ବିଶ୍ୱ ଜଳିଲାଣି

ଦ କୁଇଭର ବ୍ୟୁରୋ :- ଆଜି ପବିତ୍ର ଇଦ୍ ପର୍ବ, ମୁସଲମାନ ସଂପ୍ରଦାୟର ପ୍ରମୁଖ ପର୍ବ। ମାସେ ବ୍ୟାପି ରୋଜା ରଖିବା ପରେ ଆଜି ଇଦ-ଉଲ-ଫିତର ପାଳିବେ ମୁସଲମାନ ଧର୍ମାବଲମ୍ବୀ। ଭୋରରୁ ମୁସଲମାନ ସମ୍ପ୍ରଦାୟ ପକ୍ଷରୁ ମସଜିଦରେ ଉପସ୍ଥିତ ରହି ସମୂହ ନମାଜ ପାଠ ହୋଇଛି। ଇସଲାମିକ ମାନ୍ୟତା ଅନୁଯାୟୀ, ଇଦ-ଉଲ୍-ଜୁହା ହଜରତ ଇବ୍ରାହିମଙ୍କ ତ୍ୟାଗକୁ ମନେପକାଇ ଏହି ପର୍ବ ପାଳନ କରାଯାଇଥାଏ। ସେପଟେ ରାଜ୍ୟରେ ଆଜି ଇଦ୍-ଉଲ-ଫିତର ପାଳନ ନେଇ ଅଞ୍ଜୁମାନ ଇସଲାମିଆ ଅହଲେ ସୁନ୍ନତ୍ ଅଲ୍ ଜମାତ କଟକ କାର୍ଯ୍ୟାଳୟ ପକ୍ଷରୁ ଘୋଷଣା କରାଯାଇଛି। ଗତକାଲି ସମ୍ବଲପୁର ଓ ସୁନ୍ଦରଗଡରେ ଚାନ୍ଦ ଦେଖାଯିବା ଯୋଗୁଁ ରାଜ୍ୟରେ ଇଦ ପାଳନ ପାଇଁ ନିଷ୍ପତ୍ତି ହୋଇଛି। ତେବେ ଏପଟେ ଇଦ୍ ଓ ଆଗକୁ ଆସୁଥିବା ଶ୍ରୀରାମନବମୀ ପାଇଁ ପୋଲିସର ଫ୍ଲାଗ ମାର୍ଚ୍ଚ ବିଭିନ୍ନ ସ୍ଥାନରେ ଦେଖିବାକୁ ମିଳିଛି l

ଦ କୁଇଭର ବ୍ୟୁରୋ :- ଆଜି ଉତ୍କଳ ଦିବସ । ପ୍ରତ୍ୟେକ ଓଡ଼ିଆଙ୍କ ପାଇଁ ଏହା ଗର୍ବ ଓ ଗୌରବର ଦିନ । ୧୯୩୬ ମସିହା, ଏପ୍ରିଲ ୧ ତାରିଖରେ ଓଡ଼ିଶାକୁ ମିଳିଥିଲା ଦେଶର ପ୍ରଥମ ଭାଷାଭିତିକ ରାଜ୍ୟ ମାନ୍ୟତା । ଏହାରି ଭିତରେ ୮୯ ବର୍ଷ ପୂର୍ଣ୍ଣ ହୋଇଛି । ସ୍ୱତନ୍ତ୍ର ପ୍ରଦେଶ ଭାବେ ଓଡ଼ିଶାକୁ ମିଳିଥିବା ମାନ୍ୟତାକୁ ଅତ୍ୟନ୍ତ ଆନନ୍ଦ ଉଲ୍ଲାସ ସହ ଉତ୍କଳ ଦିବସ ଭାବେ ପାଳନ କରାଯାଇଆସୁଛି ।

ଏହି ଦିନକୁ ସ୍ମରଣୀୟ କରିବା ପାଇଁ ଆଜି ରାଜ୍ୟବାସୀ ବେଶ୍ ଧୁମଧାମରେ ପାଳନ କରିବେ ଉତ୍କଳ ଦିବସ । ଉତ୍କଳ ଦିବସ ପାଇଁ ରାଜଧାନୀର ପ୍ରମୁଖ ସରକାରୀ କାର୍ଯ୍ୟାଳୟକୁ ରଂଗୀନ ଆଲୋକମାଳାରେ ସଜ୍ଜିତ କରାଯାଇଛି । ବିଧାନସଭା, ଲୋକସେବା ଭବନ, ଖାରବେଳ ଭବନ, ନିର୍ମାଣ ସୌଧ, କମିସନରେଟ୍ ପୁଲିସ ମୁଖ୍ୟାଳୟ ରଙ୍ଗ ବେରଙ୍ଗ ଆଲୋକରେ ଝଲସି ଉଠିଛି । ସେହିପରି କୃଷି ଭବନ, ରିଜର୍ଭ ବ୍ୟାଙ୍କ ଓ ଏସ୍ବିଆଇ ମୁଖ୍ୟ କାର୍ଯ୍ୟାଳୟକୁ ମଧ୍ୟ ସଜା ଯାଇଛି ।

ଦ କୁଇଭର ବ୍ୟୁରୋ :- ଭାରତୀୟ ସମ୍ବିଧାନର ପ୍ରଣେତା ବାବା ସାହେବ ଡକ୍ଟର ଭୀମରାଓ ଆମ୍ବେଦକରଙ୍କ ଜନ୍ମ ବାର୍ଷିକୀ ଅର୍ଥାତ୍ ଏପ୍ରିଲ ୧୪କୁ କେନ୍ଦ୍ର ସରକାର ଏକ ସାଧାରଣ ଛୁଟି ଦିବସ ଘୋଷଣା କରିଛନ୍ତି। କେନ୍ଦ୍ର ସଂସ୍କୃତି ମନ୍ତ୍ରୀ ଗଜେନ୍ଦ୍ର ସିଂ ଶେଖାୱତ ଶୁକ୍ରବାର ଏକ ପୋଷ୍ଟରେ ସରକାରଙ୍କ ଏହି ନିଷ୍ପତ୍ତି ସମ୍ପର୍କରେ ସୂଚନା ଦେଇଛନ୍ତି। କାର୍ମିକ, ଜନ ଅଭିଯୋଗ ଏବଂ ପେନସନ୍ ମନ୍ତ୍ରଣାଳୟ ଦ୍ବାରା ଜାରି କରାଯାଇଥିବା ଏକ ସରକାରୀ ଆଦେଶ ନିଶ୍ଚିତ କରିଛି ଯେ, ଆମ୍ବେଦକର ଜୟନ୍ତୀ ପାଳନ ଅବସରରେ ସମଗ୍ର ଭାରତରେ ଶିଳ୍ପ ପ୍ରତିଷ୍ଠାନ ସମେତ କେନ୍ଦ୍ର ସରକାରୀ କାର୍ଯ୍ୟାଳୟଗୁଡ଼ିକ ଏପ୍ରିଲ୍ ୧୪, ୨୦୨୫ ରେ ବନ୍ଦ ରହିବ। ଏହି କ୍ରମରେ କୁହାଯାଇଛି ଯେ, ଭାରତ ସରକାରଙ୍କ ସମସ୍ତ ମନ୍ତ୍ରଣାଳୟ କିମ୍ବା ବିଭାଗ ଏହି ନିଷ୍ପତ୍ତି ସମସ୍ତଙ୍କ ନଜରକୁ ଆଣିପାରିବେ।

ଶେଖାୱତ କହିଛନ୍ତି ଯେ, ସମ୍ବିଧାନର ପ୍ରଣେତା ତଥା ସମାଜରେ ସମାନତାର ଏକ ଯୁଗର ପ୍ରତିଷ୍ଠାତା ଆମର ସମ୍ମାନିତ ବାବା ସାହେବ ଡକ୍ଟର ଭୀମରାଓ ଆମ୍ବେଦକରଙ୍କ ଜନ୍ମ ବାର୍ଷିକୀରେ ଏକ ସାଧାରଣ ଛୁଟିଦିନ ହେବ। ଶେଖାୱତ କହିଛନ୍ତି ଯେ, ଏହି ନିଷ୍ପତ୍ତି ଗ୍ରହଣ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ବାବା ସାହେବଙ୍କ ପ୍ରତି ଦେଶର ନିଷ୍ଠାପର ଭାବନାକୁ ସମ୍ମାନ ଦେଇଛନ୍ତି।

ଭୁବନେଶ୍ୱର( ଦ କୁଇଭର ):- ଓଡ଼ିଶା ସରକାରଙ୍କ ୩୦ ଜଣ ବରିଷ୍ଠ ଓଏଏସ ଅଫିସର ଆଇଏଏସ ପାହ୍ୟାକୁ ପଦୋନ୍ନତି ପାଇଛନ୍ତି । ସିଲେକ୍ଟ ଲିଷ୍ଟ-୨୦୨୩ ଓ ସିଲେକ୍ଟ ଲିଷ୍ଟ-୨୦୨୪ ବର୍ଷରେ ଏହି ୩୦ ବରିଷ୍ଠ ଓଏଏସ ଅଫିସରଙ୍କୁ ଆଇଏଏସ ପାହ୍ୟାକୁ ପଦୋନ୍ନତି ମିଳିଛି । ଓଡ଼ିଶା ପ୍ରଶାସନିକ ସେବାର ଏହି ଅଫିସରଙ୍କୁ ରାଜ୍ୟ କ୍ୟାଡ଼ରରେ ଖାଲି ପଡ଼ିଥିବା ଆଇଏଏସ ପଦବୀରେ ନିଯୁକ୍ତି ମିଳିବ । ରାଜ୍ୟ ସରକାରଙ୍କ ଆବେଦନକୁ ଗ୍ରହଣ କରିବା ସହ କାର୍ମିକ ମନ୍ତ୍ରଣାଳୟ ପକ୍ଷରୁ ଏନେଇ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇଛି । ଏହି ଅଫିସରମାନେ ଓଡ଼ିଶା କ୍ୟାଡ଼ରରେ ୨୦୧୪ ଓ ୨୦୧୫ ବ୍ୟାଚର ଆଇଏଏସ ଭାବେ ପରିଗଣିତ ହେବେ ।୨୦୨୩ ଓ ୨୦୨୪ ମସିହା ପାଇଁ ଖାଲି ପଡ଼ିଥିବା ପଦୋନ୍ନତି ଭିତ୍ତିକ ଆଇଏଏସ ପଦବୀ ପୂରଣ ହେବ । ରାଜ୍ୟ ସରକାରଙ୍କର ୩୦ ଜଣ ବରିଷ୍ଠ ଓଏଏସ ଅଫିସର ଆଇଏଏସ ପଦବୀକୁ ଉନ୍ନୀତ ହୋଇଛନ୍ତି । ଇଣ୍ଡିଆନ ଆଡମିନିଷ୍ଟ୍ରେଟିଭ ସର୍ଭିସ (କ୍ୟାଡ଼ର) ରୁଲସ - ୧୯୫୪ର ରୁଲସ-୫(୧)ର ପ୍ରାବଧାନ ଆଧାରରେ ଓଡ଼ିଶା ପ୍ରଶାସନିକ ସେବାର ଅଫିସରମାନେ ଆଇଏଏସ ପଦବୀକୁ ଉନ୍ନୀତ ହୋଇଛନ୍ତି ।

ଦ କୁଇଭର ବ୍ୟୁରୋ :- ସୀମାନ୍ତ ଛତିଶଗଡ଼ରେ ଶନିବାର ଗୋଟିଏ ଦିନରେ ୧୭ ନକ୍ସଲ ନିହତ ହୋଇଛନ୍ତି। ନିହତଙ୍କ ମଧ୍ୟରେ ମୋଷ୍ଟ ୱାଣ୍ଟେଡ୍‌ ଜଗଦୀଶ ରହିଥିବା ପୁଲିସ ସୂଚନା ଦେଇଛି। ସୁକମା ଜିଲ୍ଲା କେରଲାପାଲ ଥାନା ଅନ୍ତର୍ଗତ ଗୋଙ୍ଗୁଡ଼ା, ନେଣ୍ଡୁମ, ଉପମପଲ୍ଲୀ ଗାଁ ନିକଟରେ ନକ୍ସଲ କ୍ୟାମ୍ପ କରିଥିଲେ। ସୂଚନା ମିଳିବା ପରେ ଶୁକ୍ରବାର ରାତିରେ ଲମ୍ବା ଅପରେସନ୍‌ ନିମନ୍ତେ ଗୁଳିଗୋଳା ଧରି ଜଙ୍ଗଲରେ ପଶିଥିଲେ ଡିଆର୍‌ଜି ଏବଂ ସିଆରପିଏଫ୍‌ ଯବାନ। ଶନିବାର ସକାଳ ପ୍ରାୟ ୮ଟାରେ ନକ୍ସଲଙ୍କ ସହ ମୁହାଁମୁହିଁ ହୋଇଥିଲେ। ଉଭୟପଟୁ ଗୁଳି ବିନିମୟ ହୋଇଥିଲା। ପରେ ସର୍ଚ ଅପରେସନ୍‌ କରିଥିଲେ ଯବାନ। ଘଟଣାସ୍ଥଳରୁ ୧୭ ନକ୍ସଲଙ୍କ ମୃତଦେହ ମିଳିଥିଲା। ସେହିପରି ଅପରାହ୍ନରେ ସାମ୍ବାଦିକ ସମ୍ମିଳନୀ କରି ବସ୍ତର ରେଞ୍ଜ ଆଇଜି ପି.ସୁନ୍ଦରରାଜ, ଦନ୍ତେୱାଡ଼ା ଡିଆଇଜି କମଳଲୋଚନ, ଏସ୍‌ପି କିରଣ ଚୌହାନ, ସିଆରପିଏଫ୍‌ ଡିଆଇଜି ଆନନ୍ଦ ସିଂ ଅପରେସନ୍‌ର ସବିଶେଷ ତଥ୍ୟ ଦେଇଛନ୍ତି। ଏନ୍‌କାଉଣ୍ଟରରେ ଦୁର୍ଦ୍ଦାନ୍ତ ନକ୍ସଲ ଜଗଦୀଶ କୁହଡାମି ଓରଫ ବୁଦରା ନିହତ ହୋଇଛି। ଷ୍ଟେଟ୍‌ ଜୋନାଲ୍‌ କମିଟି ସଦସ୍ୟ ଜଗଦୀଶ ନାଁରେ ଡଜନେରୁ ଅଧିକ ଆପରାଧିକ ମାମଲା ରହିଛି। ଝିରମ ଘାଟି ହମ୍‌ଲାର ସେ ମାଷ୍ଟର ମାଇଣ୍ଡ୍‌ ଥିଲା। ତା’ ନାଁରେ ସରକାର ୨୫ ଲକ୍ଷ ଟଙ୍କାର ପୁରସ୍କାର ଘୋଷଣା କରିଥିଲେ।

ତେବେ ଘଟଣାସ୍ଥଳରୁ ଏକେ-୪୭ ସହ ଇନ୍‌ସାସ୍‌ ରାଇଫଲ୍‌, ଏସ୍‌ଏଲ୍‌ଆର, ୩୦୩ ରାଇଫଲ୍‌, ରକେଟ୍‌ ଲଞ୍ଚର, ବିଜିଏଲ୍‌ ଲଞ୍ଚର୍‌ ସମେତ ବିପୁଳ ବିସ୍ଫୋରକ ଜବତ ହୋଇଛି। ନକ୍ସଲଙ୍କ ପାଲଟା ଆକ୍ରମଣରେ ୩ଜଣ ଡିଆର୍‌ଜି ଯବାନ ଏବଂ ଜଣେ ସିଆରପିଏଫ୍‌ ଯବାନ ଆହତ ହୋଇଛନ୍ତି। ସମସ୍ତଙ୍କୁ ଚିକିତ୍ସା ନିମନ୍ତେ ହେଲିକପ୍ଟର ଯୋଗେ ରାୟପୁର ସ୍ଥାନାନ୍ତର କରାଯାଇଛି।

ଦ କୁଇଭର ବ୍ୟୁରୋ :-- ଜଳୁଛି ନିଆଁ, ଜାଳୁଛି । ଖାଲି ଜଙ୍ଗଲ ନୁହେଁ, ଗାଁ ଠୁ ସହର ବି ଜଳିଗଲାଣି । ବିଶ୍ୱ ତାପମାତ୍ରା ହେଉ ବା ଯତ୍ନହୀନତା ଅଥବା ଅଜ୍ଞତା ଯୋଗୁଁ ନିଆଁ ଲାଗିବା ସାରା ବିଶ୍ୱରେ ବଢୁଛି । ସାରା ବିଶ୍ୱ ଦେଖିଥିଲା ଲସ୍ ଆଞ୍ଜେଲସର ଅଗ୍ନିକାଣ୍ଡ । କେତେ ଜଳିଥିଲା, କେତେ ମରିଥିଲେ, ହଲିଉଡ଼ର ବଡ଼ ବଡ଼ କଳାକାର ବାସ ହୀନ ହୋଇଯାଇଥିଲେ । ଏବେ ଜଳୁଛି ଦକ୍ଷିଣ କୋରିଆ। ସେହିଭଳି ଓଡ଼ିଶାରେ ବି ଅନେକ ଜଙ୍ଗଲରେ ନିଆଁ ଲାଗିଛି ଯାହା ଆଜି ଯାଏଁ ବି ଲିଭିନି ।

ଏବେ ଆସିବା ପ୍ରସଙ୍ଗକୁ, ଦକ୍ଷିଣ କୋରିଆ ଆଣ୍ଡୋଙ୍ଗ ଅଞ୍ଚଳରେ ଥିବା ଜଙ୍ଗରେ ଲାଗିଛି ନିଆଁ । ଶକ୍ତିଶାଳୀ ପବନ ଓ ଶୁଷ୍କ ପରିସ୍ଥିତି ଯୋଗୁଁ ମାର୍ଚ୍ଚ ୨୨ରେ ଜଙ୍ଗଲରେ ଭୟଙ୍କର ଅଗ୍ନିଝଡ ଆରମ୍ଭ ହୋଇଥିଲା । ଅଗ୍ନି ଝଡ ମାର୍ଚ୍ଚ ୨୨ ରୁ ଆରମ୍ଭ ହୋଇ ଆଜିଯାଏଁ ଲିଭିବାର ନା ଧରୁନି । ଏହି ନିଆଁ ଜନବସତି ଆଡକୁ ମାଡି ମାଡି ଆସି ଅନେକ ଘର ଜଳିଗଲାଣି । । ନିଆଁର ଆଁରେ ଜଳିଯାଉଛି ଘରଦ୍ୱାର । କୌଣସି ପ୍ରକାର ଜୀବନ ତ ବଞ୍ଚାଇ ଦେଉଛନ୍ତି ହେଲେ ସମ୍ପତି ଜଳି ପୋଡି ଛାରଖାର ହେଇଯାଉଛି । ଏଭଳି ସ୍ଥିତି ହେଉଛି ଦକ୍ଷିଣ କୋରିଆରେ ।

ଦକ୍ଷିଣ କୋରିଆରେ ଘଟିଥିବା ଅଗ୍ନିକାଣ୍ଡରେ ହାରାହାରି ୨୭ ଜଣଙ୍କର ଜୀବନ ଗଲାଣି । ଏହି ନିଆଁରେ ୩୨ ଜଣ ଆହତ ହୋଇଛନ୍ତି । ନିଆଁର ଆଁ ଭିତରେ ଜଳିପୋଡ଼ି ପାଉଁଶ ହୋଇଗଲାଣି ଦକ୍ଷିଣ କୋରିଆ । ପ୍ରକୃତି ଏମିତି ତାଣ୍ଡବ ରଚିଛି ଯେ ତା ଆଗରେ କେହି ବି ବଞ୍ଚି ପାରୁନାହାନ୍ତି । ଏହି ନିଆଁ ୮୧,୫୦୦ ଏକରକୁ ଜାଳିପୋଡ଼ି ଧ୍ୱଂସ କରିଦେଲାଣି । ଦକ୍ଷିଣ କୋରିଆ ପାର୍ବତ୍ୟାଞ୍ଚଳ ହେତୁ ଜଙ୍ଗଲ ନିଆଁ ଲଢ଼ିବା ପାଇଁ ହେଲିକପ୍ଟର ଉପରେ ନିର୍ଭର କରୁଛନ୍ତି । ଅଗ୍ନିକାଣ୍ଡ ଲିଭେଇବା ପାଇଁ ତିନୋଟି ଅଞ୍ଚଳରେ ୧୨୦ ରୁ ଅଧିକ ହେଲିକପ୍ଟର ମୁତୟନ କରାଯାଇଛି । ଏହି ଅଗ୍ନିକାଣ୍ଡକୁ ନିୟନ୍ତ୍ରଣ କରିବାକୁ ଚେଷ୍ଟା କରିବା ସମୟରେ ବୁଧବାର ଜଣେ ପାଇଲଟଙ୍କ ଜୀବନ ଯାଇଛି । ଦେଖାଯାଉ ଦକ୍ଷିଣ କୋରିଆ ନିଆଁକୁ ଲିଭେଇ ପାରୁଛି ନାଁ ନିଆଁ ମାଡି ମାଡି ଯାଉଛି ।

ଦ କୁଇଭର ବ୍ୟୁରୋ :- ଇଦ୍ ଏବଂ ରାମ ନବମୀ ପାଇଁ ପୋଲିସ ଅଧିକାରୀଙ୍କ ଛୁଟି ବାତିଲ୍ । ଆଗକୁ ଆସୁଛି ଇଦ୍ ତା ସହିତ ପବିତ୍ର ରାମ ନବମୀ । ଏନେଇ ରାଜ୍ୟରେ ଚଳଚଞ୍ଚଳ ମୁସଲମାନ ଏବଂ ହିନ୍ଦୁ ସମ୍ପ୍ରଦାୟର ଭାଇ-ଭଉଣୀମାନେ । ଘରେ ଘରେ ଉତ୍ସାହ ଓ ଉଦ୍ଦୀପନାର ମାହୋଲ ଦେଖିବାକୁ ମିଳିଛି । ରାଜ୍ୟରେ କିପରି ଭାଇଚାରା ଓ ସଦଭାବନାର ସହ ଇଦ୍,ରାମ ନବମୀ ଏବଂ ହନୁମାନ ଜୟନ୍ତୀ ପାଳନ ହେବ ସେନେଇ ପୋଲିସ ପକ୍ଷରୁ ଆରମ୍ଭ ହୋଇଛି ପ୍ରସ୍ତୁତି । ପାଟ୍ରୋଲିଂକୁ ବଢାଯାଇଥିବା ବେଳେ ଅପରାଧୀଙ୍କ ଗତିବିଧିକୁ କଡ଼ା ନଜର ରଖିଛି ପୋଲିସ । ଏନେଇ ବରିଷ୍ଠ ଅଧିକାରୀଙ୍କ ସହ ସମସ୍ତ ଜିଲ୍ଲା ଏସପି ଓ ଆଇଜି, ଡିଆଇଜିଙ୍କ ସହ ସରିଛି ବୈଠକ । ଏଥିପାଇଁ ଆସନ୍ତା ୧୫ ତାରିଖ ଯାଏଁ କିଛି ନିର୍ଦ୍ଧିଷ୍ଟ ପୋଲିସ କର୍ମଚାରୀମାନଙ୍କର ଛୁଟି ବାତିଲ କରାଯାଇଥିବା ବିିଭାଗ ପକ୍ଷରୁ ସୂଚନା ମିଳିଛି ।ଏନେଇ ସମସ୍ତ ଜିଲ୍ଲା ଏସପି,ରେଞ୍ଜ ଆଇଜି ଓ ଡିଆଇଜିମାନଙ୍କୁ ନିର୍ଦ୍ଦେଶାବଳୀ ଜାରି ହୋଇଛି । ବିଶେଷ କରି ଯେଉଁସବୁ ଅଞ୍ଚଳ ସମ୍ବେଦନଶୀଳ ସେହି ସ୍ଥାନ ଚିହ୍ନଟ ପାଇଁ ନିର୍ଦ୍ଦେଶ ରହିଛି ।

ଆସନ୍ତା ୧୫ ତାରିଖ ଯାଏ ହୋମଗାର୍ଡ,ଏପିଆର, ଓଆର ଓ ଓଏପିଏଫ ପୋଲିସ କର୍ମଚାରୀମାନଙ୍କର ସାଧାରଣ ଛୁଟି ବାତିଲ କରଯାଇଛି । ଅତି ଆବଶ୍ୟକ କିମ୍ବା ମେଡ଼ିକାଲ କେସରେ ଛୁଟି ନେଇପାରିବେ । ଏନଜିଓ ଓ ଏନସିସି ଭଲ୍ୟୁଣ୍ଟର ମାନଙ୍କୁ ମଧ୍ୟ ଟ୍ରାଫିକ ଓ ଅନ୍ୟ ପରିଚାଳନାରେ ନିୟୋଜନ କରିବା ପାଇଁ ନିର୍ଦ୍ଦେଶ ରହିଛି । ଓ୍ବାରେଣ୍ଟି ମାନଙ୍କୁ ଧରିବା ଓ ଥାନାରେ ଆସି ହାଜିରା କରାଇବା ଏବଂ ଅଭ୍ୟାସ ଗତ ଅପରାଧୀଙ୍କ ଗତିବିଧି ନଜର ରଖିବା ପାଇଁ ନିର୍ଦ୍ଦେଶ ହୋଇଛି ।ପୋଲିସ ଡିଜଙ୍କ କାର୍ଯ୍ୟାଳୟ ପକ୍ଷରୁ ମଳିଥିବା ସୂଚନା ଅନୁସାରେ ଉଭୟ ରାମ ନବମୀ ଓ ଇଦ୍କୁ ଦୃଷ୍ଟିରେ ରଖି ପୋଲିସ ପକ୍ଷରୁ ବ୍ୟାପକ ବନ୍ଦୋବସ୍ତ କରାଯିବ । ଯେକୌଣସି ପ୍ରକାର ଅଘଟଣ ସମ୍ପର୍କରେ ଆଗୁଆ ସୂଚନା ପାଇବା ପାଇଁ ଉପଯୁକ୍ତ ପଦକ୍ଷେପ ନେବା ପାଇଁ ପ୍ରସ୍ତୁତି ଚାଲିଛି । ବିଶେଷକରି ବିଭିନ୍ନ ସମୟରେ ସୋସିଆଲ ମିଡିଆରେ ଗୁଜବ, ବିଭ୍ରାନ୍ତିକର ତଥ୍ୟ ସଂକ୍ରାନ୍ତରେ ନଜର ରଖିବାକୁ ଅଧିକ ଗୁରୁତ୍ବ ଦିଆଯାଇଛି । ସୋସିଆଲ ମିଡିଆ ପ୍ଲାଟଫର୍ମ ଉପରେ ୨୪ ଘଣ୍ଟିଆ ପାଟ୍ରୋଲିଂ କରିବା ପାଇଁ ଡିଜିପି ପରାମର୍ଶ ଦେଇଛନ୍ତି ।

ପାରଳାଖେମୁଣ୍ଡି( ଦ କୁଇଭର ):-: ପୂର୍ବ ତଟ ରେଳପଥ ମହାପ୍ରବନ୍ଧକ ପରମେଶ୍ୱର ଫଙ୍କୱାଲ, ଡିଭିଜନାଲ ରେଳପଥ ପ୍ରବନ୍ଧକ ଲଳିତ ବୋହରା, ପୂର୍ବତଟ ରେଳପଥର ପ୍ରମୁଖ ବିଭାଗ ମୁଖ୍ୟ ଏବଂ ବିଭାଗର ବରିଷ୍ଠ ଅଧିକାରୀମାନ ପାରଳାଖେମୁଣ୍ଡି ରେଳଷ୍ଟେସନ ପରିଦର୍ଶନ କରି ନିର୍ମାଣଧୀନ ରେଳଷ୍ଟେସନର କାର୍ଯ୍ୟର ତଦାରଖ କରିଛନ୍ତି | ବିଭାଗର ବରିଷ୍ଠ ଅଧିକାରୀମାନଙ୍କ ସହିତ ନୌପଡା-ଗୁଣୁପୁର ସେକ୍ସନ ସହିତ ପ୍ରମୁଖ ରେଳ ସୁବିଧାଗୁଡ଼ିକର ପୁଙ୍ଖାନୁପୁଙ୍ଖ ଯାଞ୍ଚ କରିଥିଲେ,ବିଭିନ୍ନ ରେଳ ସୁବିଧା ଓ ସୁରକ୍ଷାର ପ୍ରତି ଧ୍ୟାନ ଦେଇଥିଲେ ।

ଶ୍ରୀ ଫଙ୍କୱାଲ ଅମୃତ ଭାରତ ଷ୍ଟେସନ କାର୍ଯ୍ୟ ଅଧୀନରେ ବିକଶିତ ହେଉଥିବା ଅପେକ୍ଷା ହଲ୍, ଶୌଚାଳୟ, ପାଣି ବୁଥ୍, ଆସନ ବ୍ୟବସ୍ଥା, ରେଳ କାର୍ଯ୍ୟାଳୟ, ୧୨ ମିଟର ଫୁଟ୍ ଓଭରବ୍ରିଜ୍ ଇତ୍ୟାଦି ସମେତ ଷ୍ଟେସନର ସମସ୍ତ ବିକାଶ ମୂଳକ କାର୍ଯ୍ୟର ଅଗ୍ରଗତି ସମ୍ପର୍କିତ କାର୍ଯ୍ୟର ତଦାରଖ ତଥା ନିରୀକ୍ଷଣ କରିଥିଲେ । ନିର୍ମାଣଧିନ କୋଠାବାଡି ସହ ଉନ୍ନତିକରଣ କାମ ଗୁଡିକୁ ବୁଲିଦେଖିଥିଲେ । ରେଳଷ୍ଟେସନ ର ଆନୁସାଙ୍ଗିକ ବ୍ୟବସ୍ଥା, ଅଗ୍ରଗତି ଆଦି ସମ୍ପର୍କରେ ପଚାରି ବୁଝିଥିଲେ । ଏନେଇ ଶ୍ରୀ ଫଙ୍କୱାଲ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି ରେଳପଥର ବିଭିନ୍ନ ଷ୍ଟେସନ୍ ଗୁଡିକରେ ବିକାଶ ସହ ବ୍ୟବସ୍ଥା ସମ୍ପର୍କରେ ତଦାରଖ କରାଯାଇଛି । ଏହା ସହ ନୌପଡା-ପାରଳାଖେମୁଣ୍ଡି-ଗୁଣୁପୁର ମଧ୍ୟରେ ଥିବା ଷ୍ଟେସନ୍ ଗୁଡିକର ଉନ୍ନତିକରଣ ଏବଂ ଏହି ପଥରେ ପ୍ରଥମେ ଚାଲୁ ରହିଥିବା ଟ୍ରେନ୍ ଗୁଡିକ ସଠିକ୍ ସମୟରେ ଯାତାୟତ କରିବା ଏବଂ ବେଗ ବଢାଇବା ପାଇଁ ଆବଶ୍ୟକ ପଦକ୍ଷେପ ଗ୍ରହଣ କରାଯାଉଛି । ଅମୃତ ଭାରତ ଯୋଜନାରେ ସାମିଲ ହୋଇ ନିର୍ମାଣ କାର୍ଯ୍ୟ ଚାଲିଥିବା ରେଳଷ୍ଟେସନ ମଧ୍ୟରେ ପାରଳାଖେମୁଣ୍ଡି ରେଳଷ୍ଟେସନର କାର୍ଯ୍ୟ ଅଧିକ ଅଗ୍ରଗତି ହୋଇଛି , ଯଥାଶୀଘ୍ର ଏହାର ଉଦଘାଟନ କରାଯିବ ବୋଲି କହିଥିଲେ । ଏହା ପରେ, ମହାପ୍ରବନ୍ଧକ ଗୁଣୁପୁର ରେଳ ଷ୍ଟେସନକୁ ଯାଇଥିଲେ |

କେନ୍ଦୁଝର( ଦ କୁଇଭର ):- କେନ୍ଦୁଝର ଜିଲ୍ଲା ଯୋଡ଼ା ଥାନା ଅନ୍ତର୍ଗତ ସହରର ୟୁନିଅନ ବ୍ୟାଙ୍କ ନିକଟରେ ଛିଡା ହୋଇଥିବା ଏକ ଆଳୁ, ପିଆଜ ବୋଝେଇ ଟ୍ରକରେ ଗତ ରାତିରେ କିଛି ଦୁବୃର୍ତ୍ତ ନିଆଁ ଲଗାଇ ଦେଇଛନ୍ତି। ପାଖରେ ଥିବା ଗୋଦାମରେ ଖାଲି କରିବାକୁ ଡ୍ରାଇଭର ଜଣକ ଟ୍ରକକୁ ଲଗାଇ ଗାଡି ଭିତରେ ଶୋଇ ପଡିଥିଲେ। ମାତ୍ର ବିଳମ୍ବିତ ରାତିରେ କିଛି ଦୁବୃର୍ତ୍ତ ଟ୍ରକରେ ନିଆଁ ଲଗାଇ ଦେଇଥିଲେ। ଏହା ଜାଣି ଟ୍ରକ ଡ୍ରାଇଭର ଓ ହେଲପର ମିଶି ନିଆଁ ଲିଭାଇଥିଲେ । ଦୁର୍ବୃତ୍ତ ମାନେ ଲୁଟ କରିବାକୁ ଆସି କାହାରିକୁ ନ ପାଇ ଏହି କାଣ୍ଡ ଘଟାଇଥିବା ଆଶଙ୍କା କରା ଯାଉଥିବା ବେଳେ ଏପରି ଦୁର୍ବୃତ୍ତଙ୍କ ଉପରେ କାର୍ଯ୍ୟାନୁଷ୍ଠାନ ପାଇଁ ସାଧାରଣରେ ଦାବି ହେଉଛି।

ଦ କୁଇଭର ବ୍ୟୁରୋ :- ଚେନ୍ନାଇ ବିପକ୍ଷ ମ୍ୟାଚରେ ରାଜସ୍ଥାନର ବଡ ବିଜୟ । ୨ଟି ମ୍ଯାଚ ପରାଜୟ ପରେ ଆଇପିଏଲରେ ବିଜୟର ଖାତା ଖୋଲିଲା ରାଦସ୍ଥାନ ରୟାଲ୍ସ । ଇଣ୍ଡିଆନ ପ୍ରିମିୟର ଲିଗ୍‌ର ୧୧ ତମ ମୁକାବିଲାରେ ଚେନ୍ନାଇ ସୁପର କିଙ୍ଗ୍ସକୁ ୬ ରନରେ ମାତଚ ଦେଇଛି ଆରଆର । ଦଳକୁ ବିଜୟ ଦ୍ବାରରେ ପହଞ୍ଚାଇଲା ନୀତିଶ ରଣାଙ୍କ ଲଢୁଆ ବ୍ୟାଟିଂ ଓ ଓ୍ବାନିଣ୍ଡୁ ହସରଙ୍ଗାଙ୍କ ଘାତକ ବୋଲିଂ । ସିଏସକେର ଆଇପିଏଲରେ ଏହା ଦ୍ବିତୀୟ ପରାଜୟ । ଟସ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇଥିଲା ଚେନ୍ନାଇ ସୁପର କିଙ୍ଗ୍ସ । ରାଜସ୍ଥାନକୁ ପ୍ରଥମେ ବ୍ୟାଟିଂ ପାଇଁ ଆମନ୍ତ୍ରଣ କରିଥିଲା । ନିର୍ଦ୍ଧାରିତ ୨୦ ଓଭରରେ ୯ ଓ୍ବିକେଟ ହରାଇ ୧୮୨ରନ କରିଥିଲା ରାଜସ୍ଥାନ । ଏହାପରେ ୧୮୩ ବିଜୟ ରନ୍‌ ଲକ୍ଷ୍ୟର ପିଛା କରି ୨୦ ଓଭରରେ ୬ଓ୍ବିକେଟ ହରାଇ ୧୭୬ ରନ କରିବାକୁ ସକ୍ଷମ ହୋଇଥିଲା ଚେନ୍ନାଇ ।ସିଏସକେର ଏହା ଦ୍ବିତୀୟ ପରାଜୟ । ଉଭୟ ଦଳ ଚଳିତ ଆଇପିଏଲରେ ୩ଟି ଲେଖାଏଁ ମ୍ୟାଚ ଖେଳି ଗୋଟିଏରେ ବିଜୟ ଓ ୨ଟିରେ ପରାଜିତ ହୋଇଛନ୍ତି ।

ଭୁବନେଶ୍ୱର( ଦ କୁଇଭର ):-- ଯେଉଁ ବିଦ୍ୟାଳୟ ଗୁଡିକ ବନ୍ଦ ହୋଇଯାଇଛି ସେ ସବୁ ଖୋଲିବା ନେଇ କିଛି ବ୍ୟବସ୍ଥା ରହିଛି ନା ନାହିଁ,ଏନେଇ ଗୃହରେ ପ୍ରଶ୍ନ କରିଥିଲେ ଅତାବିରା ବିଧାୟକ ନିହାର ମହାନନ୍ଦ । ଏହାର ଉତ୍ତର ରଖିଛନ୍ତି ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ । ମନ୍ତ୍ରୀ କହିଛନ୍ତି ଯେ, ପୂର୍ବ ସରକାର ତରବରିଆ ଭାବରେ, ଠିକ୍ ଭାବେ ବିଚାର ନକରି ଛାତ୍ରଛାତ୍ରୀ ସଂଖ୍ୟା କମ ଥିବା ସମୁଦାୟ ୫୬୩୨ଟି ସ୍କୁଲ ମିଶ୍ରଣ କରିଛନ୍ତି । ୧୦୦ ମିଟର ବ୍ୟବଧାନରେ ଥିବା ୨୧୨୫ଟି ସାଟେଲାଇଟ୍‌ ସ୍କୁଲ ବି ମିଶ୍ରଣ କରାଯାଇଛି । ସଂରକ୍ଷିତ ଅଞ୍ଚଳ ୨୦ ଓ ଅଣସଂରକ୍ଷିତ ଅଞ୍ଚଳରେ ୪୦ ପିଲା ଥିଲେ, ସ୍କୁଲ ଖୋଲିବାକୁ ବିଚାର କରାଯିବ । ଏହି ପ୍ରକ୍ରିୟା ଅନୁସାରେ ଆବେଦନ କରାଯିବ ବୋଲି ଗୃହରେ ସୂଚନା ଦେଇଛନ୍ତି ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ । ସେ ଆହୁରି କହିଛନ୍ତି,ନୂଆ ସରକାର ଏପର୍ଯ୍ୟନ୍ତ ୧୮ ହଜାରରୁ ଅଧିକ ଶିକ୍ଷକ ନିଯୁକ୍ତି ଦେଇ ସାରିଲେଣି । ଆଗକୁ ଆହୁରି ୧୦ ହଜାର ଶିକ୍ଷକ ନିଯୁକ୍ତ ହେବେ । ପିଅନ ଓ କିରାଣୀର ଆବଶ୍ୟକତା ଦେଖି ନିଯୁକ୍ତି ଦିଆଯିବ । ଏହାପରେ ବନ୍ଦ ହୋଇଥିବା ସ୍କୁଲ୍‌ ସବୁ ଖୋଲିବ ।

ନୂଆଦିଲ୍ଲୀ( ଦ କୁଇଭର ):- ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବ୍ୟକ୍ତିଗତ ସଚିବ ଭାବରେ ଆଇଏଫଏସ ନିଧି ତିୱାରୀ ନିଯୁକ୍ତ ହୋଇଛନ୍ତି । କାର୍ମିକ ଏବଂ ତାଲିମ ବିଭାଗ ଦ୍ୱାରା ଜାରି କରାଯାଇଥିବା ଆଦେଶ ଅନୁଯାୟୀ, ନିଧି ତିୱାରୀଙ୍କୁ ପ୍ରଧାନମନ୍ତ୍ରୀ ମୋଦିଙ୍କ ବ୍ୟକ୍ତିଗତ ଭାବେ ଦାୟିତ୍ବ ତୁଲାଇବେ । ବ୍ୟକ୍ତିଗତ ସଚିବ ଭାବେ ପ୍ରଧାନମନ୍ତ୍ରୀ ମୋଦିଙ୍କ ମିଟିଂ ଏବଂ ଅନ୍ୟ କାମ ତଦାରଖ କରିବେ ନିଧି ।

ନିଧି ତିୱାରୀ ନଭେମ୍ବର ୨୦୨୨ ଠାରୁ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରେ ଉପସଚିବ ଭାବରେ କାର୍ଯ୍ୟ କରୁଛନ୍ତି । ଏହା ପୂର୍ବରୁ, ସେ ବୈଦେଶିକ ମନ୍ତ୍ରଣାଳୟର ନିରସ୍ତ୍ରୀକରଣ ଏବଂ ଅନ୍ତର୍ଜାତୀୟ ସୁରକ୍ଷା ବ୍ୟାପାର ବିଭାଗରେ ଉପସଚିବ ଭାବରେ କାର୍ଯ୍ୟ କରିଥିଲେ। ତିୱାରୀ ୨୦୧୩ରେ ସିଭିଲ୍ ସର୍ଭିସେସ୍ ପରୀକ୍ଷାରେ ଉତ୍ତୀର୍ଣ୍ଣ ହୋଇ ତାଙ୍କ କ୍ୟାରିଅର୍ ଆରମ୍ଭ କରିଥିଲେ ।

ଦ କୁଇଭର ବ୍ୟୁରୋ :-:ନବୀନଙ୍କ ମନ୍ତ୍ରୀ କଣ ଥିଲେ ଲାଞ୍ଚୁଆ ? ଲାଞ୍ଚ ନେଇ ନିଜର ତହବିଲ ବଢ଼ାଉଥୁଲେ କି ? ଆୟ ତ ନଥିଲା, ଆୟ କର ବି ତ ଦେଖାଉନଥିଲେ । ଏତେ ଟଙ୍କା ଆସିଲା କେମିତି ନବୀନ ବାବୁଙ୍କ ମନ୍ତ୍ରୀଙ୍କ ପାଖରେ । ନବୀନ ବାବୁଙ୍କ ମନ୍ତ୍ରୀ ଚାନ୍ଦା ନେଉଥୁଲେ । ଏମିତି ବି ଚର୍ଚ୍ଚା ଜୋର ଧରିଛି । ଏମିତି କଥା ଆମେ ଫାଙ୍କାରେ କହିନୁ ବା ତାଙ୍କୁ ବଦନାମ କରିବା ପାଇଁ ବି କୁହାଯାଉନାହିଁ । ଠୋସ ପ୍ରମାଣ ଆସିଛି । ଆଉ ପ୍ରମାଣ ନିଜେ ଦେଇଛି ସାଇବର କ୍ରାଇମ ଥାନା । ସେ କାଳେ ଅନଲାଇନ ଟ୍ରେଡିଙ୍ଗରେ ୧ କୋଟି ୪୦ ଲକ୍ଷ ଟଙ୍କା ଲୁଟର ଶିକାର ହୋଇଛନ୍ତି । ସାଇବର ଅପରାଧୀମାନେ ତୁଷାରଙ୍କ ଏକାଉଣ୍ଟରୁ ୧ କୋଟି ୪୦ ଲକ୍ଷ ଟଙ୍କା ନେଇଯାଇଥିଲେ । ଏବେ ସେମାନଙ୍କୁ ଗିରଫ କରାଯାଇଛି । ୧୯ ଲକ୍ଷ ଟଙ୍କା ଉଦ୍ଧାର ବି କରାଯାଇଛି ।

ଏବେ ଆସିବା ପ୍ରସଙ୍ଗକୁ, ଆମେ ଏଠି କହୁଛୁ ନବୀନ ବାବୁଙ୍କର ପୂର୍ବତନ ଗୃହ ଏବଂ କ୍ରୀଡା ମନ୍ତ୍ରୀ ତଥା ଏବେକାର କାକଟ ପୁର ବିଧାୟକ ତୁଷାରକାନ୍ତି ବେହେରାଙ୍କ କଥା । ନିର୍ବାଚନ ବେଳେ ଦାଖଲ କରିଥିବା ତାଙ୍କ ଆପି ଡେଭିଟକୁ ଦେଖିବା ତାଙ୍କର ସମ୍ପତି ଏତେ ନୁହେଁ । ବର୍ତମାନ ଦରମା ଲକ୍ଷେ ଟଙ୍କା । ସେ ବିଧାୟକ ହେବା ପୂର୍ବରୁ ବି ତାଙ୍କ ଆୟ ଦେଖାଉନଥିଲେ । ମନ୍ତ୍ରୀ ହେଲାପରେ ବି ଆୟ ଦେଖାଉନଥିଲେ । ଗତ ନିର୍ବାଚନରେ ଯାହା ଦାଖଲ କରିଛନ୍ତି, ତାଙ୍କ ଆୟ ପ୍ରମାଣ ସେଥିରେ କୌଣସି ପ୍ରକାର ଏତେ ତାଙ୍କର ଜମି ଦେଖାଯାଇ ନାହିଁ । ଏବେ ତାଙ୍କ ଏକାଉଣ୍ଟରୁ ୧ କୋଟି ୪୦ ଲକ୍ଷ ଟଙ୍କା ଚୋରି ହୋଇଥିବା ଖୋଦ ସାଇବର କ୍ରାଇମ ଅଧିକାରୀ ମାନେ କହୁଛନ୍ତି । ସେ ବି ମାନୁଛନ୍ତି ।

କିନ୍ତୁ ପ୍ରଶ୍ନ ହେଉଛି, ଏତେ ଟଙ୍କା ତୁଷାରଙ୍କ ପାଖରୁ ଆସିଲା କେଉଁଠୁ ? ତାଙ୍କ ଏକାଉଣ୍ଟକୁ ଏତେ ପଇସା ଦେଲା କିଏ ? କେଉଁ ସ୍ଥାନରୁ ସେ ପଇସା ଆଣିଲେ ? ଅବଶ୍ୟ ପୂର୍ବତନ ମନ୍ତ୍ରୀ ହିସାବରେ ସେ ପଇସାକୁ ଏପଟ ସେପଟ କରିବାରେ କିଛି ବଡ଼ କଥା ନୁହେଁ । କୌଣସି ପ୍ରକାର ଧାର ଆଣିଥିବା ବି ଦେଖେଇ ଦେଇ ପାରନ୍ତି । କିନ୍ତୁ ବିଧାୟକ ଅନଲାଇନ ଟ୍ରେଂଡିଙ୍ଗ କରୁଛନ୍ତି, ତା ଧିଅରୁ ପଇସା ଆୟ କରୁଛନ୍ତି, ଏକଥା ତ ସମସ୍ତେ ଜାଣିବା ଦରକାର । ଯଦି ସେ କେଉଁଠୁ ଋଣ ବା ଧାର ଆଣିନଥାନ୍ତି । ତାହେଲେ କଣ ଚାନ୍ଦାରୁ ଆୟ କରିଛନ୍ତି ଏତେ ଟଙ୍କା । ଯାହାକୁ ଲୁଚେଇ ରଖିଥିଲେ । ମନ୍ତ୍ରୀ ପଦ ଯିବା ପରେ ଏବେ ବାହାର କରୁଛନ୍ତି ଗୁପ୍ତ ଧନକୁ । ଦେଖାଯାଉ ମୋହନ ସରକାର ତୁଷାରକାନ୍ତିଙ୍କ ସମ୍ପତି ଉପରେ ତଦନ୍ତ କରିବେ ନା ଚୁପଚାପ ରହିଯିବେ ।

ବ୍ରହ୍ମପୁର( ଦ କୁଇଭର ):- :- ବହୁ କଳ୍ପନା ଜଳ୍ପନା ର ଅନ୍ତ ଘଟି ଶେଷରେ ଚଳିତ ବର୍ଷର ନବ ନିର୍ବାଚିତ ପ୍ରାର୍ଥୀଙ୍କ ନାମ ଘୋଷଣା କରାଯାଇଛି l ଶେଷ ହୋଇଛି ରାଜ୍ୟର ପ୍ରତ୍ୟେକ ବାର ଆସୋସିଏସନର ନିର୍ବାଚନ l ପ୍ରତ୍ୟେକ ବାର ଆସୋସିଏସନ ଭଳି ବ୍ରହ୍ମପୁର ସ୍ଥିତ ଗଞ୍ଜାମ ବାର ଆସୋସିଏସନ ରେ ମଧ୍ୟ ଶାନ୍ତି ଶୃଙ୍ଖଳାରେ ସହ ଶନିବାର ଚଳିତ ବର୍ଷର ଶେଷ ହୋଇଛି ୨୦୨୫ ବାର ନିର୍ବାଚନ । ନବ ନିର୍ବାଚିତ ସଭାପତି, ଉପସଭାପତି, ସମ୍ପାଦକ ଓ ସହ ସମ୍ପାଦକ ଙ୍କ ଫଳାଫଳ ଘୋଷଣା ହୋଇସାରିଛି l ଗଞ୍ଜାମ ଓକିଲ ସଂଘ ନିର୍ବାଚନ ରେ ସଭାପତି ଭାବେ ମନୋଜ କୁମାର ପଟ୍ଟନାୟକ,ଉପସଭାପତି ଭାବେ ଟି.କେ ରେଡ୍ଡୀ, ସମ୍ପାଦକ ଭାବେ ଟି. ଭେଙ୍କଟ ରାଓ, ଯୁଗ୍ମ ସଂପାଦକ ଭାବେ ଅସିତ୍ ସାବତ ନିଜ ନିଜର ପ୍ରତିଦ୍ବନ୍ଦୀ ମାନଙ୍କୁ ମାତ ଦେଇ ବିଜୟୀ ହୋଇଛନ୍ତି l ତେବେ ଗଞ୍ଜାମ ବାର ଆସୋସିଏସନ ରେ ମୋଟ ୧୪୪୩ ଜଣ ଓକିଲ ଶନିବାର ନିଜ ନିଜର ମତ ସାବ୍ୟସ୍ତ କରିଥିବା ବେଳେ କିଛି ଜଣ ଅନୁପସ୍ଥିତ ରହିଥିବା ମଧ୍ୟ ଜଣାପଡିଛି l ତେବେ ସର୍ବାଧିକ ୭୧୭ ଭୋଟ ପାଇ ଗଞ୍ଜାମ ବାର ଆସୋସିଏସନ ର ଉପ-ସଭାପତି ଭାବେ ଜୟ ଯୁକ୍ତ ହୋଇଛନ୍ତି ବରିଷ୍ଠ ଓକିଲ ଶ୍ରୀ ଟି.କେ ରେଡ୍ଡୀ l ତେବେ ଏନେଇ ଗଞ୍ଜାମ ବାର ର ସମସ୍ତ ଓକିଲ ମହଲ ରେ ଖୁସି ର ଲହରୀ ଖେଳିଯାଇଥିବା ଦେଖିବାକୁ ମିଳିଛି l ସମସ୍ତ ନବ ନିର୍ବାଚିତ ପ୍ରାର୍ଥୀ ମାନଙ୍କୁ ବିଭିନ୍ନ ମହଲରୁ ଶୁବେସ୍ଛାର ସୁଅ ଛୁଟିଛି l

ପାରଳାଖେମୁଣ୍ଡି ( ଦ କୁଇଭର ) : ଦକ୍ଷିଣ ପୂର୍ବ ରେଳବାଇର ଜେନେରାଲ ମ୍ୟାନେଜର ପରମେଶ୍ବର ପଂଖଓ୍ବାଲ ଙ୍କ ପାରଳାଖେମୁଣ୍ଡି ରେଳଷ୍ଟେସନ ପରିଦର୍ଶନ । ନିର୍ମାଣଧୀନ ରେଳଷ୍ଟେସନର କାର୍ଯ୍ୟର ତଦାରଖ କରିବାସହ ବିକାଶ ମୂଳକ କାର୍ଯ୍ୟର ଅଗ୍ରଗତି ସମ୍ପର୍କିତ ସମସ୍ତ କାର୍ଯ୍ୟର ତଦାରଖ ତଥା ନିରୀକ୍ଷଣ କରିଥିଲେ । ନିର୍ମାଣଧିନ କୋଠାବାଡି ସହ ଉନ୍ନତିକରଣ କାମ ଗୁଡିକୁ ବୁଲିଦେଖିଥିଲେ । ରେଳଷ୍ଟେସନ ର ଆନୁସାଙ୍ଗିକ ବ୍ୟବସ୍ଥା, ବିକାଶ କାମର ଅଗ୍ରଗତି ଆଦି ସମ୍ପର୍କରେ ପଚାରି ବୁଝିଥିଲେ । ଏନେଇ ଶ୍ରୀ ପଂଖଓ୍ବାଲ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି ରେଳପଥର ବିଭିନ୍ନ ଷ୍ଟେସନ୍ ଗୁଡିକରେ ବିକାଶ ସହ ବ୍ୟବସ୍ଥା ସମ୍ପର୍କରେ ତଦାରଖ କରାଯାଇଛି । ଏହା ସହ ନୌପଡା-ପାରଳାଖେମୁଣ୍ଡି-ଗୁଣୁପୁର ମଧ୍ୟରେ ଥିବା ଷ୍ଟେସନ୍ ଗୁଡିକର ଉନ୍ନତିକରଣ ଏବଂ ଏହି ପଥରେ ପ୍ରଥମେ ଚାଲୁ ରହିଥିବା ଟ୍ରେନ୍ ଗୁଡିକ ସଠିକ୍ ସମୟରେ ଯାତାୟତ କରିବା ଏବଂ ବେଗ ବଢାଇବା ପାଇଁ ଆବଶ୍ୟକ ପଦକ୍ଷେପ ଗ୍ରହଣ କରାଯାଉଛି । ଅମୃତ ଭାରତ ଯୋଜନାରେ ସାମିଲ ହୋଇ ନିର୍ମାଣ କାର୍ଯ୍ୟ ଚାଲିଥିବା ରେଳଷ୍ଟେସନ ମଧ୍ୟରେ ପାରଳାଖେମୁଣ୍ଡି ରେଳଷ୍ଟେସନର କାର୍ଯ୍ୟ ଅଧିକ ଅଗ୍ରଗତି ହୋଇଛି , ଯଥାଶୀଘ୍ର ଏହାର ଉଦଘାଟନ କରାଯିବ ।

ବ୍ରହ୍ମପୁର( ଦ କୁଇଭର ):- ସ୍ଥାନୀୟ ବଡ଼ ବଜାର ଥାନା ଅନ୍ତର୍ଗତ ଜେନା ସାହିରେ ଚାଲିଥିବା ବେଲଗାଁ ଦଣ୍ଡ ନାଚ ଯାତ୍ରାରେ ଯାତ୍ରା ଅଧିକାରୀଙ୍କ ଛୁରାମାଡ଼ରେ ଜଣେ ଯୁବକଙ୍କ ମୃତ୍ୟୁ ହୋଇଛି । ମୃତକ ଜଣକ ହେଲେ ବେଲଗାଁ ଅଞ୍ଚଳର ଜଗଦୀଶ ପାଣିଗ୍ରାହୀ । ଜଗଦୀଶ ପୂର୍ବରୁ ଏହି ଦଣ୍ଡନାଚରେ କାମ କରୁଥିଲେ । ଭୋଗ କହିବାକୁ ନେଇ ଯାତ୍ରା ଅଧିକାରୀ ,ତାଙ୍କ ପୁଅଙ୍କ ସହ ଜଗଦୀଶଙ୍କ ବଚସା ହୋଇଥିଲା ।ପରେ ବାପା ଓ ପୁଅ ଜଗଦୀଶଙ୍କୁ ଛୁରୀରେ ଆକ୍ରମଣ କରିଥିଲେ ।ଛୁରାମାଡ଼ରେ ଜଗଦୀଶଙ୍କ ବେକରୁ ମାତ୍ରାଧିକ ରକ୍ତସ୍ରାବ ହୋଇଥିଲା । ପରେ ଗୁରୁତର ଅବସ୍ଥାରେ ଜଗଦୀଶ ବ୍ରହ୍ମପୁର ଏମକେସିଜି ମେଡ଼ିକାଲରେ ଭର୍ତ୍ତି ହୋଇଥିଲେ ।ଚିକିତ୍ସିତ ଅବସ୍ଥାରେ ଏଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଖବର ପାଇ ପୁଲିସ ଘଟଣା ସ୍ଥଳ ଓ ମେଡ଼ିକାଲରେ ପହଞ୍ଚି ତଦନ୍ତ କରୁଥିବା ଜଣାପଡିଛି । ଥାନା ଅଧିକାରୀ ବାବା ଶଙ୍କର ସରଫ ଘଟଣା ସ୍ଥଳରୁ ଆକ୍ରମଣକାରୀ ବାପା ଓ ପୁଅକୁ କାବୁ କରିଛି । ଥାନାରେ ସେମାନଙ୍କୁ ଅଟକ ରଖି ପଚରାଉଚରା କରିବା ପରେ ସେମାନଙ୍କୁ କୋର୍ଟ ଚାଲାଣ କରାଯାଇଥିବା ସୂଚନା ମିଳିଛି l

ଦ କୁଇଭର ବ୍ୟୁରୋ :- ଚଳିତ ଥର ଆଇପିଏଲ୍‌ର ଅଷ୍ଟମ ମ୍ୟାଚ୍‌ରେ ଚେନ୍ନାଇ ସୁପର୍ କିଙ୍ଗ୍ସକୁ ୫୦ ରନ୍‌ରେ ହରାଇ‌ ଦେଇଛି ରୟାଲ୍ ଚ୍ୟାଲେଞ୍ଜର୍ସ ବେଙ୍ଗାଲୁରୁ । ଏଥି ସହ ଆର୍‌ସିବି ୨ରୁ ୨ ବିଜୟ ସହ ପଏଣ୍ଟ ଟେବୁଲ୍ ଶୀର୍ଷ ସ୍ଥାନ ବଜାୟ ରଖିଛି । ଚେନ୍ନାଇ ସୁପର୍ କିଙ୍ଗ୍ସ ସମ୍ମୁଖରେ ୧୯୭ ରନ୍ ବିଜୟ ଲକ୍ଷ୍ୟ ରହିଥିବା ବେଳେ ଘରୋଇ ଦଳ ଲଢ଼ି ପାରି ନଥିଲା । ଦ୍ବିତୀୟ ଓଭରରେ ଜୋସ ହାଜେଲଉଡ୍‌ ଏବଂ ୧୩ତମ ଓଭରରେ ୟଶ ଦୟାଲ ଦୁଇଟି ଲେଖାଏଁ ପ୍ରମୁଖ ୱିକେଟ୍ ବାହାର କରି ସିଏସ୍‌କେ ମେରୁଦଣ୍ଡ ଭାଙ୍ଗି ଦେଇଥିଲେ ।

ଚେନ୍ନାଇ ବିପକ୍ଷରେ ବେଙ୍ଗାଲୁରୁର ବଡ ବିଜୟ । ଘରୋଇ ମାଟିରେ ସିଏସକେକୁ ଦୀର୍ଘ ୧୭ ବର୍ଷ ପରେ ପରାସ୍ତ କରିବାରେ ସଫଳ ହେଲା ଆରସିବି । ଶୁକ୍ରବାର ଆଇପିଏଲରେ ଖେଳାଯାଇଥିବା ଅଷ୍ଟମ ମୁକାବିଲାରେ ଚେନ୍ନାଇ ସୁପର କିଙ୍ଗ୍ସକୁ ୫୦ ରନରେ ପରାସ୍ତ କରି ବିଜୟ ଧାରା ବଜାୟ ରଖିଲା ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ । ରଜତ ପଟିଦାରଙ୍କ ନେତୃତ୍ବାଧୀନ ଆରସିବିର ଆଇପିଏଲରେ ଏହା କ୍ରମାଗତ ଦ୍ବିତୀୟ ବିଜୟ । ପ୍ରଥମ ମ୍ୟାଚରେ ଦଳ କେକେଆରକୁ ପରାସ୍ତ କରିଥିଲା । ୨୦୦୮ ରେ ଚେନ୍ନାଇର ଚେପକରେ ସିଏସକେକୁ ପରାସ୍ତ କରିଥିଲା ଆରସିବି । ଦ୍ବିତୀୟ ଥର ପାଇଁ ଚଳିତ ସିଜିନରେ ପରାସ୍ତ କରିବାର ସଫଳ ହୋଇଛି ।ଟସ ଜିତି ପ୍ରଥମେ ଫିଲ୍ଡିଂ ନିଷ୍ପତ୍ତି ନେଇଥିଲା ଚେନ୍ନାଇ । ପ୍ରଥମେ ବ୍ୟାଟିଂ ପାଇଁ ଆରସିବିକୁ ଆମନ୍ତ୍ରଣ କରିଥିଲା ।ଟୁର୍ଣ୍ଣାମେଣ୍ଟରେ ଏହା ଆରସିବିର କ୍ରମାଗତ ଦ୍ୱିତୀୟ ବିଜୟ ହୋଇଥିବାବେଳେ CSKର ପ୍ରଥମ ପରାଜୟ । ମୁମ୍ବାଇ ବିପକ୍ଷ ମ୍ୟାଚରେ ଚେନ୍ନାଇ ବିଜୟୀ ହୋଇଥିଲା । ସିଏସକେ ବ୍ୟାଟରଙ୍କ ପାଇଁ ଘାତକ ସାବ୍ୟସ୍ତ ହୋଇଥିଲା ଆରସିବି ବୋଲର । ଫଳରେ ଲୟ ହରାଇ ରନ୍‌ କରିବାରେ ବିଫଳ ହୋଇଥିଲେ ଚେନ୍ନାଇ ବ୍ୟାଟର । ରଚିନ ରବିନ୍ଦ୍ର ସର୍ବାଧିକ ୪୧ ରନ କରିଥିବା ବେଳେ ଧୋନି ଅପରାଜିତ ୩୦ ଓ ଜାଡେଜା ୨୫ ର କରିଥିଲେ । ଅନ୍ୟ କେହିବି ପଡିଆରେ ଅଧିକ ସମୟ ତିଷ୍ଟି ପାରିନଥିଲେ । ଜୋସ ହେଜେଲଉଡ ସର୍ବାଧିକ ୩ଟି ଓ୍ବିକେଟ ନେଇଥିବା ବେଳେ ୟସ ଦୟାଲ ୨ଓ ଲିଭିଙ୍ଗଷ୍ଟୋନ ୨ଟି ଓ୍ବିକେଟ ନେଇଥିଲେ ।

ବ୍ରହ୍ମପୁର( ଦ କୁଇଭର ):- ଆଜି ହେଉଛି ୯୦ତମ ପୋଲିସ ପ୍ରତିଷ୍ଠା ଦିବସ,ଏହି ଅବସରରେ ସାରା ରାଜ୍ୟରେ ପୋଲିସ ପକ୍ଷରୁ ପୋଲିସ ପ୍ରତିଷ୍ଠା ଦିବସ ପାଳନ କରାଯାଇଛି। ଏହି ପରିପ୍ରେକ୍ଷୀରେ ବ୍ରହ୍ମପୁର ସହର ର ଆମ୍ଭପୁଆ ସ୍ଥିତ ରିଜେର୍ଭ ପଡିଆ ଠାରେ ୯୦ ତମ ପୋଲିସ ପ୍ରତିଷ୍ଠା ଦିବସ ପାଳନ କରାଯାଇଥିଲା । ଏହି ପ୍ରତିଷ୍ଠା ଦିବସରେ ଦକ୍ଷିଣାଞ୍ଚଳ ଆଇଜି ନିତି ଶେଖର ମୁଖ୍ୟ ଅତିଥି ରୂପେ ଯୋଗ ଦେଇ ଚିତାକର୍ଷକ ପରେଟକୁ ଅଭିବାଦନ ଗ୍ରହଣ କରିବା ସହ ଓଡିଶା ରାଜ୍ୟପାଳ ଓ ମୁଖ୍ୟମନ୍ତ୍ରୀଙ୍କ ବାର୍ତ୍ତା ପ୍ରଦାନ କରିଥିଲେ। ପୋଲିସ ବାହିନୀ ର ଲୋକଙ୍କ ପ୍ରତି ରହିଥିବା କର୍ତ୍ତବ୍ୟ ଓ ସୁରକ୍ଷା ଉପରେ ନିଜ ଭାଷଣ ପ୍ରଦାନ କରିଥିଲେ। ପରିଶେଷରେ ବ୍ରହ୍ମପୁର ପୋଲିସ ତଥା ଜିଲ୍ଲାର ବିଭିନ୍ନ ଥାନାର ଦକ୍ଷ ପୋଲିସ କର୍ମଚାରୀ ମାନଙ୍କୁ ପୁରସ୍କୃତ କରାଯାଇଥିଲା। ଏହି ପ୍ରତିଷ୍ଠା ଦିବସରେ ବ୍ରହ୍ମପୁର ଏସପି ଡାକ୍ତର ଶ୍ରବଣା ବେବେକ ଏମ, ଅତିରିକ୍ତ ଏସପି ସିମା ସ୍ୱାଇଁ,ଅତିରିକ୍ତ ଏସପି କୈଳାଶ ଚନ୍ଦ୍ର ବୁର୍ଦା ଙ୍କ ସମେତ ସମସ୍ତ ଥାନା ଅଧିକାରୀ ଓ ପୋଲିସ କର୍ମଚାରୀ ଉପସ୍ଥିତ ଥିଲେ।

ତେବେ ବୈଦ୍ୟନାଥପୁର ଥାନା ପୋଲିସ ସୁଚିତ୍ରା ପରିଡା, କେ. ନୂଆଗାଁ ପୋଲିସ ଷ୍ଟେସନ SI ଅଞ୍ଜଳି ବେହେରା, ନିମଖଣ୍ଡି ପୋଲିସ si ଜ୍ଞାନ ରଞ୍ଜନ ବେହେରା ସମେତ ଜିଲ୍ଲାର ୧୬ ଜଣ ପୋଲିସ ଅଫିସର ଙ୍କୁ ସେମାନଙ୍କ ଉଚକୋଟିର କାର୍ଯ୍ୟ ପାଇଁ ସନମାନିତ କରାଯାଇଛି l

ଦ କୁଇଭର ବ୍ୟୁରୋ :- ହୁ ହୁ ହୋଇ ବଢ଼ି ଚାଲିଛି ସୁନାଦର । ଲକ୍ଷେ ଛୁଇଁବ ସୁନା ଦର । ୨୨ ହେଉ କି ୨୪ କ୍ୟାରେଟ, ଉଭୟ ଦରରେ ବିପୁଳ ବୃଦ୍ଧି ହୋଇଛି । ଭୁବନେଶ୍ବରରେ ୨୨ କ୍ୟାରେଟ୍ ସୁନା ଦର ୧୦ ଗ୍ରାମ ପିଛା ପାଖାପାଖି ୮୫ହଜାର ଟଙ୍କା ରହିଛି । ସେହିପରି ୨୪ କ୍ୟାରେଟ୍ ସୁନା ଦର ୧୦ ଗ୍ରାମ ପିଛା ପାଖାପାଖି ୯୨ହଜାର ଟଙ୍କା ରହିଛି । ସୋମବାର ୨୨ କ୍ୟାରେଟ୍‌ ସୁନା ଦର ୧୦ ଗ୍ରାମ ପିଛା ୬୫୦ ଟଙ୍କା ଏବଂ ୨୪ କ୍ୟାରେଟ୍ ପିଛା ୭୦୦ରୁ ଅଧିକ ଟଙ୍କା ବଢ଼ିଛି । ଆଗକୁ ବିବାହ ଋତୁ ଥିବାରୁ ଗ୍ରାହକଙ୍କ ମୁଣ୍ଡରେ ଚଡ଼କ ପଡ଼ିଛି । ଭୁବନେଶ୍ବରରେ ସପ୍ତାହକ ମଧ୍ୟରେ ୨୨ କ୍ୟାରେଟ୍ ସୁନା ୩ହଜାର ୩ହଜାରରୁ ଅଧିକ ମହଙ୍ଗା ହୋଇଥିବା ବେଳେ ୨୪ କ୍ୟା‌ରେଟ୍ ସୁନା ୨୫୧୦ ଟଙ୍କା ମହଙ୍ଗା ହୋଇଛି । କେବଳ ସୁନା ନୁହେଁ, ରୁପା ଦାମ୍ ମଧ୍ୟ ବଢ଼ିଛି। ଏକ କିଲୋ ରୁପାର ଦାମ୍ ଏବେ ୧ଲକ୍ଷ ୧୩ହଜାର ଟଙ୍କା ରହିଛି । ତେବେ ଅନିଶ୍ଚିତତାର ସ୍ଥିତିରେ ବଡ଼ ବଡ଼ ନିବେଶ ସଂସ୍ଥା ଓ ବିଭିନ୍ନ ଦେଶର କେନ୍ଦ୍ରୀୟ ବ୍ୟାଙ୍କଗୁଡ଼ିକ ସୁନା କିଣା ବଢେଇ ଦେଇଥିବାରୁ, ଏହି ମୂଲ୍ୟବାନ ଧାତୁର ଦାମ ବଢିଛି ।