ବ୍ରହ୍ମପୁରରେ ପୁଣି ସେକ୍ସ ରାକେଟ

ଦ କୁଇଭର ବ୍ୟୁରୋ :- ଦେଶରୁ ବିଦେଶ ସବୁଠି ଚମକିବ ଓଡିଶା ହସ୍ତତନ୍ତ । ଓଡ଼ିଆ ହସ୍ତକଳାକୁ ମିଳିବ ନୂଆ ପରିଚୟ । ବିଦେଶରେ ବଢିବ ଚାହିଦା । ଆମ ବୁଣାକାରମାନଙ୍କ ହାତ ତିଆରି କାରିଗରୀକୁ ନେଇ ବିଦେଶରେ ପ୍ରଚାର କରିବେ ଧକ ଧକ ଗର୍ଲ ମାଧୁରୀ ଦୀକ୍ଷିତ ।ବଲିଓଡ଼ର ଫ୍ୟାସନ ଆଇକନ ମାଧୁରୀ ଦୀକ୍ଷିତଙ୍କୁ ହସ୍ତତନ୍ତ ବିଭାଗର ବ୍ରାଣ୍ଡ ଆମ୍ବାସଡର ଘୋଷଣା କରି ମୁଖ୍ୟମନ୍ତ୍ରୀ ମୋହନ ମାଝୀ କହିଥିଲେ, ଅଭିନୟ ଓ ନୃତ୍ୟ ପ୍ରତିଭାରେ ମାଧୁରୀ ଯେଭଳି ସମସ୍ତଙ୍କୁ ପ୍ରଭାବିତ କରିଛନ୍ତି ଓ ଭାରତ ସମେତ ବିଶ୍ୱରେ ନିଜର ସ୍ୱତନ୍ତ୍ର ଚାପ ଛାଡିଛନ୍ତି, ଓଡ଼ିଶାର ହସ୍ତତନ୍ତକୁ ସେମିତି ନେଇ ବିଶ୍ୱରେ ପହଂଚାଇବେ ଓ ଓଡିଶାକୁ ଏକ ମଜଭୁତ ଫ୍ୟାସନ ରାଜ୍ୟ ଭାବେ ଗଢି ତୋଳିବେ । ଉଦ୍ଘାଟନୀ ସମାରୋହରେ ଯୋଗ ଦେଇ ବଲିଉଡ ଅଭିନେତ୍ରୀ ମାଧୁରୀ ଦୀକ୍ଷିତ ଆମ ବୁଣାକାରମାନଙ୍କର ହାତ ତିଆରି ହସ୍ତତନ୍ତର ପ୍ରଚାର କରିଥିଲେ। ସେ କହିଥିଲେ, 'ଓଡିଶା କଳାର ଏହା ଏକ ଅନନ୍ୟ ନିଦର୍ଶନ । ଏହାର ପ୍ରଚାରରେ ମୁଁ ସାମିଲ ହୋଉ ଓଡିଶା ପରମ୍ପରାର ଏହି ଆତ୍ମାକୁ ଅନୁଭବ କରିଲି। ଏହାର ପ୍ରଚାର ମୋର ଏକାନ୍ତ କାମ୍ୟ । ଏହା ଓଡ଼ିଶାର ଭବିଷ୍ୟତକୁ ଆଗକୁ ନେବ। କାରଣ ଓଡିଶା ହସ୍ତତନ୍ତର ପ୍ରତିଟି ଡିଜାଇନ ଗୋଟେ ଗୋଟେ କାହାଣୀ କୁହେ, ଯାହା ସହ ମୁ ଯୋଡି ହୋଇସାରିଛି। ତେଣୁ ଏହାର ପ୍ରଚାର ପ୍ରସାରର ମୁଁ ଗୋଟେ ଭାଗ ହୋଇଥିବାରୁ ଗର୍ବିତ ।'

ଜାତୀୟ ହସ୍ତତନ୍ତ ଦିବସ ଅବସରରେ ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ ଆଜି ସ୍ଥାନୀୟ ଜନତା ମୈଦାନ ଠାରେ ଆୟୋଜିତ ହସ୍ତତନ୍ତ ମେଳା "ଏକତା" କୁ ଉଦ୍ଘାଟନ କରିଛନ୍ତି । ମୁଖ୍ୟମନ୍ତ୍ରୀ କହିଛନ୍ତି, ଆମ ହସ୍ତତନ୍ତ ହେଉଛି ଓଡ଼ିଆ ଅସ୍ମିତାର ଏକ ପ୍ରମୁଖ ସ୍ତମ୍ଭ। ଆମର 'ହସ୍ତତନ୍ତ କ୍ଷେତ୍ର' କେବଳ ଏକ ଆର୍ଥିକ ସ୍ତମ୍ଭ ନୁହେଁ ବରଂ ଏହା ଜାତୀୟ ଗର୍ବ ଓ ଗରିମାର ପ୍ରତୀକ। ପ୍ରାଚୀନ ସାମୁଦ୍ରିକ ବାଣିଜ୍ୟରୁ ଆରମ୍ଭ କରି ବର୍ତ୍ତମାନର ବିଶ୍ୱ ଫ୍ୟାଶନ୍ ପ୍ଲାଟଫର୍ମ ପର୍ଯ୍ୟନ୍ତ, ଆମର ବୟନ ସର୍ବଦା ଉତ୍କର୍ଷତା, ଆଧ୍ୟାତ୍ମିକତା ଓ ସଂସ୍କୃତିର ଜୟଗାନ କରିଆସିଛି । ହସ୍ତତନ୍ତ ଉନ୍ନୟନ ଯୋଜନା ମାଧ୍ୟମରେ ବୁଣାକାରମାନଙ୍କ ସାମାଜିକ-ଆର୍ଥିକ ଅବସ୍ଥାକୁ ଉନ୍ନତ କରିବା ପାଇଁ ସରକାରଙ୍କ ଲକ୍ଷ୍ୟ ରହିଛି ବୋଲି ମୁଖ୍ୟମନ୍ତ୍ରୀ ଏହି ଅବସରରେ କହିଛନ୍ତି। ମୁଖ୍ୟମନ୍ତ୍ରୀ କହିଛନ୍ତି, ଓଡ଼ିଆ ଅସ୍ମିତାର ପ୍ରମୁଖ ସ୍ତମ୍ଭ ହେଉଛି ହସ୍ତତନ୍ତ । ମିଶନ ମୋଡରେ ଏହାର ବିକାଶ ହେବ। ଏକ ବର୍ଷ ପାଇଁ ମାଧୁରୀ ଦୀକ୍ଷିତଙ୍କୁ ବ୍ରାଣ୍ଡ ଆମ୍ବାସାଡର ଘୋଷଣା କରି ମୁଖ୍ୟମନ୍ତ୍ରୀ କହିଛନ୍ତି, ଗ୍ଲୋବାଲ ବ୍ରାଣ୍ଡିଙ୍ଗ ସହ ବିଶ୍ୱ ବଜାରରେ ସେ ଏହାର ପ୍ରଚାର ପ୍ରସାର କରିବେ । ବିଶ୍ୱ ବଜାରରେ ବଢିବ ଓଡିଶା କାରିଗରୀର ଚାହିଦା। ଗ୍ଲୋବାଲ ବ୍ରାଣ୍ଡିଙ୍ଗ ସହ ଓଡିଶାର ହସ୍ତତନ୍ତର ପ୍ରଚାର ପ୍ରସାର ହେବ । ଐତିହ୍ୟର ସୂତ୍ରଧାର ସାଜିଥିବା ଏହି ବିଭାଗକୁ ଆଗକୁ ନେବାକୁ ଆଜିଠାରୁ ବଡ ପଦକ୍ଷେପ ନେଇଛନ୍ତି ରାଜ୍ୟ ସରକାର। ଓଡିଶା ହସ୍ତତନ୍ତ ସାମଗ୍ରୀ ର ନକଲି ସାମଗ୍ରୀ ବଜାରରେ ସ୍ୱଳ୍ପ ଦରରେ ବିକ୍ରି ହେଉଛି ବୋଲି ଅଭିଯୋଗ ଆସୁଥିବା ବେଳେ ଏନେଇ ନେଇ ବିଭାଗ ସଚେତନ ରହିଛି। ଆଗକୁ ଯେଭଳି ଏହାର ଡୁପ୍ଲିକେଶି ନ ହୁଏ ବିଭାଗୀୟ ଅଧିକାରୀ ସେ ନେଇ କାମ କରୁଛନ୍ତି। ଡୁପ୍ଲିକେଟ୍ କରୁଥିବା ଲୋକଙ୍କ ବିରୁଦ୍ଧରେ ଆବଶ୍ୟକ ପଡ଼ିଲେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଖାଲି ସେତିକି ନୁଁହେ, ଯୁବ ବୁଣାକାରମାନେ କିଭଳି ଉତ୍ସାହିତ ହେବେ ସେଥିପାଇଁ ବ୍ଲୁ ପ୍ରିଣ୍ଟ ପ୍ରସ୍ତୁତ ହେଇଥିବା କହିଛନ୍ତି ମୁଖ୍ୟମନ୍ତ୍ରୀ । ଯୁବପିଢୀଙ୍କୁ ପ୍ରୋତ୍ସାହନଠୁ ଆରମ୍ଭ କରି ପ୍ରଶିକ୍ଷଣ, ଉନ୍ନତ ଜ୍ଞାନକୌଶଳ ସହ ନୂଆ ଡ଼ିଜାଇନ ପ୍ରଶିକ୍ଷଣ ପର୍ଯ୍ୟନ୍ତ ସବୁ ପ୍ରକାର ସହାୟତା ସରକାର ଯୋଗାଇଦେବେ ଓ ଯୁବ ବୁଣାକାରଙ୍କୁ ରୋଜଗାର ଦେବେ ବୋଲି ମଧ୍ୟ ପ୍ରତିଶ୍ରତି ଦେଇଛନ୍ତି।

ବ୍ରହ୍ମପୁର ( ଦ କୁଇଭର ):- ଖେଲୋ ଇଣ୍ଡିଆ ଦ୍ବାରା ଭଦ୍ରକ ଠାରେ ଆୟୋଜିତ ରାଜ୍ୟସ୍ତରୀୟ ତାଇକୋଣ୍ଡ ପ୍ରତି ଯୋଗିତାରେ ବ୍ରହ୍ମପୁର ମୀନାକ୍ଷୀ ନଗର୍ ସ୍ଥିତ ସେଣ୍ଟ ଜାଭିୟର୍ସ ସ୍କୁଲ ର ଛାତ୍ରୀ ମାନେ ସଫଳତା ଅର୍ଜନ କରିଛନ୍ତି । ଏଥିଲାଗି ସମସ୍ତ ଛାତ୍ରୀ ମାନଙ୍କୁ ସ୍କୁଲ ଚେୟାରମାନ ଅଧ୍ୟକ୍ଷ କେ. ସି.ପଣ୍ଡା , ନିର୍ଦ୍ଦେଶକ କୁନାଲ କୌଶିକ ପଣ୍ଡା , ରାହୁଲ ରାଜ୍ ପଣ୍ଡା ଓ ଆମ୍ବପୁଆ ସ୍କୁଲ ଅଧ୍ୟକ୍ଷା ଉଷା ପଟ୍ଟନାୟକ ଶୁଭକାମନା ସହ ଶୁଭେଛା ଜଣାଇଛନ୍ତି । ଏହି ପ୍ରତି ଯୋଗିତାରେ ଜାଭିୟର୍ସ ସ୍କୁଲ ର ୧୧ଜଣ ଛାତ୍ରୀ ଅଂଶ ଗ୍ରହଣ କରିଥିଲେ। ସେମାନଙ୍କ ମଧ୍ୟରୁ ୬ ଜଣ ଛାତ୍ରୀ ୮ଟି କାଂସ୍ୟ ପଦକ ହାସଲ କରି ସ୍କୁଲ ର ଗୌରବ ବୃଦ୍ଧି କରିଛନ୍ତି । ତେଜଲ୍ ପାଣିଗ୍ରାହୀ ୨ଟି କାଂସ୍ୟ, ସୁଧାମୟୀ ପାଢ଼ୀ ୨ଟି କାଂସ୍ୟ, ସିମ୍ରନ୍ ଗୌଡ଼ , ଡି. ଅଖିଳ, ସସ୍ମିତା, ସମିତା ପ୍ରମୁଖ ଗୋଟିଏ ଗୋଟିଏ କାଂସ୍ୟ ପଦକ ହାସଲ କରି ଏପରି ସଫଳତା ହାସଲ କରିଛନ୍ତି । କୋଚ କିରଣ ନାୟକ ଛାତ୍ରୀ ମାନଙ୍କୁ ତାଲିମ୍ ଦେଇଥିଲେ। ଛାତ୍ରୀ ମାନଙ୍କ ସଫଳତା ଲାଗି ସ୍କୁଲ ଶିକ୍ଷକ ଶିକ୍ଷୟତ୍ରୀ ମାନେ ଖୁସି ଅନୁଭବ କରିବା ସହ ଛାତ୍ରୀ ମାନଙ୍କୁ ଅଭିନନ୍ଦନ ଜଣାଇଛନ୍ତି ।

ଗଞ୍ଜାମ ( ଦ କୁଇଭର ):- ଗଞ୍ଜାମ ଜିଲ୍ଲା ସଦର ଥାନା ଅନ୍ତର୍ଗତ ବାଲିପଡ଼ା ଠାରେ ଗାଡି ଦୁର୍ଘଟଣା ଜଣେ ୮ବର୍ଷର ଶିଶୁ ବାଳକ ଗୁରୁତର ହୋଇଛି ! ଗୁରୁତର ଅବସ୍ଥାରେ ବ୍ରହ୍ମପୁର mkcg ମେଡିକାଲକୁ ସ୍ଥାନାନ୍ତର କରାଯାଇଛି ! ସୂଚନା ଅନୁସାରେ ଆଜି ଦିନ ପାଖା ପାଖି ୧୧ ଘଣ୍ଟା ସମୟରେ ଘରୁ ବାହାରି ଦୋକାନକୁ ଯିବା ସମୟରେ ଏହିଭଳି ଏକ ସଡ଼କ ଦୁର୍ଘଟଣା ଘଟିଥିଲା ଯାହାଫଳରେ ୮ବର୍ଷର ଶିଶୁ ପୁତ୍ର ଗୁରୁତର ହୋଇଛନ୍ତି ! ଅନ୍ୟ ପଟେ ଗୁରୁତର ଶିଶୁର ମା ବ୍ରହ୍ମପୁର mkcg ମେଡିକାଲରେ ନିଜ ଶିଶୁକୁ ବଞ୍ଚାଇ ଦେବା ପାଇଁ ଆକୁଳ ନିବେଦନ କରୁଛନ୍ତି !

ଘଟଣା ଘଟିବା ପରେ ଜାତୀୟ ରଜପଥକୁ ଅବରୋଧ କରିଛନ୍ତି ସ୍ଥାନୀୟ ଲୋକେ ! ଖବର ପାଇ ସଦର ଥାନା ପୁଲିସ ଘଟଣା ସ୍ଥଳରେ ପହଂଚି ସ୍ଥାନୀୟ ଲୋକଙ୍କୁ ବୁଝା ସୁଝା କରୁଛନ୍ତି ହେଲେ ସ୍ଥାନୀୟ ଲୋକେ ବୁଝିବାକୁ ନାରାଜ ଅଛନ୍ତି ! ଅନ୍ୟ ପଟେ ଯେଉଁ ଗାଡିଟି ଧକ୍କା ଦେଇଛି ସେହି ଗାଡିଟି ପୁଲିସ ଗାଡି ବୋଲି ସୂଚନା ମିଳୁଛି ! ଦୁର୍ଘଟଣା ଘଟାଇ ଗାଡିଟି ଦୃତ ଗତିରେ ଚାଲିଯାଇଥିବା ଖବର ମିଳୁଛି ! ଯେହେତୁ ସେହି ଜାତୀୟ ରାଜପଥରେ ଛୋଟ ବଡ଼ ଦୁର୍ଘଟଣା ଘଟୁଛି ! ଅନ୍ୟ ପଟେ ଗାଡି ଚାଳକଙ୍କ ବେପରୁଆ ଗାଡି ଚଳାଇବା ହେତୁ ଏହିଭଳି ଦୁର୍ଘଟଣା ଘଟୁଛି ଏବଂ ସାଧାରଣ ଲୋକଙ୍କ ଧନ ଜୀବନ ନଷ୍ଟ ହେଉଛି ! ଅନ୍ୟ ପଟେ ଖବର ପାଇ ବ୍ରହ୍ମପୁର ଏସପି ଡା. ଶ୍ରବଣା ବିବେକ ଏମ ବ୍ରହ୍ମପୁର mkcg ଆଶୁ ଚିକିତ୍ସା ରେ ପହଂଚି ସ୍ଥିତି ଅନୁଧ୍ୟାନ କରୁଛନ୍ତି ! ଏବଂ ପରିବାର ଲୋକଙ୍କ ସହ ଆଲୋଚନା କରୁଛନ୍ତି !

ଦ କୁଇଭର ବ୍ୟୁରୋ :- କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡାଇ ବ୍ଲକ ବଡ଼ପଡା ଅଞ୍ଚଳରେ ଜଣେ ଯୁକ୍ତ ୩ ଛାତ୍ରୀ ଆତ୍ମାହୂତି ଦେଇଛନ୍ତି । ଏଥର କଲେଜର ଅଧ୍ୟାପକ କି ଅଧ୍ୟକ୍ଷଙ୍କ ନିର୍ଯାତନା ନୁହେଁ, ତାଙ୍କ ପୁରୁଷ ବନ୍ଧୁଙ୍କ ନିର୍ଯାତନା ବୋଲି କହୁଛନ୍ତି ତାଙ୍କ ବାପା । ପୁରୁଷ ବନ୍ଧୁଙ୍କ ସହ ତାଙ୍କ ଝିଅର ବ୍ରେକ ଅପ ହୋଇଥିଲା । ଏହାପରେ ସେ ଝିଅର ଅନ୍ତରଙ୍ଗ ମୁହୂର୍ତ୍ତର ଫଟୋ ଗୁଡ଼ିକୁ ସୋସିଆଲ ମିଡିଆରେ ଭାଇରାଲ କରୁଥିଲା । ଏନେଇ ପୋଲିସକୁ ସେ ଜଣାଇଥିଲେ । ମାତ୍ର ପୋଲିସ ନୀରବ ରହିଥିଲା । ଫଳରେ ଝିଅ ଆତ୍ମାହୂତି ଦେବାକୁ ବାଧ୍ୟ ହେଲା ବୋଲି ତାଙ୍କ ବାପା କହୁଛନ୍ତି । ତାଙ୍କ ବାପାଙ୍କ କଥାକୁ ଥରେ ଶୁଣିବା । ମନ ଦେଇ ଶୁଣିଲେ ଅନେକ କିଛି ପ୍ରଶ୍ନ ଆସୁଛି ।

ବାପା ଯାଇଥିଲେ ପଟ୍ଟାମୁଣ୍ଡାଇ ହସ୍ପିଟାଲ । ସେହି ସମୟରେ ଝିଅ ଛାତ ଉପରେ ଆତ୍ମାହୂତି ଦେଲା । ୪ଘଣ୍ଟା ପରେ ସେ ଆସି କବାଟ ଭାଙ୍ଗିଲେ । ଛାତ ଉପରେ ଜଳୁଥିବା ଖବର ପାଖ ପଡ଼ିଶା ପାଇଲେ ନାହିଁ । କବାଟ ଭାଙ୍ଗିବା ବେଳେ ବି କେହି ଜାଣିଲେ ନାହିଁ । ସବୁ ସେ ହିଁ କରିଛନ୍ତି ।

ଏକଥା ଶୁଣିଲା ବେଳକୁ ଅନେକ ପ୍ରଶ୍ନ ଆସୁଛି । ସେତିକି ନୁହେଁ, ଝିଅର ପୁରୁଷ ବନ୍ଧୁଙ୍କ ନାମ କ’ଣ ? ସେ ହଇରାଣ କରିବାର ପ୍ରମାଣ ଅଛିକି ? ଥାନାରେ ଦେଇଥିବା ଏତଲାର ନକଲ ଅଛି କି ? ଏମିତି ପ୍ରଶ୍ନର ଉତ୍ତର ଶୁଣନ୍ତୁ । ସୋସିଆଲ ମିଡିଆର ଫଟୋ ସେମାନେ ଡିଲିଟ କରିଦିଅନ୍ତି । ଏସବୁକୁ ଦେଖିଲେ ଜଣାପଡ଼ୁଛି ଯେ, ଝିଅର କାରନାମାରେ ବାପା ଓ ପରିବାର ଲୋକେ ଅତିଷ୍ଠ ନଥିଲେ ତ ? ସମାଜରେ ମାନ ସମ୍ମାନ ହାନୀ ପାଇଁ କିଛି ମାରାତ୍ମକ ପଦକ୍ଷେପ ନିଆଯାଇ ନାହିଁ ତ ?

ଝିଅଟିଏ ଜଳି ପ୍ରାଣ ହରାଇଛନ୍ତି । ଏହା ଆତ୍ମହତ୍ୟା କି ହତ୍ୟା ତାହାର ତଦନ୍ତ ହେବା କଥା । ପ୍ରତିଟି ଦିଗକୁ ନଜର ଦେଇ ତଦନ୍ତ କରାଯିବା ଦରକାର । ମୃତ ଛାତ୍ରୀ ପ୍ରତି ସମବେଦନା ସବୁଠି ରହିଛି । ମାତ୍ର ତାଙ୍କ ମୃତ୍ୟୁ ଯେ ରହସ୍ୟମୟ ତାହା ଏବେ ଠାରୁ ଦିଶିଲାଣି । ବାପା ହିଁ ଘଟଣାକୁ ବିବାଦୀୟ କରୁଛନ୍ତି । ପୋଲିସରେ ଏତଲା ଦିଆଯିବା କଥାକୁ ପୋଲିସ ଅସ୍ୱୀକାର କରିଛି । ଏପଟେ ବାପା ପାଖରେ ପ୍ରମାଣ ନାହିଁ । ସେପଟେ ଅନ୍ତରଙ୍ଗ ମୁହୂର୍ତ୍ତର ଫଟୋ କଥା ବି ଆସୁଛି । ଏସବୁକୁ ଦେଖିଲେ ଘଟଣା ପଛରେ ଅନେକ ରହସ୍ୟ ଥିବା କୁହାଯାଉଛି । ବାପାଙ୍କ ବୟାନ କହୁଛି ବାଲେଶ୍ୱର ଛାତ୍ରୀ ଆତ୍ମାହୂତି କଥା । ସେଠାରେ ସରକାର ୨୦ଲକ୍ଷର କ୍ଷତିପୂରଣ ଦେଇଛନ୍ତି । ଏଠି ଆତ୍ମାହୂତି ପଛରେ କି ରହସ୍ୟ ରହିଛି ତାହା ତଦନ୍ତ ହେଲେ ପଦାକୁ ଆସିବ । ଦେଖାଯାଉ ପୋଲିସ ବାସ୍ତବ କଥା ଖୋଜି ବାହାର କରିପାରୁଛି ନା ମୃତା ଛାତ୍ରୀଙ୍କ ପରିବାର ଲୋକଙ୍କ କଥା ଅନୁଯାୟୀ ମାମଲାକୁ ଭାଙ୍ଗୁଛି ।

ବ୍ରହ୍ମପୁର( ଦ କୁଇଭର ) :- ବ୍ରହ୍ମପୁର ଆସ୍କା ରୋଡ୍‌ ମୟୁରୀ ବିହାର ଚତୁର୍ଥ ଗଳିର ଅନୁରାଗ ମିଶ୍ର ସାଇବର କ୍ରାଇମ୍ ପୋଲିସ ଷ୍ଟେସନ୍‌ରେ ଗତ ୨ ତାରିଖରେ ରିପୋର୍ଟ କରିଛନ୍ତି ଯେ ସେ ବ୍ୟାଙ୍କିଂ ଚ୍ୟାନେଲ୍‌ ମାଧ୍ୟମରେ ଉଚ୍ଚ ରିଟର୍ଣ୍ଣ ଆଶା କରି ଆର୍ଥିକ ନିବେଶ ସହିତ ଜଡିତ ଏକ ଠକେଇର ଶିକାର ହୋଇଛନ୍ତି ଏବଂ ଏହି ଅପରାଧରେ ସେ ଅନିଲ କୁମାର ମିଶ୍ର ନାମକ ଜଣେ ବ୍ୟକ୍ତିଙ୍କ ଠାରୁ ପ୍ରାୟ ୯ କୋଟି ଟଙ୍କା ହରାଇଛନ୍ତି l ପ୍ରଥମେ ତାଙ୍କ ବିଶ୍ୱାସ ଜିତିବା ପାଇଁ ଛୋଟ ଲାଭକୁ ଅନୁମତି ଦେଖାଇ, ତାଙ୍କୁ ଏକ କୋଟିରୁ ଅଧିକ ନିବେଶ ପାଇଁ ଭଲ ରିଟର୍ଣ୍ଣ ପ୍ରଦାନ କରାଯାଇଥିଲା ଯାହା ଫଳରେ ଅଭିଯୋଗକାରୀ ଅଭିଯୁକ୍ତଙ୍କ ଦ୍ୱାରା ଦିଆଯାଇଥିବା ବିଭିନ୍ନ ଟ୍ରେଡିଂ ଆକାଉଣ୍ଟ୍‌ରେ ୯ କୋଟି ଟଙ୍କା ନିବେଶ କରିଥିଲେ।

ସୂଚନା ପ୍ରକାରେ,ଗତ ୨୯.୪.୨୦୨୪ ରେ ଅଭିଯୋଗକାରୀ ତାଙ୍କ ଆକାଉଣ୍ଟରୁ ଟଙ୍କା ସ୍ଥାନାନ୍ତର କରି ୨,୦୦,୦୦୦/- ଟଙ୍କା ନିବେଶ କରିଥିଲେ। ତୁରନ୍ତ ତିନୋଟି ଭିନ୍ନ କାରବାର ମାଧ୍ୟମରେ ଅଭିଯୋଗକାରୀଙ୍କ ଉକ୍ତ ଚଳନ୍ତି ଆକାଉଣ୍ଟରେ ୨,୨୬,୦୦୦/- ଟଙ୍କା ଜମା କରାଯାଇଥିଲା ଯାହା ତାଙ୍କୁ ଅନିଲ କୁମାର ମିଶ୍ରଙ୍କ ଯୋଜନା ଏବଂ ସଚ୍ଚୋଟତା ଉପରେ ବିଶ୍ୱାସ କରାଇଥିଲା। ଏହି ପ୍ରାରମ୍ଭିକ ସଫଳତା ଉପରେ ନିର୍ଭର କରି ସେ ନିବେଶ କରି ଚାଲିଥିଲେ ଏବଂ ଏହିପରି ଅଭିଯୋଗକାରୀଙ୍କ ଦ୍ୱାରା ମେ-୨୦୨୪ ରୁ ୧୧.୪.୨୦୨୫ ପର୍ଯ୍ୟନ୍ତ ବ୍ୟାଙ୍କ କାରବାର ମାଧ୍ୟମରେ ବିଭିନ୍ନ ତାରିଖରେ ତାଙ୍କ ICICI ବ୍ୟାଙ୍କ ଆକାଉଣ୍ଟରୁ କେବଳ ବ୍ୟାଙ୍କ କାରବାର ମାଧ୍ୟମରେ ମୋଟ ୯,୭୧,୫୫,୦୭୩/- ଟଙ୍କା ନିବେଶ କରାଯାଇଥିଲା। ଯଦିଓ ଏପ୍ରିଲ ୨୦୨୫ ପର୍ଯ୍ୟନ୍ତ, ସେ ଅଭିଯୁକ୍ତ ବ୍ୟକ୍ତିଙ୍କଠାରୁ "ଫେରସ୍ତ" ଭାବରେ ପ୍ରାୟ ୩ କୋଟି ଟଙ୍କା ପାଇଥିଲେ, କିନ୍ତୁ ୧୧.୪.୨୦୨୫ ପରେ ପୀଡିତ ଅଭିଯୋଗକାରୀଙ୍କ ଠାରୁ କୌଣସି ଟଙ୍କା ପାଇ ନଥିଲେ। ସେ ଜାଣିପାରିଲେ ଯେ ସେ ଠକାମିର ଶିକାର ହୋଇଛନ୍ତି ଏବଂ ବ୍ରହ୍ମପୁରର ସିସି ଏବଂ ଇଓ ପିଏସରେ ରିପୋର୍ଟ କରିଥିଲେ। ରିପୋର୍ଟକୁ ଆଧାର କରି ତଦନ୍ତ ସମୟରେ, ଜଣାପଡିଲା ଯେ ଅଭିଯୁକ୍ତ କେବଳ ବିଭିନ୍ନ ବାଣିଜ୍ୟିକ ଆପ୍ସରେ ଟଙ୍କା ବିନିଯୋଗ କରୁଥିଲେ ଏବଂ ତାଙ୍କର ଲାଭର କିଛି ଟଙ୍କା ଫେରସ୍ତ ଭାବରେ ଦେଉଥିଲେ। କିନ୍ତୁ ସେ ଟଙ୍କା ହରାଇଲେ ଏବଂ ଆଉ କିଛି ଫେରସ୍ତ କରିପାରିଲେ ନାହିଁ। ଅଭିଯୁକ୍ତଙ୍କ ବୟାନର ସତ୍ୟତା ଯାଞ୍ଚ କରିବା ପାଇଁ ତଦନ୍ତ ଚାଲିଥିବା ସୂଚନା ମିଳିଛି l ତେବେ ଅଭିଯୁକ୍ତ କୋଦଳା ଥାନା ଅଞ୍ଚଳର ହୋଇଥିବାବେଳେ ୪ଟି ମୋବାଇଲ୍ ସହ ୪ଟି ବ୍ୟାଙ୍କ ଖାତା ଜବତ କରାଯାଇଛି l

ତେବେ ବାରମ୍ବାର ସାମାଜିକ ଗଣମାଧ୍ୟମ ଏବଂ ମେସେଜିଂ ଆପ୍ସରେ ଅବାଞ୍ଛିତ ନିବେଶ ପ୍ରସ୍ତାବ ଏବଂ ଡିଜିଟାଲ୍ ଗିରଫଦାରୀ ବିରୁଦ୍ଧରେ ସତର୍କ ରହିବାକୁ ନାଗରିକମାନଙ୍କୁ ଅନୁରୋଧ କରାଯାଉଛି। ସାଇବର ଠକେଇର ଶିକାର ନହେବା ପାଇଁ ନିବେଶ କରିବା ପୂର୍ବରୁ ସର୍ବଦା ଏପରି ଯୋଜନାଗୁଡ଼ିକର ସତ୍ୟତା ଯାଞ୍ଚ କରନ୍ତୁ, କୌଣସି ସନ୍ଦେହଜନକ କାର୍ଯ୍ୟକଳାପ କ୍ଷେତ୍ରରେ, ତୁରନ୍ତ 'ସାଇବର ହେଲ୍ପଲାଇନ୍ ୧୯୩୦' କୁ ରିପୋର୍ଟ କରନ୍ତୁ କିମ୍ବା ନିକଟସ୍ଥ ପୋଲିସ ଷ୍ଟେସନ ଯିବାପାଇଁ ପରାମର୍ଶ ଵା ସତର୍କ ବାଣୀ ଦିଆଯାଏ, ତଥାପି ବାରମ୍ବାର ଲୋଭର ଶିକାର ହୁଅନ୍ତି ଜନତା ତେଣୁ ଆଗକୁ ସତର୍କ ରହିବାକୁ ସାଇବର ଅପରାଧ ଏବଂ ଅର୍ଥନୈତିକ ଅପରାଧ ପୋଲିସ ପକ୍ଷରୁ ଅନୁରୋଧ କରାଯାଇଛି l

ଦ କୁଇଭର ବ୍ୟୁରୋ :- ଆମେରିକାର ତାରିଫ ମନମାନିକୁ କଡ଼ା ଜବାବ ଦେଇଛି ଭାରତ । ଭାରତରେ ଆଜି ମୋଦି ସରକାର ଆମେରିକାର ଏଭଳି ପଦକ୍ଷେପକୁ କେବଳ ନିନ୍ଦା କରିନାହାନ୍ତି, ଏହାର ମୁକାବିଲା କରିବା ପାଇଁ ଭାରତ ପ୍ରସ୍ତୁତ ବୋଲି କହିଛନ୍ତି । ପ୍ରଧନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି ଯେ ଆମେରିକାର ସ୍ୱାର୍ଥ ପାଇଁ ଭାରତର ଚାଷୀ ଏବଂ ବ୍ୟବସାୟିକ ସ୍ୱାର୍ଥକୁ ଜଳାଞ୍ଜଳି ଦିଆଯାଇ ପାରିବ ନାହିଁ । ଭାରତର ଚାଷୀ ଭାଇ ମାନଙ୍କର ଯେଉଁ ହକ ରହିଛି ତାକୁ କେନ୍ଦ୍ର ସରକାର ସୁରକ୍ଷିତ ରଖିବେ । ଋଷ ସହ ସମ୍ପର୍କକୁ ନେଇ ମୋଦି ସ୍ପଷ୍ଟ କରେଇଦେଇଛନ୍ତି, ଯେ ଭାରତର କ୍ଷତି ହେବା ଭଳି କୌଣସି ପଦକ୍ଷେପ ମୋଦି ସରକାର ନେବେ ନାହିଁ ।

ଆମେରିକା ଠାରୁ ତୈଳ ଆମଦାନୀ କଲେ ଭାରତ ଉପରେ ଆର୍ଥିକ ବୋଝ ବୋହୁ ଉପରେ ପଡ଼ିଯିବ । ତେଣୁ ଭାରତୀୟଙ୍କ ସ୍ୱାର୍ଥକୁ ଦେଖି ମୋଦି ସରକାର ପଦକ୍ଷେପ ନେଉଛନ୍ତି । ଆମେରିକା ତାରିଫ ବଢାଉ । ଏ ଦିଗରେ ଖୁବ ଶୀଘ୍ର କେନ୍ଦ୍ର ସରକାର ପଦକ୍ଷେପ ନେବେ ବୋଲି ମୋଦି ସ୍ପଷ୍ଟ କରିଦେଇଛନ୍ତି ।

ଦ କୁଇଭର ବ୍ୟୁରୋ :- ଋଷକୁ ସାରା ବିଶ୍ୱରେ ଏକଘରିଆ କରିବା ପାଇଁ ଆମେରିକା ଜୋର ସୋରରେ ଲାଗିଛି । ଋଷ ସହ ନିଜେ ବେପାର କରୁଛି, ହେଲେ ଅନ୍ୟ କାହାକୁ କରିବାକୁ ଦେବାକୁ ଚାହୁଁନାହିଁ । ଋଷ ଠାରୁ ଆମେରିକା ଯୁରାନିୟମ କିଣୁଛି । ହେଲେ ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ କହିଲେଣି, ଋଷ ସହ ଯେଉଁ ମାନେ ତୈଳ ବେପାର କରିବେ ବା ବ୍ୟବସାୟ କରିବେ ସେହି ଦେଶ ଉପରେ ଆମେରିକା ୧୦୦ ପ୍ରତିଶତ ଟିକସ ଲଗାଇବ । ଏମିତି କିଛି ଚେତାବନୀ ଦେଇ ବିଶ୍ୱ ବାଣିଜ୍ୟ ବଜାରକୁ ଅସନ୍ତୁଳିତ ଆଡକୁ ଠେଲି ଦେଉଛନ୍ତି ଟ୍ରମ୍ପ । ଏହାକୁ ନେଇ ବିଭିନ୍ନ ଦେଶ ପ୍ରତିକ୍ରିୟା ବି ପ୍ରକାଶ କଲେଣି ।

ବିଶ୍ୱ ବାଣିଜ୍ୟ ବଜାରର ସନ୍ତୁଳନକୁ ବିଗାଡୁଛି ଆମେରିକା । ବିଶେଷ କରି ଟ୍ରମ୍ପ ଦ୍ଵିତୀୟ ଥର ରାଷ୍ଟ୍ରପତି ଦାୟିତ୍ୱ ନେବା ପରେ ବିଶ୍ୱବାଣିଜ୍ୟ ବଜାରକୁ ଆମେରିକା ହାତମୁଠାରେ ରଖିବାକୁ ଯୋଜନା ଚଳାଇଛନ୍ତି । ବିଶ୍ୱରେ ଅନ୍ୟତମ ବୃହତ ଶକ୍ତି ଋଷ, ଚୀନ ଓ ଭାରତ ଏଥିରେ ସହମତ ହେଉନାହାନ୍ତି । ସେଥିପାଇଁ ଟ୍ରମ୍ପ କଟକଣା ଆଉ ଧମକ ବି ଜାରି କରୁଛନ୍ତି । ଭାରତ ମୁହଁ ତୋଡ ଜବାବ ଦେବାକୁ ପ୍ରସ୍ତୁତ ହୋଇଗଲାଣି । ଋଷ, ଚୀନ, ଇରାନ ଭଳି ଦେଶ ଆଉ କେଇ ପାଦ ଆଗେଇଗଲେଣି ।

ଋଷକୁ ଡରେଇବା ପାଇଁ ଆମେରିକା ପରମାଣୁ ଓ ଜଳ ଜାହାଜ ଆଣି ସୀମାରେ ରଖିଲାଣି । ସେପଟେ ଋଷ ସହ ବେପାର କରୁଥିବା ଅନ୍ୟ ଦେଶ ଗୁଡ଼ିକୁ ମଧ୍ୟ ଚେତାବନୀ ଦେଲାଣି । ତାର ସମର୍ଥକ ଦେଶ ଗୁଡ଼ିକୁ ପ୍ରସ୍ତୁତ କଲାଣି । ଏହାର ଜବାବ ଦେବାକୁ ଯାଇ ଋଷ ଓ ଚୀନ ମିଳିତ ଭାବେ ଜଳ ସେନାକୁ ପ୍ରସ୍ତୁତ କଲେଣି । ଖାଲି ଜଳ ସେନାକୁ ପ୍ରସ୍ତୁତ କରିନାହାନ୍ତି । ଏବେ ସାମରିକ ପ୍ରସ୍ତୁତି ମଧ୍ୟ କଲେଣି । ଭାରତ ଫିଲିଫାଇନ୍ସ ସହ ମିଶି ସମୁଦ୍ରରେ ତାର ପଇଁତରାକୁ ଅଧିକ କରୁଛି ।

ଋଷର ସାଥ ଦେଉଛି ଭାରତ । କୌଣସି ବି ସ୍ଥିତିରେ ଭାରତ ତାର ଆନ୍ତର୍ଜାତୀୟ ବାଣିଜ୍ୟ ନୀତିକୁ ବଦଳାଇବ ନାହିଁ । ଦେଶର ସ୍ୱାର୍ଥ ପାଇଁ ଏହା କରିବ । ଏଥିପାଇଁ ଅନେକ କିଛି ପଦକ୍ଷେପ ନେବାକୁ ଯାଉଛି ଭାରତ । ଆମେରିକାର ଏଭଳି ଅସନ୍ତୁଳିତ କାର୍ଯ୍ୟ ପାଇଁ ସାରା ବିଶ୍ୱରେ ପ୍ରତିକ୍ରିୟା ବଢ଼ିଲାଣି । ପ୍ରମୁଖ ଶକ୍ତିଶାଳୀ ଦେଶ ଗୁଡ଼ିକ ଆମେରିକା ବିରୁଦ୍ଧରେ ଛିଡ଼ା ହେବାକୁ ଲାଗିଲେଣି । ଦେଖାଯାଉ ଏହି ବାଣିଜ୍ୟ ଯୁଦ୍ଧ ଆଗକୁ କି ରୂପ ନେଉଛି ?

ଦ କୁଇଭର ବ୍ୟୁରୋ :- ସତ ଖୋଲିବେ ସିକ୍ୟୁରିଟି ଗାର୍ଡ । କ୍ରାଇମବ୍ରାଞ୍ଚ ର ତଦନ୍ତର ସମ୍ମୁଖୀନ ହେଲେ ଏଫ୍ ଏମ କଲେଜର ସିକ୍ୟୁରିଟି ଗାର୍ଡ । କଲେଜ୍ ଫାଷ୍ଟ ଗେଟରେ କାର୍ଯ୍ୟରତ ସିକ୍ୟୁରିଟି ଗାର୍ଡଙ୍କୁ ଝାଳ ବୁହା ପଚରାଉଚରା କରିଛି କ୍ରାଇମ୍ ବ୍ରାଞ୍ଚ । ଘଟଣା ଦିନ କେତେବେଳେ କାର୍ଯ୍ୟରେ ଯୋଗ ଦେଇଥିଲେ ସିକ୍ୟୁରିଟି ଗାର୍ଡ ।ଛାତ୍ରୀ ଜଣକ କେଉଁ ସମୟରେ କଲେଜ୍ କ୍ୟାମ୍ପସ କୁ ପଶିଲେ । ଛାତ୍ରୀ ଙ୍କ ସାଙ୍ଗରେ କିଏ କିଏ ଥିଲେ । କେଉଁ ଛାତ୍ର ମାନେ ଛାତ୍ରୀଙ୍କ ସହ ଥିଲେ । କେତେ ଜଣ ଅଣଛାତ୍ର ଘଟଣା ଦିନ କ୍ୟାମ୍ପସ ମଧ୍ୟରେ ଥିଲେ । ସବୁ ଛାତ୍ର ମାନେ ୟୁନିଫର୍ମ ରେ ଥିଲେ ନା ନର୍ମାଲ ଡ୍ରେସ୍ ରେ ଥିଲେ ।ଏସବୁ ବିଷୟକୁ ନେଇ ବହୁ ସମୟଧରି ପଚରା ଉଚୁରା କରିଛି କ୍ରାଇମବ୍ରାଞ୍ଚ । ମେଇନ ଗେଟ୍ ସହ , ପ୍ରିଂସିପାଲ୍ ଚ୍ୟମ୍ବର ଓ କ୍ୟାମ୍ପସ ରେ ଡ୍ୟୁଟି କରୁଥିବା ୩ ଜଣ ସିକ୍ୟୁରିଟି ଗାର୍ଡ ଆଜି କ୍ରାଇମବ୍ରାଞ୍ଚ ଜେରାର ସମ୍ମୁଖୀନ ହୋଇଛନ୍ତି ।

ଦ କୁଇଭର ବ୍ୟୁରୋ : ଏଫ୍ଏମ କଲେଜ ଛାତ୍ରୀ ଜୀବନ ହାରିବା ଘଟଣା । ଗିରଫ ଅଧ୍ୟକ୍ଷଙ୍କ ବେଲ୍ ଆବେଦନ ଖାରଜ । ଫକୀରମୋହନ ସ୍ବୟଂଶାସିତ ମହାବିଦ୍ୟାଳୟ ଛାତ୍ରୀଙ୍କ ମୃତ୍ୟୁ ଘଟଣାରେ ନିଲମ୍ବିତ ତଥା ଗିରଫ ଅଧ୍ୟକ୍ଷ ଦିଲ୍ଲୀପ କୁମାର ଘୋଷଙ୍କ ଆଜି ଜାମିନ ଆବେଦନ ଶୁଣାଣି ଖାରଜ ହୋଇଛି । ଏହି ଆବେଦନକୁ ଏସ୍ ଡି ଜେ ଏମ୍ କୋର୍ଟ ଖାରଛ କରିଛନ୍ତି । ତାଙ୍କର ଏହା ଦ୍ବିତୀୟ ଥର ପାଇଁ ୧୪ ଦିନ ଅବଧି ଖାରଜ ହୋଇଛି । ତାଙ୍କର ବେଲ୍ କୁ ଏସ୍ ଡି ଜେ ଏମ୍ କିଶୋର କୁମାର ନାଥ ଖାରଜ କରିଛନ୍ତି ।

ସୂଚନା ଅନୁସାରେ ଫକୀରମୋହନ ସ୍ବୟଂଶାସିତ ମହାବିଦ୍ୟାଳୟ ବିଏଡ୍ ଛାତ୍ରୀ ଦୁଷ୍କର୍ମ ଅଭିଯୋଗରେ ନ୍ୟାୟ ନପାଇ ଘଟଣା ସବୁଠି ଚର୍ଚ୍ଚା ସୃଷ୍ଟି କରିଥିଲା । ଛାତ୍ରୀ ନ୍ଯାୟ ନପାଇବାରୁ ଜୁଲାଇ ମାସ ୧୨ ତାରିଖରେ କଲେଜ ଅଧ୍ୟକ୍ଷଙ୍କ କାର୍ଯ୍ୟାଳୟ ସମ୍ମୁଖରେ ନିଜକୁ ନିଆଁ ଲଗାଇ ଜୀବନ ହରିବାକୁ ଉଦ୍ୟମ କରିଥିଲେ। ପରବର୍ତ୍ତୀ ସମୟରେ ଛାତ୍ରୀ ଜଣକ ମୃତ୍ୟ ବରଣ କରିଥିଲେ। ତେବେ ଏହି ଘଟଣା ଘଟିବା ଦିନ ହେଚୋଡି ସମୀର ସାହୁଙ୍କୁ ଗିରଫ କରାଯାଇ ନିଲମ୍ବନ କରାଯାଇଥିଲା । ପରେ କଲେଜ ଅଧ୍ୟକ୍ଷଙ୍କୁ ନିଲମ୍ବନ ସହ ଗିରଫ କରାଯାଇଥିଲା । ଗିରଫ ଅଧ୍ୟକ୍ଷଙ୍କ ଦୁଇ ଥର ଜାମିନ ଖାରଜ କରାଯାଇଛି । ଅନ୍ୟପଟେ ଆଜି ସମୀରଙ୍କ ଦ୍ବିତୀୟ ଥର ପାଇଁ ଜାମିନ ଆବେଦନ ଶୁଣାଣି ରହିଛି ବୋଲି ଜଣାପଡିଛି

ଗୋପାଳପୁର ( ଦ କୁଇଭର ):- ଗୋପାଳପୁର ବେଳାଭୂମି ଗଣଦୁଷ୍କର୍ମ ମାମଲାର ବିଚାରଣା ପ୍ରକ୍ରିୟା ଖୁବ୍‌ଶୀଘ୍ର ଆରମ୍ଭ ହେବ। ବର୍ତ୍ତମାନ ଜେଏମ୍‌ଏଫ୍‌ସି (ଗ୍ରାମାଞ୍ଚଳ) ରିତିକା ଜେନାଙ୍କ କୋର୍ଟରେ କମିଟ୍‌ମେଣ୍ଟ୍‌ ପରେ ବିଚାରଣା ପାଇଁ ଜିଲ୍ଲା ଦୌରାଜଜ୍‌ କୋର୍ଟକୁ ମାମଲା ସ୍ଥାନାନ୍ତର କରାଯାଇଛି। କିଛିଦିନ ମଧ୍ୟରେ ମାମଲାର ଅଭିଯୁକ୍ତଙ୍କୁ କୋର୍ଟରେ ହାଜର କରି ଚାର୍ଜଫ୍ରେମ୍‌ କରାଯିବ। ଏହାପରେ ବିଚାରଣା ଆରମ୍ଭ ହେବ ବୋଲି ସୂଚନା ମିଳିଛି। ସେହିପରି ଚାର୍ଜସିଟ୍‌ରୁ ବାଦ୍‌ ପଡ଼ିଥିବା ଅଭିଯୁକ୍ତର ନାଁ ମାମଲାରୁ କାଟିବା ପାଇଁ ଦାଖଲ ହୋଇଥିବା ଡିସ୍‌ଚାର୍ଜ ପିଟିସନ୍‌କୁ ଜେଏମ୍‌ଏଫ୍‌ସି ଖାରଜ କରିଛନ୍ତି। ଏହି ପିଟିସନ୍‌ର ଶୁଣାଣି ବେଳେ ଜେଏମ୍‌ଏଫ୍‌ସି କୋର୍ଟର ଏପିପି ଆଲୋକ କଦମ ମାମଲାରୁ ଅଭିଯୁକ୍ତର ନାଁ କାଟିବାକୁ ଦୃଢ଼ ବିରୋଧ କରିବା ସହିତ ବଳି‌ଷ୍ଠ ଯୁକ୍ତି ଉପସ୍ଥାପନ କରିଥିଲେ। ଏଣୁ ସେହି ପିଟିସନ୍‌ ଖାରଜ ହୋଇଛି। ଗଞ୍ଜାମ ଜିଲ୍ଲା ଗୋପାଳପୁର ବେଳାଭୂମିରେ ଗତ ଜୁନ୍ ୧୫ ତାରିଖ ସଂଧ୍ୟାରେ ଜଣେ ଯୁକ୍ତତିନି ଶେଷବର୍ଷ ଛାତ୍ରୀଙ୍କୁ ତାଙ୍କ ପୁରୁଷ ବନ୍ଧୁଙ୍କ ଉପସ୍ଥିତିରେ ଗଣଦୁଷ୍କର୍ମ ହୋଇଥିଲା। ଏହି ଘଟଣାରେ ଗୋପାଳପୁର ଥାନା ପୁଲିସ ଘଟଣା ରାତିରେ ହିଁ ପୁଲିସ ବିଭିନ୍ନ ସ୍ଥାନରେ ଚଢ଼ଉ କରି ୬ଜଣ ଯୁବକଙ୍କୁ ଧରିଥିଲା। ପରବର୍ତ୍ତୀ ସମୟରେ ପୁଲିସ ଅନ୍ୟ ୪ଜଣ ନାବାଳକଙ୍କୁ ମଧ୍ୟ କାବୁ କରିଥିଲା। ୧୭ତାରିଖରେ ରାଜ୍ୟ ସରକାର ଏହି ମାମଲାର ତଦନ୍ତଭାର କ୍ରାଇମ୍‌ବ୍ରାଞ୍ଚକୁ ହସ୍ତାନ୍ତର କରିଥିଲେ। କ୍ରାଇମ୍‌ବ୍ରାଞ୍ଚ ୫ଜଣ ଯୁବକ ଓ ୪ଜଣ ନାବାଳକଙ୍କ ବିରୋଧରେ ଜୁଲାଇ ୨୮ତାରିଖରେ ଚାର୍ଜସିଟ୍ ଦାଖଲ କରିଥିଲା। କିନ୍ତୁ ଜଣେ ଅଭିଯୁକ୍ତ ବିରୋଧରେ ଚାର୍ଜସିଟ୍‌ ଦାଖଲ ହୋଇ ନଥିଲା।

ବ୍ରହ୍ମପୁର( ଦ କୁଇଭର ):- ବ୍ରହ୍ମପୁର ଜିଲ୍ଲା ପୋଲିସରେ ଯେତେବେଳେ ନୂତନ ଭାବେ ଯୋଗ ଦେଇଥିଲେ ବ୍ରହ୍ମପୁର ଆରକ୍ଷୀ ଅଧିକ୍ଷକ ଡ଼ା ଶ୍ରବଣା ବିବେକ ଏମ, ସେତେବେଳେ ଏକ ବଡ଼ ଧରଣର ସେକ୍ସ ରାକେଟକୁ ଧରିବାରେ ସଫଳ ହୋଇଥିଲେ l କିଛି ଦିନର ବୀରତି ପରେ ଏବେ ପୁଣି ସହର ତଥା ଆଖ ପାଖ ଅଞ୍ଚଳରେ ଦେଖାଦେଇଛି ଏଭଳିଆ ସେକ୍ସ ରାକେଟ l ନିମଖଣ୍ଡି ଶ୍ରୀକ୍ଷେତ୍ର ବିହାର ଅଞ୍ଚଳରେ କିଛି ଦିନ ହେଲା ଚାଲିଥିଲା ଏଭଳିଆ ସେକ୍ସ ରାକେଟ କାରବାର,ଅଞ୍ଚଳର ସଭାପତି ଏ ବିଷୟରେ ଜାଣିବାକୁ ପାଇଲାପରେ, ଗତ କାଲି ଅର୍ଥାତ ବୁଧବାର ରାତିରେ ସେହି ଘରେ ଆପତି ଜନକ କାର୍ଯ୍ୟ ଚାଲିଥିବା ଜାଣିବା ପରେ ପ୍ରଥମେ ସେହି ଘରକୁ ବାହାର ପଟୁ ତାଲା ପକାଇ ପୋଲିସକୁ ଖବର ଦେଇଥିଲେ । ଖବର ପାଇ ପୋଲିସ ଚଢ଼ାଉ କରିବାକୁ ଆସିବା ଭିତରେ ଛାତ ଉପର ଡେଇଁ ୩ ଜଣ ଫେରାର ହୋଇଯାଇଥିବାବେଳେ କେବଳ ଜଣଙ୍କୁ ହିଁ ପୋଲିସ ଧରିପାରିଛି l ତେଵେ ବୁଦ୍ଧିଜୀବୀଙ୍କ କହିବା ପ୍ରକାରେ ସହରର ଅନେକ ସ୍ଥାନରେ ଏଭଳିଆ ସେକ୍ସ ରାକେଟ କାରବାର ଚାଲିଛି,ସେ ସବୁ ମଧ୍ୟ ପୋଲିସ କେବେ ଠାବ କରୁଛି, ଦେଖିବାକୁ ବାକି ରହିଲା l

ବ୍ରହ୍ମପୁର( ଦ କୁଇଭର):- ଜରଡା ଥାନାର ସମ୍ପୃକ୍ତ ଆଇଆଇସି ଟୁନା ସାସମଲ, ଗୋସାନିନୁଗାଁ ଥାନା ଡିଏସ୍ପି ସ୍ମୃତି ଏବଂ ଟାଉନ ଥାନା ଭାରପ୍ରାପ୍ତ ଅଧିକାରୀ ସୌଭାଗ୍ୟ ସ୍ୱାଇଁ ସ୍କୁଲ ଛାତ୍ରଛାତ୍ରୀମାନଙ୍କୁ ବ୍ରହ୍ମପୁର ପୋଲିସ ଷ୍ଟେସନ ପରିଦର୍ଶନ କରିବାକୁ ନିମନ୍ତ୍ରଣ କରିଥିଲେ। ସ୍କୁଲ ପିଲାମାନେ ପୋଲିସ ଷ୍ଟେସନ ପରିଦର୍ଶନ କରିଥିଲେ ଏବଂ ପୋଲିସ ଷ୍ଟେସନରେ ନିୟୋଜିତ ଅଧିକାରୀ ଏବଂ କର୍ମଚାରୀଙ୍କ ସହ ଆଲୋଚନା କରିଥିଲେ। ସେମାନଙ୍କୁ ପୋଲିସର କାର୍ଯ୍ୟପନ୍ଥା, ନୂତନ ଫୌଜଦାରୀ ଆଇନ ବିଷୟରେ ଶିକ୍ଷା ଦିଆଯାଇଥିଲା। ସେମାନଙ୍କ ପରିଦର୍ଶନ ପରେ, ଛାତ୍ରଛାତ୍ରୀମାନେ ଆଇଆଇସି ଏବଂ ଅନ୍ୟ ଅଧିକାରୀଙ୍କ ସହିତ ଆଲୋଚନା କରିଥିଲେ ଏବଂ ପ୍ରଶ୍ନ ପଚାରି ସେମାନଙ୍କର ସନ୍ଦେହକୁ ସ୍ପଷ୍ଟ କରିଥିଲେ। ଏହି କାର୍ଯ୍ୟକ୍ରମ ପୋଲିସ ବ୍ୟବସ୍ଥା ପ୍ରତି ଛାତ୍ରଛାତ୍ରୀମାନଙ୍କର ବିଶ୍ୱାସକୁ ସୁନିଶ୍ଚିତ କରିବ ଏବଂ ସେମାନଙ୍କ କ୍ୟାରିୟରର ପସନ୍ଦ ଭାବରେ ପୋଲିସରେ ଯୋଗଦେବାକୁ ଉତ୍ସାହିତ କରିବ ବୋଲି ପୋଲିସ ପକ୍ଷରୁ ସୂଚନା ମିଳିଛି l

ବ୍ରହ୍ମପୁର ( ଦ କୁଇଭର ):- ଗତ କିଛି ଦିନ ଜିଲ୍ଲା ତଥା ରାଜ୍ୟରେ ଯେଉଁ ପ୍ରକାର ଘଟଣା, ଦୁର୍ଘଟଣା ମାନ ଘଟିଚାଲିଛି, ସେଥିପାଇଁ ବିଜେଡି ଭାରତୀୟ ଜନତା ପାର୍ଟିର ସରକାର ତଥା କର୍ମୀମାନଙ୍କୁ ଦୋଷାରୋପ କରୁଥିଲେ ଯାହାର ଉତ୍ତରରେ ଆଜି ଏକ "ସାମ୍ବାଦିକ ସମ୍ମିଳନୀ" ବ୍ରହ୍ମପୁର ହିଲପାଟଣା ସ୍ଥିତ ବିଜେପି ଜିଲ୍ଲା କାର୍ଯ୍ୟାଳୟ ଠାରେ ଅନୁଷ୍ଠିତ ହୋଇଯାଇଛି । ଏହି "ସାମ୍ବାଦିକ ସମ୍ମିଳନୀରେ" ଭାରତୀୟ ଜନତା ପାର୍ଟିର ଗଞ୍ଜାମ ଜିଲ୍ଲା ସଭାପତି ସରୋଜ ସାବତ,ବରିଷ୍ଠ ନେତା ତଥା ରାଷ୍ଟ୍ରୀୟ ପରିଷଦ ସଭ୍ୟ କାହ୍ନୁ ଚରଣ ପତି, ଆସ୍କା, ବ୍ରହ୍ମପୁର ଏବଂ କନ୍ଧମାଳ ତିନୋଟି ଲୋକସଭା କ୍ଷେତ୍ର ଦାୟୀତ୍ଵରେ ଥିବା ଦଳର ବରିଷ୍ଠ ନେତା ସୁନିଲ କୁମାର ସାହୁ, ବିଜେପି ନେତା ତଥା ବରିଷ୍ଠ ଆଇନଜିବୀ ପୀତବାସ ପଣ୍ଡା,ଜିଲ୍ଲା ସାଧାରଣ ସମ୍ପାଦକ ପ୍ରଭାତ କିରଣ ଷଡ଼ଙ୍ଗୀ ପ୍ରମୁଖ ମଞ୍ଚାସୀନ ଥିଲେ ।

ତେବେ ଗତ ୨୯ ତାରିଖ ଦିନ ଗୋଳନ୍ଥରା ଚଟି ଛକ ନିକଟରେ ଘଟିଥିବା ଏକ ଦୁର୍ଘଟଣାକୁ ବିଜୁ ଜନତା ଦଳର ନେତା ଭୃଗୁ ବକ୍ସିପାତ୍ର ଓ ଲେଲିନ ମହାନ୍ତି ଯେଉଁପରି ଭାବରେ ତାକୁ ଅତି ରଞ୍ଜିତ କରି ରାଜ୍ୟରେ ଆଇନ ଶୃଙ୍ଖଳା ଭୁଷୁଡି ପଡ଼ିଛି, ମନ୍ତ୍ରୀଙ୍କୁ ଏହି ଘଟଣାରେ ଟାଣି ଓଟାରି ସଂପୃକ୍ତ କରିବା ଓ ଦୁଇ ଯୁବ ଆଇନଜୀବୀଙ୍କୁ ଦୁର୍ବୁତ୍ତ ବୋଲି ଗତକାଲିର "ସାମ୍ବାଦିକ ସମ୍ମିଳନୀରେ" କହିବା ବିଜୁ ଜନତା ଦଳର ରାଜନୈତିକ ଦେବାଳିଆ ପଣକୁ ସ୍ପଷ୍ଟ ଇଙ୍ଗିତ କରୁଛି । ଗତ ଜୁଲାଇ ୨୯ ତାରିଖ ଅପରାହ୍ନ ୪ ଘଣ୍ଟ ସମୟରେ ଏକ କାର୍ ଅତି ଦୃତ ଗତିରେ ଆଇନଜୀବୀ ଅଜିତ୍ କରଙ୍କ ମାଁ, ଯିଏ କି ନିଜ ଘର ସମ୍ମୁଖରେ ଛିଡ଼ା ହୋଇଥିଲେ ତାଙ୍କ ଉପରକୁ ମାଡ଼ି ଆସିବାରୁ ସେ ଉକ୍ତ କାର୍ ଧକ୍କାରେ ଛିଟିକି ପଡିଗଲେ । ଏହି ଘଟଣାକୁ ନେଇ ଆଇନଜୀବୀ ଅଜିତ୍ କର ଓ ତାଙ୍କ ମାଁ ନନ୍ଦିନୀ କର ପ୍ରତିବାଦ କରିବାରୁ କାର୍ ରେ ବସିଥିବା ଚାରି ଜଣ ବ୍ୟକ୍ତି ଓ ପଛରେ ଅନ୍ୟ ଏକ କାର୍ ରେ ବସିଥ‌ିବା ଛଅ ଜଣ ମହିଳା ମିଶି ଆଇନଜୀବି ଅଜିତ୍ କର ଓ ତାଙ୍କ ମାଁଙ୍କୁ ଆକ୍ରମଣ କରିଥିଲେ, ଯାହାକି ସ୍ଥାନୀୟ ଗୋଳନ୍ଥରା ଥାନାରେ ଏତଲା ମଧ୍ୟ ହୋଇଛି । ଘଟଣାର ପରବର୍ତି ପର୍ଯ୍ୟାୟରେ ସ୍ଥାନୀୟ ଓ ରାସ୍ତାରେ ଯାଉ ଥିବା ଲୋକମାନେ ଏକାଠି ହୋଇ ଏହାର ପ୍ରତିବାଦ କରିଥିଲେ । ଯାହା ଫଳରେ ଜଣେ ଯୁବକ ଆହତ ହୋଇଥିବା ଥାନାରେ ମଧ୍ୟ ଅଭିଯୋଗ ହୋଇଛି । ଅପରାଧୀଙ୍କୁ ଗତ ଚବିଶ ବର୍ଷ ଧରି ଯେଉଁ ମାନେ ସୁରକ୍ଷା ଦେଇଥିଲେ, ଗତ ନିର୍ବାଚନ ସମୟରେ ରକ୍ତମୁଖା ହୋଇ ବିଜେପି କର୍ମୀ ମାନଙ୍କୁ ମରଣାନ୍ତକ ଆକ୍ରମଣ କରିବା ଘଟଣା ଜିଲ୍ଲାବାସୀ ଭୁଲି ନାହାଁନ୍ତି । ଲୋଚାପଡ଼ା, ହୁଗୁଳାପଟା, କନିସି, ଗୋଳନ୍ଥରା ଗାଁ ମାନଙ୍କରେ ସଶସ୍ତ୍ର ବିଜେଡ଼ି ନେତା ଓ କର୍ମୀ ମାନଙ୍କର ଆକ୍ରମଣ ଘଟଣା ଗୋପାଳପୁରବାସୀ ତଥା ଜିଲ୍ଲାବାସୀ ମନେ ରଖିଛନ୍ତି । ଏହି ପରୀପ୍ରେକ୍ଷୀରେ ମାନ୍ୟବର ମନ୍ତ୍ରୀଙ୍କ ଉପରେ ଯେଉଁ କଟୁ ମନ୍ତବ୍ୟ ବିଜେଡ଼ି ନେତା ମାନେ ଦେଇଛନ୍ତି ତାକୁ ଦଳ ପକ୍ଷରୁ ଦୃଢ଼ ନିନ୍ଦା କରାଯାଇଛି । ସୂର୍ଯ୍ୟ ଯେପରି ସ୍ବଚ୍ଚ ଓ ନିର୍ମଳ, ମାନ୍ୟବର ମନ୍ତ୍ରୀ ସେହିପରି ସ୍ବଚ୍ଚ ନିର୍ମଳ । ରାଜ୍ୟରେ ମୋହନ ମାଝୀ ସରକାରଙ୍କ ଜନମୁଖି କାର୍ଯ୍ୟକୁ ସହ୍ୟ ନ କରି ପାରି ଓ ଗତ ନିର୍ବାଚନରେ ପରାଜୟର ଗ୍ଲାନିକୁ ଭୁଲି ନ ପାରି ବିଜୁ ଜନତା ଦଳର ନେତା ମାନେ ଔଷଧ ବିକଳରେ ତାଟିଆ କାମୁଡୁଛନ୍ତି ବୋଲି ବରିଷ୍ଠ ନେତା ପୀତବାସ ପଣ୍ଡା କହିଛନ୍ତି । ଏହା ସହ କିଛି ଘଟଣାକୁ ଅତିରଞ୍ଜିତ କରି ସାଧାରଣ ଲୋକଙ୍କୁ ଭୁଆଁ ବୁଲେଇବାକୁ ବିଜେଡ଼ି ନେତା ଚେଷ୍ଟା କରୁଛନ୍ତି, ସେମାନେ ଏଥିରେ କେବେ ହେଲେ ସଫଳ ହେବେ ନାହିଁ ବୋଲି ଦଳ ପକ୍ଷରୁ କୁହାଯାଇଛି ।

ଗୋଳନ୍ଥରା ସ୍ଥିତ ବନ୍ଦେ ମାତରଂ ଭବନ ନିକଟରେ ଗଣ୍ଡଗୋଳ ହୋଇଥିବା ଘଟଣା ମଧ୍ଯ ସମ୍ପୂର୍ଣ୍ଣ ମିଥ୍ୟା ଅଟେ ଏବଂ ଗଞ୍ଜାମ ଓକିଲ ସଂଘ ଅଭିଯୁକ୍ତ ମାନଙ୍କ ପାଇଁ ନ ଲଢ଼ିବା କଥା ଯେଉଁ ବିଜୁ ଜନତା ଦଳ ପକ୍ଷରୁ ପ୍ରେସ୍ ନୋଟରେ କୁହା ଯାଇଛି ସେଥିରେ ମଧ୍ୟ କୌଣସି ସତ୍ୟତା ନାହିଁ ବରଂ ଏହି ଘଟଣାରେ ଦୁଇ ଜଣ ଯୁବ ଆଇନଜୀବୀଙ୍କୁ ମିଥ୍ୟାରେ ସଂପୃକ୍ତି କରାଯାଇଛି । ବିଜୁ ଜନତା ଦଳ ତାଙ୍କ ନିଜର ଅନ୍ତର୍କଦଳ ଲୁଚାଇବାକୁ ଯାଇ ଏଭଳି ମିଥ୍ୟା ଆରୋପ କରୁଛି । ଏଣୁ ବିଜୁ ଜନତା ଦଳର ନେତା ମାନେ ସତ୍ୟକୁ କେତେ ବିଦ୍ରୁପ କଲେ ମଧ୍ୟ ଏଥିରେ ସଫଳ ହୋଇପାରିବେ ନାହିଁ ବୋଲି ବିଜେପି ରାଷ୍ଟ୍ରୀୟ ପରିଷଦ ସଭ୍ୟ କାହ୍ନୁ ଚରଣ ପତି କହିଛନ୍ତି । ଆଜିର ଏହି "ସାମ୍ବାଦିକ ସମ୍ମିଳନୀକୁ' ରାଜ୍ୟ ଯୁବମୋର୍ଚ୍ଚା ସମ୍ପାଦକ ତୁତୁନ୍ ପାତ୍ର,ଜିଲ୍ଲା ଯୁବମୋର୍ଚ୍ଚା ସଭାପତି ଶିବ ଶଙ୍କର ନାୟକ,ଜିଲ୍ଲା ଓବିସି ମୋର୍ଚ୍ଚା ସଭାପତି ମଦନ ମୋହନ ପାତ୍ର ପ୍ରମୁଖ ଉପସ୍ଥିତ ରହି ପରିଚାଳନାରେ ସହଯୋଗ କରିଥିଲେ ।

ବ୍ରହ୍ମପୁର( ଦ କୁଇଭର ):- ଦୁଷ୍କର୍ମର ଶୀକାର ହୋଇଥିବା ନାବାଳିକା ଜଣକ ନିଜ ପରିବାର ସହ ଦୀର୍ଘ ୧୪ ବର୍ଷ ଧରି ମୁମ୍ୱାଇରେ ରହିଆସୁଛନ୍ତି । ଗତ ମାର୍ଚ୍ଚ ମାସରେ ଯୁବକ ଜଣକ ନିଜ ଘରକୁ ନେଇ ଦୁଷ୍କର୍ମ କରିଥିବା ଅଭିଯୋଗ ହୋଇଛି । ଦୁଷ୍କର୍ମକାରୀ ଯୁବକ ଜଣକ ନାବାଳିକାକୁ ଧମକ ଦେବା ସହ ଘଟଣା ପ୍ରଘଟ କଲେ ହତ୍ୟା ଧମକ ଦେଉଥିଲା । ଏନେଇ ନାବାଳିକା ଜଣକ ଚୁପ ହୋଇ ରହିଥିଲେ । ପରେ ଗର୍ଭବତୀ ହେବା ପରେ ଘଟଣା ସମ୍ପର୍କରେ ପରିବାର ଲୋକଙ୍କୁ ଅବଗତ କରିଥିଲେ ନାବାଳିକ । ସେପଟେ ନାବାଳିକର ପରିବାର ଲୋକେ ସଂପୃକ୍ତ ଯୁବକର ପରିବାର ଲୋକଙ୍କୁ ପଚାରିବାରୁ ପୁଣି ଧମକ ମିଳଥିଲା । ଏପରିକି ନାବାଳିକାର ଗର୍ଭପାତ କରିବା ଲାଗି ବିଭିନ୍ନ ଔଷଧ ମଧ୍ୟ ଦେଇଥିଲେ । ତାଙ୍କ ନିଜ ଘର ଗଞ୍ଜାମ ହୋଇଥିବାରୁ ପରିବାର ଲୋକେ ନାବାଳିକାଙ୍କୁ ବ୍ରହ୍ମପୁର ଏମକେସିଜି ମେଡିକାଲକୁ ଆଣି ଗର୍ଭପାତ କରିବା ଲାଗି ଭର୍ତ୍ତି କରିଥିଲେ ।

ମେଡିକାଲର ସ୍ତ୍ରୀ ଓ ପ୍ରସୂତୀ ବିଭାଗରେ ଭର୍ତ୍ତି ହୋଇଥିବା ବେଳେ ନାବାଳିକା ଜଣକ ଗର୍ଭବତୀ ଥିବା ନେଇ ମେଡିକାଲ ପକ୍ଷରୁ ଏମଏଲସି (ମେଡିକୋ ଲିଗାଲ କପ୍ଲେନ) ବ୍ରହ୍ମପୁର ବୈଦ୍ୟନାଥପୁର ଥାନାରେ କରାଯାଇଥିଲା । ଏହି ଅଭିଯୋଗ ପାଇବା ପରେ ପୋଲିସ ତୁରନ୍ତ ମେଡିକାଲରେ ପହଞ୍ଚି ତଦନ୍ତ କରିବା ସହ ଘଟଣା ସମ୍ପର୍କରେ ଜାଣିବାକୁ ପାଇଥିଲା । ଏନେଇ ବୈଦ୍ୟନାଥପୁର ଥାନା ପୋଲିସ ଏଫଆଇଆର ରୁଜୁ କରିଥିଲା । ମାମଲା ରୁଜୁ କରି ମହାରାଷ୍ଟ୍ରର ପାର୍କ ସାଇଟ ଥାନାକୁ ସ୍ଥାନାନ୍ତର କରିଥିଲା । ଫଳରେ ଦୁଷ୍କର୍ମକାରୀ ଯୁବକ ପ୍ରଥମେଶ ସଞ୍ଜୟ ଥୋରାଟକୁ ଗିରଫ କରି କୋର୍ଟ ଚାଲାଣ କରିଛି ପୋଲିସ । ନାବାଳିକା ଜଣଙ୍କୁ ବ୍ରହ୍ମପୁର ଶିଶୁ ସୁରକ୍ଷା କମିଟିକୁ ପଠାଇବା ସହ ତାର ଥଇଥାନ ସହ ଆର୍ଥିକ ସହାୟତା ଓ ପ୍ରତ୍ୟେକ ମେଡିକାଲ ଚେକ ଅପ୍ କରିବା ଲାଗି କୁହାଯାଇଛି ।

ଦ କୁଇଭର ବ୍ୟୁରୋ :- ନିବେଶ ଓ ନିଯୁକ୍ତି ଉପରେ ଗୁରୁତ୍ୱ ଦେଉଛନ୍ତି ମୋହନ ସରକାର । ଏହି କ୍ରମରେ ଖୁବଶୀଘ୍ର ପୂରଣ ହେବ ୨୨ ହଜାର ୮୯୬ ପଦବୀ । ୧୦ଟି ବିଭାଗର ଗ୍ରୁପ ସି'ର ଏହି ପଦବୀ ପୂରଣ କରିବା ପାଇଁ ମୁଖ୍ୟ ଶାସନ ସଚିବ ମନୋଜ ଆହୁଜା ନିର୍ଦ୍ଦେଶ ଦେଇଛନ୍ତି । ଅଗଷ୍ଟ ୩୧ ସୁଦ୍ଧା ନିଯୁକ୍ତି ପକ୍ରିୟା ସାରିବାକୁ ନିର୍ଦ୍ଦେଶ ଦେଇଛନ୍ତି ମୁଖ୍ୟ ଶାସନ ସଚିବ । ଓଡିଶା ସରକାରରେ ପ୍ରାୟ ୪ ଲକ୍ଷ ମଞ୍ଜୁରୀ ପ୍ରାପ୍ତ ପଦ ରହିଛି । ସେଥିରୁ ପ୍ରାୟ ଲକ୍ଷେ ପଦ ବିଭିନ୍ନ ବିଭାଗରେ ଫାଙ୍କା ପଡ଼ିଛି । ଫାଙ୍କା ରହିଥିବା ପଦ ପୂରଣ କରିବା ପାଇଁ ମୋହନ ସରକାର ଅଣ୍ଟା ଭିଡ଼ିଛନ୍ତି । ୨ ବର୍ଷ ମଧ୍ୟରେ ୬୫ ହଜାର ପଦ ପୂରଣ କରିବା ପାଇଁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଘୋଷଣା କରିଛନ୍ତି । ସେଥିମଧ୍ୟରୁ ବିଭିନ୍ନ ବିଭାଗରେ ୨୮୩୯୨ ପଦରେ ସିଧାସଳଖ ନିଯୁକ୍ତି ଜୁନ ମାସ ସୁଦ୍ଧା ହୋଇଛି । ରାଜ୍ୟ ସରକାରଙ୍କ କ୍ଷମତା ସଂପନ୍ନ କମିଟି ଫାଙ୍କା ଥିବା ଗ୍ରୁପ 'ସି' ୨୫୯୫୩ ପଦ ପୂରଣ ପାଇଁ ଅନୁମୋଦନ ଦେଇଛନ୍ତି । ଅନୁମୋଦିତ ଗ୍ରୁପ 'ସି' ୨୫୯୫୩ ପଦ ମଧ୍ୟରୁ ୧୦ ବିଭାଗରେ ୨୨ ହଜାର ୮୯୬ ପଦବୀ ଫାଙ୍କା ଅଛି । ଚଳିତ ମାସ ଶେଷ ସୁଦ୍ଧା ନିଯୁକ୍ତି ପକ୍ରିୟା ସାରିବାକୁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଛନ୍ତି । ୧୦ ବିଭାଗରେ ୪୪ ହଜାର ୯୦୯ ପଦବୀ ଖାଲି ପଡ଼ିଥିବା ବେଳେ ୨୨ ହଜାର ୮୯୬ ପଦବୀ ପୂରଣ ପାଇଁ ବିଭାଗ ଗୁଡିକୁ ନିର୍ଦ୍ଦେଶ ଦେଇଛନ୍ତି ମୁଖ୍ୟ ଶାସନ ସଚିବ । ବିଦ୍ୟାଳୟ ଓ ଗଣଶିକ୍ଷ ବିଭାଗରେ ସର୍ବାଧିକ ୮ ହଜାର ୩୫୮ ପଦବୀ ପୂରଣ କରିବା ପାଇଁ ଅନୁମତି ମିଳିଛି । ଦ୍ଵିତୀୟରେ ପଂଚାୟତିରାଜ ଏବଂ ପାନୀୟ ଜଳ ବିଭାଗ ରହିଛି । ଏହି ବିଭାଗରେ ୪ ହଜାର ୪୨ ପଦବୀ ପୂରଣ ହେବ । ସ୍ୱାସ୍ଥ୍ୟ ବିଭାଗର ୩ ହଜାର ୬୭୭ ପଦବୀ ପୂରଣ ହେବ । କୃଷି ବିଭାଗରେ ୧୪୬୯ ପଦବୀ ପୂରଣ କରାଯିବ । ରାଜସ୍ୱ ଏବଂ ବିପର୍ଯ୍ୟୟ ପରିଚାଳନା ବିଭାଗରେ ୧୩୭୧, ଖାଦ୍ୟ ଯୋଗାଣ ଏବଂ ଖାଉଟି କଲ୍ୟାଣ ବିଭାଗରେ ୧୧୯୩, ମତ୍ସ୍ୟ ଏବଂ ପଶୁ ସମ୍ପଦ ବିଭାଗରେ ୮୮୮, ଉଚ୍ଚଶିକ୍ଷା ବିଭାଗରେ ୮୬୭, ଅନୁସୂଚିତ ଜନଜାତି ଓ ଅନୁସୂଚିତ ଜାତି ଉନ୍ନୟନ, ସଂଖ୍ୟାଲଘୁ ଓ ପଛୁଆ ବର୍ଗ କଲ୍ୟାଣ ବିଭାଗରେ ୫୨୬ ଓ ଗୃହ ବିଭାଗରେ ୫୦୫ ପଦବୀ ପୂରଣ କରାଯିବ ।

ବ୍ରହ୍ମପୁର( ଦ କୁଇଭର ):- ଦିନକୁ ଦିନ ସୋସିଆଲ ମିଡ଼ିଆର କ୍ରେଜ ଯେଉଁ ମାତ୍ରାରେ ବଢ଼ି ଚାଲିଛି, ଲୋକମାନେ ମଧ୍ୟ ସେତିକି ମାତ୍ରାରେ ଅଧିକ ବୁଦ୍ଧି ଖଟେଇ ନିଜକୁ ଚତୁର ବୋଲି ଭାବିଦିଅନ୍ତି କିନ୍ତୁ ସେମାନେ ଭୁଲିଯାନ୍ତି,ଆଇନ - ନା କେଉଁ ଅଭିଯୁକ୍ତକୁ କାହାକୁ ଛାଡ଼ିଛି ନା ଆଗକୁ କାହାକୁ ଛାଡିବ l ଆମେ କହୁଛୁ ବ୍ରହ୍ମପୁର ଅଂଚଳରେ ଘଟିଥିବା ଏକ ସମ୍ବେଦନଶୀଳ ଘଟଣା କଥା l ବ୍ରହ୍ମପୁର ସାଇବର ଅପରାଧ ଏବଂ ଅର୍ଥନୈତିକ ଅପରାଧ ପୋଲିସ ଦ୍ୱାରା ଜଣେ ଯୁବକଙ୍କୁ ଗିରଫ କରାଯାଇଛି l ଜଣେ ମହିଳାଙ୍କ ନାମରେ ନକଲି ଫେସବୁକ୍ ଆକାଉଣ୍ଟ କରି ସମାଜରେ ତାଙ୍କ ପ୍ରତିଷ୍ଠାକୁ କ୍ଷତି ପହଞ୍ଚାଇବା ଉଦ୍ଦେଶ୍ୟରେ ସେହି ଫେସବୁକ୍ ଏବଂ ଇନଷ୍ଟାଗ୍ରାମ ଆକାଉଣ୍ଟରେ ଅଶ୍ଳୀଳ ଏବଂ ଅଶ୍ଳୀଳ ବିଷୟବସ୍ତୁ ପୋଷ୍ଟ କରିବା ଅଭିଯୋଗରେ ଜଣେ ଅଭିଯୁକ୍ତକୁ ଗିରଫ କରିଛି ପୋଲିସ l ଗତ ୧ ଅଗଷ୍ଟ ତାରିଖରେ ଗୋପାଳପୁର ଅଞ୍ଚଳର ଜଣେ ୨୮ ବର୍ଷୀୟା ମହିଳା ଅଭିଯୋଗ କରିଥିଲେ ଯେ ତାଙ୍କ ନାମରେ କେହି ଜଣେ ନକଲି ଫେସବୁକ୍ ଏବଂ ଇନଷ୍ଟାଗ୍ରାମ ପ୍ରୋଫାଇଲ୍ ତିଆରି କରିଛନ୍ତି ଏବଂ ହ୍ୟାଣ୍ଡେଲ ମଣିଷ ଜଣକ ସେଥିରେ ବିଭିନ୍ନ ପ୍ରକାର ଆପତ୍ତିଜନକ ପୋଷ୍ଟ କରୁଛି ଯାହା ସମାଜରେ ତାଙ୍କ ପ୍ରତିଷ୍ଠାକୁ କ୍ଷତି ପହଞ୍ଚାଉଛି। ତେବେ ମହିଳା ପୀଡ଼ିତାଙ୍କ ଅଭିଯୋଗ କୁ ଭିତ୍ତି କରି ମାମଲା ରୁଜୁ ହୋଇଥିଲା ଏବଂ ତଦନ୍ତ ସମୟରେ, ସାଇବର କ୍ରାଇମ୍ ପୋଲିସ ଦଳ ଅଭିଯୁକ୍ତ ବ୍ୟକ୍ତିଙ୍କୁ ଚିହ୍ନଟ କରିବାରେ ସଫଳ ହେବା ସହ ମଙ୍ଗଳବାର ଗିରଫ କରି କୋର୍ଟ ଚାଲାଣ କରିଥିବା ସୂଚନା ମିଳିଛି l

ଅଭିଯୁକ୍ତ ଜଣକ ବଣ୍ଟୁ ପରିଡା, ବୟସ ୨୮ ଏବଂ ସେ କବିସୂର୍ଯ୍ୟନଗର ନଗର ଥାନା ଅଧୀନ ନନ୍ଦିଆଗଡ଼ ଗ୍ରାମର ବୋଲି ଜଣାପଡିଛି l ଅଭିଯୁକ୍ତ ଏବଂ ପୀଡିତା ଉଭୟ ପୂର୍ବରୁ ବନ୍ଧୁ ଥିଲେ ଏବଂ ୨୦୧୫ ରୁ ପୀଡିତାଙ୍କୁ ପିଛା କରୁଥିଲେ କିନ୍ତୁ ପୀଡିତା ଏବଂ ପୀଡିତାଙ୍କ ପରିବାର ପୋଲିସକୁ ଖବର ଦେଇ ନଥିଲେ, ବର୍ତ୍ତମାନ ଯେତେବେଳେ ତାଙ୍କ ପ୍ରତିଷ୍ଠା ଉପରେ ପ୍ରଭାବ ପଡିଲା ସେ ବାଧ୍ୟ ହୋଈ ଆଇନର ଆଶ୍ରୟ ନେବା ଜଣାପଡିଛି l ତେବେ ଅଭିଯୁକ୍ତ ଗିରଫ ପରେ ଗୋଟିଏ poco x6 NEO ମୋବାଇଲ ଜବତ କରିଥିବା ପୋଲିସ ପକ୍ଷରୁ ସୂଚନା ଦେଇଛି l

ଦ କୁଇଭର ବ୍ୟୁରୋ :- ଏଣିକି ରାଜ୍ୟରେ ଆଉ ହୋଇପାରିବନି ଗୋହତ୍ୟା । ଲୁଚା ଚୋରା ଯାହା ସବୁ ଚାଲିଥିଲା ସେସବୁ ମଧ୍ୟ ସମ୍ପୂର୍ଣ ବନ୍ଦ ହେବ l ରାଜ୍ୟରେ ଗୋଚାଲାଣ ଓ ଗୋହତ୍ୟା ଭଳି ଅପରାଧ ଦିନକୁ ଦିନ ବଢ଼ିଚାଲିଥିଲା । ପ୍ରତିଦିନ କେଉଁଠି ନା କେଉଁଠି ଗୋଚାଲାଣ ବେଳେ ଗାଡ଼ି ଧରାପଡ଼ୁଥିଲା । ଆଉ କେଉଁଠି କେଉଁଠି ତ ଗୋମାଂସ ଚୋରା ଚାଲାଣ ବେଳେ ଗାଡ଼ି ଧରାପଡ଼ିଥିବାର ନଜିର ରହିଛି । ଏହି ସବୁକୁ ରୋକିବା ପାଇଁ ଅନେକ ସମାଜସେବୀ ଏବଂ ସାଧାରଣ ଲୋକ ନିବେଦନ କରିଆସୁଥିଲେ, କିନ୍ତୁ ସରକାର ଏହା ଉପରେ କୌଣସି ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ନେଉନଥିଲେ । ଆଜି ଏହି ହାଇକୋର୍ଟ ଏ ସବୁକୁ ରୋକିବା ପାଇଁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି । ଓଡ଼ିଶା ପ୍ରିଭେନସନ୍ ଅଫ୍ କାଓ ସ୍ଲଟର ଆକ୍ଟ ୧୯୬୦ କଡ଼ାକଡ଼ି ପାଳନ କରିବାକୁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି ହାଇକୋର୍ଟ । ଜନସ୍ବାର୍ଥ ମାମଲାର ଶୁଣାଣି କରି ହାଇକୋର୍ଟ ଏହି ନିର୍ଦ୍ଦେଶ ଦେଇଛନ୍ତି । ଆଉ ହାଇକୋର୍ଟଙ୍କ ଏହି ନିର୍ଦ୍ଦେଶକୁ ସବୁଠି ସ୍ବାଗତ କରାଯାଇଛି l

ଦ କୁଇଭର ବ୍ୟୁରୋ :- ଗୁରୁବାର ରାତିରେ ଚିକିଟି ଧାନଘର ରୋଡ଼ ସ୍ଥିତ ଏକ ଘରେ ଚାଲିଥିବା ଜୁଆ ଆଡ୍ଡା ଉପରେ ଚିକିଟିଫାଣ୍ଡି ପୁଲିସ ଚଢାଉ କରି ୭ଜଣ ଜୁଆଡ଼ିଙ୍କୁ କାବୁ କରିଥିବା ସୂଚନା । ଜୁଆ ଆଡ୍ଡାରୁ ପୁଲିସ ୬୧ ହଜାର ୨୭୦ ଟଙ୍କା ସହ ତାସ କାଟା ଜବତ କରିଥିବା ଜଣାପଡ଼ିଛି । ଫାଣ୍ଡି ଅଧିକାରୀ ଗୌତମ ସାହୁ ଦାୟିତ୍ଵ ଗ୍ରହଣ କରିବା ପରେ ଅଞ୍ଚଳରେ କଡାକଡି ପେଟ୍ରୋଲିଂ ହେଉଥିବା ସ୍ଥାନୀୟ ଅଞ୍ଚଳରେ ଆଲୋଚନା ହେଉଛି ।

ବ୍ରହ୍ମପୁର( ଦ କୁଇଭର ):- ବ୍ରହ୍ମପୁର ବଡ଼ବଜାର ଥାନା ଅନ୍ତର୍ଗତ ରଙ୍ଗୁଣୀବନ୍ଧ ସାହି ନିକଟରେ ଥିବା ଶାସ୍ତ୍ରୀ ନଗରର ଏସ. ରୁନା ଅଚାରୀ ନାମଙ୍କ ଜଣେ ବ୍ୟକ୍ତିଙ୍କୁ ଗୁଳିମାଡ଼ ହୋଇଥିବା ଜଣାପଡିଛି। ଆହତ ବ୍ୟକ୍ତିମାନଙ୍କୁ ଏମକେସିଜି ମେଡ଼ିକାଲରେ ଚିକିତ୍ସା ନିମନ୍ତେ ଭର୍ତ୍ତି କରାଯାଇଛି। ରୁନା ନିଜ ଘରେ ଥିବା ସମୟରେ କିଛି ବ୍ୟକ୍ତି ଘରେ ପଶି ତାଙ୍କୁ ଗୁଳିମାଡ଼ କରିଥିବା ଜଣାପଡିଛି। ମେଡିକାଲରେ ବ୍ରହ୍ମପୁର ଆରକ୍ଷୀ ଅଧିକ୍ଷକ ଡ଼ା ଶ୍ରବଣ ବିବେକ ଏମ ପହଞ୍ଚି ସ୍ଥିତି ଅନୁଧ୍ୟାନ କରୁଥିବା ଜଣାପଡିଛି l