ଭାରତ ଉପରେ ଟ୍ରମ୍ପଙ୍କ ଡବଲ ମାଡ଼

ଦ କୁଇଭର ବ୍ୟୁରୋ :- ଭାରତ ଉପରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଡବଲ ମାଡ଼ ବାଜିଛି । ଟ୍ରମ୍ପ ଭାରତ ଉପରେ ଆମେରିକାର ରପ୍ତାନୀ ଶୁଳ୍କକୁ ୫୦ ପ୍ରତିଶତ ବଢ଼ାଇ ଦେଇଛନ୍ତି । ଋଷ ସହ ବେପାର ବନ୍ଦ ନକରିବା ଯାଏ ଆମେରିକା ସେମିତି କଠୋର ହେବ ବୋଲି କହିଛନ୍ତି ଟ୍ରମ୍ପ । ପୂର୍ବରୁ ଏହି ଶୁଳ୍କକୁ ୨୫ ପ୍ରତିଶତ କରିଥିଲେ । ମାତ୍ର ଏବେ ଏହାକୁ ୫୦ ପ୍ରତିଶତ କରିଛନ୍ତି । ଆହୁରି ବଢ଼ିବ ବୋଲି ବି ଚେତାବନୀ ଦେଇଛନ୍ତି ଟ୍ରମ୍ପ । ଋଷ ସହ ସମ୍ପର୍କ ରଖିଥିବା ଅନେକ ଦେଶ ଉପରେ ଆମେରିକା ତାର ଶୁଳ୍କ ମାଡ଼ ଜାରି ରଖିଛି । ବ୍ରାଜିଲ ଉପରେ ମଧ୍ୟ ୫୦ ପ୍ରତିଶତ ଶୁଳ୍କ ଲାଗୁ କରିଛି ।

ଆମେରିକାର ଏହି ତାରିଫ ମାଡ଼ ଫଳରେ ଆଜି ସେୟାର ବଜାରରେ ବେଶ ପ୍ରଭାବ ପଡ଼ିଛି । ସେୟାର ବଜାରରେ ପ୍ରାୟ ୨୪୩ ପଏଣ୍ଟ ହ୍ରାସ ହୋଇଛି । କେବଳ ସେତିକି ନୁହେଁ, ବଜାର ଉପରେ ଏହାର ପ୍ରଭାବ ପଡ଼ୁଛି । ଆମେରିକାକୁ ଯିବାକୁ ଥିବା ଅନେକ ସାମଗ୍ରୀ ଏବେ ପଡ଼ି ରହିଛି । ଏଭଳି ସ୍ଥିତି ପୂରା ଦେଶକୁ ଚିନ୍ତାରେ ପକାଇ ଦେଇଛି । ଦେଶର ବେପାର ବଜାର ଉପରେ ବଡ଼ ପ୍ରଭାବ ପଡ଼ିଛି । 

ଆମେରିକା ଭାରତ ଉପରେ କଡ଼ା ପଦକ୍ଷେପ ନେଉଛି । ବାରମ୍ବାର ତାରିଫ ବଢ଼ାଉଛି । ଅପରେସନ ସିନ୍ଦୁର ପର ଠାରୁ ଭାରତ ଉପରେ ଆମେରିକା ଦାଉ ସାଧୁଛି । ପ୍ରତି କ୍ଷେତ୍ରରେ ଭାରତର ଶତ୍ରୁ ମାନଙ୍କୁ ସହାୟତା କରୁଛି ଓ ଭାରତ ଉପରେ କଟକଣା ଲଗାଉଛି । ଆପଲକୁ ଭାରତକୁ ନଆସିବା ପାଇଁ କହିଥିଲେ ଟ୍ରମ୍ପ । ଭାରତକୁ ଋଷରୁ ତେଲ କିଣା ବନ୍ଦ କରିବାକୁ କହିଥିଲେ । ମାତ୍ର ଭାରତ ତାହାକୁ ଗ୍ରହଣ ନକରିବାରୁ ଏବେ ତାରିଫ ମାଡ଼ ଆରମ୍ଭ କରିଛନ୍ତି । ଦୁଇଟି କିସ୍ତିରେ ତାରିଫକୁ ୫୦ପ୍ରତିଶତ ବଢ଼ାଇଛନ୍ତି ଟ୍ରମ୍ପ ।

ଆମେରିକା ଯଦି ତାର ତାରିଫକୁ ଏହି ପରି ବୃଦ୍ଧି କରି ରଖିବ, ତେବେ ଭାରତର ଜିଡିପି(ଗ୍ରସ ଡୋମେଷ୍ଟିକ ପ୍ରଡକ୍ଟ)ଉପରେ ୦.୪ ପ୍ରତିଶତ ପ୍ରଭାବ ପକାଇବ । ଯାହା ଅର୍ଥନୀତି ଉପରେ ମଧ୍ୟ ମାଡ଼ ହେବ ବୋଲି ଅର୍ଥନୈତିକ ବିଷାରଦମାନେ କହିଲେଣି । ଆମେରିକାର ଏପରି ଆଭିମୁଖ୍ୟକୁ ବିରୋଧୀ କଂଗ୍ରେସ ବି ଘୋର ନିନ୍ଦା କରିଛି । ଟ୍ରମ୍ପଙ୍କୁ ସିଧା ସଳଖ ସମାଲୋଚନା କରିଛନ୍ତି ଲୋକସଭାର ବିରୋଧୀ ଦଳ ନେତା ରାହୁଲ ଗାନ୍ଧୀ । ସେ କହିଛନ୍ତି ଏହା ଟ୍ରମ୍ପଙ୍କ ସ୍ୱେଚ୍ଛାଚାରିତା । ବିଶ୍ୱ ବାଣିଜ୍ୟ ନିୟମର ଖୋଲା ଉଲ୍ଲଙ୍ଘନ । ରାହୁଲଙ୍କ ବ୍ୟତୀତ କଂଗ୍ରେସ ଏମପି ଶଶୀ ଥରୁର ବି ଏହାକୁ କଡ଼ା ସମାଲୋଚନା କରି ଆମେରିକାକୁ ନିନ୍ଦା କରିଛନ୍ତି ।

ଏଭଳି ବାଦ ବିବାଦ ମଧ୍ୟରେ ଭାରତ ରପ୍ତାନୀ ଶିଳ୍ପ ପ୍ରଭାବିତ ହେବାକୁ ଯାଉଛି । ବିଶେଷ କରି ଆମେରିକା ନେଉଥିବା ସାମଗ୍ରୀ ଗୁଡ଼ିକ ଏବେ ଅନ୍ୟ ଦେଶକୁ ପଠାଯିବ । ହେଲେ ଏଥିପାଇଁ ସମୟ ଲାଗିବ । ସେହି ସମୟ ମଧ୍ୟରେ ଭାରତର ଅନେକ ଉତ୍ପାଦ ପ୍ରଭାବିତ ହେବ । ଦେଖାଯାଉ ବାଣିଜ୍ୟ ବଜାରରେ ଏପରି ସ୍ଥିତିକୁ ମୋଦି କେତେଶୀଘ୍ର ନିୟନ୍ତ୍ରଣକୁ ନେଇ ପାରୁଛନ୍ତି ଓ ଦେଶର ଅର୍ଥବ୍ୟବସ୍ଥାକୁ ସୁଧାରି ପାରୁଛନ୍ତି ?

ଦ କୁଇଭର ବ୍ୟୁରୋ :- ଋଷକୁ ସାରା ବିଶ୍ୱରେ ଏକଘରିଆ କରିବା ପାଇଁ ଆମେରିକା ଜୋର ସୋରରେ ଲାଗିଛି । ଋଷ ସହ ନିଜେ ବେପାର କରୁଛି, ହେଲେ ଅନ୍ୟ କାହାକୁ କରିବାକୁ ଦେବାକୁ ଚାହୁଁନାହିଁ । ଋଷ ଠାରୁ ଆମେରିକା ଯୁରାନିୟମ କିଣୁଛି । ହେଲେ ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ କହିଲେଣି, ଋଷ ସହ ଯେଉଁ ମାନେ ତୈଳ ବେପାର କରିବେ ବା ବ୍ୟବସାୟ କରିବେ ସେହି ଦେଶ ଉପରେ ଆମେରିକା ୧୦୦ ପ୍ରତିଶତ ଟିକସ ଲଗାଇବ । ଏମିତି କିଛି ଚେତାବନୀ ଦେଇ ବିଶ୍ୱ ବାଣିଜ୍ୟ ବଜାରକୁ ଅସନ୍ତୁଳିତ ଆଡକୁ ଠେଲି ଦେଉଛନ୍ତି ଟ୍ରମ୍ପ । ଏହାକୁ ନେଇ ବିଭିନ୍ନ ଦେଶ ପ୍ରତିକ୍ରିୟା ବି ପ୍ରକାଶ କଲେଣି ।

ବିଶ୍ୱ ବାଣିଜ୍ୟ ବଜାରର ସନ୍ତୁଳନକୁ ବିଗାଡୁଛି ଆମେରିକା । ବିଶେଷ କରି ଟ୍ରମ୍ପ ଦ୍ଵିତୀୟ ଥର ରାଷ୍ଟ୍ରପତି ଦାୟିତ୍ୱ ନେବା ପରେ ବିଶ୍ୱବାଣିଜ୍ୟ ବଜାରକୁ ଆମେରିକା ହାତମୁଠାରେ ରଖିବାକୁ ଯୋଜନା ଚଳାଇଛନ୍ତି । ବିଶ୍ୱରେ ଅନ୍ୟତମ ବୃହତ ଶକ୍ତି ଋଷ, ଚୀନ ଓ ଭାରତ ଏଥିରେ ସହମତ ହେଉନାହାନ୍ତି । ସେଥିପାଇଁ ଟ୍ରମ୍ପ କଟକଣା ଆଉ ଧମକ ବି ଜାରି କରୁଛନ୍ତି । ଭାରତ ମୁହଁ ତୋଡ ଜବାବ ଦେବାକୁ ପ୍ରସ୍ତୁତ ହୋଇଗଲାଣି । ଋଷ, ଚୀନ, ଇରାନ ଭଳି ଦେଶ ଆଉ କେଇ ପାଦ ଆଗେଇଗଲେଣି ।

ଋଷକୁ ଡରେଇବା ପାଇଁ ଆମେରିକା ପରମାଣୁ ଓ ଜଳ ଜାହାଜ ଆଣି ସୀମାରେ ରଖିଲାଣି । ସେପଟେ ଋଷ ସହ ବେପାର କରୁଥିବା ଅନ୍ୟ ଦେଶ ଗୁଡ଼ିକୁ ମଧ୍ୟ ଚେତାବନୀ ଦେଲାଣି । ତାର ସମର୍ଥକ ଦେଶ ଗୁଡ଼ିକୁ ପ୍ରସ୍ତୁତ କଲାଣି । ଏହାର ଜବାବ ଦେବାକୁ ଯାଇ ଋଷ ଓ ଚୀନ ମିଳିତ ଭାବେ ଜଳ ସେନାକୁ ପ୍ରସ୍ତୁତ କଲେଣି । ଖାଲି ଜଳ ସେନାକୁ ପ୍ରସ୍ତୁତ କରିନାହାନ୍ତି । ଏବେ ସାମରିକ ପ୍ରସ୍ତୁତି ମଧ୍ୟ କଲେଣି । ଭାରତ ଫିଲିଫାଇନ୍ସ ସହ ମିଶି ସମୁଦ୍ରରେ ତାର ପଇଁତରାକୁ ଅଧିକ କରୁଛି ।

ଋଷର ସାଥ ଦେଉଛି ଭାରତ । କୌଣସି ବି ସ୍ଥିତିରେ ଭାରତ ତାର ଆନ୍ତର୍ଜାତୀୟ ବାଣିଜ୍ୟ ନୀତିକୁ ବଦଳାଇବ ନାହିଁ । ଦେଶର ସ୍ୱାର୍ଥ ପାଇଁ ଏହା କରିବ । ଏଥିପାଇଁ ଅନେକ କିଛି ପଦକ୍ଷେପ ନେବାକୁ ଯାଉଛି ଭାରତ । ଆମେରିକାର ଏଭଳି ଅସନ୍ତୁଳିତ କାର୍ଯ୍ୟ ପାଇଁ ସାରା ବିଶ୍ୱରେ ପ୍ରତିକ୍ରିୟା ବଢ଼ିଲାଣି । ପ୍ରମୁଖ ଶକ୍ତିଶାଳୀ ଦେଶ ଗୁଡ଼ିକ ଆମେରିକା ବିରୁଦ୍ଧରେ ଛିଡ଼ା ହେବାକୁ ଲାଗିଲେଣି । ଦେଖାଯାଉ ଏହି ବାଣିଜ୍ୟ ଯୁଦ୍ଧ ଆଗକୁ କି ରୂପ ନେଉଛି ?

ବ୍ରହ୍ମପୁର ( ଦ କୁଇଭର ):- ସ୍ବେଛାସେବୀ ଅନୁଷ୍ଠାନ ବହୁମୁଖୀ ସମାଜ ମଙ୍ଗଳ ଓ ସାଂସ୍କୃତିକ କେନ୍ଦ୍ର ତରଫରୁ ସିଦ୍ଧାର୍ଥ ନଗର ମୁଖ୍ୟ ରାସ୍ତାସ୍ଥିତ ହିମାନୀ ସେଲିବ୍ରେସନରେ ପ୍ରଖ୍ୟାତ ସିନେ ଗାୟକ ସ୍ବର୍ଗତ କିଶୋର କୁମାର ଙ୍କ ସତାନବେତମ ଜନ୍ମଦିନରେ ଏକ ଶ୍ରଦ୍ଧାଞ୍ଜଳି ତଥା ସ୍ମୃତି ଚାରଣ ସଭା ଆୟୋଜନ କରାଯାଇଥିଲା।ଏହି ଅବସରରେ ପ୍ରତିଷ୍ଠିତ ଗାୟକ ମାନେ ଯୋଗ ଦେଇ କିଶୋର କୁମାର ଙ୍କ ସଙ୍ଗୀତ ଗାନ କରିଥିଲେ ।ଏହି କାର୍ଯ୍ୟକ୍ରମ ରେ ସଭାପତି ଡ଼ା ଶଙ୍କର୍ଷଣ ପାତ୍ର ଅଧ୍ୟକ୍ଷତା କରିଥିବା ବେଳେ ମୁଖ୍ୟ ଅତିଥି ରୂପେ ବରିଷ୍ଠ ଗାୟକ ସୁଦୀପ କୁମାର ସାହୁ ଯୋଗ ଦେଇଥିଲେ। ଇଞ୍ଜିନିୟର ଆଶୁତୋଷ ପାତ୍ର, ଉପସଭାପତି ତଥା ବରିଷ୍ଠ ଓକିଲ ମହେନ୍ଦ୍ର ନାଥ ସାହୁ, ଶ୍ୟାମ ସୁନ୍ଦର ଖାଡଙ୍ଗା, ଅରୁଣ କୁମାର ସାହୁ ପ୍ରମୁଖ ଯୋଗ ଦେଇଥିଲେ । କେନ୍ଦ୍ର ସଂପାଦକ ମହମଦ ଆସଲାମ ଏହି ଅବସରରେ ଅତିଥି ପରିଚୟ ପ୍ରଦାନ କରି ସ୍ୱର୍ଗତଃ କିଶୋର କୁମାର ଙ୍କ ସଙ୍ଗୀତ ଜୀବନୀ ସମ୍ପର୍କ ରେ ଆଲୋକ ପାତ କରିଥିଲେ । ଗାୟକ ମାୟାଧର ସାହୁ, ସୁନିର ବିଶ୍ୱାସ, ସତ୍ୟମ ଆଚାରି, ଚାନ୍ଦିନୀ ବଡ ମୁଣ୍ଡି , ରମେଶ ଚନ୍ଦ୍ର ସେଠୀ, ଅରୁଣ କୁମାର ପାତ୍ର, ବାବୁଲି ମହାରଣା, ସୁନୀଲ କୁମାର୍ ସାହୁଙ୍କ ସମେତ ବହୁ କଳାକାର ଉପସ୍ଥିତ ଥିଲେ । ପ୍ରାରମ୍ଭରେ ସ୍ଵର୍ଗତ କିଶୋର କୁମାରଙ୍କ ଫଟୋ ଚିତ୍ରରେ ପୁଷ୍ପମାଲ୍ୟ ଅର୍ପଣ କରାଯିବା ସହ ଅମର ଆତ୍ମାର ସଦଗତି କାମନା ଲାଗି ଦୁଇ ମିନିଟ ନୀରବ ପ୍ରାର୍ଥନା କରାଯାଇଥିଲା । ଶେଷରେ ଯୁଗ୍ମ ସଂପାଦକ ପାର୍ବତୀ ପ୍ରସାଦ ପାଢୀ ଧନ୍ୟବାଦ ଅର୍ପଣ କରିଥିଲେ।

ବ୍ରହ୍ମପୁର( ଦ କୁଇଭର ):- ବ୍ରହ୍ମପୁର ସହରର କେନ୍ଦ୍ର ସ୍ଥଳି ପୁରୁଣା ବସଷ୍ଟାଣ୍ଡରେ ନିର୍ମିତ ଆହାର କେନ୍ଦ୍ରର ଶୁଭାରମ୍ଭ କରିଛନ୍ତି ବିଧାୟକ କେ.ଅନିଲ କୁମାର । ଏହି ଅବସରରେ ବ୍ରହ୍ମପୁର ମହାନଗର ନିଗମ ମେୟର ସଂଘମିତ୍ରା ଦଳାଇ, କମିଶନର ପ୍ରଥମେସ ଅରବିନ୍ଦ ରାଜସିର୍କେ ଉପସ୍ଥିତ ଥିଲେ। ପୁରୁଣା ବସଷ୍ଟାଣ୍ଡରେ ସାଧାରଣ ଯାତ୍ରୀଙ୍କ ପାଇଁ ପୂର୍ବରୁ ନିର୍ମିତ ହୋଇଥିବା ଆହାର କେନ୍ଦ୍ର ସ୍ଥାନରେ କାର ପାର୍କିଂ ପାଇଁ ମଲ୍ଟି ପାର୍କିଂ କମ୍ପ୍ଲେକ୍ସ ନିର୍ମାଣ କାର୍ଯ୍ୟ ନିର୍ମାଣାଧୀନ ରହିଛି । ଫଳରେ ସେହି ସ୍ଥାନରେ ଥିବା ଅସ୍ଥାୟୀ ଭାବେ ଆହାର କେନ୍ଦ୍ରଟି ଚାଲୁ ରହିଥିଲା । ତେବେ ଲୋକଙ୍କ ଆହାର କେନ୍ଦ୍ରକୁ ଯିବା ଆସିବାରେ ଅସୁବିଧା ହେବା ଅଭିଯୋଗ ପରେ ପୁରାତନ ଆହାର କେନ୍ଦ୍ରକୁ ମଲ୍ଟି କାର ପାର୍କିଂ କମ୍ପ୍ଲେକ୍ସ ବାହାରକୁ ସ୍ଥାନାନ୍ତର କରାଯାଇଥିଲା । ବର୍ତ୍ତମାନ ଆହାର କେନ୍ଦ୍ରଟି ରାସ୍ତା କଡ଼ରେ ନିର୍ମାଣ ହେବା ଫଳରେ ଅଧିକରୁ ଅଧିକ ଆହାର କେନ୍ଦ୍ରର ସୁବିଧା ପାଇପାରିବେ ବୋଲି ବିଧାୟକ କେ.ଅନିଲ କୁମାର ସୂଚନା ପ୍ରଦାନ କରିଛନ୍ତି । ଏହି ଅବସରରେ ସାଂସଦଙ୍କ ପ୍ରତିନିଧି ବାଳକୃଷ୍ଣ ସାମନ୍ତରାଙ୍କ ସମେତ ବହୁ କର୍ପୋରେଟର ଅଂଶ ଗ୍ରହଣ କରିଥିଲେ ।

ଦ କୁଇଭର ବ୍ୟୁରୋ :- ଆମେରିକାର ତାରିଫ ମନମାନିକୁ କଡ଼ା ଜବାବ ଦେଇଛି ଭାରତ । ଭାରତରେ ଆଜି ମୋଦି ସରକାର ଆମେରିକାର ଏଭଳି ପଦକ୍ଷେପକୁ କେବଳ ନିନ୍ଦା କରିନାହାନ୍ତି, ଏହାର ମୁକାବିଲା କରିବା ପାଇଁ ଭାରତ ପ୍ରସ୍ତୁତ ବୋଲି କହିଛନ୍ତି । ପ୍ରଧନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି ଯେ ଆମେରିକାର ସ୍ୱାର୍ଥ ପାଇଁ ଭାରତର ଚାଷୀ ଏବଂ ବ୍ୟବସାୟିକ ସ୍ୱାର୍ଥକୁ ଜଳାଞ୍ଜଳି ଦିଆଯାଇ ପାରିବ ନାହିଁ । ଭାରତର ଚାଷୀ ଭାଇ ମାନଙ୍କର ଯେଉଁ ହକ ରହିଛି ତାକୁ କେନ୍ଦ୍ର ସରକାର ସୁରକ୍ଷିତ ରଖିବେ । ଋଷ ସହ ସମ୍ପର୍କକୁ ନେଇ ମୋଦି ସ୍ପଷ୍ଟ କରେଇଦେଇଛନ୍ତି, ଯେ ଭାରତର କ୍ଷତି ହେବା ଭଳି କୌଣସି ପଦକ୍ଷେପ ମୋଦି ସରକାର ନେବେ ନାହିଁ ।

ଆମେରିକା ଠାରୁ ତୈଳ ଆମଦାନୀ କଲେ ଭାରତ ଉପରେ ଆର୍ଥିକ ବୋଝ ବୋହୁ ଉପରେ ପଡ଼ିଯିବ । ତେଣୁ ଭାରତୀୟଙ୍କ ସ୍ୱାର୍ଥକୁ ଦେଖି ମୋଦି ସରକାର ପଦକ୍ଷେପ ନେଉଛନ୍ତି । ଆମେରିକା ତାରିଫ ବଢାଉ । ଏ ଦିଗରେ ଖୁବ ଶୀଘ୍ର କେନ୍ଦ୍ର ସରକାର ପଦକ୍ଷେପ ନେବେ ବୋଲି ମୋଦି ସ୍ପଷ୍ଟ କରିଦେଇଛନ୍ତି ।

ଦ କୁଇଭର ବ୍ୟୁରୋ :- ଆମେରିକାର ତାରିଫ ଧମକ ପରେ ଏବେ ଭାରତ, ଋଷ ଓ ଚୀନ ଏକଜୁଟ ହୋଇଛନ୍ତି । ଏମାନଙ୍କ ଏକତା ଦେଖି ଟ୍ରମ୍ପଙ୍କ ପିଳେହି ପାଣି । ପୁଟିନଙ୍କ ସହ ଶାନ୍ତି ଆଲୋଚନା କରିବା ପାଇଁ ଦୂତ ପଠାଇଲେଣି । ମାତ୍ର ତିନି ଦିନ ଭିତରେ ଟ୍ରମ୍ପଙ୍କ ଅବସ୍ଥା ଢିଲା କରିଦେଲେ ଭାରତ, ଋଷ ଓ ଚୀନ ।

ଋଷ ସହ ବେପାର କରୁଥିବା ଦେଶକୁ ଟ୍ରମ୍ପ ଦେଇଥିଲେ ଧମକ । ଟ୍ରମ୍ପ ତାରିଫ ବା ଶୁଳ୍କକୁ ୧୦୦ ପ୍ରତିଶତ କରିଦେଲେ । ଏହା ପରେ ଏକଜୁଟ ହେଲେ ଅନେକ ଦେଶ । ଭାରତ ବିରୁଦ୍ଧରେ ଟ୍ରମ୍ପଙ୍କ ନକରାତ୍ମକ ଆଭିମୁଖ୍ୟ ଭାରତ, ଋଷ ଓ ଚୀନକୁ ଏକତ୍ରିତ କରିଦେଲା । ୨୦୨୦ ପରେ ଚୀନ ଗସ୍ତକୁ ରଦ୍ଦ କରିଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବେ ଚୀନ ଗସ୍ତରେ ବାହାରିଲେଣି । ଚୀନ ସହ ଭାରତର ଦ୍ୱିପାକ୍ଷିକ ସମ୍ପର୍କକୁ ଆହୁରି ନିବିଡ଼ କରିବା ପାଇଁ ଏ ଗସ୍ତ । ସେହି ଭଳି ଋଷ ସହ ମଧ୍ୟ ସମ୍ପର୍କକୁ ନିବିଡ଼ କରାଯାଇଛି । ଭାରତ, ଋଷ ଓ ଚୀନ ଏହି ତିନି ଦେଶ ମିଶି ବିଶ୍ୱରେ ସ୍ୱତନ୍ତ୍ର ବ୍ୟବସାୟୀକ ନେଟୱର୍କ ତିଆରି କରିବାକୁ ଯୋଜନା କରିଛନ୍ତି ।

ଏହି ତିନି ଦେଶ ଏକାଠି ହେଲେ ଆମେରିକାର ବ୍ୟବସାୟ ପୁରା ଠପ ହୋଇଯିବ । ଏକଥା ଜାଣିବା ପରେ ଟ୍ରମ୍ପ ଏବେ ଭୟଭୀତ ହୋଇଗଲେଣି । ଟ୍ରମ୍ପ ପୁଟିନଙ୍କ ସହ କଥା ହେବା ପାଇଁ ଦୂତ ପଠାଇଛନ୍ତି । ଶାନ୍ତିର ଦୂତ । ଆମେରିକା ଏବେ ତାର ପରମାଣୁ ଜଳ ଜାହାଜକୁ ଫେରାଇଲାଣି । ଆମେରିକା ଋଷକୁ ଏକଘରିଆ କରିବା ପାଇଁ ଯେଉଁ ଉଦ୍ୟମ ଆରମ୍ଭ କରିଛି ତାହା ବି ରଦ୍ଦ କରିବ । କିନ୍ତୁ କିଛିଟା ସର୍ତ ଆମେରିକା ରଖୁଛି । ଯାହାକୁ ଋଷ ମାନିବାକୁ ପ୍ରସ୍ତୁତ ନୁହେଁ । ଭାରତ, ଋଷ ଓ ଚୀନ ଏକ ହେବା ପରେ ଆମେରିକା ତାର ଔକାତ ଜାଣିପାରିଛି । ଏବେ ପ୍ରଶ୍ନ ଆସୁଛି ଟ୍ରମ୍ପ ତାଙ୍କ ତାରିଫ ଧମକ ପ୍ରତ୍ୟାହାର କରିବେ ନା ଏହି ତିନି ଦେଶ ବିଶ୍ୱରେ ନୂଆ ନେଟୱର୍କ ତିଆରି କରି ନେତୃତ୍ୱ ନେବା ପାଇଁ ଆଗେଇବେ ?

ଦ କୁଇଭର ବ୍ୟୁରୋ:- ଗୋଳନ୍ଥରା ଥାନା ଅନ୍ତର୍ଗତ ଭୈରବୀ ରାସ୍ତାରେ ଆଇନଜୀବୀ ଭାନୁମୂର୍ତ୍ତିଙ୍କ ପରିବାରଙ୍କୁ ସଂଘବଧ ଆକ୍ରମଣ ମାମଲାରେ ସମ୍ପୃକ ଥିବା ସମସ୍ତ ଅଭିଯୁକ୍ତଙ୍କୁ ଗିରଫ ଦାବି ନେଇ ବୁଧବାର ଏସପିଙ୍କୁ ଭେଟିଲା ଗଞ୍ଜାମ ଓକିଲ ସଂଘ । ବର୍ତ୍ତମାନ ଏହି ଘଟଣାରେ ୪ଜଣ ଗିରଫ ହୋଇଥିବା ବେଳେ ମନ୍ତ୍ରୀଙ୍କ ପୁତୁରା ଦୀପକ ଜେନାଙ୍କ ସମେତ ଏକାଧିକ ଅଭିଯୁକ୍ତ ଏଯାବତ ଫେରାର ରହିଛନ୍ତି ।ସେମାନଙ୍କୁ ତୁରନ୍ତ ଗିରଫ କରିବାକୁ ଦାବି କରିଲା ଗଞ୍ଜାମ ଓକିଲ ସଂଘ ।

ବ୍ରହ୍ମପୁର( ଦ କୁଇଭର ) :- ବ୍ରହ୍ମପୁର ଆସ୍କା ରୋଡ୍‌ ମୟୁରୀ ବିହାର ଚତୁର୍ଥ ଗଳିର ଅନୁରାଗ ମିଶ୍ର ସାଇବର କ୍ରାଇମ୍ ପୋଲିସ ଷ୍ଟେସନ୍‌ରେ ଗତ ୨ ତାରିଖରେ ରିପୋର୍ଟ କରିଛନ୍ତି ଯେ ସେ ବ୍ୟାଙ୍କିଂ ଚ୍ୟାନେଲ୍‌ ମାଧ୍ୟମରେ ଉଚ୍ଚ ରିଟର୍ଣ୍ଣ ଆଶା କରି ଆର୍ଥିକ ନିବେଶ ସହିତ ଜଡିତ ଏକ ଠକେଇର ଶିକାର ହୋଇଛନ୍ତି ଏବଂ ଏହି ଅପରାଧରେ ସେ ଅନିଲ କୁମାର ମିଶ୍ର ନାମକ ଜଣେ ବ୍ୟକ୍ତିଙ୍କ ଠାରୁ ପ୍ରାୟ ୯ କୋଟି ଟଙ୍କା ହରାଇଛନ୍ତି l ପ୍ରଥମେ ତାଙ୍କ ବିଶ୍ୱାସ ଜିତିବା ପାଇଁ ଛୋଟ ଲାଭକୁ ଅନୁମତି ଦେଖାଇ, ତାଙ୍କୁ ଏକ କୋଟିରୁ ଅଧିକ ନିବେଶ ପାଇଁ ଭଲ ରିଟର୍ଣ୍ଣ ପ୍ରଦାନ କରାଯାଇଥିଲା ଯାହା ଫଳରେ ଅଭିଯୋଗକାରୀ ଅଭିଯୁକ୍ତଙ୍କ ଦ୍ୱାରା ଦିଆଯାଇଥିବା ବିଭିନ୍ନ ଟ୍ରେଡିଂ ଆକାଉଣ୍ଟ୍‌ରେ ୯ କୋଟି ଟଙ୍କା ନିବେଶ କରିଥିଲେ।

ସୂଚନା ପ୍ରକାରେ,ଗତ ୨୯.୪.୨୦୨୪ ରେ ଅଭିଯୋଗକାରୀ ତାଙ୍କ ଆକାଉଣ୍ଟରୁ ଟଙ୍କା ସ୍ଥାନାନ୍ତର କରି ୨,୦୦,୦୦୦/- ଟଙ୍କା ନିବେଶ କରିଥିଲେ। ତୁରନ୍ତ ତିନୋଟି ଭିନ୍ନ କାରବାର ମାଧ୍ୟମରେ ଅଭିଯୋଗକାରୀଙ୍କ ଉକ୍ତ ଚଳନ୍ତି ଆକାଉଣ୍ଟରେ ୨,୨୬,୦୦୦/- ଟଙ୍କା ଜମା କରାଯାଇଥିଲା ଯାହା ତାଙ୍କୁ ଅନିଲ କୁମାର ମିଶ୍ରଙ୍କ ଯୋଜନା ଏବଂ ସଚ୍ଚୋଟତା ଉପରେ ବିଶ୍ୱାସ କରାଇଥିଲା। ଏହି ପ୍ରାରମ୍ଭିକ ସଫଳତା ଉପରେ ନିର୍ଭର କରି ସେ ନିବେଶ କରି ଚାଲିଥିଲେ ଏବଂ ଏହିପରି ଅଭିଯୋଗକାରୀଙ୍କ ଦ୍ୱାରା ମେ-୨୦୨୪ ରୁ ୧୧.୪.୨୦୨୫ ପର୍ଯ୍ୟନ୍ତ ବ୍ୟାଙ୍କ କାରବାର ମାଧ୍ୟମରେ ବିଭିନ୍ନ ତାରିଖରେ ତାଙ୍କ ICICI ବ୍ୟାଙ୍କ ଆକାଉଣ୍ଟରୁ କେବଳ ବ୍ୟାଙ୍କ କାରବାର ମାଧ୍ୟମରେ ମୋଟ ୯,୭୧,୫୫,୦୭୩/- ଟଙ୍କା ନିବେଶ କରାଯାଇଥିଲା। ଯଦିଓ ଏପ୍ରିଲ ୨୦୨୫ ପର୍ଯ୍ୟନ୍ତ, ସେ ଅଭିଯୁକ୍ତ ବ୍ୟକ୍ତିଙ୍କଠାରୁ "ଫେରସ୍ତ" ଭାବରେ ପ୍ରାୟ ୩ କୋଟି ଟଙ୍କା ପାଇଥିଲେ, କିନ୍ତୁ ୧୧.୪.୨୦୨୫ ପରେ ପୀଡିତ ଅଭିଯୋଗକାରୀଙ୍କ ଠାରୁ କୌଣସି ଟଙ୍କା ପାଇ ନଥିଲେ। ସେ ଜାଣିପାରିଲେ ଯେ ସେ ଠକାମିର ଶିକାର ହୋଇଛନ୍ତି ଏବଂ ବ୍ରହ୍ମପୁରର ସିସି ଏବଂ ଇଓ ପିଏସରେ ରିପୋର୍ଟ କରିଥିଲେ। ରିପୋର୍ଟକୁ ଆଧାର କରି ତଦନ୍ତ ସମୟରେ, ଜଣାପଡିଲା ଯେ ଅଭିଯୁକ୍ତ କେବଳ ବିଭିନ୍ନ ବାଣିଜ୍ୟିକ ଆପ୍ସରେ ଟଙ୍କା ବିନିଯୋଗ କରୁଥିଲେ ଏବଂ ତାଙ୍କର ଲାଭର କିଛି ଟଙ୍କା ଫେରସ୍ତ ଭାବରେ ଦେଉଥିଲେ। କିନ୍ତୁ ସେ ଟଙ୍କା ହରାଇଲେ ଏବଂ ଆଉ କିଛି ଫେରସ୍ତ କରିପାରିଲେ ନାହିଁ। ଅଭିଯୁକ୍ତଙ୍କ ବୟାନର ସତ୍ୟତା ଯାଞ୍ଚ କରିବା ପାଇଁ ତଦନ୍ତ ଚାଲିଥିବା ସୂଚନା ମିଳିଛି l ତେବେ ଅଭିଯୁକ୍ତ କୋଦଳା ଥାନା ଅଞ୍ଚଳର ହୋଇଥିବାବେଳେ ୪ଟି ମୋବାଇଲ୍ ସହ ୪ଟି ବ୍ୟାଙ୍କ ଖାତା ଜବତ କରାଯାଇଛି l

ତେବେ ବାରମ୍ବାର ସାମାଜିକ ଗଣମାଧ୍ୟମ ଏବଂ ମେସେଜିଂ ଆପ୍ସରେ ଅବାଞ୍ଛିତ ନିବେଶ ପ୍ରସ୍ତାବ ଏବଂ ଡିଜିଟାଲ୍ ଗିରଫଦାରୀ ବିରୁଦ୍ଧରେ ସତର୍କ ରହିବାକୁ ନାଗରିକମାନଙ୍କୁ ଅନୁରୋଧ କରାଯାଉଛି। ସାଇବର ଠକେଇର ଶିକାର ନହେବା ପାଇଁ ନିବେଶ କରିବା ପୂର୍ବରୁ ସର୍ବଦା ଏପରି ଯୋଜନାଗୁଡ଼ିକର ସତ୍ୟତା ଯାଞ୍ଚ କରନ୍ତୁ, କୌଣସି ସନ୍ଦେହଜନକ କାର୍ଯ୍ୟକଳାପ କ୍ଷେତ୍ରରେ, ତୁରନ୍ତ 'ସାଇବର ହେଲ୍ପଲାଇନ୍ ୧୯୩୦' କୁ ରିପୋର୍ଟ କରନ୍ତୁ କିମ୍ବା ନିକଟସ୍ଥ ପୋଲିସ ଷ୍ଟେସନ ଯିବାପାଇଁ ପରାମର୍ଶ ଵା ସତର୍କ ବାଣୀ ଦିଆଯାଏ, ତଥାପି ବାରମ୍ବାର ଲୋଭର ଶିକାର ହୁଅନ୍ତି ଜନତା ତେଣୁ ଆଗକୁ ସତର୍କ ରହିବାକୁ ସାଇବର ଅପରାଧ ଏବଂ ଅର୍ଥନୈତିକ ଅପରାଧ ପୋଲିସ ପକ୍ଷରୁ ଅନୁରୋଧ କରାଯାଇଛି l

ବ୍ରହ୍ମପୁର( ଦ କୁଇଭର ):- ବ୍ରହ୍ମପୁର ବଡ଼ବଜାର ଥାନା ଅନ୍ତର୍ଗତ ରଙ୍ଗୁଣୀବନ୍ଧ ସାହି ନିକଟରେ ଥିବା ଶାସ୍ତ୍ରୀ ନଗରର ଏସ. ରୁନା ଅଚାରୀ ନାମଙ୍କ ଜଣେ ବ୍ୟକ୍ତିଙ୍କୁ ଗୁଳିମାଡ଼ ହୋଇଥିବା ଜଣାପଡିଛି। ଆହତ ବ୍ୟକ୍ତିମାନଙ୍କୁ ଏମକେସିଜି ମେଡ଼ିକାଲରେ ଚିକିତ୍ସା ନିମନ୍ତେ ଭର୍ତ୍ତି କରାଯାଇଛି। ରୁନା ନିଜ ଘରେ ଥିବା ସମୟରେ କିଛି ବ୍ୟକ୍ତି ଘରେ ପଶି ତାଙ୍କୁ ଗୁଳିମାଡ଼ କରିଥିବା ଜଣାପଡିଛି। ମେଡିକାଲରେ ବ୍ରହ୍ମପୁର ଆରକ୍ଷୀ ଅଧିକ୍ଷକ ଡ଼ା ଶ୍ରବଣ ବିବେକ ଏମ ପହଞ୍ଚି ସ୍ଥିତି ଅନୁଧ୍ୟାନ କରୁଥିବା ଜଣାପଡିଛି l

ଦ କୁଇଭର ବ୍ୟୁରୋ :- ବଙ୍ଗୋପସାଗରରେ ଲଘୁଚାପ ସୃଷ୍ଟି ହେବା ନେଇ ଆକଳନ କରିଛନ୍ତି ଅନ୍ତର୍ଜାତୀୟ ପାଣିପାଗ ବିଜ୍ଞାନୀ ଜାସନ୍ ନିକୋଲସ୍ । ଆସନ୍ତା ୧୧ ତାରିଖ ବେଳେକୁ ପଶ୍ଚିମ ବଙ୍ଗୋପସାଗରରେ ଲଘୁଚାପ ସୃଷ୍ଟି ହୋଇପାରେ ବୋଲି ପୂର୍ବାନୁମାନ କରିଛନ୍ତି। ଅନ୍ୟପଟେ ୮ ତାରିଖ ତାରିଖ ଯାଏଁ ଅଧା ଓଡ଼ିଶାକୁ ୱାର୍ଣ୍ଣିଂ।ଆଜି ଓ ଆସନ୍ତାକାଲି ବିଜୁଳି ଘଡ଼ଘଡ଼ି ସହ ୩୦ରୁ ୪୦ କିମି ବେଗରେ ପବନ ବହିବା ନେଇ ୨୦ ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି କରାଯାଇଛି । ୬ ତାରିଖ ଦିନ ମଧ୍ୟ ବିଜୁଳି ଘଡ଼ଘଡ଼ି ସହ ଘଣ୍ଟାପ୍ରତି ୩୦-୪୦କିମି ବେଗରେ ଝଟକା ପବନ ନେଇ୨୦ ଜିଲ୍ଲାକୁ ୟେଲୋ ଆଲର୍ଟ ଜାରି ହୋଇଛି । ପ୍ରବଳ ବର୍ଷା ପାଇଁ କେନ୍ଦୁଝର ଏବଂ ମୟୂରଭଞ୍ଜ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି ।ଏହି ଦୁଇ ଜିଲ୍ଲାରେ ପ୍ରବଳ ବର୍ଷା ହେବ । ୭ ତାରିଖ ଦିନ ୨୦ ଜିଲ୍ଲାକୁ ୟେଲୋ ଆଲର୍ଟ ଜାରି ହୋଇଛି ।

ପ୍ରବଳ ବର୍ଷା ପାଇଁ ୫ ଜିଲ୍ଲା ସମ୍ବଲପୁର, ଝାରସୁଗୁଡ଼ା, ସୁନ୍ଦରଗଡ଼, କେନ୍ଦୁଝର ଏବଂ ମୟୂରଭଞ୍ଜକୁ ୟେଲୋ ୱାର୍ଣ୍ଣିଂ ଜାରି କରିଛି ପାଣିପାଗ ବିଜ୍ଞାନକେନ୍ଦ୍ର । ଆସନ୍ତା ୮ ତାରିଖ ପର୍ଯ୍ୟନ୍ତ ରାଜ୍ୟର ୨୦ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ୧୧ ତାରିଖ ପର୍ଯ୍ୟନ୍ତ ରାଜ୍ୟର କିଛି ଜିଲ୍ଲାରେ ହାଲୁକାରୁ ମଧ୍ୟମ ଧରଣର ବର୍ଷା ସମ୍ଭାବନା ନେଇ ପୂର୍ବାନୁମାନ କରିଛି ପାଣିପାଗ ବିଭାଗ ।

ବ୍ରହ୍ମପୁର( ଦ କୁଇଭର ):- ଦିନକୁ ଦିନ ସୋସିଆଲ ମିଡ଼ିଆର କ୍ରେଜ ଯେଉଁ ମାତ୍ରାରେ ବଢ଼ି ଚାଲିଛି, ଲୋକମାନେ ମଧ୍ୟ ସେତିକି ମାତ୍ରାରେ ଅଧିକ ବୁଦ୍ଧି ଖଟେଇ ନିଜକୁ ଚତୁର ବୋଲି ଭାବିଦିଅନ୍ତି କିନ୍ତୁ ସେମାନେ ଭୁଲିଯାନ୍ତି,ଆଇନ - ନା କେଉଁ ଅଭିଯୁକ୍ତକୁ କାହାକୁ ଛାଡ଼ିଛି ନା ଆଗକୁ କାହାକୁ ଛାଡିବ l ଆମେ କହୁଛୁ ବ୍ରହ୍ମପୁର ଅଂଚଳରେ ଘଟିଥିବା ଏକ ସମ୍ବେଦନଶୀଳ ଘଟଣା କଥା l ବ୍ରହ୍ମପୁର ସାଇବର ଅପରାଧ ଏବଂ ଅର୍ଥନୈତିକ ଅପରାଧ ପୋଲିସ ଦ୍ୱାରା ଜଣେ ଯୁବକଙ୍କୁ ଗିରଫ କରାଯାଇଛି l ଜଣେ ମହିଳାଙ୍କ ନାମରେ ନକଲି ଫେସବୁକ୍ ଆକାଉଣ୍ଟ କରି ସମାଜରେ ତାଙ୍କ ପ୍ରତିଷ୍ଠାକୁ କ୍ଷତି ପହଞ୍ଚାଇବା ଉଦ୍ଦେଶ୍ୟରେ ସେହି ଫେସବୁକ୍ ଏବଂ ଇନଷ୍ଟାଗ୍ରାମ ଆକାଉଣ୍ଟରେ ଅଶ୍ଳୀଳ ଏବଂ ଅଶ୍ଳୀଳ ବିଷୟବସ୍ତୁ ପୋଷ୍ଟ କରିବା ଅଭିଯୋଗରେ ଜଣେ ଅଭିଯୁକ୍ତକୁ ଗିରଫ କରିଛି ପୋଲିସ l ଗତ ୧ ଅଗଷ୍ଟ ତାରିଖରେ ଗୋପାଳପୁର ଅଞ୍ଚଳର ଜଣେ ୨୮ ବର୍ଷୀୟା ମହିଳା ଅଭିଯୋଗ କରିଥିଲେ ଯେ ତାଙ୍କ ନାମରେ କେହି ଜଣେ ନକଲି ଫେସବୁକ୍ ଏବଂ ଇନଷ୍ଟାଗ୍ରାମ ପ୍ରୋଫାଇଲ୍ ତିଆରି କରିଛନ୍ତି ଏବଂ ହ୍ୟାଣ୍ଡେଲ ମଣିଷ ଜଣକ ସେଥିରେ ବିଭିନ୍ନ ପ୍ରକାର ଆପତ୍ତିଜନକ ପୋଷ୍ଟ କରୁଛି ଯାହା ସମାଜରେ ତାଙ୍କ ପ୍ରତିଷ୍ଠାକୁ କ୍ଷତି ପହଞ୍ଚାଉଛି। ତେବେ ମହିଳା ପୀଡ଼ିତାଙ୍କ ଅଭିଯୋଗ କୁ ଭିତ୍ତି କରି ମାମଲା ରୁଜୁ ହୋଇଥିଲା ଏବଂ ତଦନ୍ତ ସମୟରେ, ସାଇବର କ୍ରାଇମ୍ ପୋଲିସ ଦଳ ଅଭିଯୁକ୍ତ ବ୍ୟକ୍ତିଙ୍କୁ ଚିହ୍ନଟ କରିବାରେ ସଫଳ ହେବା ସହ ମଙ୍ଗଳବାର ଗିରଫ କରି କୋର୍ଟ ଚାଲାଣ କରିଥିବା ସୂଚନା ମିଳିଛି l

ଅଭିଯୁକ୍ତ ଜଣକ ବଣ୍ଟୁ ପରିଡା, ବୟସ ୨୮ ଏବଂ ସେ କବିସୂର୍ଯ୍ୟନଗର ନଗର ଥାନା ଅଧୀନ ନନ୍ଦିଆଗଡ଼ ଗ୍ରାମର ବୋଲି ଜଣାପଡିଛି l ଅଭିଯୁକ୍ତ ଏବଂ ପୀଡିତା ଉଭୟ ପୂର୍ବରୁ ବନ୍ଧୁ ଥିଲେ ଏବଂ ୨୦୧୫ ରୁ ପୀଡିତାଙ୍କୁ ପିଛା କରୁଥିଲେ କିନ୍ତୁ ପୀଡିତା ଏବଂ ପୀଡିତାଙ୍କ ପରିବାର ପୋଲିସକୁ ଖବର ଦେଇ ନଥିଲେ, ବର୍ତ୍ତମାନ ଯେତେବେଳେ ତାଙ୍କ ପ୍ରତିଷ୍ଠା ଉପରେ ପ୍ରଭାବ ପଡିଲା ସେ ବାଧ୍ୟ ହୋଈ ଆଇନର ଆଶ୍ରୟ ନେବା ଜଣାପଡିଛି l ତେବେ ଅଭିଯୁକ୍ତ ଗିରଫ ପରେ ଗୋଟିଏ poco x6 NEO ମୋବାଇଲ ଜବତ କରିଥିବା ପୋଲିସ ପକ୍ଷରୁ ସୂଚନା ଦେଇଛି l

ଦ କୁଇଭର ବ୍ୟୁରୋ :- ବିଜେଡି ସୁପ୍ରିମୋ ତଥା ବିଜେଡି ସଭାପତି ନବୀନ ପଟ୍ଟନାୟକ ସୋମବାର ୪ ଜିଲ୍ଲା ସଭାପତିଙ୍କ ନାଁ ଘୋଷଣା କରିଛନ୍ତି । ଗଞ୍ଜାମ, କେନ୍ଦ୍ରାପଡା, କଳାହାଣ୍ଡି ଓ କଟକ ଜିଲ୍ଲାର ବିଜେଡି ସଭାପତିଙ୍କ ନାଁ ଘୋଷଣା ହୋଇଛି। ଗଞ୍ଜାମ ଜିଲ୍ଲାର ବିଜେଡି ସଭାପତି ଭାବେ ବିକ୍ରମ କୁମାର ପଣ୍ଡା ନିୟୋଜିତ ହୋଇଥିବା ବେଳେ କେନ୍ଦ୍ରାପଡା ଜିଲ୍ଲା ସଭାପତି ଭାବେ ଶିବ ପ୍ରସାଦ ଭୋଳ, ସେହିପରି କଳାହାଣ୍ଡି ଜିଲ୍ଲା ସଭାପତି ଭାବେ ପ୍ରଦୀପ ଦିଶାରୀ ହୋଇଥିବା ବେଳେ କଟକ ଜିଲ୍ଲା ସଭାପତି ହୋଇଛନ୍ତି ପ୍ରଫୁଲ୍ଲ ସିଂହ । ପୂର୍ବରୁ ବିଜେଡି ସୁପ୍ରିମୋ ୨୪ଟି ଜିଲ୍ଲାର ସଭାପତିଙ୍କ ନାଁ ଘୋଷଣା କରିଥିଲେ। ଆଜି ଏହି ୪ ଟି ଜିଲ୍ଲାର ନାମ ଘୋଷଣା କରିଥିବା ବେଳେ ଆଗକୁ ବଳକା ୫ଟି ଜିଲ୍ଲାର ସଭାପତି ନାଁ ଘୋଷଣା ହେବାକୁ ବାକି ରହିଛି। ସେହିପରି ବିଜେଡିର ସାଙ୍ଗଠନିକ ନିର୍ବାଚନ ପରେ ବିଜୁ ଜନତା ଦଳର ଛାତ୍ର, ଯୁବ ଓ ମହିଳା ସଙ୍ଗଠନର ସଭାପତିଙ୍କ ନାଁ ଘୋଷଣା ହେବ।

ଦ କୁଇଭର ବ୍ୟୁରୋ :- ଫସିଯିବେ ବରିଷ୍ଠ ଆଇଏଏସ ଅଧିକାରୀ ବିଷ୍ଣୁପଦ ସେଠୀ । ବିଭିନ୍ନ କୋର୍ଟରୁ ସୁରକ୍ଷା ପାଉଥିବା ବିଷ୍ଣୁପଦଙ୍କୁ ସୁପ୍ରିମକୋର୍ଟ ସୁରକ୍ଷା ଦେବାକୁ ମନା କରିଦେଇଛନ୍ତି । ଫଳରେ ଏବେ ସେ ଗିରଫ ହୋଇ ପାରନ୍ତି ବୋଲି ଆଶଙ୍କା ବଢ଼ିଛି । ଦୁର୍ନୀତି ମାମଲାରେ ସିବିଆଇ ତଦନ୍ତର ସାମ୍ନା କରୁଥିବା ବିଷ୍ଣୁପଦଙ୍କୁ ଗିରଫ ସମ୍ଭାବନା ରହିଛି । ବାରମ୍ବାର ହାଇକୋର୍ଟ ଓ ଏବେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇ ଗିରଫ ଠୁ ବଞ୍ଚିବାକୁ ଉଦ୍ୟମ କରିଥିଲେ । ମାତ୍ର ତାହା ସମ୍ଭବ ହେଲା ନାହିଁ । ସୁପ୍ରିମକୋର୍ଟ ତାଙ୍କ ଗିରଫ ସମ୍ଭାବନାରୁ ସୁରକ୍ଷା ଦେବାକୁ ଅଗ୍ରାହ୍ୟ କରିଦେଇଛନ୍ତି ।

ଆଇଏଏସ ବିଷ୍ଣୁପଦ ବିଜେଡି ସରକାରରେ ବେଶ କାର୍ପଟଦାର ଅଫିସର ଥିଲେ । ଓମଫେଡ ହେଉ କି ମତ୍ସ୍ୟ ବିଭାଗ, ଉଚ୍ଚଶିକ୍ଷା ହେଉ କି ଆଦିବାସୀ ବିକାଶ ବିଭାଗ ସବୁଥିରେ ତାଙ୍କ ବିରୋଧରେ ଏକାଧିକ ଅଭିଯୋଗ ଥିଲା । ଏପରିକି ତାଙ୍କୁ ତତ୍କାଳୀନ ତୃତୀୟ ମହଲା ସୁରକ୍ଷା ଦେଉଥିବାରୁ ଅନେକ ଦୁର୍ନୀତି ଅଭିଯୋଗରେ ବି ସେ ସରକାରରେ ଗୁରୁତ୍ୱପୂର୍ଣ୍ଣ ଦାୟିତ୍ୱ ପାଉଥିଲେ । ଲୋକପାଳ ହୁଅନ୍ତୁ କି ସୂଚନା କମିଶନର ସମସ୍ତେ ତାଙ୍କ ଆଗରେ ଆଣ୍ଠେଇ ପଡ଼ୁଥିଲେ । ବେଶ ପ୍ରଭାବି ଥିଲେ ବିଷ୍ଣୁପଦ । ତାଙ୍କର ଆଉ ଗୋଟିଏ କାର୍ଡ ଥିଲା ସେ ଅନୁସୂଚିତ ଜାତି । ଏହାକୁ ଆଳ କରି କାଳେ ସେ ଅନେକଙ୍କୁ ପାଣି ପିଆଇଥିଲେ ।

ଦୁର୍ନୀତି ମାମଲାରେ ଟାର୍ଗେଟକୁ ଆସିଲେ ବିଷ୍ଣୁପଦ । ସିବିଆଇ ତଦନ୍ତ କରି ତାଙ୍କ ଘର, ଅଫିସ ସବୁଠି ଚଢ଼ାଉ କରିଥିଲା । ତାଙ୍କୁ ଗିରଫ କରାଯିବା ନେଇ ପ୍ରସ୍ତୁତି ବି ହୋଇଥିଲା । ଏଥିରୁ ରକ୍ଷା ପାଇବା ପାଇଁ ବିଷ୍ଣୁପଦ ବାରମ୍ବାର ହାଇକୋର୍ଟ ଯାଇଥିଲେ । ହାଇକୋର୍ଟ ବି ତାଙ୍କ ଗିରଫଦାରୀ ଉପରେ ଅନେକ ଥର ରୋକ ଲଗାଇ ତାଙ୍କୁ ସୁରକ୍ଷା ଦେଇଥିଲେ । ମାତ୍ର ସିବିଆଇ କାଳେ ହାଇକୋର୍ଟରେ ଯଥେଷ୍ଟ ପ୍ରମାଣ ଦେବା ପରେ ହାଇକୋର୍ଟ ଆଉ ଗିରଫଦାରୀକୁ ରୋକିବା ଆବେଦନକୁ ଗ୍ରହଣ କଲେ ନାହିଁ । ହାଇକୋର୍ଟ ଅଗ୍ରାହ୍ୟ କରିବା ପରେ ସେ ସୁପ୍ରିମକୋର୍ଟଙ୍କୁ ଆବେଦନ କରିଥିଲେ । ମାତ୍ର ସୁପ୍ରିମକୋର୍ଟ ତାଙ୍କ ଆବେଦନକୁ ଅଗ୍ରାହ୍ୟ କରିଦେଇଛନ୍ତି । ଫଳରେ ଏବେ ସିବିଆଇ ତାଙ୍କୁ ଗିରଫ କରିବାରେ କୌଣସି ପ୍ରତିବନ୍ଧକ ରହିବ ନାହିଁ । କୌଣସି ବି ମୁହୂର୍ତ୍ତରେ ବିଷ୍ଣୁପଦ ଗିରଫ ହୋଇ ପାରନ୍ତି ବୋଲି କୁହାଯାଉଛି । ଦେଖାଯାଉ ସିବିଆଇ ଏବେ କି ପଦକ୍ଷେପ ନେଉଛି ?

ବ୍ରହ୍ମପୁର ( ଦ କୁଇଭର ):- ଗତ କିଛି ଦିନ ଜିଲ୍ଲା ତଥା ରାଜ୍ୟରେ ଯେଉଁ ପ୍ରକାର ଘଟଣା, ଦୁର୍ଘଟଣା ମାନ ଘଟିଚାଲିଛି, ସେଥିପାଇଁ ବିଜେଡି ଭାରତୀୟ ଜନତା ପାର୍ଟିର ସରକାର ତଥା କର୍ମୀମାନଙ୍କୁ ଦୋଷାରୋପ କରୁଥିଲେ ଯାହାର ଉତ୍ତରରେ ଆଜି ଏକ "ସାମ୍ବାଦିକ ସମ୍ମିଳନୀ" ବ୍ରହ୍ମପୁର ହିଲପାଟଣା ସ୍ଥିତ ବିଜେପି ଜିଲ୍ଲା କାର୍ଯ୍ୟାଳୟ ଠାରେ ଅନୁଷ୍ଠିତ ହୋଇଯାଇଛି । ଏହି "ସାମ୍ବାଦିକ ସମ୍ମିଳନୀରେ" ଭାରତୀୟ ଜନତା ପାର୍ଟିର ଗଞ୍ଜାମ ଜିଲ୍ଲା ସଭାପତି ସରୋଜ ସାବତ,ବରିଷ୍ଠ ନେତା ତଥା ରାଷ୍ଟ୍ରୀୟ ପରିଷଦ ସଭ୍ୟ କାହ୍ନୁ ଚରଣ ପତି, ଆସ୍କା, ବ୍ରହ୍ମପୁର ଏବଂ କନ୍ଧମାଳ ତିନୋଟି ଲୋକସଭା କ୍ଷେତ୍ର ଦାୟୀତ୍ଵରେ ଥିବା ଦଳର ବରିଷ୍ଠ ନେତା ସୁନିଲ କୁମାର ସାହୁ, ବିଜେପି ନେତା ତଥା ବରିଷ୍ଠ ଆଇନଜିବୀ ପୀତବାସ ପଣ୍ଡା,ଜିଲ୍ଲା ସାଧାରଣ ସମ୍ପାଦକ ପ୍ରଭାତ କିରଣ ଷଡ଼ଙ୍ଗୀ ପ୍ରମୁଖ ମଞ୍ଚାସୀନ ଥିଲେ ।

ତେବେ ଗତ ୨୯ ତାରିଖ ଦିନ ଗୋଳନ୍ଥରା ଚଟି ଛକ ନିକଟରେ ଘଟିଥିବା ଏକ ଦୁର୍ଘଟଣାକୁ ବିଜୁ ଜନତା ଦଳର ନେତା ଭୃଗୁ ବକ୍ସିପାତ୍ର ଓ ଲେଲିନ ମହାନ୍ତି ଯେଉଁପରି ଭାବରେ ତାକୁ ଅତି ରଞ୍ଜିତ କରି ରାଜ୍ୟରେ ଆଇନ ଶୃଙ୍ଖଳା ଭୁଷୁଡି ପଡ଼ିଛି, ମନ୍ତ୍ରୀଙ୍କୁ ଏହି ଘଟଣାରେ ଟାଣି ଓଟାରି ସଂପୃକ୍ତ କରିବା ଓ ଦୁଇ ଯୁବ ଆଇନଜୀବୀଙ୍କୁ ଦୁର୍ବୁତ୍ତ ବୋଲି ଗତକାଲିର "ସାମ୍ବାଦିକ ସମ୍ମିଳନୀରେ" କହିବା ବିଜୁ ଜନତା ଦଳର ରାଜନୈତିକ ଦେବାଳିଆ ପଣକୁ ସ୍ପଷ୍ଟ ଇଙ୍ଗିତ କରୁଛି । ଗତ ଜୁଲାଇ ୨୯ ତାରିଖ ଅପରାହ୍ନ ୪ ଘଣ୍ଟ ସମୟରେ ଏକ କାର୍ ଅତି ଦୃତ ଗତିରେ ଆଇନଜୀବୀ ଅଜିତ୍ କରଙ୍କ ମାଁ, ଯିଏ କି ନିଜ ଘର ସମ୍ମୁଖରେ ଛିଡ଼ା ହୋଇଥିଲେ ତାଙ୍କ ଉପରକୁ ମାଡ଼ି ଆସିବାରୁ ସେ ଉକ୍ତ କାର୍ ଧକ୍କାରେ ଛିଟିକି ପଡିଗଲେ । ଏହି ଘଟଣାକୁ ନେଇ ଆଇନଜୀବୀ ଅଜିତ୍ କର ଓ ତାଙ୍କ ମାଁ ନନ୍ଦିନୀ କର ପ୍ରତିବାଦ କରିବାରୁ କାର୍ ରେ ବସିଥିବା ଚାରି ଜଣ ବ୍ୟକ୍ତି ଓ ପଛରେ ଅନ୍ୟ ଏକ କାର୍ ରେ ବସିଥ‌ିବା ଛଅ ଜଣ ମହିଳା ମିଶି ଆଇନଜୀବି ଅଜିତ୍ କର ଓ ତାଙ୍କ ମାଁଙ୍କୁ ଆକ୍ରମଣ କରିଥିଲେ, ଯାହାକି ସ୍ଥାନୀୟ ଗୋଳନ୍ଥରା ଥାନାରେ ଏତଲା ମଧ୍ୟ ହୋଇଛି । ଘଟଣାର ପରବର୍ତି ପର୍ଯ୍ୟାୟରେ ସ୍ଥାନୀୟ ଓ ରାସ୍ତାରେ ଯାଉ ଥିବା ଲୋକମାନେ ଏକାଠି ହୋଇ ଏହାର ପ୍ରତିବାଦ କରିଥିଲେ । ଯାହା ଫଳରେ ଜଣେ ଯୁବକ ଆହତ ହୋଇଥିବା ଥାନାରେ ମଧ୍ୟ ଅଭିଯୋଗ ହୋଇଛି । ଅପରାଧୀଙ୍କୁ ଗତ ଚବିଶ ବର୍ଷ ଧରି ଯେଉଁ ମାନେ ସୁରକ୍ଷା ଦେଇଥିଲେ, ଗତ ନିର୍ବାଚନ ସମୟରେ ରକ୍ତମୁଖା ହୋଇ ବିଜେପି କର୍ମୀ ମାନଙ୍କୁ ମରଣାନ୍ତକ ଆକ୍ରମଣ କରିବା ଘଟଣା ଜିଲ୍ଲାବାସୀ ଭୁଲି ନାହାଁନ୍ତି । ଲୋଚାପଡ଼ା, ହୁଗୁଳାପଟା, କନିସି, ଗୋଳନ୍ଥରା ଗାଁ ମାନଙ୍କରେ ସଶସ୍ତ୍ର ବିଜେଡ଼ି ନେତା ଓ କର୍ମୀ ମାନଙ୍କର ଆକ୍ରମଣ ଘଟଣା ଗୋପାଳପୁରବାସୀ ତଥା ଜିଲ୍ଲାବାସୀ ମନେ ରଖିଛନ୍ତି । ଏହି ପରୀପ୍ରେକ୍ଷୀରେ ମାନ୍ୟବର ମନ୍ତ୍ରୀଙ୍କ ଉପରେ ଯେଉଁ କଟୁ ମନ୍ତବ୍ୟ ବିଜେଡ଼ି ନେତା ମାନେ ଦେଇଛନ୍ତି ତାକୁ ଦଳ ପକ୍ଷରୁ ଦୃଢ଼ ନିନ୍ଦା କରାଯାଇଛି । ସୂର୍ଯ୍ୟ ଯେପରି ସ୍ବଚ୍ଚ ଓ ନିର୍ମଳ, ମାନ୍ୟବର ମନ୍ତ୍ରୀ ସେହିପରି ସ୍ବଚ୍ଚ ନିର୍ମଳ । ରାଜ୍ୟରେ ମୋହନ ମାଝୀ ସରକାରଙ୍କ ଜନମୁଖି କାର୍ଯ୍ୟକୁ ସହ୍ୟ ନ କରି ପାରି ଓ ଗତ ନିର୍ବାଚନରେ ପରାଜୟର ଗ୍ଲାନିକୁ ଭୁଲି ନ ପାରି ବିଜୁ ଜନତା ଦଳର ନେତା ମାନେ ଔଷଧ ବିକଳରେ ତାଟିଆ କାମୁଡୁଛନ୍ତି ବୋଲି ବରିଷ୍ଠ ନେତା ପୀତବାସ ପଣ୍ଡା କହିଛନ୍ତି । ଏହା ସହ କିଛି ଘଟଣାକୁ ଅତିରଞ୍ଜିତ କରି ସାଧାରଣ ଲୋକଙ୍କୁ ଭୁଆଁ ବୁଲେଇବାକୁ ବିଜେଡ଼ି ନେତା ଚେଷ୍ଟା କରୁଛନ୍ତି, ସେମାନେ ଏଥିରେ କେବେ ହେଲେ ସଫଳ ହେବେ ନାହିଁ ବୋଲି ଦଳ ପକ୍ଷରୁ କୁହାଯାଇଛି ।

ଗୋଳନ୍ଥରା ସ୍ଥିତ ବନ୍ଦେ ମାତରଂ ଭବନ ନିକଟରେ ଗଣ୍ଡଗୋଳ ହୋଇଥିବା ଘଟଣା ମଧ୍ଯ ସମ୍ପୂର୍ଣ୍ଣ ମିଥ୍ୟା ଅଟେ ଏବଂ ଗଞ୍ଜାମ ଓକିଲ ସଂଘ ଅଭିଯୁକ୍ତ ମାନଙ୍କ ପାଇଁ ନ ଲଢ଼ିବା କଥା ଯେଉଁ ବିଜୁ ଜନତା ଦଳ ପକ୍ଷରୁ ପ୍ରେସ୍ ନୋଟରେ କୁହା ଯାଇଛି ସେଥିରେ ମଧ୍ୟ କୌଣସି ସତ୍ୟତା ନାହିଁ ବରଂ ଏହି ଘଟଣାରେ ଦୁଇ ଜଣ ଯୁବ ଆଇନଜୀବୀଙ୍କୁ ମିଥ୍ୟାରେ ସଂପୃକ୍ତି କରାଯାଇଛି । ବିଜୁ ଜନତା ଦଳ ତାଙ୍କ ନିଜର ଅନ୍ତର୍କଦଳ ଲୁଚାଇବାକୁ ଯାଇ ଏଭଳି ମିଥ୍ୟା ଆରୋପ କରୁଛି । ଏଣୁ ବିଜୁ ଜନତା ଦଳର ନେତା ମାନେ ସତ୍ୟକୁ କେତେ ବିଦ୍ରୁପ କଲେ ମଧ୍ୟ ଏଥିରେ ସଫଳ ହୋଇପାରିବେ ନାହିଁ ବୋଲି ବିଜେପି ରାଷ୍ଟ୍ରୀୟ ପରିଷଦ ସଭ୍ୟ କାହ୍ନୁ ଚରଣ ପତି କହିଛନ୍ତି । ଆଜିର ଏହି "ସାମ୍ବାଦିକ ସମ୍ମିଳନୀକୁ' ରାଜ୍ୟ ଯୁବମୋର୍ଚ୍ଚା ସମ୍ପାଦକ ତୁତୁନ୍ ପାତ୍ର,ଜିଲ୍ଲା ଯୁବମୋର୍ଚ୍ଚା ସଭାପତି ଶିବ ଶଙ୍କର ନାୟକ,ଜିଲ୍ଲା ଓବିସି ମୋର୍ଚ୍ଚା ସଭାପତି ମଦନ ମୋହନ ପାତ୍ର ପ୍ରମୁଖ ଉପସ୍ଥିତ ରହି ପରିଚାଳନାରେ ସହଯୋଗ କରିଥିଲେ ।

ବ୍ରହ୍ମପୁର ( ଦ କୁଇଭର ) ;ବହୁ ବାସହୀନ ପରିବାର ପାଇଁ ମହାନଗର ନିଗମ ପକ୍ଷରୁ ରହିବା ନିମନ୍ତେ ସୁବିଧା ଯୋଗାଇ ଦିଆଯାଇଛି। କିନ୍ତୁ କିଛି ୱାର୍ଡର ବିଭିନ୍ନ ସ୍ଥାନରେ ବହୁତଳ ବିଶିଷ୍ଟ କୋଠା ନିର୍ମାଣ ହୋଇଛି।ଏହାକୁ ଯୋଗ୍ୟ ହିତାଧିକାରୀ ଚୟନ କରାଯାଇ ସେମାନଙ୍କ ମଧ୍ୟର ବଣ୍ଟନ ହୋଇଥିଲା। ମହାନଗର ନିଗମ ୦୪ ନଂ ୱାର୍ଡର ଅଟୋନଗର ନିକଟରେ ଥିବା ଆପାର୍ଟମେଣ୍ଟ ବାସିନ୍ଦା ଭୋଗୁଛନ୍ତି ଅନେକ ସମସ୍ୟା। ଗତତିନି ବର୍ଷ ହେବ ଏହି ଆପାର୍ଟମେଣ୍ଟରେ ୩ଗୋଟି ସେଡରେ ୭୦ ପରିବାର ରହୁଛନ୍ତି। ଏଠାରେ ୬ ଗୋଟି ସେଡ ରହିଥିବା ବେଳେ ଯଥା B,C ଏବଂ D ବିଲ୍ଡିଂରେ ଲୋକେ ରହିଆସିଛନ୍ତି।ପ୍ରଥମରୁ ରହିଛି ଜଳ ଯୋଗାଣ ସମସ୍ୟା ଯାହାକି ଦୀର୍ଘ ଦିନ ହେବ ଅଭିଯୋଗ ପରେ ମଧ୍ୟ ତାହା ସମାଧାନ ହେଉନାହିଁ, ମହା ନଗର ନିଗମ ଅଞ୍ଚଳରେ ପିଏଚଡି ପକ୍ଷରୁ ଦୈନିକ ଛଡ଼ା ଯାଉଥିବା ପାଣି ସଂରକ୍ଷଣ ବ୍ୟବସ୍ତାରେ ରହିଛି ତ୍ରୁଟି। ଏହା ସହ ଉପର ମହଲାରେ ରହୁଥିବା ଲୋକେ ପାଣି ନ ଆସିଲେ ଅଧିକ ହେଉଛି ସମସ୍ୟା।ସର୍ବଦା ମହାନଗର ନିଗମ ପରିମଳ ଓ ପରିଚ୍ଛନ୍ନତା ଉପରେ ଗୁରୁତ୍ୱ ରଖିଥିବା ବେଳେ ଏଠାରେ କିନ୍ତୁ ତାହାର ବାଟବଣା ହେଉଥିବା ଦେଖା ଯାଉଛି। କୋଠାର ଚାରିପାଖେ ଡ୍ରେନେଜ୍ ବ୍ୟବସ୍ଥା ରହିଥିଲା ମଧ୍ୟ ସେଠାରୁ ଜଳ ନିଷ୍କାସନ ପ୍ରକ୍ରିୟା ଠପ ହୋଇଛି। କୋଠର ରକ୍ଷଣା ବେକ୍ଷଣ ପାଇଁ ଆର୍ଥିକ ଅନୁଦାନ ଅର୍ଥ ଠିକ୍ ବ୍ୟବହାର ହେଉନାହିଁ। ଯେପରିକି ବିଲ୍ଡିଂର ରଙ୍ଗମାରିବା ପାଇଁ ଠିକାସଂସ୍ଥା ପକ୍ଷରୁ କାମ ଚାଲିଥିଲେ ବି ସେଠାରେ ଅନିୟମିତତା ରହିଥିବା ଅଭିଯୋଗ ରହିଛି।ଏହାସହ ଠିକ ଭାବେ ଏଠାକୁ ଆବର୍ଜନା ନେବା ଗାଡି ନିୟମିତ ଆସୁନଥିବା ବାସିନ୍ଦା ପ୍ରତିକ୍ରିୟା ରଖିଛନ୍ତି। ଛୋଟ ପିଲାଙ୍କ ପାଇଁ ଏକ ଅଙ୍ଗନବାଡ଼ି କେନ୍ଦ୍ର ସ୍ଥାପନ କରାଗଲେ ପରିବାର ଲୋକେ ଉପକୃତ ହୋଇପାରିବେ ବୋଲି ମଧ୍ୟ ମହିଳା କହିଛନ୍ତି।ସୋମବାର ଦିନ ସ୍ଥାନୀୟ ବାସିନ୍ଦା ସାମୁହିକ ଭାବରେ ଏହି ସମସ୍ତ ସମସ୍ୟା ନେଇ ମେୟରଙ୍କ ନିକଟରେ ଦ୍ବାରସ୍ଥ ହୋଈ ଏକ ଲିଖିତ ଅଭିଯୋଗ ପତ୍ର ପ୍ରଦାନ କରିଛନ୍ତି। ଏହା ଗ୍ରହଣ ପରେ ମହାନଗର ନିଗମ ମେୟର, ଆପାର୍ଟମେଣ୍ଟ ବାସିନ୍ଦାଙ୍କ ସମସ୍ତ ସମସ୍ୟାର ଖୁବ୍ କମ୍ ଦିନ ମଧ୍ୟରେ ସମସ୍ତ ବିଭାଗ ସହ ସମୀକ୍ଷା କରାଯାଇ ସମାଧାନ ହେବ ବୋଲି ମେୟର ସଂଘମିତ୍ରା ଦଳେଇ ପ୍ରତିକ୍ରିୟା ରଖିଛନ୍ତି।

ବାଲେଶ୍ୱର( ଦ କୁଇଭର ):- ସତ ଖୋଲିବେ ସିକ୍ୟୁରିଟି ଗାର୍ଡ । କ୍ରାଇମବ୍ରାଞ୍ଚ ର ତଦନ୍ତର ସମ୍ମୁଖୀନ ହେଲେ ଏଫ୍ ଏମ କଲେଜର ସିକ୍ୟୁରିଟି ଗାର୍ଡ । କଲେଜ୍ ଫାଷ୍ଟ ଗେଟରେ କାର୍ଯ୍ୟରତ ସିକ୍ୟୁରିଟି ଗାର୍ଡଙ୍କୁ ଝାଳ ବୁହା ପଚରାଉଚରା କରିଛି କ୍ରାଇମ୍ ବ୍ରାଞ୍ଚ । ଘଟଣା ଦିନ କେତେବେଳେ କାର୍ଯ୍ୟରେ ଯୋଗ ଦେଇଥିଲେ ସିକ୍ୟୁରିଟି ଗାର୍ଡ ।ଛାତ୍ରୀ ଜଣକ କେଉଁ ସମୟରେ କଲେଜ୍ କ୍ୟାମ୍ପସ କୁ ପଶିଲେ । ଛାତ୍ରୀ ଙ୍କ ସାଙ୍ଗରେ କିଏ କିଏ ଥିଲେ । କେଉଁ ଛାତ୍ର ମାନେ ଛାତ୍ରୀଙ୍କ ସହ ଥିଲେ । କେତେ ଜଣ ଅଣଛାତ୍ର ଘଟଣା ଦିନ କ୍ୟାମ୍ପସ ମଧ୍ୟରେ ଥିଲେ । ସବୁ ଛାତ୍ର ମାନେ ୟୁନିଫର୍ମ ରେ ଥିଲେ ନା ନର୍ମାଲ ଡ୍ରେସ୍ ରେ ଥିଲେ ।ଏସବୁ ବିଷୟକୁ ନେଇ ବହୁ ସମୟଧରି ପଚରା ଉଚୁରା କରିଛି କ୍ରାଇମବ୍ରାଞ୍ଚ । ମେଇନ ଗେଟ୍ ସହ , ପ୍ରିଂସିପାଲ୍ ଚ୍ୟମ୍ବର ଓ କ୍ୟାମ୍ପସ ରେ ଡ୍ୟୁଟି କରୁଥିବା ୩ ଜଣ ସିକ୍ୟୁରିଟି ଗାର୍ଡ ଆଜି କ୍ରାଇମବ୍ରାଞ୍ଚ ଜେରାର ସମ୍ମୁଖୀନ ହୋଇଛନ୍ତି ।

ଦ କୁଇଭର ବ୍ୟୁରୋ :- ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆଜି ଲୋକସେବା ଭବନ ଠାରେ ଗୋଦାବରୀଶ ମିଶ୍ର ଆଦର୍ଶ ପ୍ରାଥମିକ ବିଦ୍ୟାଳୟ କାର୍ଯ୍ୟକ୍ରମ ସମ୍ପର୍କରେ ସମୀକ୍ଷା କରିଛନ୍ତି । ବୈଠକରୁ ଜଣାଯାଇଛିଯେ, ପ୍ରଥମ ପର୍ଯ୍ୟାୟରେ ୮୩୫ ଆଦର୍ଶ ବିଦ୍ୟାଳୟ ନିର୍ମାଣ ହେବ । ଏହି ବିଦ୍ୟାଳୟ ଗୁଡିକ ରାଜ୍ୟର ଉଚ୍ଚ ବିଦ୍ୟାଳୟ ପାଇଁ ଏକ ଫିଡର ସ୍କୁଲ ଭାବରେ କାର୍ଯ୍ୟ କରିବ । ପ୍ରତ୍ୟେକ ବିଦ୍ୟାଳୟ ପାଇଁ ୭ କୋଟି ଟଙ୍କା ପର୍ଯ୍ୟନ୍ତ ବ୍ୟୟ ଅଟକଳ ରଖା ଯାଇଛି ।ଯେଉଁ ସ୍କୁଲରେ ୧୦୦ରୁ ଅଧିକ ଛାତ୍ରଛାତ୍ରୀ ଥିବେ, ୨ ଏକରରୁ ଅଧିକ ଜମି ଉପଲବ୍ଧ ହେଉଥିବ, ଏବଂ ଶିଶୁ ବାଟିକା ଠାରୁ ଆରମ୍ଭ କରି ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପାଠ ପଢ଼ା ହେଉଥିବ, ସେହି ସ୍କୁଲଗୁଡିକୁ ଗୋଦାବରୀଶ ମିଶ୍ର ଆଦର୍ଶ ପ୍ରାଥମିକ ବିଦ୍ୟାଳୟ ଭାବେ ନିର୍ମାଣ କରାଯିବ।ବୈଠକରେ ମୁଖ୍ୟମନ୍ତ୍ରୀ, ପ୍ରତ୍ୟେକ ଗ୍ରାମ ପଞ୍ଚାୟତର ହେଡକ୍ୱାର୍ଟର୍ସରେ ଭୌଗୋଳିକ ଅବସ୍ଥିତିକୁ ଦୃଷ୍ଟିରେ ରଖି ଗୋଟିଏ ଲେଖାଏଁ ଆଦର୍ଶ ସ୍କୁଲ ନିର୍ମାଣ କରାଯିବ ଏବଂ ସାମାଜିକ-ଅର୍ଥନୈତିକ ପୃଷ୍ଠଭୂମିରେ ଜାତୀୟ ସ୍ତରୀୟ ଗୁଣାତ୍ମକ ଶିକ୍ଷା ପ୍ରଦାନ କରାଯିବା ଏବଂ ଛାତ୍ରଛାତ୍ରୀଙ୍କ ଯିବା ଆସିବା ସୁବିଧା ଉପରେ ଗୁରୁତ୍ୱାରୋପ କରିଥିଲେ । ବିଶେଷ କରି ଦୁର୍ଗମ ଓ ଦୂର ଅଂଚଳରେ ରହୁଥିବା ପିଲାଙ୍କ ଯିବା ଆସିବା ପାଇଁ ମାଗଣାରେ ପରିବହନ ସୁବିଧା ଯୋଗାଇ ଦେବା ପାଇଁ ମୁଖ୍ୟମନ୍ତ୍ରୀ କହିଥିଲେ ।

ପର୍ଯ୍ୟାପ୍ତ ଜମି ଥିବା ସ୍କୁଲଗୁଡ଼ିକୁ ଚୟନ କରାଯାଇ, ଭବିଷ୍ୟତରେ ହାଇସ୍କୁଲ ସ୍ତରକୁ ଅପଗ୍ରେଡ୍ ପାଇଁ ଏହାକୁ ଉନ୍ନତିକରଣ କରାଯିବ, ପ୍ରଯୁକ୍ତିବିଦ୍ୟା ବ୍ୟବହାର କରି ଶିକ୍ଷା ଫଳାଫଳକୁ ଉନ୍ନତ କରିବା ଏବଂ ଶିକ୍ଷକ ଚୟନ ପ୍ରକ୍ରିୟାରେ ଉନ୍ନତ ପଦକ୍ଷେପ ଗ୍ରହଣ କରିବା ପାଇଁ ମୁଖ୍ୟମନ୍ତ୍ରୀ ବିଭାଗୀୟ ସଚିବ ଓ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ ।ଭିତ୍ତିଭୂମିରେ ଉନ୍ନତି ଆଣିବା, ଆଧୁନିକ ଶିକ୍ଷାଦାନ ପଦ୍ଧତି ଗ୍ରହଣ କରିବା ଏବଂ ଅଭିଭାବକ, ପୂର୍ବତନ ଛାତ୍ର ଏବଂ ସ୍ଥାନୀୟ ଅଂଶୀଦାରଙ୍କ ସମ୍ପୃକ୍ତିକୁ ପ୍ରୋତ୍ସାହିତ କରିବା ଜାତୀୟ ଶିକ୍ଷା ନୀତି ୨୦୨୦( NEΡ 2020 ) ସହିତ ସମନ୍ୱୟ ରଖି, ତୃତୀୟ ଶ୍ରେଣୀ ସୁଦ୍ଧା ମୌଳିକ ଶିକ୍ଷାଗତ ଦକ୍ଷତା ହାସଲ କରିବା ପାଇଁ ମୂଳଦୁଆ ସାକ୍ଷରତା ଏବଂ ସଂଖ୍ୟାକୁ ସୁଦୃଢ଼ କରିବା ଉପରେ ମୁଖ୍ୟମନ୍ତ୍ରୀ ଗୁରୁତ୍ୱାରୋପ କରିଥିଲେ ।ଏହି ବିଦ୍ୟାଳୟ ଗୁଡିକରେ STEM (Science, Technology, Engineering, and Mathematics) ପଦ୍ଧତିରେ ଶିକ୍ଷା, ବିଜ୍ଞାନ, ପ୍ରଯୁକ୍ତିବିଦ୍ୟା, ଇଞ୍ଜିନିୟରିଂ ଏବଂ ଗଣିତ ଶିକ୍ଷା ସହ ବୃତ୍ତିଗତ ଦକ୍ଷତା ଓ ଅଭିଜ୍ଞତାମୂଳକ ଶିକ୍ଷା ସମେତ ବହୁବିଧ ଶିକ୍ଷାକୁ ପ୍ରାଧାନ୍ୟ ଦେବା ପାଇଁ ଛାତ୍ରଙ୍କ ସର୍ବାଙ୍ଗୀନ ଅଭିବୃଦ୍ଧିକୁ ସମର୍ଥନ କରିବା ପାଇଁ ସୃଜନଶୀଳତା, ସମାଲୋଚନାମୂଳକ ଚିନ୍ତାଧାରା ଏବଂ ଜୀବନ କୌଶଳକୁ ଉତ୍ସାହିତ କରିବା ପାଇଁ ରାଜ୍ୟସରକାରଙ୍କ ପ୍ରୟାସ ବିଷୟରେ ଏହି ବୈଠକରେ ଆଲୋଚନା ହୋଇଥିଲା ।

ଉକ୍ତ ବୈଠକରେ ସ୍କୁଲ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ, ମୁଖ୍ୟ ଶାସନ ସଚିବ ମନୋଜ ଆହୁଜା, ଉନ୍ନୟନ କମିଶନର ଅନୁ ଗର୍ଗ, ଅର୍ଥ ବିଭାଗ ପ୍ରମୁଖ ଶାସନ ସଚିବ ସଂଜୀବ ମିଶ୍ର, ମୁଖ୍ୟମନ୍ତ୍ରୀଙ୍କ ପ୍ରମୁଖ ଶାସନ ସଚିବ ଶାଶ୍ୱତ ମିଶ୍ର, ସ୍କୁଲ ଓ ଗଣଶିକ୍ଷା ବିଭାଗ କମିଶନର ତଥା ସଚିବ, ଶାଳିନୀ ପଣ୍ଡିତ, ଗ୍ରାମ୍ୟ ଉନ୍ନୟନ ବିଭାଗ ସଚିବ ଯାମିନୀ ଷଡ଼ଙ୍ଗୀ, ଓସେପା ନିର୍ଦ୍ଦେଶିକା, ଅନନ୍ୟା ଦାସ ପ୍ରମୁଖ ଉପସ୍ଥିତ ଥିଲେ ।

ବ୍ରହ୍ମପୁର( ଦ କୁଇଭର ):- ରାଜ୍ୟରେ ଅହେତୁକ ବୃଦ୍ଧି ପାଇଥୁବା ଛାତ୍ରୀ ଓ ନାରୀଙ୍କ ଉପରେ ନିର୍ଯାତନା ଓ ଅପରାଧ ବିରୁଦ୍ଧରେ ତ୍ବରିତ ଉପଯୁକ୍ତ ପୁଲିସ କାର୍ଯ୍ୟାନୁଷ୍ଠାନ ଦାବି ନେଇ ଆଜି ଅର୍ଥାତ ଗୁରୁବାର ଗୋପାଳପୁର ନିର୍ବାଚନ ମଣ୍ଡଳୀ ଅଧୀନ ସମସ୍ତ ବିଶ୍ୱବିଦ୍ୟାଳୟ ଏବଂ ମହାବିଦ୍ୟାଳୟର ଛାତ୍ରଛାତ୍ରୀଙ୍କ ତରଫରୁ ଗୋପାଳପୁର ଥାନା ଅଧିକାରୀଙ୍କ ମାଧ୍ୟମରେ ଓଡ଼ିଶା ପୁଲିସ ମହାନିର୍ଦ୍ଦେଶକଙ୍କୁ ଦାବିପତ୍ର ପ୍ରଦାନ କରାଯାଇଛି l

ସମ୍ପ୍ରତି ରାଜ୍ୟରେ ଛାତ୍ରୀ ଓ ନାରୀ ନିର୍ଯାତନା ଅହେତୁକ ବୃଦ୍ଧି ପାଇଥିବା ବେଳେ, ଆମେ ଛାତ୍ରଛାତ୍ରୀମାନେ, ଏହି ସ୍ମାରକପତ୍ର ମାଧ୍ୟମରେ ଆପଣଙ୍କ ସମ୍ମୁଖରେ ଗଭୀର ଚିନ୍ତା ଓ ନିରାଶା ବ୍ୟକ୍ତ କରୁଛୁ। ଗତ କିଛି ଦିନରେ ରାଜ୍ୟର ଛାତ୍ରୀ ଓ ନାରୀମାନେ ଯେପରି ନିର୍ଯାତନାର ଶିକାର ହେଉଛନ୍ତି, ତାହା ରାଜ୍ୟର ସମଗ୍ର ଆମ ଛାତ୍ର ସମାଜକୁ ସ୍ଥମ୍ବିଭୂତ କରିଛି। ଅସଦାଚରଣ, ଅପହରଣ, ଦୁଷ୍କର୍ମ, ଗଣଦୁଷ୍କର୍ମ, ହତ୍ୟା ଆଦି ଘଟଣା ପ୍ରତିଦିନ ଖବରକାଗଜର ଶିରୋନାମା ହେଉଛି। ନିୟମିତ ଭାବେ ଏହିଭଳି ହୃଦୟ ବିଦାରକ ଘଟଣାମାନ ଲୋକଲୋଚନକୁ ଆସୁଥିବାରୁ, ଏକ ଭୟର ବାତାବରଣ ସୃଷ୍ଟି ହୋଇଛି, ଯେଉଁ କାରଣରୁ ଛାତ୍ରୀ ଓ ମହିଳା ମାନେ ଏକୁଟିଆ ଘରୁ ବାହାରିବାକୁ ନିରାପଦ ମଣୁ ନାହାନ୍ତି।

ଗୋପାଳପୁର ବିଚ୍‌ରେ ଏକ କଲେଜ ଛାତ୍ରୀଙ୍କୁ ଗଣଦୁଷ୍କର୍ମ: ଏହି ଘଟଣା ମାନବତା ଉପରେ ଏକ ଅତ୍ୟନ୍ତ ନିନ୍ଦନୀୟ ଆକ୍ରମଣର ଅତୁଟ ପ୍ରମାଣ ଦେଉଛି । ସେହିପରି ଏଫ୍ଏମ୍ କଲେଜ, ବାଲେଶ୍ଵରରେ ଏକ ଛାତ୍ରୀଙ୍କ ଆତ୍ମଦାହ କରିବା ଘଟଣା: ଛାତ୍ରୀ ଜଣକ କଲେଜର ଜଣେ ଅଧ୍ୟାପକଙ୍କ ଦ୍ଵାରା ଅସଦାଚରଣର ଶିକାର ହୋଇଥିବା ଅଭିଯୋଗ ଆଣି ନ୍ୟାୟ ଭିକ୍ଷା କରିଥିଲେ। କଲେଜରୁ ତାଙ୍କୁ ନ୍ୟାୟ ମିଳିବ ନାହିଁ ବୋଲି ଅନୁମାନ କରି ସେ ସ୍ଥାନୀୟ ଥାନା, ସ୍ଥାନୀୟ ଏସପି, ସ୍ଥାନୀୟ ବିଧାୟକଙ୍କ ଦୃଷ୍ଟି ଆକର୍ଷଣ କରିବା ସହିତ ସାମାଜିକ ଗଣମାଧ୍ୟମ ‘ଏକ୍ସ’ରେ ରାଜ୍ୟ ଉଚ୍ଚଶିକ୍ଷା ମନ୍ତ୍ରୀ, କେନ୍ଦ୍ର ଶିକ୍ଷାମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କ ସହଯୋଗ ଲୋଡ଼ିଥିଲେ । କିନ୍ତୁ, ନ୍ୟାୟ ପାଇବାରେ ବିଫଳ ହେବା ପରେ ସେ ଆତ୍ମଦାହ ଭଳି ଚରମ ନିଷ୍ପରି ନେଇଥିଲେ । ଏହି ଦୁଃଖଦ ଘଟଣା ସୂଚାଇ ଦେଉଛି ଯେ, ଏକ ଅଭିଯୋଗକୁ ଗମ୍ଭୀରତାର ସହ ନ ନେବା, ନ୍ୟାୟ ପ୍ରଦାନରେ ଟାଳଟୁଳ ନୀତି ଅବଲମ୍ବନ ହେବା ଓ ଅନ୍ୟାୟକୁ ପ୍ରଶ୍ରୟ ଦେବାର ପରିଣାମ କେତେ ଭୟଙ୍କର ହୁଏ ।ପୁରୀ ଜିଲ୍ଲା ବଳଙ୍ଗାରେ ଏକ ନାବାଳିକାକୁ ଳିଅନ୍ତା ଜାଳିଦେବା ପାଇଁ ଉଦ୍ୟମ କରାଯିବା: ଏହି ଅମାନବୀୟ କାର୍ଯ୍ୟ ସମାଜରେ ଭୟର ବାତାବରଣ ସୃଷ୍ଟି କରିଛି।

ବିଜେପି ସରକାରରେ ଗତ ୧୩ ମାସ ମଧ୍ୟରେ ରାଜ୍ୟରେ ଘଟିଥିବା ପ୍ରମୁଖ ମହିଳା ଓ ଛାତ୍ରୀ ନିର୍ଯାତନା ଘଟଣାମାନ ହେଲା: (ସେପ୍ଟେମ୍ବର ୧୭, ୨୦୨୪)ରେ ନବରଙ୍ଗପୁର ତେନ୍ତୁଳିଖୁଣ୍ଟିରେ ଆଦିବାସୀ ନାବାଳିକାକୁ ଦୁଷ୍କର୍ମ ପରେ ହତ୍ୟା, (ସେପ୍ଟେମ୍ବର ୨୨, ୨୦୨୪)ରେ ଭୁବନେଶ୍ଵର, ଭରତପୁର ପୋଲିସ୍ ଷ୍ଟେସନରେ ମହିଳାଙ୍କୁ ଦୁବ୍ୟବହାର, ଅକ୍ଟୋବର ୨୩, ୨୦୨୪ରେ କୁଚିଣ୍ଡାରେ ଦଳିତ ନାବାଳିକାକୁ ଗଣଦୁଷ୍କର୍ମ, (ମେ' ୩, ୨୦୨୫)ରେ କୋରାପୁଟ ଲମତାପୁଟରେ ଥିବା ଅନୁସୂଚିତ ଜାତି ଓ ଜନଜାତି ସ୍କୁଲରେ ନାବାଳିକାକୁ ଦୁଷ୍କର୍ମ, (ଜୁନ ୧୭, ୨୦୨୫)ରେ କେନ୍ଦୁଝର ତେନ୍ତଳାପଶିରେ ଆଦିବାସୀ ନାବାଳିକାକୁ ଗଣଦୁଷ୍କର୍ମ ଓ ହତ୍ୟା, (ଜୁନ୍ ୨୪, ୨୦୨୫)ରେ ବ୍ରହ୍ମପୁରରେ ବିଜେପିର ଜଣେ ସକ୍ରିୟ ସଦସ୍ୟ ତଥା ହୋମିଓପାଥି ଡାକ୍ତରଙ୍କ ଦ୍ବାରା ନାବାଳିକା ଦୁଷ୍କର୍ମର ଶିକାର, (ଜୁଲାଇ ୨୨, ୨୦୨୫)ରେ ମାଲକାନଗିରିରେ ଗୋଟିଏ ଦିନରେ ଦଳିତ ନାବାଳିକାକୁ ପ୍ରଥମେ ୩ ଜଣ ଗଣଦୁଷ୍କର୍ମ କରିବା ପରେ ଦ୍ବିତୀୟ ଥର ଟ୍ରକ ଡ୍ରାଇଭର ଦ୍ବାରା ଦୁଷ୍କର୍ମର ଶିକାର। ଏହି ଘଟଣାଗୁଡ଼ିକ ବ୍ୟତୀତ (ଜୁଲାଇ ୧୮, ୨୦୨୫)ରେ ରାୟଗଡ଼ା ଜିଲ୍ଲା ବିଷମକଟକ ଥାନା ଅଞ୍ଚଳର ଡୁକୁମ ଗ୍ରାମରେ ଥିବା ଅନୁସୂଚିତ ଜାତି ଓ ଜନଜାତି ସ୍କୁଲ ଛାତ୍ରୀ ନିବାସରେ ଛାତ୍ରୀ ଗର୍ଭବତୀ, (ଜୁଲାଇ ୨୦, ୨୦୨୫)ରେ ମୟୂରଭଞ୍ଜ ବାଙ୍ଗିରିପୋଷିରେ ଓ କନ୍ଧମାଳ ତୁମୁଡ଼ିବନ୍ଧରେ ଥିବା ଅନୁସୂଚିତ ଜାତି ଓ ଜନଜାତି ସ୍କୁଲ ଛାତ୍ରୀ ନିବାସରେ ଛାତ୍ରୀ ଗର୍ଭବତୀ, (ଜୁଲାଇ ୨୬, ୨୦୨୫)ରେ କନ୍ଧମାଳ ତୁମୁଡ଼ିବନ୍ଧରେ ଥିବା ଅନୁସୂଚିତ ଜାତି ଓ ଜନଜାତି ସ୍କୁଲ ଛାତ୍ରୀ ନିବାସରେ ୨ ଜଣ ଦଶମ ଶ୍ରେଣୀ ଛାତ୍ରୀ ଗର୍ଭବତୀ ହୋଇଛନ୍ତି । ଏହିସବୁ ଘଟଣା କେବଳ ନାରୀଙ୍କ ସୁରକ୍ଷା ଉପରେ ନୁହେଁ, ବରଂ ସାମୁଦାୟିକ ବିଶ୍ଵାସ, ଶିକ୍ଷାସ୍ଥଳର ସୁରକ୍ଷା ଓ ଆଇନ ଏବଂ ଶାସନ ବ୍ୟବସ୍ଥା ଉପରେ ପ୍ରଶ୍ନ ଉଠାଇଛି।

ତେଣୁ ଆମେ ଦାବି କରୁଛୁ, ଉପରୋକ୍ତ ସମସ୍ତ ଘଟଣାର ନିରପେକ୍ଷ ଓ ତ୍ବରିତ ତଦନ୍ତ କରାଯାଇ ପୀଡ଼ିତାଙ୍କୁ ନ୍ୟାୟ ପ୍ରଦାନ କରାଯାଉ ।ଦୋଷୀମାନଙ୍କ ଉପରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ । ଶିକ୍ଷା ସ୍ଥଳଗୁଡ଼ିକରେ ଛାତ୍ରୀମାନଙ୍କ ପାଇଁ ସୁରକ୍ଷା ବୃଦ୍ଧି କରିବାକୁ ଦୃଢ଼ ପଦକ୍ଷେପ ନିଆଯାଉ । ନାରୀ ସୁରକ୍ଷା ପାଇଁ ଏକ ଅଧିକ କ୍ରିୟାଶୀଳ ଓ ପ୍ରଭାବଶାଳୀ ମେକାନିଜମ୍ ଗଠନ କରାଯାଉ ବୋଲି ଛାତ୍ରଛାତ୍ରୀମାନେ ଦାବି କରିଥିଲେ l

ବ୍ରହ୍ମପୁର ( ଦ କୁଇଭର ):- ଖେଲୋ ଇଣ୍ଡିଆ ଦ୍ବାରା ଭଦ୍ରକ ଠାରେ ଆୟୋଜିତ ରାଜ୍ୟସ୍ତରୀୟ ତାଇକୋଣ୍ଡ ପ୍ରତି ଯୋଗିତାରେ ବ୍ରହ୍ମପୁର ମୀନାକ୍ଷୀ ନଗର୍ ସ୍ଥିତ ସେଣ୍ଟ ଜାଭିୟର୍ସ ସ୍କୁଲ ର ଛାତ୍ରୀ ମାନେ ସଫଳତା ଅର୍ଜନ କରିଛନ୍ତି । ଏଥିଲାଗି ସମସ୍ତ ଛାତ୍ରୀ ମାନଙ୍କୁ ସ୍କୁଲ ଚେୟାରମାନ ଅଧ୍ୟକ୍ଷ କେ. ସି.ପଣ୍ଡା , ନିର୍ଦ୍ଦେଶକ କୁନାଲ କୌଶିକ ପଣ୍ଡା , ରାହୁଲ ରାଜ୍ ପଣ୍ଡା ଓ ଆମ୍ବପୁଆ ସ୍କୁଲ ଅଧ୍ୟକ୍ଷା ଉଷା ପଟ୍ଟନାୟକ ଶୁଭକାମନା ସହ ଶୁଭେଛା ଜଣାଇଛନ୍ତି । ଏହି ପ୍ରତି ଯୋଗିତାରେ ଜାଭିୟର୍ସ ସ୍କୁଲ ର ୧୧ଜଣ ଛାତ୍ରୀ ଅଂଶ ଗ୍ରହଣ କରିଥିଲେ। ସେମାନଙ୍କ ମଧ୍ୟରୁ ୬ ଜଣ ଛାତ୍ରୀ ୮ଟି କାଂସ୍ୟ ପଦକ ହାସଲ କରି ସ୍କୁଲ ର ଗୌରବ ବୃଦ୍ଧି କରିଛନ୍ତି । ତେଜଲ୍ ପାଣିଗ୍ରାହୀ ୨ଟି କାଂସ୍ୟ, ସୁଧାମୟୀ ପାଢ଼ୀ ୨ଟି କାଂସ୍ୟ, ସିମ୍ରନ୍ ଗୌଡ଼ , ଡି. ଅଖିଳ, ସସ୍ମିତା, ସମିତା ପ୍ରମୁଖ ଗୋଟିଏ ଗୋଟିଏ କାଂସ୍ୟ ପଦକ ହାସଲ କରି ଏପରି ସଫଳତା ହାସଲ କରିଛନ୍ତି । କୋଚ କିରଣ ନାୟକ ଛାତ୍ରୀ ମାନଙ୍କୁ ତାଲିମ୍ ଦେଇଥିଲେ। ଛାତ୍ରୀ ମାନଙ୍କ ସଫଳତା ଲାଗି ସ୍କୁଲ ଶିକ୍ଷକ ଶିକ୍ଷୟତ୍ରୀ ମାନେ ଖୁସି ଅନୁଭବ କରିବା ସହ ଛାତ୍ରୀ ମାନଙ୍କୁ ଅଭିନନ୍ଦନ ଜଣାଇଛନ୍ତି ।