ରାହୁଲଙ୍କ ପାଟି ବାନ୍ଧି ଦେଲା ଜିଲେବି

ବ୍ରହ୍ମପୁର ( ଦ କୁଇଭର ):- ଦିଲ୍ଲୀରେ ବିଜେଡିର ୭ ସାଂସଦଙ୍କ ଦମ୍ଭୋକ୍ତି, ଆମେ ଏକ୍। କିନ୍ତୁ ଦିନକ ପରେ ନବୀନଙ୍କ ଜିଲ୍ଲାରେ ଗୋଷ୍ଠୀ କନ୍ଦଳ ତୀବ୍ର। ପରିସ୍ଥିତି ଏମିତି ଯେ, କଥା ଶଙ୍ଖ ଭବନ ଯାଏ ପହଞ୍ଚିଲା। ବୈଠକରେ ଉଚ୍ଚବାଚ ବି ହୋଇଥିବା ସୂଚନା ରହିଛି। ଶଙ୍ଖ ଭବନରେ ସମାଧାନ ନହେବାରୁ ଶେଷରେ ନବୀନ ନିବାସ ଯାଇ ସୁପ୍ରିମୋଙ୍କୁ ଭେଟି ଫେରାଦ ହେଲେ। ବ୍ରହ୍ମପୁର ମେୟର ଓ ଜିଲ୍ଲା ବିଜେଡି ସଭାପତି ରମେଶ ଚନ୍ଦ୍ର ଚ୍ୟାଉପଟ୍ଟନାୟକ ଗୋଷ୍ଠୀ ସହ ପୂର୍ବତନ ବିଧାୟକ ବିକ୍ରମ ପଣ୍ଡାଙ୍କ କର୍ପୋରେଟର ଗୋଷ୍ଠୀ ଭିତରେ କନ୍ଦଳ ତୀବ୍ର ରୂପ ଧାରଣ କରିଛି। ରାମ ଲିଙ୍ଗମ୍ ଉଦ୍ୟାନ କାମକୁ ନେଇ ଉଭୟ ଗୋଷ୍ଠୀ ମଧ୍ୟରେ ବିବାଦ ବଢିଛି। ଉଭୟ ପକ୍ଷ ନବୀନ ନିବାସ ଯାଇ ଫେରିବା ପରେ କହିଛନ୍ତି ଏକାଠି ହୋଇ ଏବେ ଗଞ୍ଜାମରେ କାମ କରିବୁ। ସୁପ୍ରିମୋ ଗୁରୁମନ୍ତ୍ର ଦେଇଛନ୍ତି। ମାତ୍ର ସତ କଣ ତାହା ଜଳ ଜଳ ହୋଇ ଦିଶୁଥିଲା।ଗଞ୍ଜାମ କଳି ନବୀନ ନିବାସ ଯାଏ ପହଞ୍ଚିଥିବା ବେଳେ ବିଜେପି କହିଛି, ବିଜେଡି ସଫା ହେଇଯିବ। ବିଜେଡି ଏହାକୁ ଅସ୍ବୀକାର କରିଥିବାବେଳେ କଂଗ୍ରେସ କିନ୍ତୁ ଏଥିରୁ ଫାଇଦା ନେବା ଲକ୍ଷ୍ୟରେ।

ନୂଆଦିଲ୍ଲୀ( ଦ କୁଇଭର ):- ରାଜଧାନୀ ଦିଲ୍ଲୀରେ ଅସମ୍ଭାଳ ହୋଇଛି ପ୍ରଦୂଷଣ ସ୍ଥିତି । ବୁଧବାର ଏକ୍ୟୁଆଇ ୪୪୫ ଥିବା ବେଳେ ଆଜି ଏହା ୪୫୦ ପାର କରିଛି । ଧୂଳି, ଧୂଆଁର ବହଳ ଆସ୍ତରଣରେ ଆକ୍ତାମାକ୍ତା ହୋଇପଡ଼ିଛନ୍ତି ଦିଲ୍ଲୀବାସୀ । ଦୃଶ୍ୟମାନ ଦୂରତା କମ ରହୁଥିବାରୁ ଟ୍ରାଫିକ୍‌ ସମସ୍ୟା ମଧ୍ୟ ସୃଷ୍ଟି ହେଉଛି । ସ୍ଥିତି ନିୟନ୍ତ୍ରଣ ପାଇଁ କଡ଼ା ପଦକ୍ଷେପ ଗ୍ରହଣ କରିଛନ୍ତି ରାଜ୍ୟ ସରକାର । ଦିଲ୍ଲୀ ସହର ଭିତରେ ବିଏସ୍‌-୩ ପେଟ୍ରୋଲ ଏବଂ ବିଏସ୍‌-୪ ଡିଜେଲ କାର୍‌ ଉପରେ ପ୍ରତିବନ୍ଧକ ଲଗାଯାଇଛି । ସହର ଭିତରେ ଏହି ଗାଡ଼ି ଚଳାଇଲେ ଦେବାକୁ ପଡ଼ିବ ୨୦ ହଜାର ଟଙ୍କା ଜୋରିମାନା । ଦୁଇ ମାସ ଭିତରେ ଦ୍ବିତୀୟ ଥର ପାଇଁ ଏଭଳି ପ୍ରତିବନ୍ଧକ ଲଗାଇଛନ୍ତି ସରକାର । ସେପଟେ ପ୍ରତି ଛକରେ ଚେକ୍‌ ପୋଷ୍ଟ କରି ଗାଡ଼ି ଗୁଡ଼ିକର ପଲ୍ୟୁସନ୍‌ ସାର୍ଟିଫିକେଟ୍‌ ଯାଞ୍ଚ କରୁଛି ପୋଲିସ । ପିୟୁସି ନଥିଲେ ୧୦ ହଜାର ଟଙ୍କାର ତଣ୍ଡ ଆଦାୟ କରାଯାଉଛି । ସେପଟେ ପ୍ରଦୂଷଣ ମୁକାବିଲାରେ ଦିଲ୍ଲୀ ସରକାର ଫେଲ୍‌ ମାରିଥିବା କହିଛନ୍ତି ସାଧାରଣ ଜନତା । ଛାତ୍ରଛାତ୍ରୀଙ୍କ ସ୍ବାସ୍ଥ୍ୟାବସ୍ଥାକୁ ଧ୍ୟାନରେ ରଖି ଜିଲ୍ଲାର ସମସ୍ତ ସରକାରୀ ଓ ବେସରକାରୀ ସ୍କୁଲକୁ ହାଇବ୍ରିଡ୍‌ ମୋଡ୍‌ରେ ଚାଲୁ କରିବାକୁ ନିର୍ଦ୍ଦେଶ ଦିଆଯାଇଛି । ସରକାରଙ୍କ ପରବର୍ତ୍ତି ଆଦେଶ ଆସିବା ଯାଏ ଏକାଦଶ ଶ୍ରେଣୀ ପର୍ୟ୍ୟନ୍ତ ସମସ୍ତ ସ୍କୁଲରେ ହାଇବ୍ରିଡ୍‌ ମୋଡ୍‌ରେ ପାଠପଢ଼ା ହେବ ।

ଭୁବନେଶ୍ୱର(ଦ କୁଇଭର): ସଂସଦ ପ୍ରବେଶ ଦ୍ୱାରରେ ରାହୁଲଙ୍କ ହିଂସାକାଣ୍ଡକୁ ନେଇ ତାତିଛି ବିଜେପି । ପୂର୍ବରୁ ଆମ୍ବେଦକରଙ୍କ ପ୍ରସଙ୍ଗରେ କଂଗ୍ରେସ ବିଭିନ୍ନ ରାଜ୍ୟରେ ବିରୋଧ ପ୍ରଦର୍ଶନ କରୁଥିଲା । ଏପରିକି ବିଜେପି ନେତା ତଥା ଗୃହମନ୍ତ୍ରୀ ଅମିତ ଶାହ ସାମ୍ବାଦିକ ସମ୍ମିଳନୀ କରି ସଫେଇ ଦେବାକୁ ବାଧ୍ୟ ହୋଇଥିଲେ । ଏହି ମାଡ଼କୁ ବିଜେପି ଭୁଲି ନାହିଁ । କଂଗ୍ରେସର ଇଟା ମାଡ଼ର ଜବାବ ଏବେ ବିଜେପି ପଥରରେ ଦେଉଛି । ରାହୁଲଙ୍କ ଠେଲାପେଲା ଓ ଧକ୍କାମୁକାରେ ଓଡ଼ିଶା ସାଂସଦ ପ୍ରତାପ ଷଢ଼ଙ୍ଗୀ ଓରଫ ନନା ଆହତ ହୋଇ ହସ୍ପିଟାଲରେ ଭର୍ତ୍ତି ହେବାକୁ ବିଜେପି ଦେଶବ୍ୟାପୀ ପ୍ରସଙ୍ଗ କଲାଣି । ବିଜେପି ଶାସିତ ରାଜ୍ୟ ଗୁଡ଼ିକରେ ବିରୋଧ ଓ ଧାରଣ ପ୍ରଦର୍ଶନ କରିବାକୁ ଦଳୀୟ ନିଦେ୍ର୍ଦଶ ଆସିଛି । ସେଥିପାଇଁ ପୂରା ସଜବାଜ ହୋଇଛି ବିଜେପି । ଦେଶରେ କଂଗ୍ରେସର ସ୍ଥିତି ଦୁର୍ବଳ ଥିବାରୁ ବିଜେପି ତାର ପ୍ରଭାବ ଦେଖାଇବାକୁ ଲାଗିଛି ।

ଆମ୍ବେଦକରଙ୍କୁ ସଂସଦର ରାଜ୍ୟସଭାରେ ଶାହ ହତାଦର ଭାଷା ପ୍ରୟୋଗ କରିଥିବା କଂଗ୍ରେସ ଅଭିଯୋଗ କରିଥିଲା । ଏହାକୁ ନେଇ କଂଗ୍ରେସ ସଂସଦରେ ହୋ ହଲ୍ଲା ଓ ହଙ୍ଗାମା କରିଥିଲା । ଧାରଣା ବି ଦେଇଥିଲା । ବିଭିନ୍ନ ରାଜ୍ୟରେ ବିରୋଧ ପ୍ରଦର୍ଶନ କରାଇଥିଲା । କେବଳ କଂଗ୍ରେସ ନୁହେଁ, କଂଗ୍ରେସ ସହ ଥିବା ଓ କଂଗ୍ରେସ ଠୁ ଦୂରେଇ ଥିବା ବିଜେଡି ଭଳି ଦଳ ଏହାକୁ ନିନ୍ଦା କଲେ । ଶିବସେନା ନେତା ଉଦ୍ଧବ ଠାକରେ ତ ଶାହଙ୍କୁ ନିନ୍ଦା କରିଥିଲେ । ଆମ୍ବେଦକରଙ୍କ ପ୍ରସଙ୍ଗରେ ଶାହଙ୍କ ମନ୍ତବ୍ୟକୁ ଗ୍ରହଣ କରାଗଲା ନାହିଁ । ସବୁଠି ନିନ୍ଦା ହେଲା ।

ହେଲେ ଏହାକୁ ବିରୋଧ କଲେ ବିଜେପି ସଦସ୍ୟମାନେ । କଂଗ୍ରେସ ସଂକ୍ଷିପ୍ତ ମନ ରଖୁଛି । ଭିଡିଓକୁ କଦର୍ଥ କରି ଦେଖାଉଛି । ଶାହ ସେପରି କିଛି ମାନହାନୀ ସୂଚକ କହିନାହାନ୍ତି । ଅନେକ ସଫେଇ ଦେଲା । ଶେଷରେ ବିଜେଡି ଏମପି ସୁଲତା ଦେଓ ବି ଶାହଙ୍କ ଭିଡିଓ ନିଜ ମୋବାଇଲରେ ଆଣି ଦେଖାଇଲେ । କହିଲେ, କେମିତି ସେ ଆମ୍ବେଦକରଙ୍କ ସମ୍ମାନ ହାନୀ କରିଛନ୍ତି । ବାସ୍ତବରେ ଏହି ପ୍ରସଙ୍ଗ ଜନତାଙ୍କ ଉପରେ ଛାଡ଼ି ଦିଆଯିବା କଥା । କାରଣ ଆମ୍ବେଦକର କେବଳ କୌଣସି ରାଜନୈତିକ ଦଳର ନୁହନ୍ତି । ଶାହଙ୍କ ଉପଯୁକ୍ତ ମତକୁ ସର୍ବସାଧାରଣରେ ଛାଡ଼ି ଦେଇ ମତାମତ ଆହ୍ୱାନ କରିବା କଥା । ଯଦି ସାଧାରଣ ଲୋକଙ୍କୁ ବାଧିବ, ତେବେ ତାହାକୁ ରେକର୍ଡରୁ ଅପସାରଣ କରାଯିବା ଉଚିତ । ଅନ୍ୟଥା ଏହାକୁ ନେଇ ଏତେ ପାଲା ଗ୍ରହଣୀୟ ନୁହେଁ ।

ହେଲେ କଂଗ୍ରେସ ଏଥିରୁ ରାଜନୀତି କରିବାକୁ ଆରମ୍ଭ କରିଥିଲା । ବିରୋଧ ଫଳରେ ବିଜେପି ବି ଜବାବ ଦେଲା । ଆନେ୍ଦାଳନ କରିଦେଲା । ସଂସଦର ଗେଟ ନିକଟରେ ଆନେ୍ଦାଳନ କରିବା ବେଳେ ଲୋକସଭାର ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ ରୋକି ଦେଲେ । ସେଠାରେ ଧକ୍କା ମୁକ୍କା ହେଲା । ଯାହା ହିଂସକାଣ୍ଡ । ଆମ୍ବେଦକରଙ୍କ ଠାରୁ ବହୁ ଉଦ୍ଧ୍ୱର୍ରେ ସଂସଦ । ଶାହ ଯଦି ଆମ୍ବେଦକରଙ୍କୁ ଅସମ୍ମାନ କଲା, ରାହୁଲ ସଂସଦରେ କଳଙ୍କ ଲଗାଇ ଦେଲେ । ଏହାକୁ ଏବେ ଧରିଛି ବିଜେପି ।

ବିଜେପି ଶାସନାଧିନ ଦେଶର ୨୦ଟି ରାଜ୍ୟରେ ଗର୍ଜନ କରିବାକୁ ଧାର୍ଯ୍ୟ କରିଛି । ଏହି ପ୍ରସଙ୍ଗକୁ ନେଇ ବିଜେପି ତାର ଶକ୍ତି ଦେଖାଇବ । ସାରା ଦେଶରେ ରାହୁଲଙ୍କ ବିରୋଧରେ ଏକ ଅଭିଯାନ ଚଳାଇବ ବୋଲି ସୂଚନା ମିଳିଛି । ସେଥିପାଇଁ ସବୁ ରାଜ୍ୟର ବିଜେପି କର୍ମୀମାନେ ସଜବାଜ ହେଲେଣି । ସେପଟେ ରାହୁଲଙ୍କ ଠେଲାପେଲାରେ ଆହତ ହୋଇଥିବା ନନାଙ୍କ ସ୍ୱାସ୍ଥ୍ୟାବସ୍ଥା ଠିକ ଅଛି । ଶୁକ୍ରବାର ସେ ଡାକ୍ତରଖାନାରୁ ଫେରିବେ ବୋଲି କୁହାଯାଉଛି । ଦେଖାଯାଉ ବିଜେପି ରାହୁଲଙ୍କ ପ୍ରସଙ୍ଗକୁ ନେଇ କି ପଦକ୍ଷେପ ନେଉଛି ଓ ସଂସଦ ଅଧିବେଶନ ଆଗକୁ ଚାଲୁଛି ନା ରହି ଯାଉଛି?

ଭୁବନେଶ୍ୱର(ଦ କୁଇଭର): ରାଜ୍ୟ ସରକାରଙ୍କର ଓଏସଡି ବା ଅଫିସର ଅନ ସ୍ପେଶାଲ ଡୁ୍ୟଟି ପଦବୀ ଏକ ଦଣ୍ଡ ନା ପୁରସ୍କାର । ଏହି ପଦବୀ ପାଉଥିବା ଅନେକ ଅଫିସର କେବଳ ମଉଜ କରନ୍ତି ଆଉ ଶେଷ ମୁହୂର୍ତ୍ତରେ ସରକାରଙ୍କୁ ଲଣ୍ଠନ ଦେଖାଇ ପାର ହୋଇ ଯାଆନ୍ତି । ଏକଥା ବିଜେଡି ହେଉ କି ବିଜେପି ସରକାର ସବୁଥିରୁ ପ୍ରମାଣିତ ହେବାରେ ଲାଗିଛି । ବିଜେଡି ତ ଦୁର୍ନୀତି ଅଭିଯୁକ୍ତଙ୍କୁ ପୁରସ୍କାର ଦେଉଥିଲା, ଏବେ ବିଜେପି ବି ସେମିତି କରିଲାଣି । ଯାହା ଦେଖାଉଛି ବିଜେଡି ଓ ବିଜେପି ସରକାର ଭିତରେ କିଛି ଫରକ ନାହିଁ । ହେଲେ ଦୁର୍ନୀତି ଅଭିଯୁକ୍ତଙ୍କୁ ସୁରକ୍ଷା କାହିଁକି? ସରକାର ଫସିଯିବେ ବୋଲି ଭୟ ନା ସରକାର ଆଇଏଏସ ଓ ଆଇପିଏସ ମାନଙ୍କର କିଛି କରିପାରିବେ ନାହିଁ ବୋଲି ଜାଣିଛନ୍ତି?

ଏବେ ଆସିବା ପ୍ରସଙ୍ଗକୁ । ରାଜ୍ୟ ସରକାର କିପରି ଦୁର୍ନୀତି ବା ଆଇନ ଭାଙ୍ଗୁଥିବା ଅଧିକାରୀ ମାନଙ୍କୁ ଓଏସଡି କରୁଛନ୍ତି ଓ ପରେ ପୁରସ୍କାର ଦେଉଛନ୍ତି । ପ୍ରଥମ ଉଦାହରଣ ହେଉଛି ଡିଏସ କୁଟ୍ଟେ ଓ ଆଶୀଷ ସିଂ । ଦୁହେଁ ବରିଷ୍ଠ ଆଇପିଏସ । ଦୁହିଙ୍କ ବିରୋଧରେ ଆସିଥିଲା ସଂଗୀନ ଅଭିଯୋଗ । ଏମିତି ଅଭିଯୋଗ ଯେ, ପୂରା କ୍ୟାରିୟରରେ କଳା ଦାଗ ଲାଗିଯିବା କଥା । ହେଲେ ଏମାନଙ୍କ ବିରୋଧରେ ତଦନ୍ତ କରାଗଲା ନାହିଁ । ତକ୍ରାଳ ଆଣି ସରକାର ତାଙ୍କୁ ଗୃହ ବିଭାଗର ଓଏସଡି କରିଦେଲେ । ଓଏସଡି ଭାବେ ୬ମାସ ବସିଲେ । ଏହାରି ଭିତରେ ହେଲା ସେଟିଂ । ଯଦି ଏମାନଙ୍କୁ ଦଣ୍ଡ ହେବ, ତେବେ ବିଜେପି ସରକାର ଯାହା ଭୂଲ କରିବ ତାହା ପଦାକୁ ଆସିବ । ତେଣୁ ଡରିଲେ ମୋହନ ସରକାର । କେବଳ ସେତିକି ନୁହେଁ, ଯଦି ଏମାନେ ଗୋଟେ ଦଳ ବା ସରକାର ପାଇଁ ଆଇନକୁ ଭାଙ୍ଗି ଏତେ ଦୂର ପର୍ଯ୍ୟନ୍ତ ଯାଇ ପାରୁଛନ୍ତି, ତେବେ ଏମାନଙ୍କୁ ବିଜେପି କାହିଁକି କାମରେ ଲଗାଇବ ନାହିଁ ।

ତେଣୁ ୬ମାସ ପରେ ସବୁ ଦୋଷକୁ ଭୁଲି ମୁଖ୍ୟମନ୍ତ୍ରୀ ମୋହନ ମାଝୀ ଏହି ଦୁଇ ଅଫିସରଙ୍କ କେନ୍ଦ୍ରୀୟ ଡେପୁଟସନକୁ ସ୍ୱିକୃତୀ ଦେଇଦେଲେ । ମୁଖ୍ୟମନ୍ତ୍ରୀ ଜାଣନ୍ତି, ଏମାନେ କେତେ ସଂଗୀନ କାମ କରିଛନ୍ତି । ତଥାପି ଏମାନଙ୍କୁ ସ୍ୱିକୃତୀ ଦେଇ ପୁରସ୍କାର ଦେଲେ । ଏବେ ଦୁହେଁ ଯାଇ କେନ୍ଦ୍ରୀୟ ସୁରକ୍ଷା ବଳରେ ଆଇଜି ଭାବେ କାର୍ଯ୍ୟ କରୁଛନ୍ତି । ସେହିପରି ପୂର୍ବରୁ ବି ନବୀନ ସରକାରରେ କିଛି ଆଇଏଏସ ଅଧିକାରୀ ନାନା ଦୁର୍ନୀତି ଅଭିଯୋଗରେ ଓଏସଡି ହୋଇ ବସିଥିଲେ । ଯେମିତି ବିଜୟ ଶର୍ମା, ସଞ୍ଜୀବ ମାରିକ ପ୍ରମୁଖ । ଏମାନଙ୍କ ବିରୋଧରେ ତ କିଛି ହେଲା ନାହିଁ, ବରଂ ସ୍ୱେଚ୍ଛାକୃତ ଅବସର ନେଇ ଚାଲିଗଲେ ।

ସେହିପରି ଏବେ ଆଇଏଏସ ବିଷ୍ଣୁପଦ ସେଠୀଙ୍କୁ ସରକାର ମୋହନ ସରକାର ଓଏସଡି କରିଛନ୍ତି । ତାହା ପୁଣି ପ୍ରମୁଖ ସଚିବ ପାହ୍ୟାର । ହେଲେ କାମ କିନ୍ତୁ କିଛି ନାହିଁ । ଦୁର୍ନୀତି ଅଭିଯୋଗର ସାମ୍ନା କରୁଥିବା ଆଇଏଏସଙ୍କୁ ନିଲମ୍ବନ ନକରି ତାଙ୍କୁ ଓଏସଡି କରି ବସାଯିବା ପଛରେ ବି ବଡ଼ କାରଣ କାଳେ ରହିଛି । ବିଷ୍ଣୁପଦ ଫସିଲେ, ସାଙ୍ଗରେ ବିଜେପି ମନ୍ତ୍ରୀଙ୍କୁ ବି ନେଇ ଫସିବେ । ତେଣୁ ବିଷ୍ଣୁପଦଙ୍କ ସୁରକ୍ଷା ଏବେ ବିଜେପିର ପ୍ରମୁଖ ଦାୟିତ୍ୱ ହୋଇ ଯାଇଛି । ତାଙ୍କୁ ଓଏସଡି କରିବା ସହ ଦିଲ୍ଲୀରେ ସେଟିଂ କରି ସେ କିପରି କେନ୍ଦ୍ରୀୟ ଡେପୁଟେସନରେ ଯିବେ ସେହି ରାସ୍ତା ବାହାର କରାଯାଉଥିବା ଜଣାପଡ଼ିଛି । ଏହା ହେଲେ ବିଷ୍ଣୁପଦ ବି ଖୁସ ଆଉ ମୋହନ ସରକାର ବି ।

ଏହା ପୂର୍ବରୁ ଆହୁରି ମଧ୍ୟ ୨ଜଣ ଆଇଏଏସଙ୍କୁ ଓଏସଡି କରାଯାଇଥିଲା । ମାତ୍ର ତାଙ୍କ ବିରୋଧରେ ଥିବା ଅଭିଯୋଗକୁ ଅଣଦେଖା କରି ପରେ ତାଙ୍କୁ ପଦୋନ୍ନତି ଦିଆଗଲା । ଏଥିରୁ ସ୍ପଷ୍ଟ ହେଉଛି ରାଜ୍ୟ ସରକାର ଆଇଏଏସ ଓ ଆଇପିଏସ ମାନଙ୍କ ପାଖରେ କେତେ ଦୁର୍ବଳ । ସେମାନେ ଯେତେବଡ଼ ତ୍ରୁଟି କରନ୍ତୁ ପଛେ ସେମାନଙ୍କ ଦେହରେ ହାତ ମାରିପାରିବେ ନାହିଁ । କେବଳ ଯନ୍ତ୍ରୀ, କିରାଣୀ, ସାମ୍ବାଦିକ, କିଛି ବେପାରୀ ଓ କିଛି ଠିକାଦାରଙ୍କ ଉପରେ ପୁରୁଷପଣିଆ ଦେଖାଉଥିବା ସରକାରଙ୍କର ଔକାତ କେତେ ତାହା ଲୋକେ ଜାଣିବା ଦରକାର । ଦେଖାଯାଉ ମୋହନ ସରକାର ଏମିତି ଡରି ରହୁଛନ୍ତି ନା କିଛି ବ୍ୟତିକ୍ରମ ସୂଚକ ପଦକ୍ଷେପ ନେଉଛନ୍ତି?

ଭୁବନେଶ୍ୱର(ଦ କୁଇଭର): ଆମ ମାଟି ମାଆ ଅସୁସ୍ଥ ହୋଇପଡ଼ିଲାଣି । ଖୋଲାଖୋଲି ଅତ୍ୟାଚାର କରୁଛନ୍ତି ସମସ୍ତେ । ଭୁଲି ଯାଉଛନ୍ତି ସେମାନଙ୍କ ଅକାର୍ଯ୍ୟ ହିଁ ମାଟିକୁ ମାରି ଦେଉଛି । ମାଟିର ଏହି ସ୍ଥିତି ହିଁ ଜୀବନ ବା ଜୀବଜଗତ ।ଇଁ ସତର୍କଘଣ୍ଟି ବଜାଇଛି । ଆମ ଖାଇବା ପ୍ଲେଟରେ ବିର୍ଯ୍ୟୟ ପହଞ୍ଚିଲାଣି । ଆମେ ଯାହା ବି ଖାଉଛେ ତାହା ବିଷ ଠୁ କମ ନୁହେଁ । ବିଷ ଖାଇଲେ, ଆମେ ସୁସ୍ଥ ହୋଇ ପାରିବା କି? ଆମ ଜୀବଜଗତ ତିଷ୍ଠି ପାରିବ କି? ମାଟିର ସୁରକ୍ଷା ପାଇଁ ଅଣ୍ଟା ଭିଡ଼ିଛି ଦ ଡ୍ରପ୍ସ ଅନୁଷ୍ଠାନ । ଅନୁଷ୍ଠାନ ପକ୍ଷରୁ ଆରମ୍ଭ କରାଯାଇଛି ମିଶନ ବସୁଧା । ଏହି ମିଶନରେ ମାଟିର ସୁରକ୍ଷା ପାଇଁ କେବଳ ସଚେତନତା ନୁହେଁ, ବରଂ ସହଯୋଗର ହାତ ବଢ଼ାଇବ ଅନୁଷ୍ଠାନ । ଏନେଇ ଏକ ଜାତୀୟ ସ୍ତରର କର୍ମଶାଳାରେ ମିଶନ ବସୁଧାର ଲକ୍ଷ୍ୟ ଓ ମାଟିର ସୁରକ୍ଷା ନେଇ ଅନେକ ଗୁରୁତ୍ୱପୂର୍ଣ୍ଣ କଥା କହିଛନ୍ତି ମିଶନ ଆବାହକ ତଥା ମିଶନର ଫେସ ପୁଷ୍ପିତା ଦ୍ୱିବେଦୀ ।

ସେ ଦେଖାଇଛନ୍ତି ମାଟିର ସ୍ଥିତି, ମାନବଜାତି ଓ ଜୀବଜଗତ ପ୍ରତି ବିପଦ ଆଉ ପ୍ରତିକାର । ଏପରିକି ଖାଦ୍ୟ ଶସ୍ୟ ଉତ୍ପାଦନ ବୃଦ୍ଧି ପାଇଁ କରାଯାଇଥିବା ସବୁଜ ବିପ୍ଳବକୁ ସେ ଅଭିଷା ବୋଲି ଦର୍ଶାଇଛନ୍ତି । ସବୁଜ ବିପ୍ଳବର ନକରାତ୍ମକ ଦିଗକୁ ଠିକ ଭାବେ ତର୍ଜମା କରାଯାଇ ନଥିବାରୁ ଆଜି ସେହି ବିପ୍ଳବ ଆମ ଉପରେ ବୋଝ ହୋଇଯାଇଛି । ଏବେ ଠୁ ଆମକୁ ପ୍ରତିକାର ପାଇଁ ଗୋଡ଼ କାଢ଼ିବାକୁ ପଡ଼ିବ ବୋଲି ସେ ଆହ୍ୱାନ ଦେଇଥିଲେ । ନହେଲେ ଖୁବଶୀଘ୍ର ଆମେ ଖାଦ୍ୟାଭାବର ଶୀକାର ହେବା ବୋଲି ସେ ଚେତାଇ ଦେଇଥିଲେ । ଏହାର ପ୍ରତିକାର ପାଇଁ ସଂସ୍ଥା ପକ୍ଷରୁ ବୈଜ୍ଞାନିକ ଜ୍ଞାନକୌଶଳରେ ନିର୍ମିତ ସହାୟତା ପ୍ରଦାନ କରାଯାଉଛି । ପ୍ରତିଟି ଲୋକ ପାଖରେ ଏହି ସହାୟତା କିପରି ପହଞ୍ଚିବ ଓ ଲୋକେ କିପରି ମାଟିକୁ ସୁସ୍ଥ କରି ଆମ ସମାଜକୁ ସୁସ୍ଥ ରଖିପାରିବେ ତାହା ଉପରେ ଶ୍ରୀମତୀ ଦ୍ୱିବେଦୀ ଗୁରୁତ୍ୱ ଦେଇଥିଲେ ।

ଏହି ଅବସରରେ ମିଶନ ବସୁଧାର ବ୍ରେନ ତଥା ଆଇଆଇଟି ଭୁବନେଶ୍ୱରର ବୈଜ୍ଞାନିକ ଡ. ବିଶ୍ୱରଞ୍ଜନ ପ୍ରଧାନ କହିଲେ, ମାଟି ଅସୁସ୍ଥ ହେବାର କାରଣ ଓ ଏହାର ନିରାକରଣ କିପରି କରାଯିବା ଆବଶ୍ୟକ । ନିରାକରଣ ନହେଲେ କି ସମସ୍ୟା ଆସିବ । ସବୁଜ ବିପ୍ଳବକୁ ବି ସେ ଆଜିର ବିର୍ଯ୍ୟୟ ପାଇଁ ଦାୟୀ କରିଥିଲେ । ଯଦି ସେତେବେଳେ ଏଦିଗରେ ଚିନ୍ତା କରାଯାଇଥାନ୍ତା, ତେବେ ଏ ସମସ୍ୟା ଆସି ନଥାନ୍ତା କି ଆମ ଭବିଷ୍ୟତ ନେଇ ଆମେ ଚିନ୍ତିତ ନଥାନ୍ତେ ବୋଲି ଡ. ପ୍ରଧାନ କହିଥିଲେ ।

ଇକୋସିଏଟ ସହଭାଗିତା ଓ ଜିଆଇଟି ଗୁଣୁପୁର ସହାୟତା ଆୟୋଜିତ ଏହି କର୍ମଶାଳାରେ ବିଶ୍ୱବ୍ୟାଙ୍କର ପୂର୍ବତନ ପରାମର୍ଶଦାତା କିର୍ତ୍ତୀ ପ୍ରସନ୍ନ ମିଶ୍ର କହିଲେ, ସତର୍କଘଣ୍ଟି ତ ବାଜିଗଲାଣି । ମାଟି ଅସୁସ୍ଥତାର ବଡ଼ ନମୂନା ପଞ୍ଜାବ । ଓଡ଼ିଶାରେ ସ୍ଥିତି ବି ଭଲ ନାହିଁ । ବସୁଧା ମିଶନ ମାଧ୍ୟମରେ ମାଟିର ସୁରକ୍ଷା ସହ ମାଟିକୁ ସୁସ୍ଥ କରିବାକୁ ଅଭିଯାନ ଆରମ୍ଭ ହୋଇଛି । ଏହି ଅଭିଯାନ ମାଟିର ବିର୍ଯ୍ୟୟ ହୋଇଥିବା ଞ୍ଜାବ ଭଳି ରାଜ୍ୟକୁ ପରିବ୍ୟାପ୍ତ କରାଯିବ । ସମଗ୍ର ଦେଶରେ ଏହି ଅଭିଯାନ ଚାଲିବ ବୋଲି ମିଶ୍ର କହିଥିଲେ । ଏହି ଅବସରରେ ଡ. ବିଶ୍ୱରଞ୍ଜନ ଭୋଳ, ଡ. ଚିତ୍ତରଞ୍ଜନ ସାହୁ ପ୍ରମୁଖ ସେମାନଙ୍କର ମତ ବ୍ୟକ୍ତ କରିଥିଲେ । ରାଜ୍ୟ ତଥା ରାଜ୍ୟ ବାହାରୁ ଅନେକ ବିଶେଷଜ୍ଞ, ଏଫପିଓ,ସ୍ବେଛାସେବୀ ଅନୁଷ୍ଠାନ,ଷ୍ଟାର୍ଟପ ଏବଂ ଚାଷୀମାନେ ଏହି କାର୍ଯ୍ୟକ୍ରମ ରେ ସାମିଲ ହୋଇଥିଲେ ।

ଦ କୁଇଭର ବ୍ୟୁରୋ :-'ଗୁରୁବାରଠାରୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ୫ ଦିନିଆ ଦିଲ୍ଲୀ ଏବଂ ରାଜସ୍ଥାନ ଗସ୍ତରେ ଯିବେ। ମୁଖ୍ୟମନ୍ତ୍ରୀ ଗୁରୁବାର ସନ୍ଧ୍ୟା ସାଢ଼େ ୫ଟାରେ ଦିଲ୍ଲୀ ଅଭିମୁଖେ ଯାତ୍ରା କରିବେ। ୨୦ ତାରିଖରେ ଦିଲ୍ଲୀରୁ ରାଜସ୍ଥାନ ଯିବେ। ସେଠାରେ ବିଭିନ୍ନ କାର୍ଯ୍ୟକ୍ରମରେ ଯୋଗଦେବେ। ରାଜସ୍ଥାନରେ ପ୍ରାକ୍ ବଜେଟ୍ ପ୍ରସ୍ତୁତି ଆଲୋଚନାରେ ମୁଖ୍ୟମନ୍ତ୍ରୀ ଭାଗ ନେବେ।ମୁଖ୍ୟମନ୍ତ୍ରୀ ୧୯, ୨୦ ଓ ୨୧ ତାରିଖ ରାଜସ୍ଥାନରେ ରହିବାର କାର୍ଯ୍ୟକ୍ରମ ରହିଛି। ତେବେ ୨୧, ୨୨ ଓ ୨୩ ତାରିଖ ଦିଲ୍ଲୀରେ ରହିବେ ବୋଲି କୁହାଯାଉଛି। ଏହି ଗସ୍ତ ସମୟରେ ଦିଲ୍ଲୀରେ ଆୟୋଜିତ ୫୫ତମ ଜିଏସଟି ବୈଠକରେ ମୁଖ୍ୟମନ୍ତ୍ରୀ ଯୋଗଦେବାର କାର୍ଯ୍ୟକ୍ରମ ରହିଛି। ଏହାସହ ମୁଖ୍ୟମନ୍ତ୍ରୀ କିଛି କେନ୍ଦ୍ରମନ୍ତ୍ରୀ ଏବଂ ଶୀର୍ଷ ନେତୃତ୍ବଙ୍କୁ ଭେଟିବାର ମଧ୍ୟ କାର୍ଯ୍ୟକ୍ରମ ଥିବା କୁହାଯାଉଛି।

ଦ କୁଇଭର ବ୍ୟୁରୋ :- ଆଜି ସବୁଠାରୁ ଛୋଟ ଦିନ, ରାତି ହେବ ଲମ୍ବା । ଭୁବନେଶ୍ବରରେ ଦିନର ଲମ୍ବ ପ୍ରାୟ ୧୦ ଘଣ୍ଟା ୫୪ ମିନିଟ୍ ୨୪ ସେକେଣ୍ଡ ରହିବ । ଆଉ ଦୀର୍ଘତମ ରାତି ପ୍ରାୟ ୧୩ ଘଣ୍ଟା ୫ ମିନିଟ୍ ୩୬ ସେକେଣ୍ଡ ହେବ । ଏନେଇ ସୂଚନା ଦେଇଛନ୍ତି ମହାକାଶ ବିଜ୍ଞାନୀ ଡକ୍ଟର ଶୁଭେନ୍ଦୁ ପଟ୍ଟନାୟକ ।ପ୍ରାୟତଃ ଭୁବନେଶ୍ୱରରେ ଡିସେମ୍ବର ୧୫ରୁ ୨୭ ତାରିଖ ଯାଏ ପ୍ରାୟ ୧୨ ଦିନ ଧରି ଦିନର ଲମ୍ବ ୧୦ ଘଣ୍ଟା ୫୪ ମିନିଟ୍ ଏବଂ ରାତି ପ୍ରାୟ ୧୩ ଘଣ୍ଟା ୫ ମିନିଟ୍ ହୋଇଥାଏ । ଆଜି ସୁନ୍ଦରଗଡ଼ରେ ଦିନ ୧୦ ଘଣ୍ଟା ୪୭ ମିନିଟ୍ ଓ ମାଲକାନଗିରିରେ ଦିନର ଲମ୍ବା ୧୧ ଘଣ୍ଟା ୦୧ ମିନିଟ୍ ରହିବ । ସେହିପରି ଦିଲ୍ଲୀ ଓ କନ୍ୟାକୁମାରୀରେ ଦିନର ଲମ୍ବା ଯଥାକ୍ରମେ ୧୦ ଘଣ୍ଟା ୧୯ ମିନିଟ୍ ଓ ୧୧ ଘଣ୍ଟା ୩୯ ମିନିଟ୍ ହେବ। ପ୍ରତିବର୍ଷ ଡିସେମ୍ୱର ୨୨ରୁ ସୂର୍ଯ୍ୟଙ୍କର ଉତ୍ତରାୟଣ ଗତି ହୋଇଥାଏ।

ଜ୍ୟୋତିର୍ବିଜ୍ଞାନୀଙ୍କ ମତରେ ପ୍ରତିବର୍ଷ ଡିସେମ୍ବର ୨୧ କିମ୍ବା ୨୨ରେ ଉତ୍ତର ଗୋଲାର୍ଦ୍ଧରେ ଶୀତଋତୁର ପ୍ରଥମ ଦିନ ଆରମ୍ଭ ହୋଇଥାଏ । ଏହା ବର୍ଷର ସବୁଠାରୁ ଛୋଟ ଦିନ ହୋଇଥାଏ । ଧୀରେ ଧୀରେ ଦିନଗୁଡ଼ିକ ଅଧିକରୁ ଅଧିକ ଲମ୍ବା ହୁଏ ବା ଦିନର ଲମ୍ବ ବଡ଼ ହେବାକୁ ଆରମ୍ଭ ହୁଏ। ତେଣୁ ଡିସେମ୍ବର ୨୫କୁ ‘ବଡଦିନ’ ରୂପେ ପାଳନ କରାଯାଏ ।

ଦ କୁଇଭର ବ୍ୟୁରୋ :- ଆଜି ରାଜ୍ୟରେ ଉପକୂଳ ଓ ଆଭ୍ୟନ୍ତରୀଣ ଓଡ଼ିଶାରେ ବର୍ଷା ଜାରି ରହିବ । ସେପଟେ ଉପକୂଳ ଓଡ଼ିଶାର ୧ରୁ ଦୁଇ ଜିଲ୍ଲାରେ ପ୍ରବଳ ବର୍ଷା ହୋଇପାରେ ବୋଲି ଆକଳନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଆସନ୍ତାକାଲି ଉପକୂଳ ଅଞ୍ଚଳରେ ହାଲୁକାରୁ ମଧ୍ୟମ ଧରଣର ବର୍ଷା ପୂର୍ବାନୁମାନ କରିଛି ପାଣିପାଗ ବିଭାଗ । ଏହାପରେ ରାଜ୍ୟରେ ଆଉ ବିଶେଷ ବର୍ଷା ହେବନାହିଁ କିନ୍ତୁ ପାଗ କୋହଲା ରହିବ । ବର୍ଷା ଛାଡ଼ିଲା ପରେ ଉପକୂଳ ଓ ଦକ୍ଷିଣ ଓଡ଼ିଶାରେ ବି ପାଗ ମେଘୁଆ ରହିପାରେ । ସମୁଦ୍ର ଭିତରେ ପବନ ରହିପାରେ ତେଣୁ ପୋର୍ଟ ୱାର୍ଣ୍ଣିଂ ରହିଛି । ମତ୍ସ୍ୟଜୀବୀମାନଙ୍କ ପାଇଁ କୌଣସି ସତର୍କତା ଏଯାଏଁ ଦିଆଯାଇନାହିଁ । ଦକ୍ଷିଣ ଓଡ଼ିଶା ଉପକୂଳ ପାଇଁ ଆଜି ସନ୍ଧ୍ୟାରୁ ସତର୍କତା ଜାରି କରାଯିବ । ଏବେ ରାତି ତାପମାତ୍ରା ସ୍ଵାଭାବିକ ଠାରୁ ଅଧିକ ରହିଛି । ୨ରୁ ୩ ଦିନ ପର୍ୟ୍ୟନ୍ତ ବିଶେଷ ପରିବର୍ତ୍ତନ ହେବାର ସମ୍ଭାବନା ନାହିଁ । ଏହାପରେ ଆଭ୍ୟନ୍ତରୀଣ ଓଡ଼ିଶାର କିଛି ଜିଲ୍ଲାରେ ତାପମାତ୍ରା ୨ରୁ୪ ଡିଗ୍ରୀ ପର୍ୟ୍ୟନ୍ତ କମିବାର ସମ୍ଭାବନା ରହିଛି ।

ଦ କୁଇଭର ବ୍ୟୁରୋ :- ଆଗାମୀ ୨୪ ଘଣ୍ଟା ପର୍ଯ୍ୟନ୍ତ ଉପକୂଳବର୍ତ୍ତି ଜିଲ୍ଲାଗୁଡ଼ିକରେ ଅନେକ ସ୍ଥାନରେ ହଲୁକାରୁ ମଧ୍ୟମ ଧରଣର ବର୍ଷା ହେବାର ସମ୍ଭାବନା ରହିଛି। ଏହା ସହ ଏହାର ଆଖପାଖ ଅଞ୍ଚଳରେ ମଧ୍ୟ ବିକ୍ଷିପ୍ତ ବର୍ଷା ରହିବ। ଅଭ୍ୟନ୍ତରୀଣ ଓଡ଼ିଶାରେ ବର୍ଷା ଶନିବାର ପ୍ରାୟତଃ କମିଯିବ । ମୟୂରଭଞ୍ଜ, ବାଲେଶ୍ଵର, ଭଦ୍ରକ, କେନ୍ଦ୍ରାପଡ଼ା,ଜଗତସିଂପୁର,ଗଞ୍ଜାମ,ଗଜପତି, ରାୟଗଡ଼ା, ଯାଜପୁର, କଳାହାଣ୍ଡି,କନ୍ଧମାଳ ,ଢେଙ୍କାନାଳ,ଖୋର୍ଦ୍ଧା,କଟକ,ଝାରସୁଗୁଡ଼ା ଜିଲ୍ଲାରେ ଅଧିକ ବର୍ଷା ରହିବ l ସେହିପରି ମାଲକାନଗିରି,ନୂଆପଡ଼ା, ବଲାଙ୍ଗିର, ନବରଙ୍ଗପୁର,ବରଗଡ଼, ସୋନପୁରରେ ଶନିବାର କମିଛି ବର୍ଷା। ଆଜିଠାରୁ ବହୁ ପରିମାଣରେ କମିବ ବର୍ଷା। ଏନେଇ ସୂଚନା ଦେଇଛନ୍ତି ଆଞ୍ଚଳିକ ପାଣିପାଗ କେନ୍ଦ୍ର ନିର୍ଦ୍ଦେଶିକା ମନୋରମା ମହାନ୍ତି।

ଆଜି ଦକ୍ଷିଣ ଉପକୂଳ, ଉପକୂଳ ଓଡ଼ିଶା,ମାଲକାନଗିରି, କୋରାପୁଟ,ରାୟଗଡ଼ା, ଗଞ୍ଜାମ ,ଗଜପତିରେ ହାଲକା ବର୍ଷା। ହେବ। ସୁନ୍ଦରଗଡ଼, ଝାରସୁଗୁଡ଼ା, କେନ୍ଦୁଝର, କଳାହାଣ୍ଡି, କନ୍ଧମାଳ, କୋରାପୁଟ ଜିଲ୍ଲାରେ ରହିବ ଘନ କୁହୁଡ଼ି ପରିଲକ୍ଷିତ ହେବ। ସବୁ ବନ୍ଦର ପାଇଁ ସିଗ୍ନାଲ ୧ କରାଯାଇଛି। ପାଗ କୁହୁଡ଼ିଆ ସହ ମେଘୁଆ ରହିବ।ଦକ୍ଷିଣ ଓଡ଼ିଶା ଉପକୂଳକୁ ଯିବାକୁ ଶନିବାର ମତ୍ସ୍ୟଜୀବୀଙ୍କୁ ମନା ହୋଇଛି। ନୟାଗଡ଼ ସହ ୬ ଟି ଜାଗାରେ ପ୍ରବଳ ବର୍ଷା ରେକର୍ଡ କରାଯାଇଛି। ଆଗାମୀ ୪୮ ଘଣ୍ଟା ହେବ ଘନ କୁହୁଡ଼ି।ଦିନ ତାପମାତ୍ରା କମିଛି ୨ରୁ ୪ ଡିଗ୍ରୀ ପର୍ଯ୍ୟନ୍ତ। କିନ୍ତୁ ରାତ୍ରି ତାପମାତ୍ରା ସ୍ଵାଭାବିକ ଠାରୁ ଅଧିକ ରହିଛି। ଆଗାମୀ ୨ ଦିନ ପରେ ଆଭ୍ୟନ୍ତରୀଣ ଓଡ଼ିଶାରେ ୨ ରୁ ୪ ଡିଗ୍ରୀ କମିବା ରାତ୍ରି ତାପମାତ୍ରା ।

ଦ କୁଇଭର ବ୍ୟୁରୋ :- କ୍ୟାଲେଣ୍ଡର ବର୍ଷ-୨୦୨୪ ସରିସରି ଆସୁଛି। ବର୍ଷ ‌ଶେଷ ହେଉଥିବାରୁ ଯୁବପିଢ଼ି ଏକ ପ୍ରକାର ଉତ୍ସାହିତ ଲୟରେ ଦେଖାଯାଉଛନ୍ତି। ପର୍ଯ୍ୟଟନସ୍ଥଳୀଗୁଡ଼ିକରେ ଭିଡ଼ ଦେଖିବାକୁ ମିଳୁଛି। ବର୍ଷର ଅନ୍ତିମ ସପ୍ତାହରେ ପର୍ଯ୍ୟଟନସ୍ଥଳୀଗୁଡ଼ିକରେ ଅଧିକ ଭିଡ଼ ରହିପାରେ। ମନ୍ଦିର, ପାହାଡ଼ ନିକଟରେ ଥିବା ଜଳପ୍ରପାତ, ବେଳାଭୂମି ନିକଟ ଝାଉଁବଣ, ନଦୀ-ନାଳକୂଳରେ ଭୋଜିର ଆସର ଅଧିକ ଜମିବ। ସବୁଠାରୁ ବର୍ଷର ଶେଷ ରାତିରେ ଓ ନୂଆବର୍ଷର ପ୍ରଥମ ରାତିରେ ଜୋରଦାର ଉତ୍ସବ ପାଳନ ହେବ। ଜିରୋ ନାଇଟ୍‌ ଭାବେ ଅଧିକ ଜଣାଶୁଣା ଏହି ମୁହୂର୍ତ୍ତ ତଥା ୨୦୨୫ ଜାନୁଆରି ୧ ତାରିଖ ରାତି ୧୨ଟା ପରଠାରୁ ବିଳମ୍ବିତ ସମୟ ଯାଏଁ ଯୁବପିଢ଼ି ଅଧିକ ଉତ୍ସାହିତ ହେବେ। ଗ୍ରାମାଞ୍ଚଳ ତୁଳନାରେ ସହରିଆ ଲୋକେ ଅଧିକ ମଜାମସ୍ତି କରିବେ। ଆସନ୍ତା ଡିସେମ୍ବର ୩୧ ତାରିଖରେ ଜିରୋ ନାଇଟ୍ ଆୟୋଜନ ପାଇଁ ଅବକାରୀ ବିଭାଗର ଅନୁମତି ଦରକାର ବୋଲି କୁହାଯାଇଛି। ଅବକାରୀ ବିଭାଗର ଅନୁମତି ନଥିଲେ କାର୍ଯ୍ୟାନୁଷ୍ଠାନ ନିଆଯିବ। ଅବକାରୀ କମିସନର ନରସିଂହ ଭୋଳ ଏମିତି ଚେତାବନୀ ଶୁଣାଇଛନ୍ତି।ଜିରୋ ନାଇଟ୍‌ ସେଲିବ୍ରେସନ୍‌ ପାଇଁ ଏବେ ଠାରୁ ବଡ଼ବଡ଼ ହୋଟେଲ, ରେଷ୍ଟୁରାଣ୍ଟ, ମଣ୍ଡପରେ ପ୍ରସ୍ତୁତି ଆରମ୍ଭ ହୋଇଯାଇଛି। ଆଗନ୍ତୁକମାନଙ୍କ ପାଇଁ ହୋଟେଲଗୁଡ଼ିକରେ ପ୍ୟାକେଜ୍‌ ବ୍ୟବସ୍ଥା ହୋଇଛି। ଇଭେଣ୍ଟ୍‌ ପରିଚାଳନା କରୁଥିବା ସଂସ୍ଥାଗୁଡ଼ିକ ମଧ୍ୟ ଜିରୋନାଇଟ୍‌ ପାଇଁ ପ୍ରସ୍ତୁତି ଆରମ୍ଭ କରିଦେଇଛନ୍ତି। ନୂଆବର୍ଷରେ ନିଶା କାରବାର ଅଧିକ ହୋଇପାରେ। ତେବେ ଏସବୁକୁ ଦୃଷ୍ଟିରେ ରଖି ସରକାର କଟକଣା ଲଗାଇଛନ୍ତି। ଜିରୋ ନାଇଟ୍ ସେଲିବ୍ରେସନ୍ ପାଇଁ ଅବକାରୀ ବିଭାଗ କଟକଣା ଲାଗୁ କରିଛି। ଆସନ୍ତା ଡିସେମ୍ବର ୩୧ ତାରିଖରେ ଜିରୋ ନାଇଟ୍ ଆୟୋଜନ ପାଇଁ ଅବକାରୀ ବିଭାଗର ଅନୁମତି ଦରକାର ବୋଲି କୁହାଯାଇଛି। ଅବକାରୀ ବିଭାଗର ଅନୁମତି ନଥିଲେ କାର୍ଯ୍ୟାନୁଷ୍ଠାନ ନିଆଯିବ। ଅବକାରୀ କମିସନର ନରସିଂହ ଭୋଳ ଏମିତି ଚେତାବନୀ ଶୁଣାଇଛନ୍ତି।

ନୂଆଦିଲ୍ଲୀ(ଦ କୁଇଭର): ବିଜେପି ଚାଣକ୍ୟ ତଥା ଗୃହମନ୍ତ୍ରୀ ଅମିତ ଶାହଙ୍କ ସଂସଦରେ ଭାଷଣ ତାତି ସାରା ଦେଶରେ ଦେଖା ଦେଇଛି । କଂଗ୍ରେସ ଏହାକୁ ଗଣ୍ଠି କରି ଏବେ ସାରା ଦେଶରେ ଆନେ୍ଦାଳନ ଆରମ୍ଭ କରିଛି । କେବଳ ଦେଶରେ ନୁହେଁ, ସଂସଦରେ ମଧ୍ୟ ଶାହଙ୍କ ଭାଷଣ ବିରୋଧରେ ନାନା କଥା କହିବା ସହ ଗୃହ ଚଳାଇ ଦେଉ ନାହାନ୍ତି । ଶାହ ବାବା ସାହେବ ଆମ୍ବେଦକରଙ୍କୁ ନେଇ କହିଥିବା ଶବ୍ଦକୁ ଧରିଛି କଂଗ୍ରେସ । ଆମ୍ବେଦକରଙ୍କୁ ଅସମ୍ମାନ କରିଛନ୍ତି ଶାହ । ତେଣୁ କ୍ଷମା ମାଗନ୍ତୁ ବୋଲି ଦାବି କରି ଏପରି ହଙ୍ଗାମା ହେଉଛି । ଅନ୍ୟପକ୍ଷରେ କଂଗ୍ରେସ ଶାହଙ୍କ କଥାକୁ ବିକୃତ କରୁଥିବା ଅଭିଯୋଗ କରି ବିଜେପି ସଦସ୍ୟମାନେ ସଂସଦ ପରିସରରେ ଧାରଣା ଦେଇଛନ୍ତି ।

କଂଗ୍ରେସର ଅଭିଯୋଗ, ସମ୍ବିଧାନ ଉପରେ ସଂସଦରେ ଚାଲିଥିଲା ଚର୍ଚ୍ଚା । ସମ୍ବିଧାନକୁ ୭୫ବର୍ଷ ପୂର୍ତ୍ତୀ ଅବସରରେ ରାଜ୍ୟସଭାରେ ଏହି ଚର୍ଚ୍ଚା କାଳରେ ଗୃହ ମନ୍ତ୍ରୀ ଶାହ କହିଲେ, ଏହା ଏକ ଫେସନ ହୋଇଗଲାଣି । ଯେଉଁଠି ଶୁଣ ଆମ୍ବେଦକର... ଆମ୍ବେଦକର... । ଏତିକି ଥର ଯଦି ଭଗବାନଙ୍କ ନାମ ନିଅନ୍ତେ, ତେବେ ସାତ ଜନ୍ମ ପର୍ୟ୍ୟନ୍ତ ସ୍ୱର୍ଗ ମିଳି ଯାଇଥାନ୍ତା । ଆମ୍ବେଦକର କ’ଣ ଭଗବାନ ହୋଇ ଗଲେ କି? ଶାହଙ୍କ ଏହି କଥାକୁ ନେଇ ଏବେ ତାତିଛି କଂଗ୍ରେସ । କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖରଗେ ଶାହଙ୍କ ଇସ୍ତଫା ଦାବି କରିଛନ୍ତି । ଏକ ସାମ୍ବାଦିକ ସମ୍ମିଳନୀ କରି ସେ ଏହି ଦାବି ରଖିଛନ୍ତି ।

ଏହାପରେ ସାରା ଦେଶରେ କଂଗ୍ରେସ ପକ୍ଷରୁ ଶାହଙ୍କ ବିରୋଧରେ ବିକ୍ଷୋଭ ପ୍ରଦର୍ଶନ ହେଉଛି । ଏହି ବିକ୍ଷୋଭ କାଳରେ ଶାହଙ୍କ କୁଶପୂତ୍ତଳିକା ଦାହ କରାଯାଉଛି । କେବଳ ସେତିକି ନୁହେଁ ଚାରିଆଡ଼େ ଶାହଙ୍କ ଇସ୍ତଫା ଦାବି କରାଯାଉଛି । ଏନେଇ କଂଗ୍ରେସ ଆନେ୍ଦାଳନକୁ ବ୍ୟାପକ କରୁଛି । ସଂସଦରେ ମଧ୍ୟ କଂଗ୍ରେସ ପୂରା ହଙ୍ଗାମା କରୁଛି । ଗୃହ ଚଳାଇ ଦେଉ ନାହିଁ । ଗୃହ ବୁଧବାର ଅଚଳ କରିଦେଇଥିଲା କଂଗ୍ରେସ । ଗୁରୁବାର ମଧ୍ୟ ସେହି ଆଭିମୁଖ୍ୟରେ ରହିଛି କଂଗ୍ରେସ ଦଳ ଓ ତାର ସହଯୋଗୀମାନେ । ବିଜେପି ଓ ସମର୍ଥକ ଦଳର ସାଂସଦମାନେ ଶାହଙ୍କ ସପକ୍ଷରେ ମତ ଦେଉଛନ୍ତି । କଂଗ୍ରେସକୁ ଟାର୍ଗେଟ କରୁଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବି ଶାହଙ୍କ ସପକ୍ଷରେ କହିବାକୁ ଯାଇ ସୋସିଆଲ ମିଡିଆ ଆକାଉଣ୍ଟ ଏକ୍ସରେ ଲେଖିଲେଣି । ଗୁରୁବାର ବିଜେପି ସଦସ୍ୟମାନେ ସଂସଦ ପରିସରରେ ଥିବା ଆମ୍ବେଦକରଙ୍କ ପ୍ରତିମୂର୍ତ୍ତୀ ନିକଟରେ କଂଗ୍ରେସ ବିରୋଧରେ ଧାରଣା ଦେଇଛନ୍ତି । ହେଲେ କୌଣସି ପ୍ରକାର ସରକାରଙ୍କୁ ଅଡ଼ୁଆରେ ପକାଇବାକୁ ଲାଗିଛି କଂଗ୍ରେସ । କଂଗ୍ରେସ ଏବେ ନୂଆ ଅଭିଯୋଗ ଆଣିଛି ଶାହଙ୍କ ଭିଡିଓ ସୋସିଆଲ ମିଡିଆରେ ସେୟାର କରିଥିବାରୁ କଂଗ୍ରେସ ଏମପି ମାନଙ୍କୁ ଏକ୍ସ ପକ୍ଷରୁ ନୋଟିସ ଜାରି କରାଯାଇଛି । ଯାହାକୁ ନେଇ ବିବାଦ ବଢ଼ିବାରେ ଲାଗିଛି ।

ଏପରି ପ୍ରତିବାଦ ପରେ ଶାହ ବାଧ୍ୟ ହୋଇ ସାମ୍ବାଦିକ ସମ୍ମିଳନୀ କରି ସଫେଇ ଦେଇଛନ୍ତି । ସେ କହିଛନ୍ତି କଂଗ୍ରେସ ସବୁବେଳେ କଥାକୁ ବିକୃତ କରି ଉପସ୍ଥାପନ କରିବାରେ ଅଭ୍ୟସ୍ତ । ଅମ୍ବେଦକରଙ୍କ ପ୍ରତି ଯଥେଷ୍ଟ ସମ୍ମାନ ଓ ଆଦର ରହିଛି । ମାତ୍ର କଂଗ୍ରେସ ଓ ଅନ୍ୟମାନେ ଯେପରି ଆମ୍ବେଦକରଙ୍କ ନାମକୁ ଅପବ୍ୟବହାର କରୁଛନ୍ତି ସେଭଳି ସ୍ଥିତି ନକରନ୍ତୁ ବୋଲି ମୁଁ କହିଥିଲି । ମୋର ମନ୍ତବ୍ୟକୁ କଂଗ୍ରେସ ଭାଙ୍ଗିଭୁଙ୍ଗି ଉପସ୍ଥାପନ କରି ଦେଶରେ ଅସନ୍ତୋଷ ସୃଷ୍ଟି କରୁଛି । ଯାହା ଅତ୍ୟନ୍ତ ନିନ୍ଦନୀୟ ବୋଲି କହିଛନ୍ତି ଶାହ । ସେ ଯାହା ହେଉ ଏବେ ଶାହଙ୍କ ମନ୍ତବ୍ୟ ସାରା ଦେଶରେ ଚର୍ଚ୍ଚାର ବିଷୟ ହୋଇଥିବା ବେଳେ ସଂସଦକୁ ପ୍ରଭାବିତ କଲାଣି । ଦେଖାଯାଉ ଶାହଙ୍କ କଥାକୁ କଂଗ୍ରେସ ଆଜି ଛାଡ଼ି ଦେଉଛି ନା ଆଗକୁ ଜାରି ରଖୁଛି?

ଦ କୁଇଭର ବ୍ୟୁରୋ :- ଅଦିନିଆ ବର୍ଷା ଉଜାଡ଼ି ଦେଇଛି ଚାଷୀର ବର୍ଷକର ଦାନାପାଣି। କଟା ହୋଇଥିବା ଧାନ, ନା ମଣ୍ଡିକୁ ଯାଇପାରିଛି ନା ଖଳାକୁ। କ୍ଷେତ ମଝିରେ ପଡ଼ି ସୁନାର ଫସଲ ବରବାଦ୍ ହୋଇଛି। ଉପକୂଳ ଏବଂ ଦକ୍ଷିଣ ଓଡ଼ିଶାରେ ଆପଣ ଯୁଆଡ଼େ ଯାଆନ୍ତୁ ବିଲ ବାଡ଼ିରେ ବତୁରି ଯାଇଛି କଟା ହୋଇଥିବା ଧାନ। ୨ ଦିନର କୋହଲା ପାଗ ସାଙ୍ଗକୁ ଝିପିଝିପି ବର୍ଷା, ଚାଷୀର ଭାତ ହାଣ୍ଡିକୁ ଉଜାଡ଼ି ଦେବା ପରେ ଏବେ ବୁଦ୍ଧିଶୂନ୍ୟ ହୋଇପଡ଼ିଛନ୍ତି ଚାଷୀକୂଳ। ପାଚିଲା ଧାନ କଳେଇକୁ ଉଠେଇଲା ବେଳକୁ ଭାଙ୍ଗିଯାଉଛି ଚାଷୀର ଦମ୍ଭ,କ୍ଷେତ ମଝିରେ ବତୁରା ଫସଲକୁ ବଞ୍ଚାଇବା ପାଇଁ ଉଦ୍ୟମ ସତ୍ତ୍ବେ ନିରାଶ ହେଉଛି ଚଷାପୁଅ,ଆଉ ବା କ’ଣ ଅଛି ଯେ ବଞ୍ଚିବ। ଖଳାକୁ ଯିବା ଆଗରୁ ବିଲ ମଝିରେ ଓଦାରେ ଯେତେବେଳେ ସରସର ହୋଇଯାଇଛି ବର୍ଷକର ଦାନାପାଣି, ସେତେବେଳେ ବୁଦ୍ଧିଶୂନ୍ୟ ବିଚରା ଚାଷୀ। ଅମଳ ବେଳକୁ ଅଦିନିଆ ବର୍ଷାରେ ଅକଲ୍ ଗୁଡୁମ୍ ଅବସ୍ଥା। ପୂର୍ବ ଓଡ଼ିଶା ଭଳି ଦକ୍ଷିଣ ଓ ଆଭ୍ୟନ୍ତରୀଣ ଓଡ଼ିଶା ଚାଷୀ ବି ସୁରକ୍ଷା ଦେଇ ପାରିନି ଫସଲକୁ। ଗଞ୍ଜାମ ଜିଲ୍ଲାର ଖଲ୍ଲିକୋଟ୍ ହେଉ କିମ୍ବା ଗଜପତି ଜିଲ୍ଲା ମୋହନା। ସବୁଠି ଅମଳ ଧାନ କ୍ଷେତ ମଝିରେ ଗଜା ହେବା ସୁନିଶ୍ଚିତ।

ନୂଆଦିଲ୍ଲୀ( ଦ କୁଇଭର ):- ଦିଲ୍ଲୀ ଗସ୍ତରେ ଥିବା ଓଡିଶା ମୁଖ୍ୟମନ୍ତ୍ରୀ ମୋହନ ମାଝୀ ଶୁକ୍ରବାର କେନ୍ଦ୍ର ସରକାରଙ୍କ ନିକଟରେ ରାଜ୍ୟର ସ୍ୱାର୍ଥକୁ ଆଖିଆଗରେ ରଖି କିଛି ଦାବି ଉପସ୍ଥାପନ କରିଛନ୍ତି । ରାଜ୍ୟ ଭିତ୍ତିଭୂମିର ବିକାଶ ପାଇଁ ଅଧିକ ଆବଣ୍ଟନ, ଗୋପାଳପୁର ଠାରେ ଏକ ଲୁଣ ଖଳା ନିର୍ମାଣ ପାଇଁ ପ୍ରସ୍ତାବ,ଝାରସୁଗୁଡା ପାଇଁ ନୂତନ ଇଣ୍ଡଷ୍ଟ୍ରିଆଲ ଟାଉନସିପ୍, ପର୍ଯ୍ୟଟନର ବିକାଶ ପାଇଁ ୧୦ ହଜାର କୋଟିର ସ୍ୱତନ୍ତ୍ର ପ୍ୟାକେଜ, ଜଳଜୀବନ ମିଶନ ଅଧିନରେ ପର୍ଯ୍ୟାପ୍ତ ବଜେଟ ବ୍ୟବସ୍ଥା ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଅଧ୍ୟକ୍ଷତାରେ ବସିଥିବା ପ୍ରାକ୍ ବଜେଟ ବୈଠକରେ ଏସବୁ ପ୍ରସ୍ତାବ ରଖିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ ।

ନୂଆଦିଲ୍ଲୀ(ଦ କୁଇଭର): ଗତ ଦୁଇଦିନ ଧରି ସଂସଦ ସମେତ ସମଗ୍ର ଦେଶରେ ଲାଗିଥିବା ଆମ୍ବେଦକର ଝଡ଼କୁ ଚାପି ଦେଲେ ଏମପି ପ୍ରତାପ ଷଢ଼ଙ୍ଗୀ । ରାହୁଲ ଗାନ୍ଧିଙ୍କ ଦ୍ୱାରା ଧକ୍କା ଖାଇ ତଳେ ପଡ଼ିବାରୁ ଆହତ ହୋଇଥିବା ପ୍ରତାପ ଏବେ ସାରା ଦେଶରେ ଚର୍ଚ୍ଚାରେ ରହିଛନ୍ତି । ଏହାକୁ ନେଇ ବିଜେପି ଏମପିଙ୍କ ବିରୋଧ ଏବଂ ପ୍ରତିବାଦରେ କଂଗ୍ରେସ ଏବଂ ସହଯୋଗୀଙ୍କ ବିରୋଧ ପୂରା ଦେଶରେ ହଇଚଇ ସୃଷ୍ଟି କରିଛି । ସଂସଦ ଭିତରେ ଏପରି ହିଂସାତ୍ମକ ଆଚରଣ ସଂସଦର ଗରିମାକୁ କ୍ଷୁର୍ଣ୍ଣ କରିଛି । ରାହୁଲଙ୍କ ଏହି କାର୍ଯ୍ୟକୁ ନେଇ ଏବେ ଚାରିଆଡ଼େ ନିନ୍ଦା କରାଯାଉଛି । ଅନ୍ୟପକ୍ଷରେ ଧକ୍କା ମାରିବା ଘଟଣାକୁ ରାହୁଲ ସ୍ୱୀକାର କରି ଏହାର କାରଣ ବି କହିଛନ୍ତି ।

ସଂସଦ ଗୁରୁବାର ସକାଳୁ ହିଁ ସରଗରମ ରହିଛି । ପ୍ରଥମେ ଆମ୍ବେଦକର ପ୍ରସଙ୍ଗକୁ ନେଇ ଚାଲିଥିଲା । ମାତ୍ର ଲୋକସଭାକୁ କଂଗ୍ରେସ ସାଂସଦ ରାହୁଲ ଗାନ୍ଧିଙ୍କ ପ୍ରବେଶ ସମୟରେ ହୋଇଥିଲା ବଡ଼ ଅଘଟଣ । ସେ ସଂସଦ ଭିତରେ ତାଙ୍କ ବାହୁବଳ ଦେଖାଇଥିଲେ । ଜଣେ ସାଂସଦଙ୍କୁ ଧକ୍କା ଦେଇଥିଲେ । ସେହି ସାଂସଦ ଜଣକ ଆସି ଓଡ଼ିଶା ବାଲେଶ୍ୱର ଏମପି ପ୍ରତାପ ଷଢ଼ଙ୍ଗୀଙ୍କ ଉପରେ ପଡ଼ିଥିଲେ । ପ୍ରତାପ ତଳେ ପଡ଼ି କ୍ଷତାକ୍ତ ହୋଇଥିଲେ । ବାସ ଏହି ପ୍ରସଙ୍ଗ ଏବେ ସଂସଦ ଭିତରେ ଓ ବାହାରେ ଭାଇରାଲ ହେଉଛି । ରାହୁଲଙ୍କ ଏହି କାର୍ଯ୍ୟକୁ ସାରା ଦେଶରେ ନିନ୍ଦା କରାଯାଉଛି । ସ୍ଥିତି ଏପରି ସ୍ଥାନରେ ପହଞ୍ଚିଛି ଯେ, ଲୋକେ ଆମ୍ବେଦକର ପ୍ରସଙ୍ଗକୁ ଭୁଲି ଯାଇ ଏବେ ରାହୁଲଙ୍କ ବାହୁବଳ ପ୍ରଦର୍ଶନକୁ ନେଇ ଚିନ୍ତା ବ୍ୟକ୍ତ କରିଛନ୍ତି ।

ରାଜ୍ୟସଭାରେ ଗୃହମନ୍ତ୍ରୀ ଅମିତ ଶାହ ଆମ୍ବେଦକରଙ୍କ ଉପରେ ଦେଇଥିବା ମନ୍ତବ୍ୟକୁ ନେଇ ହଙ୍ଗାମା କରୁଥିଲା କଂଗ୍ରେସ । ସଂସଦକୁ ଅଚଳ କରିଦେଉଥିଲା । ବିଭିନ୍ନ ରାଜ୍ୟରେ ବିରୋଧ ସହ କୁଶପୂତ୍ତଳିକା ଦାହ କରାଯାଉଥିଲା । ଯାହା ବିଜେପି ପାଇଁ ବଡ଼ ଚିନ୍ତାର କାରଣ ହୋଇଥିଲା । ବିଜେପି ଏହାକୁ ବିରୋଧ କରୁଥିଲେ ମଧ୍ୟ କଂଗ୍ରେସ ଆଗରେ ରହୁଥିଲା । ବିଜେପି ଗୁରୁବାର ସକାଳେ ସଂସଦ ପରିସରରେ ଧାରଣା ଦେଇଥିଲା । ପୂରା ଦମରେ ଲାଗିଥିଲା କଂଗ୍ରେସ । ଗୁରୁବାର ବି କଂଗ୍ରେସ ସଂସଦରେ ହଙ୍ଗାମା କରିବାକୁ କାଳେ ପ୍ରସ୍ତୁତ ହେଉଥିଲା ।

ସଂସଦକୁ ସାଂସଦମାନେ ପ୍ରବେଶ କରୁଥିଲେ । ପ୍ରବେଶ ରାସ୍ତାରେ ଭିଡ଼ ବି ଥିଲା । କଂଗ୍ରେସ ସାଂସଦ ରାହୁଲ ଗାନ୍ଧି ବିଜେପିକୁ କଡ଼ା ଜବାବ ଦେବା ପାଇଁ ପ୍ରସ୍ତୁତ ହୋଇ ଯାଉଥିଲେ । ମାତ୍ର ରାସ୍ତାରେ ଅନେକ ସାଂସଦ ଯାଉଥିଲେ । ସେ କାଳେ ଜଣେ ସାଂସଦଙ୍କୁ ଠେଲି ଦେଲେ । ସେହି ସାଂସଦ ଜଣକ ପ୍ରତାପ ଷଢ଼ଙ୍ଗୀଙ୍କ ଉପରେ ପଡ଼ିବାରୁ ସାଂସଦ ପ୍ରତାପ ତଳେ ପଡ଼ି ଆହତ ହୋଇଥିଲେ । ଏହାକୁ ନେଇ ଆରମ୍ଭ ହୋଇଛି ନୂଆ ହଙ୍ଗାମା । ବିଜେପି ସାଂସଦ ଏକଜୁଟ ହୋଇ ନାରାବାଜି ଓ ଧାରଣା ଦେଇଛନ୍ତି । ରାହୁଲଙ୍କ ବିରୋଧରେ ପୂରା ତାତିଗଲେଣି ବିଜେପି ଓ ସହଯୋଗୀ ସାଂସଦ । ରାହୁଲ ବି ମାନିଗଲେ ସେ ଧକ୍କା ମାରିଛନ୍ତି । କାରଣ ବି ଦର୍ଶାଇଲେ । ତାଙ୍କ ଦର୍ଶାଯାଇଥିବା କାରଣ ଅନୁଯାୟୀ ବିଜେପି ସାଂସଦମାନେ ତାଙ୍କ ରାସ୍ତା ରୋକିଥିଲେ । ସେ ଜୋର କରି ପଶିଥିଲେ ।

ଏହାକୁ ଏବେ ଧରିଛି ବିଜେପି । ପୂରା ଦମରେ ରାହୁଲଙ୍କ ଦାଦାଗିରି ବୋଲି ଦେଖାଇଛି । ଏହାକୁ ନେଇ ଗୃହ ଭିତରେ ଓ ବାହାରେ ପ୍ରଦର୍ଶନ ଚାଲିଛି । ଏପରି ରକ୍ତାକ୍ତ ହିଂସା ସଂସଦରେ ପ୍ରଥମ ହୋଇଥିବାରୁ ବିଭିନ୍ନ ମହଲରେ ନିନ୍ଦା କରାଯାଉଛି । ଓଡ଼ିଆ ସାଂସଦଙ୍କୁ ରାହୁଲଙ୍କ ଆଘାତ ଏବେ ସବୁଠି ଚର୍ଚ୍ଚାର ବିଷୟ ହୋଇଛି । ଏହି ଚର୍ଚ୍ଚା ଏତେ ଜୋର ହୋଇଛି ଯେ, ଆଉ ଆମ୍ବେଦକର ପ୍ରସଙ୍ଗ ଉଠୁ ନାହିଁ । ଏବେ ବାଜି ବିଜେପି ହାତକୁ ଚାଲି ଆସିଛି । ଦେଖାଯାଉ ବିଜେପି ରାହୁଲଙ୍କ ଏହି ଘଟଣାକୁ କି ରୂପ ଦେଉଛି ଓ ରାହୁଲ କେମିତି ମୁକାବିଲା କରୁଛନ୍ତି?

ଦ କୁଇଭର ବ୍ୟୁରୋ :- ରାଜ୍ୟ ମୁଣ୍ଡରେ ଏବେ ଗହମ ବୋଝ। ଉତ୍ତରପ୍ରଦେଶକୁ ହାଲୁକା କରିବା ପାଇଁ କେନ୍ଦ୍ର ଓଡ଼ିଶାକୁ ଜବରଦସ୍ତି ୧.୯୯ ଲକ୍ଷ କ୍ବିଣ୍ଟାଲ୍‌ ଗହମ ଆବଣ୍ଟନ କରିଛି। ଏଥିରୁ ୩୦ ହଜାର କ୍ବିଣ୍ଟାଲ୍‌ ଗହମ ରାଜ୍ୟ ଯୋଗାଣ ନିଗମ ଗୋଦାମରେ ରହିଛି। ଏହାକୁ ନେଇ ସରକାର ଚିନ୍ତାରେ। ଯଥାଶୀଘ୍ର ଏହି ଗହମ ଫେରାଇ ନେବାକୁ ମୁଖ୍ୟ ଶାସନ ସଚିବ କେନ୍ଦ୍ରକୁ ଅନୁରୋଧ କରିବା ପରେ ବି କୌଣସି ପଦକ୍ଷେପ ନିଆଯାଇନାହିଁ । ଚାଉଳ ଉତ୍ପାଦନରେ ବଳକା ରାଜ୍ୟ ଓଡ଼ିଶା। ଖାଦ୍ୟ ସୁରକ୍ଷା ଯୋଜନାରେ ହିତାଧିକାରୀଙ୍କ ପ୍ରଥମ ପସନ୍ଦ ମଧ୍ୟ ଚାଉଳ। ଏହାକୁ ଦୃଷ୍ଟିରେ ରଖି ରାସନ୍‌ କାର୍ଡରେ ପୂର୍ବରୁ ନବୀନ ପଟ୍ଟନାୟକ ସରକାର କେବଳ ଚାଉଳ ଦେଉଥିଲେ। ନୂଆ ସରକାର ବି ଏହି ଧାରା ଭାଙ୍ଗିନାହାନ୍ତି। କିନ୍ତୁ ଅଚାନକ ସେପ୍ଟେମ୍ବର ମାସରେ କେନ୍ଦ୍ର ଓଡ଼ିଶାକୁ ଗହମ ଦେଇଥିଲା। ବାଧ୍ୟ ହୋଇ ଓଡ଼ିଶା ସରକାର ଘୋଷଣା କରିଥିଲେ ଯେ ଖାଦ୍ୟ ସୁରକ୍ଷା ଯୋଜନାରେ ଚାଉଳ ସହିତ ଗହମ ଦିଆଯିବ। ଉତ୍ତରପ୍ରଦେଶ ଏବଂ ପଞ୍ଜାବରେ ଗହମର ମାତ୍ରାଧିକ ଉତ୍ପାଦନକୁ ଦୃଷ୍ଟିରେ ରଖି ସେଠାକାର ବଳକା ଗହମର ଚାପ ହ୍ରାସ ପାଇଁ କେନ୍ଦ୍ର ପକ୍ଷରୁ ଓଡ଼ିଶାକୁ ଏହାକୁ ଯୋଗାଇ ଦିଆଯାଇ ଥିଲା।ଇତିମଧ୍ୟରେ ଓଡ଼ିଶାରେ ନଭେମ୍ବର ମାସରୁ ଧାନ ସଂଗ୍ରହ ଆରମ୍ଭ ହୋଇଛି। ରବିରେ କଷ୍ଟମ୍‌ ମିଲିଂର ଚାଉଳ ରାଜ୍ୟ ଯୋଗାଣ ନିଗମ ଏବଂ ଏଫ୍‌ସିଆଇକୁ ପହଞ୍ଚୁଛି। ଏହି କ୍ରମରେ ରାଜ୍ୟ ପାଇଁ ବଡ଼ ସମସ୍ୟା ହେଲା, ସଂଗୃହୀତ ଧାନ ଏବଂ ଚାଉଳ ସଂରକ୍ଷଣ ପାଇଁ ଗୋଦାମର ଅଭାବ। ଯେଉଁ ଗୋଦାମରେ ଚାଉଳ ରଖାଯାଇପାରନ୍ତା ସେଠାରେ ଗହମ ଗଦା ହୋଇ ରହିଥିବାରୁ ସ୍ଥାନାଭାବ ରହିଛି। ଆହୁରି ମଧ୍ୟ ଖାଦ୍ୟ ସୁରକ୍ଷା ଯୋଜନାରେ ଚାଉଳ ବଦଳରେ ଗହମ ବାଣ୍ଟିଲେ ପ୍ରଥମତଃ ହିତାଧିକାରୀ ଏହାକୁ ନେବେ ନାହିଁ। ଦ୍ବିତୀୟତଃ ବଳକା ଚାଉଳ ପଡ଼ି ରହିବାର ଆଶଙ୍କା ରହିଥିଲା। ତେଣୁ ଓଡ଼ିଶା ସରକାର ପୂର୍ବପରି ଗହମ ବଦଳରେ ଚାଉଳ ବାଣ୍ଟିବାକୁ ନିଷ୍ପତ୍ତି ନେଇ କେନ୍ଦ୍ରକୁ ଜଣାଇଥିଲେ। ଏଥିସହ ରାଜ୍ୟର ପିଡିଏସ୍‌ କେନ୍ଦ୍ରରେ ଗହମ ଯୋଗାଣକୁ ବନ୍ଦ କରି ଦେଇଥିଲେ। ସେହି କୋଟାରେ ଚାଉଳ ପହଞ୍ଚିଥିଲା। ବର୍ତ୍ତମାନ ଏଫସିଆଇ ଏବଂ ଯୋଗାଣ ନିଗମ ଗୋଦାମରେ ସ୍ଥାନାଭାବ ଦୂର ପାଇଁ ଗହମ ଫେରାଇ ନେବାକୁ ଚିଠି ଲେଖାଯାଇଥିଲେ ହେଁ ସେମାନେ ନିରବ।

ଭୁବନେଶ୍ୱର( ଦ କୁଇଭର ):- ଜାନୁଆରୀରେ ମିଳିବ 'ସୁଭଦ୍ରା ଯୋଜନା' ପ୍ରଥମ କିସ୍ତିର ୪ର୍ଥ ପର୍ଯ୍ୟାୟ ଟଙ୍କା । ଏହି ପର୍ଯ୍ୟାୟରେ ୨୦ ଲକ୍ଷରୁ ଅଧିକ ମହିଳାଙ୍କ ଖାତାକୁ ଯିବ ସୁଭଦ୍ରା ଟଙ୍କା । ଭେରିଫିକେସନ୍ ପ୍ରକ୍ରିୟା ଡିସେମ୍ବର ୩୦ ସୁଦ୍ଧା ସାରିବାକୁ ଲକ୍ଷ୍ୟ ରଖାଯାଇଥିବା ବେଳେ ଜାନୁଆରୀରେ ସୁଭଦ୍ରା ଯୋଜନା ଟଙ୍କା ଦିଆଯିବ ବୋଲି କହିଛନ୍ତି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା । ଏନେଇ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା କହିଛନ୍ତି, "ସୁଭଦ୍ରା ଯୋଜନାରେ ଚତୁର୍ଥ ପର୍ଯ୍ୟାୟରେ ୨୦ ଲକ୍ଷରୁ ଊର୍ଦ୍ଧ୍ବ ମହିଳାଙ୍କୁ ଟଙ୍କା ମିଳିବ । ଆମେ ପ୍ରସ୍ତୁତି ପଛରେ ଅଛୁ । ଆମେ ସମସ୍ତଙ୍କୁ ସୁଯୋଗ ଦେବୁ । ଘରେ ଘରେ ଅଙ୍ଗନବାଡ଼ି ଦିଦି, ଆରଆଇ ଯାଞ୍ଚ କରୁଛନ୍ତି । ଜାଗା ଜମି ପାଇଁ ଯାହା ସମସ୍ୟା ଅଛି ଏହାର ଯାଞ୍ଚ ପାଇଁ ୩୦ ତାରିଖ ଟାର୍ଗେଟ ରଖାଯାଇଛି । ବିଭିନ୍ନ ସମସ୍ୟା ପାଇଁ ଯାଞ୍ଚ ପ୍ରକ୍ରିୟାରେ ସମୟ ଲାଗୁଛି । ଯାଞ୍ଚ ସରିଗଲେ ଜାନୁଆରୀରେ ସୁଭଦ୍ରା ଯୋଜନା ଟଙ୍କା ମିଳିବ । ସୁଭଦ୍ରା ଯୋଜନା ୪ର୍ଥ ପର୍ଯ୍ୟାୟ ଟଙ୍କା ଦିଆ ସରିବା ପରେ କିଛି ଲୋକ ଯଦି ଭୁଲରେ ଟଙ୍କା ନେଇଯାଇଥିବେ ତେବେ ସେମାନଙ୍କ ଉପରେ କ'ଣ ବ୍ୟବସ୍ଥା କରାଯିବ ତାହା ଆଗକୁ ଦେଖାଯିବ l

ଗଜପତି( ଦ କୁଇଭର ):- ଗଜପତି ଜିଲ୍ଲାରେ ଜାରି ରହିଛି ଅପରେସନ ଗ୍ରୀନ କ୍ଲିନ l ପୁଣି ଏକ କୋଟି ଟଙ୍କାର ଗଞ୍ଜେଇ ଚାଷ ନଷ୍ଟ କରିଛି ପୋଲିସ ଓ ଅବକାରୀ ବିଭାଗ l ଆର.ଉଦୟଗିରି ଥାନା ସିଣ୍ଡରାମପୁର ଗାଁ ନିକଟରେ ପ୍ରାୟ ୫ ଏକର ଜମିରେ ହୋଇଥିବା ଗଞ୍ଜେଇ ଚାଷ କାଟି ପୋଡି ନଷ୍ଟ କରିଛି ମିଳିତ ବାହିନୀ l ଗତ ଏକ ମାସ ଧରି ଚାଲିଥିବା ଏହି ଅଭିଯାନ ରେ ୭୦ କୋଟି ଟଙ୍କାରୁ ଅଧିକ ଗଞ୍ଜେଇ ଚାଷ ନଷ୍ଟ କରାଯାଇଥିବା ପୋଲିସ ସୂଚନା ଦେଇଛି l ଏହି ଅଭିଯାନ ଆହୁରି କିଛି ଦିନ ଜାରି ରହିବ l ଏହି ଅଭିଯାନ ରେ ପୋଲିସ, ଅବକାରୀ, ବନ ବିଭାଗ ଓ ରାଜସ୍ବ ବିଭାଗର କର୍ମଚାରୀ ସାମିଲ ହୋଇଛନ୍ତି l

ରମ୍ଭା( ଦ କୁଇଭର ):- ସିରିଜ ମନ୍ଦିର ଚୋରି ଘଟଣାରେ ରମ୍ଭା ଥାନା ପୁଲିସକୁ ମିଳିଛି ବଡ଼ ସଫଳତା । ରମ୍ଭା ଥାନା ଅଞ୍ଚଳରେ ହୋଇଥିବା ସିରିଜ ମନ୍ଦିର ଚୋରି ଘଟଣାରେ ପୁଲିସ ୩ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଥାନା ଅଧିକାରୀ ସତ୍ୟବ୍ରତ ଭୂତିଆ ସୂଚନା ଦେଇଛନ୍ତି । ଗିରଫ ଅଭିଯୁକ୍ତଙ୍କ ନିକଟରୁ ପୁଲିସ ୫ଟି ଆଇରନ ରୋଡ଼, ହାତୁଡ଼ି ,ନଗଦ ୧୨୫୦ଟଙ୍କା ସମେତ ଅନ୍ୟାନ୍ୟ ସାମଗ୍ରୀ ଜବତ କରିଛି । ଗିରଫ ଅଭିଯୁକ୍ତମାନେ ହେଲେ ରମ୍ଭା ଥାନା ଅଞ୍ଚଳର ବି ରାଜୁ ପ୍ରଧାନ, ବ୍ରହ୍ମପୁର ସଦର ଥାନା ଅନ୍ତର୍ଗତ କୁକୁଡ଼ାଖଣ୍ଡି ଗ୍ରାମର ଏସ ବାବୁଲା ଓ ମଲାଡ଼ ଗୋଡିବନ୍ଧ ଗ୍ରାମର ଏ. ରାମଚନ୍ଦ୍ର । ଏହି ଅଭିଯୁକ୍ତମାନେ ୭ଟି ମନ୍ଦିର ଓ କିଛି କିରାଣୀ ଦୋକାନୀରୁ ଚୋରି କରିଥିବା ପୁଲିସ ତଦନ୍ତ ବେଳେ ଜଣାପଡିଛି ।

ଭୁବନେଶ୍ୱର( ଦ କୁଇଭର ):- ପୂର୍ବତନ ପ୍ରଦେଶ କଂଗ୍ରେସ ସଭାପତି ତଥା ବରିଷ୍ଠ କଂଗ୍ରେସ ନେତା ନିରଞ୍ଜନ ପଟ୍ଟନାୟକଙ୍କ ଘରେ ED ରେଡ୍ । ଭୁବନେଶ୍ବର ନୟାପଲ୍ଲୀ ସ୍ଥିତ ବାସଭବନରେ ଚାଲିଛି ED ପକ୍ଷରୁ ରେଡ୍ କରାଯାଉଛି । ଆଜି ସକାଳ ୭ଟାରୁ ED ପକ୍ଷରୁ ନିରଞ୍ଜନ ପଟ୍ଟନାୟକଙ୍କ ଘରେ ରେଡ୍‌ କରାଯାଉଛି । ଏକକାଳୀନ ୩ଟି ସ୍ଥାନରେ ED ରେଡ୍‌ କରୁଛି । ବେଆଇନ ଅର୍ଥ କାରବାର ନେଇ ନିରଞ୍ଜନଙ୍କ ଘରେ ଇଡି ରେଡ୍‌ କରିଥିବା ଜଣାପଡ଼ିଛି । ତେବେ କେଉଁ ଘଟଣାକୁ ନେଇ ରେଡ୍‌ ହେଉଛି ସେନେଇ ଏପର୍ଯ୍ୟନ୍ତ କିଛି ସ୍ପଷ୍ଟ ସୂଚନା ମିଳିପାରିନାହିଁ । ସେହିପରି ED ରେଡ୍ ନେଇ ନିରଞ୍ଜନ ପଟ୍ଟନାୟକଙ୍କ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ ।ସୂଚନା ଅନୁସାରେ ଆଜି ସକାଳ ୭ଟାରୁ ବରିଷ୍ଠ କଂଗ୍ରେସ ନେତା ନିରଞ୍ଜନ ପଟ୍ଟନାୟକଙ୍କ ଘରେ ଇଡି ପକ୍ଷରୁ ରେଡ୍‌ କରାଯାଉଛି । ଇଡିର ୮ରୁ ୧୦ଜଣ ଅଧିକାରୀ ନିରଞ୍ଜନଙ୍କ ଘରେ ପହଞ୍ଚି ଚଢ଼ାଉ କରିଥିଲେ ।