ବିହାରରେ କିଏ ଗଢ଼ିବ ସରକାର

ଦ କୁଇଭର ବ୍ୟୁରୋ :- ବିହାର ବିଧାନସଭା ନିର୍ବାଚନର ଦ୍ୱିତୀୟ ପର୍ଯ୍ୟାୟରେ ୨୦ଟି ଜିଲ୍ଲାର ୧୨୨ଟି ବିଧାନସଭା ଆସନ ପାଇଁ ମତଦାନ ଚାଲିଛି । ଦ୍ୱିତୀୟ ପର୍ଯ୍ୟାୟରେ ୧୨୨ଟି ଆସନ ପାଇଁ ୧୩୦୨ ଜଣ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଛନ୍ତି । ୩ କୋଟି ୭୦ ଲକ୍ଷରୁ ଅଧିକ ଭୋଟର ଇଲେକ୍ଟ୍ରୋନିକ୍ ଭୋଟିଂ ମେସିନ୍ (ଇଭିଏମ୍) ରେ ସେମାନଙ୍କ ରାୟ ରେକର୍ଡ କରୁଛନ୍ତି । ନିର୍ବାଚନ ଫଳାଫଳ ନଭେମ୍ବର ୧୪ରେ ଆସିବ, କିନ୍ତୁ ଏହା ପୂର୍ବରୁ ଏକଜିଟ୍ ପୋଲ୍‌ର ଆକଳନ କିଛି ସମୟ ମଧ୍ୟରେ ଆସିବ । ବିହାରରେ ନୀତୀଶ କୁମାରଙ୍କ ନେତୃତ୍ୱରେ ଏନଡିଏ ସରକାର ଅଛି । ୨୦୦୫ରୁ ୨୦୨୦ ପର୍ଯ୍ୟନ୍ତ, ପ୍ରତ୍ୟେକ ବିଧାନସଭା ନିର୍ବାଚନରେ ନୀତୀଶ କୁମାରଙ୍କ ନେତୃତ୍ୱରେ ଥିବା ମେଣ୍ଟ ହିଁ ଜିତିଥିଲା । ୨୦୧୫ ନିର୍ବାଚନରେ ମହାମେଣ୍ଟ ଜିତିଥିଲା, ସେତେବେଳେ ନୀତୀଶ କୁମାରଙ୍କ ନେତୃତ୍ୱରେ ଥିବା ଜନତା ଦଳ (ୟୁନାଇଟେଡ୍) ମଧ୍ୟ ଏହାର ଅଂଶ ଥିଲା । ଏଥର ନିର୍ବାଚନରେ ମୁଖ୍ୟ ପ୍ରତିଯୋଗିତା ଶାସକ ଏନଡିଏ ଏବଂ ବିରୋଧୀ ମହାମେଣ୍ଟ ମଧ୍ୟରେ ବୋଲି ବିବେଚନା କରାଯାଉଛି । ରାଜନୀତି ରଣନୀତିଜ୍ଞରୁ ରାଜନେତା ପାଲଟିଥିବା ପ୍ରଶାନ୍ତ କିଶୋରଙ୍କ ପାର୍ଟି ଜନ ସୁରାଜ, ଅସଦୁଦ୍ଦିନ ଓଓ୍ୱେସିଙ୍କ ଏଆଇଏମଆଇଏମ ନିର୍ବାଚନୀ ଲଢେଇକୁ ବହୁକୋଣୀୟ କରିବାକୁ ଚେଷ୍ଟା କରିଥିଲେ । ଏଥର ଏନଡିଏ ମହାମେଣ୍ଟ ସହିତ ପିକେଙ୍କ ପାର୍ଟିଠାରୁ ମଧ୍ୟ କଡା ଟକ୍କର ପାଉଛି । ବିହାର ବିଧାନସଭାରେ ମୋଟ ୨୪୩ଟି ଆସନ ଅଛି ଏବଂ ସେଥିମଧ୍ୟରୁ ୧୨୧ଟି ଆସନ ପାଇଁ ପ୍ରଥମ ପର୍ଯ୍ୟାୟରେ ନଭେମ୍ବର ୬ରେ ଭୋଟ୍ ଗ୍ରହଣ କରାଯାଇଥିଲା । ପ୍ରଥମ ପର୍ଯ୍ୟାୟରେ ୬୫ ପ୍ରତିଶତରୁ ଅଧିକ ମତଦାନ ହୋଇଥିଲା