନ ଧରି ବୁଲିବା ସେମାନଙ୍କୁ ଧିରେ ଧିରେ ଅଶହାୟତା ଆଡ଼କୁ ଟାଣି ନେଉଛି । ବୁଦ୍ଧିଜୀବୀଙ୍କ କହିବା ଅନୁଯାୟୀ ଦୀପାଳୀ ଓ ବିଶାଲ ଟଙ୍କଧରଙ୍କ ସହ ନଲଢ଼ି ନିଜକୁ ସଶକ୍ତ କଲେ ହିଁ ସୁରକ୍ଷିତ ରହିପାରିବେ । ନହେଲେ ଆସନ୍ତା ୫ବର୍ଷ ପରେ ଦୀପାଳୀ ଓ ବିଶାଲଙ୍କ ସ୍ଥିତି ନଥିବ ବୋଲି କହୁଛନ୍ତି । ଦେଖାଯାଉ ଦୀପାଳୀ ତାଙ୍କ ଉଭୟ ସାମ୍ରାଜ୍ୟ ରଖି ପାରୁଛନ୍ତି ନା ଅର୍ଥର ଅହଂକାରରେ ସବୁ କିଛି ହଜାଇ ଦେଉଛନ୍ତି?

ପୁରୀ( ଦ କୁଇଭର ):- ପୁରୀର କେତେକ ଅଂଚଳରେ ମହାପ୍ରଭୁ ଶ୍ରୀଜଗନ୍ନାଥଙ୍କ ନାମରେ ଥିବା ଜମି ଜବରଦଖଲକାରୀଙ୍କ କବଳରେ ରହିଛି। ମାଟିତୋଟା ମଉଜାରେ ଥିବା ଏହି ଜମିରୁ ଜବରଦଖଲ ଉଚ୍ଛେଦ ପାଇଁ ଶ୍ରୀମନ୍ଦିର ପ୍ରଶାସନ କତ୍ତୃପକ୍ଷ ବାସେଳୀସାହି ଥାନାରେ ଏତଲା ଦେଇଛନ୍ତି। ଏ ଦିଗରେ ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ପ୍ରଶାସନ ପକ୍ଷରୁ ଜିଲାପାଳ ଓ ଏସପିଙ୍କୁ ଅନୁରୋଧ କରାଯାଇଛି।

ସୂଚନା ଅନୁସାରେ ପୁରୀ ମାଟିତୋଟା ମୌଜାରେ ଶ୍ରୀଜଗନ୍ନାଥ ମହାପ୍ରଭୁଙ୍କ ନାମରେ ଥିବା ଜମି ବେଆଇନ୍ ଭାବରେ ଜବରଦଖଲ କରି ହସ୍ତାନ୍ତର ଉଦ୍ୟମ ହୋଇଥିବା ଶ୍ରୀମନ୍ଦିର ପ୍ରଶାସନ ନଜରକୁ ଆସିଛି। ଏନେଇ ଆଇନ୍‌ଗତ କାର୍ଯ୍ୟାନୁଷ୍ଠାନ ପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ବାସେଳୀସାହି ଥାନାରେ ଏତଲା ଦାଖଲ କରାଯାଇଛି। ମୌଜା- ମାଟିତୋଟା ୟୁନିଟ୍ ନଂ-୧, ଖାତା ନମ୍ବର-୩୮ର ସମୁଦାୟ ୧୦୯ଟି ପ୍ଲଟର ଏହି ଜମିକୁ ବେଆଇନ୍ ଭାବେ ହାତେଇବାକୁ ହୋଇଥିବା ଉଦ୍ୟମକୁ କଦାପି ବରଦାସ୍ତ କରାଯିବ ନାହିଁI ଏହା ଉପରେ ତୁରନ୍ତ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ ଲାଗି ଜିଲ୍ଲାପାଳ ଏବଂ ଆରକ୍ଷୀ ଅଧୀକ୍ଷକଙ୍କୁ ଅନୁରୋଧ କରିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ।

ବ୍ରହ୍ମଗିରି(ଦ କୁଇଭର): ବ୍ରହ୍ମଗିରି ବିଧାୟିକା ଉପାସନା ମହାପାତ୍ରଙ୍କ କାର୍ଯ୍ୟଶୈଳୀକୁ ନେଇ ଉଠିଲାଣି ପ୍ରଶ୍ନ । ସେ କାହାକୁ ନେଇ କରୁଛନ୍ତି ରାଜନୀତି? ତାଙ୍କ ରାଜନୀତିର ଉତ୍ସ କିଏ? ବିଜେପି କର୍ମୀ, ଦଳର ସଂଗଠନ, ସାଧାରଣ ଜନତା ନା ନିଜର ବୋକଚାବୁହା ଗୋଷ୍ଠୀ? କାହା ସ୍ୱାର୍ଥରେ ଉପାସନା । ନା ନିଜର ପତିଆରା ଓ ଦବଦବା ରଖିବା ପାଇଁ ସେ ବିଜେପି ସଂଗଠନକୁ ବି ଦଳି ମକଚି ଦେଉଛନ୍ତି? ଏଭଳି ଚର୍ଚ୍ଚା ଏବେ ବ୍ରହ୍ମଗିରିରେ ଜୋର ଧରିଲାଣି । କ୍ଷମତାକୁ ଆସିବାର ମାତ୍ର ୬ମାସ ମଧ୍ୟରେ ଉପାସନା ଯେ କେବଳ ବିବାଦୀୟ ହେଉ ନାହାନ୍ତି ବରଂ ଲୋକଙ୍କ ଭରସା ବି ହରାଇବାକୁ ଯାଉଥିବା ଚର୍ଚ୍ଚା ହେଉଛି ।

ବ୍ରହ୍ମଗିରି ବିଧାୟିକା ଉପାସନା ମହାପାତ୍ର ହେଉଛନ୍ତି ଜଣେ ଉଦୀୟମାନ ରାଜନେତା । ରାଜନୀତିରେ ଲମ୍ବା ଭବିଷ୍ୟତ ରହିଛି ତାଙ୍କର । ବିଜେପି ଭଳି ଜାତୀୟ ଦଳରେ ସେ ବ୍ରେକ ପାଇବା ସହ ବିଜେଡିକୁ ହରାଇ ଜିତିଥିଲେ । ପୂରା ବିଜେପି ସଂଗଠନ ତାଙ୍କ ପାଇଁ ଲାଗିଥିଲା । ନିର୍ବାଚନ ବେଳେ ବିଜେପି ସଂଗଠନ ଶରଣରେ ଥିବା ଉପାସନା ଜିତିବା ପରେ କାଳେ ନିଜସ୍ୱ ସଂଗଠନ ଆରମ୍ଭ କରିଦେଲେଣି । ତାଙ୍କ ବାପା ସ୍ୱର୍ଗତ ଲୁଲୁ ମହାପାତ୍ରଙ୍କର କିଛି ସମର୍ଥକଙ୍କୁ ନେଇ ଗଢ଼ିଥିବା ଗୋଷ୍ଠୀକୁ ନେଇ ଚଳାଇଛନ୍ତି ରାଜନୀତି । ବିଜେପି ସଂଗଠନ ତାଙ୍କ ପାଇଁ ଗୁରୁତ୍ୱ ରଖୁନାହିଁ । ବିଶେଷ କରି ଆରଏସଏସ ମଧ୍ୟ ତାଙ୍କ ପାଇଁ ବ୍ରହ୍ମଗିରିରେ ଉପାସନାଙ୍କ ପାଇଁ ସେପରି ସ୍ଥିତି ରଖୁନାହିଁ । ଯାହାକୁ ନେଇ ଆରଏସଏସ ସଦସ୍ୟମାନେ ବି ତାତିଲେଣି । ହେଲେ ଖାମଖିଆଲି ଉପାସନାଙ୍କର କାଳେ ସେଥିପ୍ରତି ଗୁରୁତ୍ୱ ନାହିଁ ।

କେବଳ ସେତିକି ନୁହେଁ, ନିର୍ବାଚନ ପୂର୍ବରୁ କାହାର ଛୁଆ କାଖଉଥିଲେ ତ କାହା ଘରେ ବସି ଗପୁଥିଲେ । ବୟସ୍କଙ୍କ ସହ କଥା ହୋଇ ସମସ୍ୟା ବୁଝୁଥିଲେ । ହେଲେ ନିର୍ବାଚନ ଜିତିବା ପରେ ଆଉ ଲୋକଙ୍କ ପାଖରେ ତାଙ୍କୁ କାଳେ ଦେଖିବାକୁ ମିଳୁନାହିଁ । ନା ବ୍ରହ୍ମଗିରି ଲୋକେ ଦରକାର ନା ବିଜେପି ସମର୍ଥକମାନେ ଦରକାର । ଏବେ ତାଙ୍କ ଲୁଲୁ ସେନା ହିଁ ବ୍ରହ୍ମଗିରିରେ କାଳେ ସର୍ବେସର୍ବା । ସେମାନେ ଯାହା ଚାହୁଁଛନ୍ତି ତାହା କରୁଛନ୍ତି । ଉପାସନା ବି ତାଙ୍କରି ପରାମର୍ଶରେ କାମ କରୁଥିବା କୁହାଯାଉଛି । ଏହା କରି ସେ କାଳେ ତାଙ୍କ ବାପାଙ୍କ ସଂଗଠନକୁ ପ୍ରାଧାନ୍ୟ ଦେଇ ବିଜେପିକୁ ତଳକୁ ଠେଲୁଛନ୍ତି ।

ଉପାସନାଙ୍କର ଏହି କାର୍ଯ୍ୟକୁ ନେଇ ଲୋକଙ୍କ ମଧ୍ୟରେ ପ୍ରତିକ୍ରିୟା ବଢ଼ିଲାଣି । ବିଜେପି ସରକାରରେ ଲୁଲୁ ଗୋଷ୍ଠୀ ବା ଉପାସନାଙ୍କ ସ୍ୱତନ୍ତ୍ର ଗୋଷ୍ଠୀଙ୍କ ପ୍ରଭାବ ବିଜେପିର ପୁରୁଣା କର୍ମକର୍ତ୍ତା, ସଂଗଠକ ମାନଙ୍କୁ ପ୍ରଭାବିତ କରୁଛି । ମାତ୍ର ଉପାସନା ବିଧାୟିକା ବୋଲି ସମସ୍ତେ ନୀରବ ରହୁଛନ୍ତି । ନିର୍ବାଚନର ୬ମାସ ମଧ୍ୟରେ ଉପାସନାଙ୍କ ଉପରୁ ଲୋକେ ଭରସା ହରାଇଥିବା କହୁଛନ୍ତି । ଏମିତି ଚାଲିଲେ, ବିଜେପି ବ୍ରହ୍ମଗିରିରେ ତାର ସଂଗଠନ ସୁଦୃଢ଼ କରିବ କ’ଣ ଦୁର୍ବଳ ହେବ । ଉପାସନାଙ୍କ ପୂର୍ବରୁ ତାଙ୍କ ଦାଦା ଲଳିତେନ୍ଦୁ ବିଦ୍ୟାଧର ମହାପାତ୍ରଙ୍କ ସମୟରେ ବି ବିଜେପି ଦୁର୍ବଳ ହେଉଥିଲା । ଆରଏସଏସ କୌଣସି ପ୍ରକାର ସ୍ଥିତିକୁ ସମ୍ଭାଳି ରଖିଥିଲା । ଏବେ ଏମପି ସମ୍ବିତ ପାତ୍ରଙ୍କ ପ୍ରୋତ୍ସାହନ ଯୋଗୁ ଉପାସନା କାଳେ ଲୋକଙ୍କୁ ଭୁଲିବା ଆରମ୍ଭ କରିଛନ୍ତି ।

ଉପସାନାଙ୍କ ବାପା ସ୍ୱର୍ଗତ ଲୁଲୁ ମହାପାତ୍ର ବ୍ରହ୍ମଗିରି ବାସୀଙ୍କ ପାଇଁ ବେଶ ତତ୍ପର ଥିଲେ । ବକ୍ସିଙ୍କ ପରିବାରର ଦାୟଦ ଭାବେ ଲୁଲୁ ସର୍ବଦା ଲୋକଙ୍କୁ ପ୍ରାଧାନ୍ୟ ଦେଉଥିଲେ । ମାତ୍ର ଏବେ ଉପାସନାଙ୍କ କାମ କାଳେ ଲୁଲୁ ଆଭିମୁଖ୍ୟକୁ ବିରୋଧ କରୁଥିବା କୁହାଯାଉଛି । ଦେଖାଯାଉ ଉପାସନା ବିଜେପିକୁ ସୁଦୃଢ଼ କରୁଛନ୍ତି ନା ନିଜ କ୍ୟାମ୍ପକୁ ବଳ ଦେଇ ଆଗକୁ ପତିଆରା ବଢ଼ାଉଛନ୍ତି ।

ଦ କୁଇଭର ବ୍ୟୁରୋ :- ଷ୍ଟେଟ୍ ହାଉସରେ ଆୟୋଜିତ ଏକ ସମାରୋହରେ ନାଇଜେରିଆ ଫେଡେରାଲ ରିପବ୍ଲିକ୍ ର ରାଷ୍ଟ୍ରପତି ମହାମହିମ ଶ୍ରୀ ବୋଲା ଅହମ୍ମଦ ଟିନୁବୁ ଭାରତ-ନାଇଜେରିଆ ସମ୍ପର୍କକୁ ପ୍ରୋତ୍ସାହିତ କରିବାରେ ଉଲ୍ଲେଖନୀୟ ଅବଦାନ ପାଇଁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କୁ ” ଗ୍ରାଣ୍ଡ କମାଣ୍ଡର ଅଫ୍‌ ଦି ଅର୍ଡର ଅଫ୍ ନାଇଜର ” ଜାତୀୟ ପୁରସ୍କାର ପ୍ରଦାନ କରିଥିଲେ। ପୁରସ୍କାର ପ୍ରଶଂସାପତ୍ରରେ ଉଲ୍ଲେଖ କରାଯାଇଛି ଯେ ପ୍ରଧାନମନ୍ତ୍ରୀଙ୍କ ଦୂରଦର୍ଶୀ ନେତୃତ୍ୱରେ ଭାରତ ଏକ ବିଶ୍ୱ ଶକ୍ତି ଭାବରେ ଅବସ୍ଥାପିତ ହୋଇଛି ଏବଂ ତାଙ୍କ ପରିବର୍ତ୍ତନଶୀଳ ଶାସନ ସମସ୍ତଙ୍କ ପାଇଁ ଏକତା, ଶାନ୍ତି ଏବଂ ଅଂଶୀଦାର ସମୃଦ୍ଧିକୁ ପ୍ରୋତ୍ସାହିତ କରିଛି ।

ଏହି ପୁରସ୍କାର ଗ୍ରହଣ କରିବା ଅବସରରେ ପ୍ରଧାନମନ୍ତ୍ରୀ ଏହି ସମ୍ମାନକୁ ଭାରତବାସୀ ଏବଂ ଭାରତ ଓ ନାଇଜେରିଆ ମଧ୍ୟରେ ଥିବା ଦୀର୍ଘକାଳୀନ ଐତିହାସିକ ବନ୍ଧୁତାକୁ ଉତ୍ସର୍ଗ କରିଥିଲେ। ସେ ଆହୁରି ମଧ୍ୟ କହିଛନ୍ତି ଯେ ଏହି ସ୍ୱୀକୃତି ଦୁଇ ଦେଶ ମଧ୍ୟରେ ରଣନୈତିକ ଭାଗିଦାରୀ ଏବଂ ଗ୍ଲୋବାଲ୍ ସାଉଥର ଆକାଂକ୍ଷା ପ୍ରତି ସେମାନଙ୍କର ଅଂଶୀଦାର ପ୍ରତିବଦ୍ଧତାକୁ ଦର୍ଶାଏ।

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ହେଉଛନ୍ତି ପ୍ରଥମ ବିଦେଶୀ ନେତା ଯିଏ କି ୧୯୬୯ ପରେ ଏହି ପୁରସ୍କାରରେ ସମ୍ମାନିତ ହୋଇଛନ୍ତି।

ବ୍ରହ୍ମପୁର( ଦ କୁଇଭର ):- ବ୍ରହ୍ମପୁର ଗୋଇଲୁଣ୍ଡିର ଏକ ଲଜରୁ ମହିଳାଙ୍କ ମୃତଦେହ ଉଦ୍ଧାର ଘଟଣାରେ ଅଭିଯୁକ୍ତ ସ୍ୱାମୀ ସାମୀଦମୋନ କୁ କେରଳରୁ ଠାବ କରିଛି ବ୍ରହ୍ମପୁର ପୋଲିସ l ପୂର୍ବରୁ ସାମୀଦମୋନ ଗଞ୍ଜାଇ ଚାଲାଣ ମାମଲାରେ ଗିରଫ ହୋଇ କେରଳର ତ୍ରିସୁର ସ୍ଥିତ ଭିୟୁର ଜେଲରେ ରହିଥିବା ବ୍ରହ୍ମପୁର ବୈଦ୍ୟନାଥପୁର ପୁଲିସ ଜାଣିବାକୁ ପାଇଥିଲା । ଗୋଇଲୁଣ୍ଡିରେ ମହିଳା ଙ୍କ ମୃତ୍ୟୁ ଘଟଣାର ତଦନ୍ତ ପାଇଁ କେରଳ ଜେଏମଏଫସି କୋର୍ଟରେ ରିମାଣ୍ଡ ଆବେଦନ କରିଥିଲା l କୋର୍ଟ ସାମୀଦମୋନ କୁ ଦୁଇଦିନିଆ ରିମାଣ୍ଡ ନେବା ପାଇଁ ମଞ୍ଜୁରୀ ପ୍ରଦାନ କରିଥିଲେ l ବୈଦ୍ୟନାଥପୁର ଥାନା ପୁଲିସ ଅଭିଯୁକ୍ତ ସାମୀଦମୋନକୁ ରିମାଣ୍ଡରେ ବ୍ରହ୍ମପୁର ଆଣି ପଚରାଉଚରା କରିଛି l ବର୍ତ୍ତମାନ ପୁଲିସ ଅଭିଯୁକ୍ତ ସ୍ୱାମୀକୁ ସାମିଦମୋନକୁ ଜେରା କରୁଥିଲେ ହେଁ ହତ୍ୟାର ପ୍ରକୃତ କାରଣ ସ୍ପଷ୍ଟ କରିପାରିନଥିବା ଜଣାପଡିଛି l ୨୧ ତାରିଖରେ ରିମାଣ୍ଡ ଅବଧି ଶେଷ ହେବା ପରେ ପୋଲିସ ସାମୀଦମୋନ କୁ କେରଳ କୋର୍ଟରେ ହଜାର କରିବାକୁ କୋର୍ଟଙ୍କ ନିର୍ଦ୍ଦେଶ ରହିଛି l ରିମାଣ୍ଡ ଅବଧି ଶେଷ ପୂର୍ବରୁ ପୋଲିସ ମହିଳାଙ୍କ ମୃତ୍ୟୁ ଘଟଣାର ପ୍ରକୃତ ତଥ୍ୟକୁ ତାଙ୍କ ସ୍ୱାମୀଙ୍କ ନିକଟରୁ ହାସଲ କରିବ ବୋଲି ବ୍ରହ୍ମପୁର ଏସ ପି ସୂଚନା ପ୍ରଦାନ କରିଛନ୍ତି l ସୂଚନାଯୋଗ୍ୟ ଯେ, ଗତବର୍ଷ ନଭେମ୍ବର ୧୯ ତାରିଖରୁ କେରଳରୁ ଏହି ଦମ୍ପତ୍ତି ଗୋଇଲୁଣ୍ଡି ର ଏକ ଲଜରେ ରହି ଆସୁଥିଲେ । କ୍ରୀଷ୍ଣାବେଣୀଙ୍କ ସ୍ବାସ୍ଥ୍ୟ ଭଲ ନଥିବା ଯୋଗୁଁ ଚିକିତ୍ସା ନିମନ୍ତେ ବ୍ରହ୍ମପୁରକୁ ଆସିଥିବା ବେଳେ ଗତ ନଭେମ୍ବର ୨୫ତାରିଖ ରାତିରେ ତାଙ୍କ ମୃତଦେହ ସେହି ଲଜର ଏକ ରୁମରୁ ଠାବ କରିଥିଲା ପୋଲିସ । କ୍ରୀଷ୍ଣାବେଣୀଙ୍କ ମୃତଦେହ ଠାବ ହୋଇଥିବା ବେଳେ ତାଙ୍କ ସ୍ବାମୀ ସାମିଦମୋନ ଫେରାର ରହିଥିବା ଜଣାପଡିଥିଲା ।