'ସଂସାର' ଅନୁଷ୍ଠାନର ୫୭ତମ ବାର୍ଷିକ ଉତ୍ସବ ପାଳିତ

ବ୍ରହ୍ମପୁର ( ଦ କୁଇଭର ):- ପ୍ରକୃତି ତଥା ପରିବେଶର ସୁରକ୍ଷା ଏବଂ ଜଳବାୟୁ ସନ୍ତୁଳନ ଦ୍ବାରା ସୁସ୍ଥ ସମାଜ ଗଠନ ସମ୍ଭବ । ଆନ୍ତର୍ଜାତିକ ୟୁନିସେଫ କାଉନସିଲ (ଫ୍ରାନ୍ସ)ର ଚେନାଇ ଚାପ୍ଟେର ମାଧ୍ୟମରେ “ ଗ୍ଲୋବାଲ ବେଷ୍ଟ ସୋସିଆଲ ୱାର୍କର ଆୱାର୍ଡ ୨୦୨୧* ପ୍ରାପ୍ତ ତଥା ଅଗ୍ରଣୀ ‘ସଂସାର’ ଅନୁଷ୍ଠାନର ପ୍ରତିଷ୍ଠାତା ସଂପାଦକ ରମେଶ ଚନ୍ଦ୍ର ସାହୁ ଏହି ବାର୍ଷିକ ଉତ୍ସବ ପାଳନ ଅବସରରେ ମତପ୍ରକାଶ କରିବା ସହ ଏହି ଦଶନ୍ଧି ମଧ୍ୟରେ ସାମୁହିକ ପ୍ରୟାସରେ ମହୁରୀଗଡର ରାଜାବନ୍ଧ, ରାଣୀବନ୍ଧ, ପଦ୍ମପୋଖରୀର ପୁନରୁଦ୍ଧାର, ଋଷିକୁଲ୍ୟା ଉତ୍ପତ୍ତିସ୍ଥଳ ଠାରୁ ସମୁଦ୍ର ମୁହାଣ ମଧ୍ୟବର୍ତ୍ତି ଅବବାହିକା ସୁରକ୍ଷା ତଥା ବିକାଶ ଦିଗରେ କାର୍ଯ୍ୟ ସହ ଐତିହାସିକ ପୀଠ ଓ ଐତିହ୍ୟର ସୁରକ୍ଷା ଦିଗରେ ଅଧୂକ ଧ୍ୟାନ ଦିଆଯିବା ଉପରେ ଗୁରୁତ୍ୱାରୋପ କରିଥିଲେ । ଏହିଭଳି କାର୍ଯ୍ୟରେ ରାଜ୍ୟ ଏବଂ କେନ୍ଦ୍ର ସରକାରଙ୍କ ପ୍ରୋତ୍ସାହନ ତଥା ବଦାନ୍ୟ ବ୍ୟକ୍ତିଙ୍କ ପୃଷ୍ଠପୋଷକତା ମିଳିଲେ ଏହି ଅନୁଷ୍ଠାନ ଆଞ୍ଚଳିକ ବାସିନ୍ଦାଙ୍କ ଦୈନିନ୍ଦିନ ଜୀବନଶୈଳୀରେ ଉପାର୍ଜନ ବୃଦ୍ଧି ସହ ଇକୋ ଟୁରିଜମ୍ ଏବଂ ପର୍ଯ୍ୟଟନ ଶିଳ୍ପ ପାଇଁ ଭିଭିଭୂମିର ବିକାଶ ହୋଇପାରିବ ବୋଲି ଉପସ୍ଥିତ ବୁଦ୍ଧିଜୀବୀମାନେ ମତବ୍ୟକ୍ତ କରି ପରିବେଶ ସୁରକ୍ଷା ଦିଗରେ କାର୍ଯ୍ୟ କରିଆସୁଥିବା ‘ସଂସାର' ପରିବାରର ସମସ୍ତ ସ୍ୱେଚ୍ଛାସେବୀଙ୍କ ଉତ୍ତୋରତ୍ତର ଉନ୍ନତି କାମନା କରିଥିଲେ । ବୁଧବାର ଦିନ ବ୍ରହ୍ମପୁର ସ୍ଥିତ ପ୍ରକାଶମୂହଲ ପରିସରରେ ଆୟୋଜିତ ଏହି କାର୍ଯ୍ୟକ୍ରମରେ ସଂସାର ଅନୁଷ୍ଠାନର ସଭାପତି ଦୁର୍ଗାପ୍ରସାଦ ଆଚାର୍ଯ୍ୟ ଅଧ୍ଯକ୍ଷତା କରିଥିବା ବେଳେ ମୂଖ୍ୟ ଅତିଥିଭାବେ ଗଞ୍ଜାମ ଜିଲ୍ଲା ବି.ଜେ.ପି ସଭାପତି ସରୋଜ ସାବତ, ମୂଖ୍ୟବକ୍ତା ରାଜ୍ୟ ବି.ଜେ.ପି ମିଡିଆ ସେଲ ପ୍ରମୂଖ ଟି.ଗୋପି, ସମ୍ମାନିତ ଅତିଥ୍ ଓଡିଶା ନାଟ୍ୟ ସଂଘ ଉପସଭାପତି ଭବାନୀ ଶଙ୍କର ମିଶ୍ର, ସାଂସଦ ପ୍ରତିନିଧୂ ବାଳକୃଷ୍ଣ ସାମନ୍ତରାୟ, ବାଲେଶ୍ଵରର ବରିଷ୍ଠ ଯାତ୍ରା କଳାକାର ରାଜେନ୍ଦ୍ରମୋହନ ପତି ପ୍ରମୂଖ ଆଲୋଚନାରେ ଅଂଶଗ୍ରହଣ କରି ଅନୁଷ୍ଠାନ ପକ୍ଷରୁ ପରିବେଶ ଉପରେ ଦୀର୍ଘବର୍ଷ ଧରି କରାଯାଉଥିବା ଉଦ୍ୟମର ଭୂୟସୀ ପ୍ରଶଂସା କରିଥିଲେ। ପ୍ରାରମ୍ଭରେ ବରିଷ୍ଠ ସାମ୍ବାଦିକ ତଥା କଣ୍ଠଶିଳ୍ପୀ ସୁଦୀପ ସାହୁ ମଞ୍ଚ ପରିଚାଳନା କରିଥିବା ବେଳେ ପ୍ରତିଷ୍ଠାତା ସଂପାଦକ ଶ୍ରୀ ସାହୁ ସଂପାଦକୀୟ ବିବରଣୀ ପାଠ କରିଥିଲେ । ଏହି ଅବସରରେ ବକୃତା, ଚିତ୍ରାଙ୍କନ, ପ୍ରବନ୍ଧ, ଯୋଗ, ହସ୍ତାକ୍ଷର, ସଂଗୀତ ପ୍ରତିଯୋଗିତା ସହ ଦୁଆନ ପଲ୍ଲୀର କଳାକାରମାନଙ୍କ ଦ୍ଵାରା ଲକ୍ଷ୍ମୀପୁରାଣ ଲୋକନାଟକ ପରିବେଷଣ, ବରିଷ୍ଠ କଣ୍ଠଶିଳ୍ପୀ ମାନଙ୍କ ସଂଗୀତ କାର୍ଯ୍ୟକ୍ରମ, କୁନି କୁନି କଳାକାରମାନଙ୍କ ଦ୍ଵାରା ସମ୍ବଲପୁରୀ ନୃତ୍ୟ ଆଦି ଅନୁଷ୍ଠିତ ହୋଇଥିଲା । ଏହାପରେ ସଂସାର ସଭାପତି ଦୁର୍ଗାପ୍ରସାଦ ଆଚାର୍ଯ୍ୟଙ୍କ ୬୬ତମ ଜନ୍ମଦିବସ ଉପଲକ୍ଷେ ବିଭିନ୍ନ ଅନୁଷ୍ଠାନ ଏବଂ ବିରଷ୍ଟ କଳାକାରମାନେ ସୁଭେଚ୍ଛା ସ‌ହ ଉପହାରମାନ ଦେଇ ତାଙ୍କର ଦୀର୍ଘଜୀବନ କାମନା କରିଥିଲେ । ଶେଷରେ ଅନୁଷ୍ଠାନ ତରଫରୁ ବରିଷ୍ଟ କଳାକାର ସଂଘର ମହାସଚିବ ସୁବାସଚନ୍ଦ୍ର ସାହୁ ଧନ୍ୟବାଦ ଅର୍ପଣ କରିଥିଲେ ।