ଆଜି ଓଡ଼ିଶା ଆସୁଛନ୍ତି ପିଏମ ମୋଦି

ଭୁବନେଶ୍ୱର(ଦ କୁଇଭର): ଭିତରେ ଭିତିରେ ବେଶ ଭଲ ଗୋଟି ଚଳାଇଛନ୍ତି ଏମପି ଅପରାଜିତା ଷଢ଼ଙ୍ଗୀ । ରାଜ୍ୟ ସଭାପତି ମନମୋହନ ସାମଲଙ୍କ ସହ ମିଶି ପୂରା ଲମ୍ବା ଖେଳ ଖେଳିଛନ୍ତି । ଓଡ଼ିଶାରେ ଚାଲିଥିବା ଭିତିରି ଗୋଡ଼ଟଣାର ପୂରା ତଥ୍ୟ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନିକଟରେ ଥୋଇଛନ୍ତି । କେବଳ ସେତିକି କରିନାହାନ୍ତି, କାଳେ ଓଡ଼ିଶାର ବିକାଶ ପାଇଁ ଯୋଜନା ବି ନେଇ ଦେଖାଇଛନ୍ତି । ଯାହା ପୂର୍ବରୁ କେହି କରିନଥିଲେ । ସେହି ଚିତ୍ରକୁ ଦେଖି ମୋଦି କାଳେ ମନମୋହନଙ୍କ ସହ ଅପରାଜିତାଙ୍କ ଉପରେ ଖୁସି ଅଛନ୍ତି । ଏହାପରେ ମୋଦିଙ୍କ ନିକଟରେ ଧର୍ମେନ୍ଦ୍ରଙ୍କ ଆଦର କାଳେ କମିଛି । ମୋଦି ଆଉ ପୂର୍ବ ଭଳି କାଳେ ଭରସା କରିପାରୁ ନାହାନ୍ତି । ଏକଥା ଆମେ କାହୁନାହୁଁ, ଖୋଦ ମୋଦିଙ୍କ ଭାଷଣ ହିଁ ଇଙ୍ଗିତ କରୁଛି ।

ମୋଦି ଯାହା କହିଲେ ତାର ତର୍ଜମା ତ କରିବା, ଏବେ ଆସିବା ଅପରାଜିତାଙ୍କ ଗୋଟି ଚାଳନାକୁ । ଅପରାଜିତା କାଳେ ଭୁବନେଶ୍ୱର ତଥା ରାଜ୍ୟର ବିକାଶକୁ ନେଇ ଏକ ବିସ୍ତୃତ ପ୍ରସ୍ତାବ ପ୍ରଧାନମନ୍ତ୍ରୀଙ୍କୁ ଦେଇଥିଲେ । ଏହାପରେ ପ୍ରଧାନମନ୍ତ୍ରୀ ଅପରାଜିତା ଓ ତାଙ୍କର ସହଯୋଗୀ ମାନଙ୍କୁ ଗୁଜୁରାଟ ବୁଲାଇ ପ୍ରସ୍ତୁତ ହେବାକୁ କହିଥିଲେ । ଠିକ ସେହି ସମୟରେ ଧର୍ମେନ୍ଦ୍ର ତାଙ୍କର ଗଡ ଫାଦର କେନ୍ଦ୍ରମନ୍ତ୍ରୀ ଅମିତ ଶାହାଙ୍କୁ ଧରି କାଳେ ଗେମ ଖେଳିଦେଲେ । ତେଣୁ ଅପରାଜିତାଙ୍କୁ ଚାପିବାକୁ କୁହାଗଲା । ହେଲେ ଅପରାଜିତା ଦବିଲେ ନାହିଁ ।

ନିର୍ବାଚନ ପୂର୍ବରୁ ଧର୍ମେନ୍ଦ୍ରଙ୍କ ନିଦେ୍ର୍ଦଶରେ କାଳେ ରାଜ୍ୟ ସଭାପତି ଥିଲେ । ନିର୍ବାଚନ କିଛିମାସ ପୂର୍ବରୁ ରାଜ୍ୟର ସଭାପତି ବଦଳାଇ ମନମୋହନ ସାମଲଙ୍କୁ କରାଗଲା । ଏହାପରେ ଅପରାଜିତା ଓ ମନମୋହନ ମିଶିଗଲେ । ସାଙ୍ଗରେ ପ୍ରଦୀପ ପାଣିଗ୍ରାହୀ ଓ ଅପରାଜିତାଙ୍କ ସୈନ୍ୟସାମନ୍ତ ମିଶିଲେ । ସେହି ସମୟରେ ଧର୍ମେନ୍ଦ୍ରଙ୍କୁ ଲୋକସଭା ନିର୍ବାଚନ ଲଢ଼ିବାକୁ ଉପରୁ ମିଳିସାରିଥିଲା ନିଦେ୍ର୍ଦଶ । ହେଲେ ବିଜେଡିର ଲୋକପ୍ରିୟତା ଆଗରେ ଲଢ଼େଇ କରି ଜିତିବାକୁ ପ୍ରାୟ ସମସ୍ତେ ଡରୁଥିଲେ । ସେ ଧର୍ମେନ୍ଦ୍ର ପ୍ରଧାନ ହୁଅନ୍ତୁ କି ବୈଜୟନ୍ତ ପଣ୍ଡା ବା ସମ୍ବିତ ପାତ୍ର, କାହାର ଜୁ ପାଉ ନଥିଲା । ତେଣୁ ଆସିଲା ବିଜେଡି ସହ ମେଣ୍ଟ କଥା ।

ମେଣ୍ଟ ପାଇଁ ପ୍ରାୟ ସମସ୍ତେ ରାଜି ହୋଇଗଲେ । ହେଲେ ଅଡ଼ି ବସିଲେ ରାଜ୍ୟ ସଭାପତି ମନମୋହନ ଓ ଏମପି ଅପରାଜିତା । କୌଣସି ସ୍ଥିତିରେ ମେଣ୍ଟ ନକରିବାକୁ କହିଲେ । ମାତ୍ର ବହୁ ପୁୁରୁଖାମାନେ କହିଲେ, ବିଜେପି ଏକାକୀ ରାଜ୍ୟରେ ସରକାର କରିବା ସମ୍ଭବ ନୁହେଁ । ସେମାନେ ବିଶ୍ୱାସ କରିପାରୁ ନଥିଲେ । ହେଲେ ଅପରାଜିତା ଓ ମନମୋହନ ଅଡ଼ି ବସିଲେ । ଶେଷରେ ମେଣ୍ଟ ହେଲାନାହିଁ ଓ ବିଜେପି କେବଳ ସରକାର କଲା ନାହିଁ, ୨୧ ଏମପିରୁ ୨୦ ବିଜେପି ନେଇଗଲା । ଏହାପରେ ଚାଲ କରି ଉପଯୁକ୍ତ ପ୍ରାର୍ଥୀଙ୍କୁ ମୁଖ୍ୟମନ୍ତ୍ରୀ ପଦରୁ ଦୂରେଇ ଦିଆଗଲା । ସବୁ ବୁଝିଗଲେ ମୋଦି ।

ଉପରୁ ଯୋଜନା ଚାଲିଥିଲା ଧର୍ମେନ୍ଦ୍ର ହେବେ ମୁଖ୍ୟମନ୍ତ୍ରୀ । ମାତ୍ର କାଳେ ମୋଦି ଅଡ଼ା ପଡ଼ିଗଲେ । ଏହାପରେ ରାଜ୍ୟ ରାଜନୀତିରେ ବଡ଼ ବଡ଼ ପରିବର୍ତ୍ତନ ହେବାରେ ଲାଗିଛି । ଅପରାଜିତାଙ୍କ ଭିତିରି ଗେମରେ ମୋଦି ଓଡ଼ିଶା ବିଜେପିର ସବୁ ସ୍ଥିତି ଜାଣି ଯାଇଛନ୍ତି । ତେଣୁ ଏଥର ଇଙ୍ଗିତ ଦେଇଗଲେ, ପୁରୁଖାମାନେ ହଇରାଣ କରନାହିଁ । ସରକାରଙ୍କୁ କାମ କରିବାକୁ ଦିଅ । ମୋଦିଙ୍କ ଏହି କଥା ଧର୍ମେନ୍ଦ୍ରଙ୍କ ସମେତ ବୈଜୟନ୍ତ ଓ ତାଙ୍କ ଗୋଷ୍ଠୀର ନେତା ମାନଙ୍କର ହୋସ ଉଡ଼ାଇ ଦେଲାଣି । କେମିତି ଓଡ଼ିଶାରେ ପତିଆରା ରଖିବେ ସେହି ଚିନ୍ତାରେ ଲାଗିଛନ୍ତି । ଅନ୍ୟପକ୍ଷରେ ଅପରାଜିତା ଓ ମନମୋହନ ପୂରା ଦମରେ ଦଳକୁ ବଢ଼ାଇବାରେ ଲାଗିଛନ୍ତି । ଦେଖାଯାଉ ମୋଦିଙ୍କ ଏହି ଚେତାବନୀରେ ବିଜେପିର ଭିତିରି ବିବାଦ ଥମୁଛି ନା ଚେର କଟା କଟି ବଢ଼ୁଛି?

ଗଞ୍ଜାମ( ଦ କୁଇଭର ):- ଏଲ ପି ଜି ଗ୍ୟାସ ବୋଝେଇ ଟ୍ରକ ରେ ଲାଗିଲା ନିଆଁ । ଅଳ୍ପକେ ବର୍ତ୍ତି ଲେ ଡ୍ରାଇଭର ।ଗଞ୍ଜାମ ଜିଲ୍ଲାର ପୁଇତଳl ଛକ ଠାରେ ଏଲ ପି ଜି ସିଲିଣ୍ଡର ବୋଝେଇ ଟ୍ରକରେ ନିଆଁ ଲାଗି ଇଞ୍ଜିନ ଟି ସମ୍ପୂର୍ଣ୍ଣ ଜଳି ଯାଇଥିବା ବେଳେ ଡ୍ରାଇଭର ଅଳ୍ପକେ ବର୍ତ୍ତି ଯାଇଛନ୍ତି । ଗଞ୍ଜାମ ଥାନା ପୁଇତଳl ଛକ ନିକଟରେ ଏଲ ପି ଜି ଗ୍ୟାସ ସିଲିଣ୍ଡର ବୋଝେଇ ଟ୍ରକ ରେ ଆଜି ସକାଳେ ନିଆଁ ଲାଗି ଯାଇଥିଲା । ଗାଡି ଟି ଭୁବନେଶ୍ଵର ରୁ ବ୍ରହ୍ମପୁର ଅଭିମୁଖେ ଯାଉଥିବା ଏଲପିଜି ଗ୍ୟାସ ସିଲିଣ୍ଡର ବୋଝେଇ ଟ୍ରକ ରେ ସଟ ସର୍କିଟ ଯୋଗୁଁ ଅଚାନକ ନିଆଁ ଲାଗି ଯାଇଥିବା ସନ୍ଦେହ କରାଯାଉଛି ।

ନିଆଁ ଲାଗିଥିବା ଡ୍ରାଇଭର ଜାଣି ପାରି ଟ୍ରକଟିକୁ ସେଠାରେ ଅଟକାଇବା ସହ ଅଗ୍ନିଶମ ବିଭାଗ କୁ ସୂଚନା ଦେଇଥିଲେ । ଛତ୍ରପୁର ଅଗ୍ନିଶମ ବିଭାଗ ସେଠାରେ ପହଁଚି ନିଆଁକୁ ଆୟତ୍ତ କରିଥିବା ବେଳେ ଟ୍ରକ ର ଇଞ୍ଜିନ ସମ୍ପୂର୍ଣ୍ଣ ଭାବରେ ଜଳିଯାଇଥିଲା । ତେବେ ଟ୍ରକ ର ଡାଲା ପଟେ ନିଆଁ ଲାଗିନଥିବା ଯୋଗୁଁ ଏକ ବଡ଼ ଦୁର୍ଘଟଣା ଟଳି ଯାଇଥିଲା । ସଠିକ ସମୟରେ ଖବର ପାଇ ଦମକଳ ବାହିନୀ ଘଟଣା ସ୍ଥଳ ରେ ପହଁଚି ନିଆଁ କୁ ଆୟତ୍ତ କରିଥିଲେl

ମୟୁରଭଞ୍ଜ( ଦ କୁଇଭର ):- ଡିସେମ୍ବର ୬ରେ ମୟୂରଭଞ୍ଜ ଗସ୍ତରେ ଆସୁଛନ୍ତି ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ରାଷ୍ଟ୍ରପତି ହେବା ପରେ ମୟୂରଭଞ୍ଜ ଜିଲ୍ଲାକୁ ଚତୁର୍ଥ ଥର ପାଇଁ ଆସୁଥିବା ବେଳେ ପ୍ରଥମ ଥର ନିଜ ଜନ୍ମମାଟି କୁସୁମୀ ବ୍ଲକ ଅନ୍ତର୍ଗତ ଉପରବେଡା ଗ୍ରାମରେ ପାଦ ଦେବେ । ସମଗ୍ର ଗାଁ ତାଙ୍କ ଅପେକ୍ଷାରେ lଏଥିପାଇଁ ସଜ୍ଜେଇ ହେଉଛି ମହାମହିମଙ୍କ ଜନ୍ମମାଟି । ରାଷ୍ଟ୍ରପତିଙ୍କ ଗସ୍ତକୁ ନେଇ ଜୋରଦାର ପ୍ରସ୍ତୁତି ଚାଲିଛି ।

ମହାମହିମ ଛୋଟବେଳେ ପାଠ ପଢୁଥିବା ସ୍କୁଲ 'ଉପରବେଡା ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ' ପରିଦର୍ଶନ କରିବେ । ସେଠାରେ ଆୟୋଜିତ ଏକ କାର୍ଯ୍ୟକ୍ରମରେ ଯୋଗ ଦେବା ପରେ ସେଠାକାର ଛାତ୍ରଛାତ୍ରୀ, ଶିକ୍ଷକ ଶିକ୍ଷୟିତ୍ରୀ ଓ କିଛି ବିଶେଷ ବ୍ୟକ୍ତିଙ୍କୁ ଭେଟିବାର କାର୍ଯ୍ୟକ୍ରମ ରହିଛି । ସେପଟେ ରାଷ୍ଟ୍ରପତିଙ୍କୁ ପାଖରୁ ଦେଖିବା ପାଇଁ ଗାଁ ଲୋକଙ୍କ ସହିତ ଉପରବେଡା ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ଶିକ୍ଷକ ଶିକ୍ଷୟିତ୍ରୀ ଓ ଛାତ୍ରଛାତ୍ରୀଙ୍କ ମଧ୍ୟରେ ଉତ୍ସାହ ବଢ଼ିବାରେ ଲାଗିଛି । ଅତି ସୁନ୍ଦର ଭାବରେ ଗାଁ ଏବଂ ଗାଁ ବିଦ୍ୟାଳୟକୁ ସାଜସଜ୍ଜା କରାଯାଉଛି । ରାଷ୍ଟ୍ରପତିଙ୍କ ସୁରକ୍ଷା ବ୍ୟବସ୍ଥାରେ ଯେପରି କୌଣସି ତ୍ରୁଟି ନ ହୁଏ ସେନେଇ ଉପରବେଡା ଗ୍ରାମକୁ ଉଚ୍ଚ ପଦସ୍ଥ ଅଧିକାରୀମାନେ ଘନଘନ ଗସ୍ତ କରୁଛନ୍ତି ।

ଦ କୁଇଭର ବ୍ୟୁରୋ :- ଆଜି ଠାରୁ ୫ ଦିନିଆ ଓଡ଼ିଶା ଗସ୍ତରେ ଆସୁଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ । ଏହି ଗସ୍ତରେ ସେ ରାଜଧାନୀ ଭୁବନେଶ୍ୱର, ପୁରୀ ଓ ମୟୂରଭଞ୍ଜରେ ଆୟୋଜିତ ବିଭିନ୍ନ କାର୍ଯ୍ୟକ୍ରମରେ ଯୋଗଦେବେ । ୪ ତାରିଖରେ ପୁରୀରେ ଆୟୋଜିତ ନୌସେନା ଦିବସ ରେ ମୁଖ୍ୟ ଅତିଥି ଭାବେ ଯୋଗଦେବେ ରାଷ୍ଟ୍ରପତି । ଏହାସହ ଭୁବନେଶ୍ୱରରେ କୋର୍ଟ କମ୍ପ୍ଲେକ୍ସର ଉଦଘାଟନରେ ମଧ୍ୟ ଯୋଗଦେବାର କାର୍ଯ୍ୟକ୍ରମ ରହିଛି । ଏନେଇ ରାଷ୍ଟ୍ରପତିଙ୍କ ତିନିଦିନିଆ ଗସ୍ତର କାର୍ଯ୍ୟସୂଚୀ ମଧ୍ୟ ଚୂଡାନ୍ତ ହୋଇଛି । ସେହି ଆଧାରରେ ପ୍ରୋଟୋକଲ ଅନୁସାରେ, ସୁରକ୍ଷା ପାଇଁ ପୋଲିସ ପକ୍ଷରୁ ସମସ୍ତ ପ୍ରସ୍ତୁତି ଶେଷ ହୋଇଛି ।ଦିଲ୍ଲୀ ଅପରାହ୍ନ ଏୟାରପୋର୍ଟରୁ ବାୟୁସେନାର ସ୍ବତନ୍ତ୍ର ବିମାନଯୋଗେ ଆସି ଅପରାହ୍ନ ୫ଟାରେ ଭୁବନେଶ୍ୱର ବିଜୁ ପଟ୍ଟନାୟକ ବିମାନ ବନ୍ଦରରେ ପହଞ୍ଚିବେ । ପରେ ବିମାନ ବନ୍ଦରରୁ ସିଧାସଳଖ କାରକେଡ ଯୋଗେ ୫.୩୦ମିନଟରେ ଚନ୍ଦ୍ରଶେଖରପୁର ନିଳାଦ୍ରୀ ବିହାରରେ ପଣ୍ଡିତ ରଘୁନାଥ ମୁର୍ମୁଙ୍କ ପ୍ରତିମୂର୍ତ୍ତି ଉନ୍ମୋଚନ ସହ ଏକ ସାଧାରଣ ସଭାରେ ଯୋଗଦେବେ । ସେଠାରୁ ୬.୨୫ରେ ରାଜଭବନରେ ପହଞ୍ଚି ରାତ୍ରିଯାପନ କରିବେ‌ । ପରଦିନ ଅର୍ତାତ ୪ ତାରିଖ ସକାଳ ୯ଟାରେ ରାଜଭବନରୁ ବାହାରି ୯.୨୦ ରେ ଭୁବନେଶ୍ୱର ଏୟାରପୋର୍ଟରେ ପହଞ୍ଚି ସେଠାରୁ ସ୍ବତନ୍ତଚ୍ର ବିମାନ ଯୋଗେ ୯.୫୫ରେ ପୁରୀ ତାଳବଣିଆ ହେଲିପ୍ୟାଡ ପଡିଆରେରେ ପହଞ୍ଚିବେ । ୧୦.୦୫ରେ ଶ୍ରୀମନ୍ଦିର ଯାଇ ମହାପ୍ରଭୁଙ୍କ ଦର୍ଶନ କରିବେ ।

ଶ୍ରୀମନ୍ଦିରରୁ ବାହାରି ୧୦.୫୦ରେ ଗୋପବନ୍ଧୁ ଆର୍ୟୁବୈଦିକ ମହାବିଦ୍ୟାଳୟରେ ପହଞ୍ଚି ୭୫ ତମ ବାର୍ଷିକୀ ଉତ୍ସବରେ ଯୋଗଦେବେ ।ପରେ ୩.୫୫ରେ ନୌସେନା ଦିବସରେ ଯୋଗ ଦେବା ପାଇଁ ବାହାରିବେ । ଏନେଇ ପୁରୀ ରାଜଭବନ ପରିସରରେ ଗାର୍ଡ ଅଫ ଅନର ସହ ସେଠାରୁ ସେ ୨୦୦ ମିଟର ପର୍ଯ୍ୟନ୍ତ ଚାଲିଚାଲି ବ୍ଲୁ ଫ୍ଲାଗ ବିଚରେ ହେଉଥିବା ନୌସେନା ଦିବସ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗଦେବେ । ୪୦.୦୫ରେ ନୌସେନା ଦିବସ କାର୍ଯ୍ୟକ୍ରମରେ ନୌସେନାର ଚିତ୍ତାକର୍ଷକ କୋଶଳ ପ୍ରଦର୍ଶନ ଓ ବିଭିନ୍ନ ପ୍ରତିରକ୍ଷାରେ ବ୍ୟବହୃତ ଯୁଦ୍ଧ ସାମଗ୍ରୀର ପ୍ରଦର୍ଶନ ଦେଖିବେ ।ପରେ ୬ ତାରିଖରେ ସକାଳ ୦୯.୦୫ରେ ରାଜଭବନରୁ ବାହାରି ଏଜି ଛକ ସ୍ଥିତ ବି.ଆର୍ ଆମ୍ବେଦକରଙ୍କ ପ୍ରତିମୂର୍ତ୍ତୀରେ ମାଲ୍ୟାର୍ପଣ କରିବେ । ୦୯.୧୫ ପର୍ଯ୍ୟନ୍ତ ସେଠାରେ ମହାପର୍ବ ନିର୍ବାଣ ଦିବସରେ ଯୋଗଦେବା । ପରେ ୦୯.୨୫ ସୁଦ୍ଧା ଭୁବନେଶ୍ୱର ଏୟାରପୋର୍ଟରେ ପହଞ୍ଚି ସେଠାରୁ କଲିକତା ବିମାନ ବନ୍ଦର ଅଭିମୁଖେ ଗସ୍ତ କରିବେ ।

ରାଷ୍ଟ୍ରପତିଙ୍କ ଗସ୍ତ ପାଇଁ ପୋଲିସ ପକ୍ଷରୁ କାରକେଡ ବ୍ୟବସ୍ଥା କରାଯାଇଛି । ଏହାସହ ସୁରକ୍ଷାକୁ ନେଇ ବ୍ୟାରିକେଡ ସହ ଟ୍ରାଫିକ ପରିଚାଳନା ପାଇଁ ପୋଲିସ ସୁରକ୍ଷା ବ୍ୟବସ୍ଥା କରଯାଇଛି । କମିସନରେଟ ପୋଲିସର ପାଖାପାଖି ୬୯ ପ୍ଲାଟୁନ ଫୋର୍ସ ମୁତୟନ କରାଯିବ । ଏନେଇ ଏୟାରପୋର୍ଟ, ରାଜଭବନ, କଳ୍ପନା ଛକ, ଏଜି ଛକ ସହ ଚନ୍ଦ୍ରଶେଖରପୁରରେ ଅସ୍ଥାୟୀ ପୋଲିସ କଣ୍ଟ୍ରୋଲ ରୁମ୍ ବ୍ୟବସ୍ଥା କରାଯାଇଛି । ଏଥିସହ ସିସିଟିଭି କଣ୍ଟ୍ରୋଲ ରୁମ୍ ଜରିଆରେ ସମ୍ପୂର୍ଣ୍ଣ କାର୍ଯକ୍ରମ ଉପରେ ନଜର ରଖିବ ପୋଲିସ ।

ଦ କୁଇଭର ବ୍ୟୁରୋ :- ରାଜ୍ୟରେ ଖୁବଶୀଘ୍ର ଦୂର ହେବ ଆଳୁ ସଙ୍କଟ । ଉତ୍ତରପ୍ରଦେଶରେ ଆସୁଛି ୩୦୦ ଟ୍ରକ୍ ଆଳୁ । ସୋମବାର ସକାଳ ସୁଦ୍ଧା ଓଡ଼ିଶାରେ ପହଞ୍ଚିବ ଟ୍ରକ । ଏନେଇ ସୂଚନା ଦେଇଛନ୍ତି ଖାଦ୍ୟ ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର । କୌଣସି ବ୍ୟବସାୟୀ ଏହି ସ୍ଥିତିର ଫାଇଦା ନେଇ ଅଧିକ ଦରରେ ଆଳୁ ବିକ୍ରି କଲେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ଚେତାଇ ଦେଇଛନ୍ତି । ସେପଟେ ପଶ୍ଚିମବଙ୍ଗରେ ବର୍ତ୍ତମାନ ୭ ଲକ୍ଷ ମେଟ୍ରିକ ଟନ୍ ଆଳୁ ଗଚ୍ଛିତ ଅଛି । ରାଜ୍ୟର ଚାହିଦା ଅତି ବେଶୀରେ ୫ ଲକ୍ଷ ମେଟ୍ରିକ ଟନ୍ । ତେଣୁ ବାକି ୨ ଲକ୍ଷ ମେଟ୍ରିକ ଟନ୍ ଆଳୁ ପଶ୍ଚିମବଙ୍ଗ ଅନ୍ୟ ରାଜ୍ୟକୁ ଦେଇ ପାରିବେ । ଏ ନେଇ ରିପୋର୍ଟ ଆସିଥିବା ସୂଚନା ଦେଇଛନ୍ତି ଖାଦ୍ୟ ଯୋଗାଣ ମନ୍ତ୍ରୀ । ଯେଉଁ ବେପାରୀମାନେ ଆଳୁ ବାହାରକୁ ବିକ୍ରି କରିବା ପାଇଁ ଗଚ୍ଛିତ ରଖିଛନ୍ତି, ଯଦି ସେମାନେ ରପ୍ତାନି କରିପାରିବେନି ତେବେ ଆଳୁ ପଚିଯିବ ଓ କ୍ଷତି ସହିବେ । ତେଣୁ ବ୍ୟବସାୟୀ ମାନେ ଆନ୍ଦୋଳନକୁ ଓହ୍ଲାଇବା ସ୍ବାଭାବିକ । ସେପଟେ ସବୁ ରାଜ୍ୟକୁ ସମାନ ଦୃଷ୍ଟିରେ ଦେଖିବାକୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀଙ୍କୁ ପରାମର୍ଶ ଦେଇଛନ୍ତି ଖାଦ୍ୟ ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ।

ମୟୁରଭଞ୍ଜ( ଦ କୁଇଭର ):- ଅଚାନକ ଜରୁରୀକାଳୀନ ଭାବେ ବିଲ ଭିତରେ ଅବତରଣ କଲା ନୌସେନା ହେଲିକପ୍ଟର । ମୟୂରଭଞ୍ଜ ଜିଲ୍ଲା ରାସଗୋବିନ୍ଦପୁର ବ୍ଲକର ଗାଁ ଅମରଦା ପଞ୍ଚାୟତ ଅମରଦା ଠାରେ ବିଲ ଭିତରେ ନୌସେନା ହେଲିକପ୍ଟର ଜରୁରୀକାଳୀନ ଅବତରଣ କରିଥିବା ଦେଖିବାକୁ ମିଳିଛି । ତେବେ ବିଲରେ ଚାଷୀମାନେ ଧାନ କାଟୁଥିବା ସମୟରେ ଦେଖିବାକୁ ପାଇଥିଲେ ଏକ ହେଲିକପ୍ଟର ବିଲ ମଧ୍ୟରେ ଅବତରଣ କରିବାକୁ ଚେଷ୍ଟା କରୁଛି । ଗୋଟିଏ ବିଲ ଭିତରେ ଅବତରଣ କରିବାକୁ ଚେଷ୍ଟା କରୁଥିବା ବେଳେ ଧାନକୁଟା ଉଡିବାରୁ ସେଠାରେ ଅବତରଣ ନ କରି ଅନ୍ୟ ଏକ ଫାଙ୍କା ବିଲରେ ଅବତରଣ କରିଥିଲା । ଦୀର୍ଘ ୩୦ ମିନିଟ ଧରି ପାଇଲଟ ହେଲିକେପ୍ଟରରୁ ଓହ୍ଲାଇ ଯାନ୍ତ୍ରିକ ତ୍ରୁଟିକୁ ସୁଧାରି ଥିଲେ । ୪୫ ମିନିଟ ପରେ ପୁଣି ଉଡିବାକୁ ସକ୍ଷମ ହୋଇଥିଲା ନୌସେନା ହେଲିକେପ୍ଟର । ତେବେ ଚାଷ କାମରେ ଲାଗିଥିବା ଲୋକେ ଭୟଭୀତ ଥିବା ପରିଲକ୍ଷିତ ହୋଇଥିଲା। ଅପରପକ୍ଷରେ ସ୍ଥାନୀୟ ଲୋକଙ୍କ ମଧ୍ୟରେ ନୌସେନା ହେଲିକେପ୍ଟର ଦେଖିବାକୁ ଭିଡ଼ ଜମିଥିଲା ।

ଗଞ୍ଜାମ( ଦ କୁଇଭର ):- ଗଞ୍ଜାମ ଜିଲ୍ଲା ସୁନାପୂର ବ୍ଲ୍ୟୁ ଫ୍ଲାଗ ବେଳାଭୂମି ରେ ଉଦଘାଟିତ ହେଲା ଇକୋ ରିଟ୍ରିଟ। ଚିକିଟି ବିଧାୟକ ଚିନ୍ତାମଣି ଧ୍ୟାନସାମନ୍ତରା ମୁଖ୍ୟ ଅତିଥି ଭାବେ ଯୋଗ ଦେଇ ରିଟ୍ରିଟ କୁ ଉଦଘାଟନ କରିଥିଲେ । ଉଦ୍ଘାଟନୀ ଉତ୍ସବରେ ଗଞ୍ଜାମ ଜିଲ୍ଲାପାଳ , ବ୍ରହ୍ମପୁର ବନଖଣ୍ଡ ଅଧିକାରୀ,ଜିଲ୍ଲା ପର୍ଯ୍ୟଟନ ଅଧିକାରୀ ଙ୍କ ସମେତ ଚିକିଟି ବ୍ଲକ ର ବିଭିନ୍ନ ବିଭାଗର ଅଧିକାରୀ ଯୋଗଦେଇଥିଲେ । ସୁନାପୂର ବେଳାଭୂମିରେ ୫ଟି ପ୍ରିମିୟମ ରୁମ୍ ସହିତ ୨୨ ଟି ସାଧାରଣ ରୁମ୍ ପର୍ଯ୍ୟଟକ ଙ୍କ ପାଇଁ ପ୍ରସ୍ତୁତ କରାଯାଇଛି । ପର୍ଯ୍ୟଟକଙ୍କ ପାଇଁ ସମସ୍ତ ପ୍ରକାର ବ୍ୟବସ୍ଥା କରାଯାଇଥିବା ଗଞ୍ଜାମ ଜିଲ୍ଲାପାଳ ସୂଚନା ପ୍ରଦାନ କରିଥିଲେ। ଅନ୍ୟ ପକ୍ଷରେ ପର୍ଯ୍ୟଟକ ଙ୍କୁ ସ୍ଥାନୀୟ ବାସିନ୍ଦା କିଭଳି ଆତିଥ୍ୟ ପ୍ରଦାନ କରିବେ ସେଥିପ୍ରତି ଦୃଷ୍ଟି ଦିଆ ଯିବ ବୋଲି କହିଛନ୍ତି ଚିକିଟି ବିଧାୟକ ମନୋରଞ୍ଜନ ଧ୍ୟାନ ସାମନ୍ତରା ।

ଭୁବନେଶ୍ୱର( ଦ କୁଇଭର ):- ୩ ଦିନ ଧରି ଭୁବନେଶ୍ବରରେ ହେଉଥିବା ପୋଲିସ ଡିଜି ସମ୍ମିଳନୀ ଶେଷ ହୋଇଛି । ରାଜ୍ୟ ରାଜଧାନୀରୁ ଦେଶର ରାଜଧାନୀକୁ ଫେରି ଯାଇଛନ୍ତି ପ୍ରଧାନମନ୍ତ୍ରୀ, ଗୃହମନ୍ତ୍ରୀ ଓ ଏନଏସଏ । କିନ୍ତୁ ଦିଲ୍ଲୀ ଯିବା ପୂର୍ବରୁ ଦେଶର ସୁରକ୍ଷାକୁ ସୁନିଶ୍ଚିତ କରିବାକୁ ବ୍ଲୁ-ପ୍ରିଣ୍ଟ ପ୍ରସ୍ତୁତ କରିଛନ୍ତି । ସବୁ ରାଜ୍ୟ, କେନ୍ଦ୍ରଶାସିତ ଅଞ୍ଚଳର ପୋଲିସ ଡିଜି ଓ ଜାତୀୟ ସୁରକ୍ଷା ସଂସ୍ଥାର ମୁଖ୍ୟଙ୍କ ସହ ବିଭିନ୍ନ ପ୍ରସଙ୍ଗକୁ ନେଇ ୩୬୦ ଡିଗ୍ରୀ ଆଲୋଚନା କରିଛନ୍ତି ମୋଦୀ, ଶାହା ଓ ଡୋଭାଲ । ଦେଶର ଆଭ୍ୟନ୍ତରୀଣ ଓ ବାହ୍ୟ ଶତ୍ରୁଙ୍କୁ ଶେଷ କରିବାକୁ ଗୁପ୍ତ ରଣନୀତି ମଧ୍ୟ ପ୍ରସ୍ତୁତ ହୋଇଥିବା ସୂଚନା ମିଳିଛି । ଜାତୀୟ ସୁରକ୍ଷା ସର୍ବୋପରି ଏଭଳି ଗୁରୁମନ୍ତ୍ର ସହ ଶେଷ ହୋଇଛି ପୋଲିସ ଡିଜି ସମ୍ମିଳନୀ।

ତୃତୀୟ ଦିନରେ ୫ଟି ବିନ୍ଦୁ ଉପରେ ଅଧିକ ଗୁରୁତ୍ବ ଦିଆଯାଇଛି ।

ଆତଙ୍କବାଦକୁ ଦମନ ପାଇଁ ରୋଡମ୍ୟାପ, ଉଗ୍ରବାଦୀ ସଙ୍ଗଠନର ସମୂଳ ବିନାଶ,ଉପକୂଳ ସୁରକ୍ଷା ପାଇଁ ନକ୍ସା ପ୍ରସ୍ତୁତ,ନୂଆ ଆପରାଧିକ ଆଇନ ବ୍ୟବହାର,ନିଶା କାରବାରରେ ରୋକ,

ରାଜ୍ୟ ଓ ରାଜ୍ୟ ମଧ୍ୟରେ ସମନ୍ବୟ ରଖି କିଭଳି ଏହି ଚ୍ୟାଲେଞ୍ଜକୁ ସାମ୍ନା କରାଯାଇପାରିବ ସେନେଇ ସମ୍ମିଳନୀରେ ପରାମର୍ଶ ଦେଇଛନ୍ତି ପ୍ରଧାନମନ୍ତ୍ରୀ। ଓଡ଼ିଶାରେ ପୋଲିସ ଡିଜି ସମ୍ମିଳନୀ ଶେଷ ହୋଇଛି । ଜାତୀୟ ସୁରକ୍ଷାକୁ ନେଇ ଯେଉଁ ରଣନୀତି ଓଡ଼ିଶାରୁ ପ୍ରସ୍ତୁତ ହୋଇଛି ତାହା ଆଗକୁ ପୂରା ଦେଶ ଦେଖିବ ।

ସୂଚନା ଥାଉକି, ଓଡ଼ିଶାର ରାଜଧାନୀ ଭୁବନେଶ୍ବରରେ ଏଥର ୫୯ ତମ ଡିଜି-ଆଇଜି ସମ୍ମିଳନୀ ହୋଇଥିଲା । ଯାହା ନଭେମ୍ବର ୨୯ ରୁ ଆରମ୍ଭ ହୋଇ ଡିସେମ୍ବର ୧ତାରିଖ ପର୍ଯ୍ୟନ୍ତ ଚାଲିଥିଲା । ପ୍ରଥମ ଦିନ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହ ଯୋଗ ଦେଇ ଏହାକୁ ଉଦଘାଟନ କରିଥିଲେ । ଦ୍ବିତୀୟ ଦିନ ଓ ଅନ୍ତିମ ଦିନ ପ୍ରଧାନମନ୍ତ୍ରୀ ସାମିଲ ହୋଇଥିଲେ । ଏଥିରେ ବିଭିନ୍ନ ପ୍ରସଙ୍ଗ ଉପରେ ମାନସ ମନ୍ଥନ କରାଯିବା ସହ ବରିଷ୍ଠ ଅଧିକାରୀଙ୍କୁ ପରାମର୍ଶ ଦେଇଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।

ଦ କୁଇଭର ବ୍ୟୁରୋ :-:ବଙ୍ଗୋପ ସାଗରରେ ବାତ୍ୟା ଫେଙ୍ଗାଲ (ଫେଞ୍ଜାଲ) ପରେ ଓଡ଼ିଶା ପାଣିପାଗରେ ପରିବର୍ତ୍ତନ ଆସିଛି । ଗତ ସପ୍ତାହଠାରୁ ରାଜ୍ୟରେ ବିଭିନ୍ନ ଜିଲ୍ଲାରେ ବର୍ଷା ହୋଇଥିବା ବେଳେ, କିଛି ଜିଲ୍ଲାରେ କାଉଁଳିଆ ପାଗ ଜାରି ରହିଛି । ବିଭିନ୍ନ ଜିଲ୍ଲାରେ ତାପମାତ୍ରା ହ୍ରାସ ପାଇଥିବା ବେଳେ, ଆଗାମୀ ୫ ଦିନ ପାଇଁ ପାଣିପାଗ ନେଇ ଏଭଳି ପୂର୍ବାନୁମାନ କରିଛି ଭୁବନେଶ୍ବର ଆଞ୍ଚଳିକ ପାଣିପାଗ କେନ୍ଦ୍ର ।

ଭୁବନେଶ୍ବର ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ସୋସିଆଲ ମିଡିଆ X ଜରିଆର ଆଜି ୪ ତାରିଖଠାରୁ ଆସନ୍ତା ୧୦ ତାରିଖ ପର୍ଯ୍ୟନ୍ତ ରାଜ୍ୟରେ କେମିତି ରହିବ ପାଣିପାଗ, ସେନେଇ ସୂଚନା ପ୍ରଦାନ କରାଯାଇଛି ।ଗତ କିଛି ଦିନ ଧରି ରାଜ୍ୟରେ ବିଭିନ୍ନ ଜିଲ୍ଲାରେ ବର୍ଷା ସହ କୋହଲା ପାଗ ଜାରି ରହିଛି । ଭୁବନେଶ୍ବର ପାଣିପାଗ କେନ୍ଦ୍ର ପକ୍ଷରୁ କରାଯାଇଥିବା ପୂର୍ବାନୁମାନ ଅନୁସାରେ ରାଜ୍ୟରେ ଆସନ୍ତା ୯ ତାରିଖ ସୋମବାର ପର୍ଯ୍ୟନ୍ତ ବିଭିନ୍ନ ଜିଲ୍ଲାରେ ବର୍ଷା ହୋଇପାରେ ।ଡିସେମ୍ବର ୪ ଏବଂ ୫ ତାରିଖରେ କିଛି ଜିଲ୍ଲାରେ ଗୋଟିଏରୁ ଦୁଇଟି ସ୍ଥାନରେ ହାଲୁକା ବର୍ଷା ହେବାର ସାମ୍ବାବନା ଅଛି । ସେପଟେ ୮ ଏବଂ ୯ ତାରିଖରେ ଚିହ୍ନିତ ଜିଲ୍ଲାଗୁଡ଼ିକରେ ଗୋଟିଏରୁ ଦୁଇଟି ସ୍ଥାନରେ ହାଲୁକାରୁ ମଧ୍ୟମ ଧରଣର ବର୍ଷା ହେବାର ସାମ୍ବାବନା ଅଛି । ଅନ୍ୟପକ୍ଷରେ ୬ , ୭ ଏବଂ ୧୦ ତାରିଖରେ ପାଗ ପ୍ରାୟତଃ ଶୁଖିଲା ରହିପାରେ ।

ବ୍ରହ୍ମପୁର( ଦ କୁଇଭର ):- ବାଲିପଦପର ସ୍ଥିତ ରାଜ୍ୟ କଳା, ସାହିତ୍ୟ ଓ ସଂସ୍କୃତିର ଅନନ୍ୟ ପ୍ରତିଷ୍ଠାନ "ଉତ୍କଳିକା"ର ବିଂଶତିତମ ବାର୍ଷିକୋତ୍ସବ ସ୍ଥାନୀୟ ଗଞ୍ଜାମ କଳା ପରିଷଦ ସ୍ଥିତ ଭାଷା ଭବନ ପ୍ରକୋଷ୍ଠ ଠାରେ ମହାସମାରୋହରେ ଅନୁଷ୍ଠିତ ହୋଇ ଯାଇଛି। ବିଶିଷ୍ଟ ନାଟ୍ୟକାର, ଚଳଚିତ୍ର ନିର୍ମାତା ତଥା ନିର୍ଦ୍ଦେଶକ ମେଜର ରମା ରମଣ ପାଢ଼ୀ ଉତ୍ସବର ଶୁଭ ଉଦଘାଟନ କରି ସୁସ୍ଥ ସମାଜ ଗଠନରେ ସାହିତ୍ୟର ଏକ ଗୁରୁତ୍ୱପୁର୍ଣ ଭୂମିକା ନିର୍ବାହ ହେତୁ ସାହିତ୍ୟିକମାନେ ଅତୀବ ସାଧୁବାଦାର୍ହ ବୋଲି ରାଜ୍ୟର ବିଭିନ୍ନ ପ୍ରାନ୍ତରୁ ସାମଗତ କବି ଓ ଲେଖକ ମାନଙ୍କୁ ଉଦବୋଧନ ଦେଇଥିଲେ। ଅନୁଷ୍ଠାନର ସଭାପତି ଆଚାର୍ଯ୍ୟ ଇଂ. ବିଚିତ୍ରାନନ୍ଦ ମୁନିଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ଉତ୍ସବରେ ନିଖିଳ ଓଡ଼ିଶା ବରିଷ୍ଠ କଳାକାର ମହାସଂଘ ସଭାପତି ସୀମାନ୍ତ ନଟରାଜ ଡ଼ା. ତିରୁପତି ସାହୁ ମୁଖ୍ୟ ଅତିଥି, ଦକ୍ଷିଣାଞ୍ଚଳ ଉଚ୍ଚ ମାଧ୍ୟମିକ ଶିକ୍ଷା ପରିଷଦ ଉପ-ସଚିବ ଡଃ. କୁଳମଣି ଓଝା ମୁଖ୍ୟ ବକ୍ତା ଏବଂ କବି ସୁଶାନ୍ତ ଦାଶ ଓ ଅବସର ପ୍ରାପ୍ତ ଓଡ଼ିଶା ଶିକ୍ଷା ପ୍ରସାଶକ କିଶୋର ଚନ୍ଦ୍ର ପଲାଇ ସମ୍ମାନିତ ଅତିଥି ଭାବେ ଯୋଗଦେଇ ସାହିତ୍ୟ ସୁସ୍ଥ, ସୁନ୍ଦର ସମାଜ ନିମନ୍ତେ ସାହିତ୍ୟ ଅଭିପ୍ରେତ ବୋଲି ନିଜ ନିଜ ବକ୍ତବ୍ୟରେ ଉପସ୍ଥାପନ କରିଥିଲେ। କବି ସୁବାସ ଚନ୍ଦ୍ର ସାହୁ ରୋଶନ୍ ସ୍ୱାଗତ ଭାଷଣ ଓ କବି ସୁଶାନ୍ତ କୁମାର କାର ଅତିଥି ପରିଚୟ ପ୍ରଦାନ କରିଥିବା ବେଳେ ଉତ୍କଳିକା ସମ୍ପାଦକ ଡଃ. ବିଜୟ ଚନ୍ଦ୍ର ମହାରଣା ସମ୍ପାଦକୀୟ ବିବରଣୀ ପାଠ କରିଥିଲେ। ପିତଳ, ଚନ୍ଦ୍ରିକା ଆବାସିକ ଶିଶୁ ବିଦ୍ୟା ମନ୍ଦିରର ଛାତ୍ରୀମାନେ ସ୍ୱାଗତ ସଂଗୀତ ପାରିବେପଷଣ କରିଥିଲେ।

ଏହି ଅବସରରେ ସର୍ବଶ୍ରୀ ସୀମାନ୍ତ ନାଟରାଜ ଡ଼ା. ତିରୁପତି ସାହୁ, ନାଟ୍ୟକାର ସୁରେନ୍ଦ୍ର କୁମାର ଜେନା, ନାଟ୍ୟ ଭୂଷଣ ଇନ୍ଦ୍ରମଣି ବାରିକ,ଡଃ. ଶ୍ୟାମା ପ୍ରସାଦ ମିଶ୍ର, କିଶୋର କୁମାର ପଟେଲ, ସୁରଞ୍ଜନ ପାତ୍ର, କରମଣୀ ମହାରଣା, ଜୟ କୁମାର ମିଶ୍ର, ମୁରଲୀଧର ନାୟକ, ଗିରିଶ ଚନ୍ଦ୍ର ତ୍ରିପାଠୀ, ସନ୍ତୋଷ କୁମାର ସାହୁ, ମାତୃ ପ୍ରସାଦ ଶତ୍ରୁଜିତ, ବିରଞ୍ଚି ନାରାୟଣ ଦାଶ,ବିକ୍ରମାଦିତ୍ୟ ପୁରୋହିତ, ଅକ୍ଷୟ କୁମାର ସାହୁ, ଧ୍ରୁବ ଚରଣ ଘିବେଲା, କେଶବ ଚନ୍ଦ୍ର ନାୟକ, ମନୋଜ କୁମାର ଭୋଇ, ଡଃ. ତାନଶ୍ରୀ ପାଣିଗ୍ରାହୀ, ଅଭିପ୍ସା ପ୍ରିୟଦର୍ଶିନୀ, ସନ୍ଧ୍ୟାରାଣୀ ବେହେରା, ଡ଼ା. ଶୁଭଶ୍ରୀ ପ୍ରଭା ସ୍ୱାଇଁ, କାନ୍ତିଲତା ଷଡ଼ଙ୍ଗୀ ପ୍ରମୁଖ ରାଜ୍ୟର ବିଭିନ୍ନ ଜିଲ୍ଲାରୁ ନିମନ୍ତ୍ରିତ ତ୍ରିଚତ୍ୱାରିଂଶ ସାରସ୍ୱତ ପ୍ରତିଭାଧାରଙ୍କୁ ଅନୁଷ୍ଠାନ ପକ୍ଷରୁ ମାନପତ୍ର, ଉତ୍ତରୀୟ ଏବଂ ସ୍ମାରକୀ ଫଳକ ପ୍ରଦାନ ସହ ଅତିଥି ମାନଙ୍କ ଦ୍ୱାରା ସମ୍ବର୍ଦ୍ଧିତ କରାଯିବ ସହିତ ଅନୁଷ୍ଠାନର ମୁଖପତ୍ର "ଅଭିନଵ ଉତ୍କଳିକା", ଡଃ. ବିଜୟ ଚନ୍ଦ୍ର ମହାରଣାଙ୍କ 'ଲଘୁ ପ୍ରବନ୍ଧ ସଂକଳନ' ଏବଂ ଉତ୍କଳିକା ଓ ନିଖିଳ ଓଡ଼ିଶା ବରିଷ୍ଠ କଳାକାର ମହାସଂଘର ଦିନ ପଞ୍ଜିକା ଅତିଥିମାନଙ୍କ ଦ୍ୱାରା ଲୋକାର୍ପିତ କରାଯାଇଥିଲା।

କାର୍ଯ୍ୟକ୍ରମର ଦ୍ଵିତୀୟ ସୋପାନ ଥିଲା ରାଜ୍ୟସ୍ତରୀୟ କବିତା ପାଠୋତ୍ସବ। ବରିଷ୍ଠ ସାରସ୍ୱତ ସାଧକ ହାଡିବନ୍ଧୁ ମାଳିଙ୍କ ଅଧ୍ୟାକ୍ଷତାରେ ଅନୁଷ୍ଠିତ ଏହି ପର୍ବରେ ସାରସ୍ୱତ ସାଧକ ଡଃ. ବନମାଳୀ ପାଣିଗ୍ରାହୀ ମୁଖ୍ୟ ଅତିଥି ଏବଂ ଡଃ. ଲକ୍ଷ୍ମୀ ନାରାୟଣ ଦାଶ ସମ୍ମାନିତ ଅତିଥି ଭାବେ ଯୋଗଦେଇ କବିତା ପାଠୋତ୍ସବ ବରିଷ୍ଠ ସାରସ୍ୱତ ସାଧକଙ୍କୁ ଅଧିକ ମାତ୍ରାରେ ଗତିଶୀଳ ଓ ନବାଗତଙ୍କୁ ଉତ୍ସାହିତ କରିଥାଏ ବୋଲି ନିଜ ବକ୍ତବ୍ୟରେ ଉପସ୍ଥାପନ କରିଥିଲେ। କବି ଚିନ୍ମୟ ରଞ୍ଜନ ମିଶ୍ର, କବି ଶୁଭ୍ରଜିତ ସାହୁ ଏବଂ କବୀ ପଦ୍ମିନୀ ମିଶ୍ରଙ୍କ ସୁନ୍ଦର ସଂଯୋଜନା କ୍ରମେ ଶତାଧିକ କବି/କବୟିତ୍ରୀ ସ୍ୱରଚିତ କବିତା ପାଠ କରିଥିଲେ। କାର୍ଯ୍ୟକ୍ରମ ପରିଚାଳନା କ୍ଷେତ୍ରରେ ସର୍ବଶ୍ରୀ କୁମାର କାର୍ତ୍ତିକେଶ୍ଵର ପ୍ରଧାନ, ବି. ଗୋପାଳ ପାତ୍ର, ପ୍ରଦୀପ କୁମାର ସାହୁ, କୈଳାସ ବେହେରା, ଅଶୋକ ଦଳେଇ ପ୍ରମୁଖ କବି ସହଯୋଗ କରିଥିଲେ। ପରିଶେଷରେ କବି ତଥା ସାରସ୍ୱତ ସଂଗଠକ ଦୀନବନ୍ଧୁ ଶ୍ରୀପଲ୍ଲଵ ଆନୁଷ୍ଠାନିକ ଧନ୍ୟବାଦ ଅର୍ପଣ କରିଥିଲେ।

ବ୍ରହ୍ମପୁର( ଦ କୁଇଭର ):- ବ୍ରହ୍ମପୁର ଏମକେସିଜି ମେଡିକାଲ କଲେଜରେ ପୁଣି ଜଣେ ଛାତ୍ରୀ ଙ୍କୁ ରେଗିଙ୍ଗ ଅଭିଯୋଗ l ସିନିୟର ଡାକ୍ତରୀ ଛାତ୍ରୀ ମାନେ ଜୁନିୟର ଛାତ୍ରୀଙ୍କୁ ରେଗିଙ୍ଗ କରିଥିବା ଅଭିଯୋଗ ହୋଇଥିଲା l ଏହି ଅଭିଯୋଗ ଆସିବା ପରେ ମେଡିକାଲ କଲେଜ କର୍ତ୍ତୃପକ୍ଷ ଆଣ୍ଟି ରେଗିଙ୍ଗ ସେଲ କୁ ଘଟଣାର ତଦନ୍ତ କରି ରିପୋର୍ଟ ଦେବାକୁ ନିର୍ଦେଶ ଦେଇଥିଲେ l ସୂଚନାଯୋଗ୍ୟ ଏମକେସିଜି କଲେଜରେ ଏମବିବିଏସ ପଢୁଥିବା ସିନିଅର ଛାତ୍ରୀ ଜୁନିଅର ଛାତ୍ରୀଙ୍କୁ ରେଗିଙ୍ଗ କରିଥିବା ଅଭିଯୋଗ ପରେ ୪ଜଣ ସିନିଅର ଛାତ୍ରୀଙ୍କୁ ଆଣ୍ଟି ରେଗିଙ୍ଗ ସେଲ ନୋଟିସ କରିଥିଲା l ଏନେଇ ସୋମବାର ଦିନ ଏମକେସିଜି ମେଡିକାଲ କଲେଜ ରେ ଆଣ୍ଟି ରେଗିଙ୍ଗ ସେଲ ର ସ୍ୱତନ୍ତ୍ର ବୈଠକ ବସିଥିଲା l ବୈଠକ ରେ ସମସ୍ତ ଅଭିଯୋଗ ଶୁଣିବା ପରେ ରେଗିଙ୍ଗ ର କୌଣସି ସତ୍ୟତା ନଥିବା କହିଥିଲେ ମେଡିକାଲ ଅଧ୍ୟକ୍ଷା l

ଭୁବନେଶ୍ୱର(ଦ କୁଇଭର): ଆଜି ବିଧାନସଭାରେ ବେଶ ଧୂଆଁଧାର ବ୍ୟାଟିଂ କରିଛନ୍ତି ଅଭିନେତାରୁ ନେତା ପାଲଟିଥିବା ବିଧାୟକ ସିଦ୍ଧାନ୍ତ ମହାପାତ୍ର । ଫିଲ୍ମରେ ଭିଲେନଙ୍କୁ ଧୋଇଲା ଭଳି ତାମିଲ ଲୁଟେରାଙ୍କ କଛା ଖୋଲିଦେଇଛନ୍ତି । ମାଟିତଳୁ ବାହାର କରିଛନ୍ତି ତାମିଲ ବାବୁ ମାନଙ୍କ ଲୁଟର ନମୂନା । ଏକଥା ଶୁଣିବା ପରେ ବିଭାଗୀୟ ମନ୍ତ୍ରୀଙ୍କର ବି ପାଟି ଚୁପ । କେବଳ ଅଫିସର ଦେଇଥିବା କାଗଜ ପଢ଼ି ଚୁପ ବସି ପଡ଼ିଛନ୍ତି ।

ଓଡ଼ିଶାରୁ ତାମିଲ କେତେ ଲୁଟିଛନ୍ତି ତାହା ଧିରେ ଧିରେ ଖୋଲୁଛି । ସେ ତାମଲ ଅଫିସର ହୁଅନ୍ତୁ କି ଠିକାଦାର ବା ବେପାରୀ । ସମସ୍ତଙ୍କ ଲୁଟ ଏବେ ପଦାକୁ ଆସିଲାଣି । ଏମିତି କିଛି ତାମିଲଙ୍କ ଲୁଟକୁ ଆଜି ଖୋଳିଛନ୍ତି ଅଭିନେତାରୁ ନେତା ପାଲଟିଥିବା ବିଧାୟକ ସିଦ୍ଧାନ୍ତ ମହାପାତ୍ର । କେବଳ ତାମିଲଙ୍କ ଲୁଟକୁ ଖୋଳି ନାହାନ୍ତି, ନବୀନଙ୍କ ମିଛ ସଚ୍ଚୋଟତାକୁ ଭୂଷା ମରିଛନ୍ତି । ଗୃହରେ ବହୁ ବଡ଼ କଥା କହିଛନ୍ତି ସିଦ୍ଧାନ୍ତ ।

ଗୃହରେ ଗ୍ରାମ୍ୟ ପାନୀୟଜଳ ଯୋଗାଣ ଖର୍ଚ୍ଚ ଦାବି ଉପରେ ଆଲୋଚନା ଚାଲିଥିଲା । ବିଧାୟକ ସିଦ୍ଧାନ୍ତ ମନ୍ତ୍ରୀ ରବି ନାୟକଙ୍କୁ ପ୍ରଶ୍ନ କଲେ, କହିଲେ ଗ୍ରାମ୍ୟ ଜଳଯୋଗାଣ ପ୍ରକଳ୍ପ କେବେ ସରିବ? କେବେ ଗାଁକୁ ପାଣି ମିଳିବ? ପ୍ରକଳ୍ପ କାର୍ଯ୍ୟକାରୀ ଠିକ ହେଉଛି ତ? ଯାହା ଗାଇଡଲାଇନ ଅଛି ତାହା ଅନୁଯାୟୀ କାମ ହେଉଛି ତ? ଯେତିକି ଲୋକଙ୍କୁ ପାଣି ଯୋଗାଯିବ, ଉତ୍ସରୁ ସେତିକି ପାଣି ଉଠିବ ତ? ପାଇପ ଯେତିକି ଗଭୀରରେ ଯିବା କଥା ସେତିକି ଯାଇନି ତ? ଏମିତି ଏତେ ପ୍ରଶ୍ନ କଲେ ଯେ, ତାମିଲ ଠିକାଦାରଙ୍କ ପୂରା ଅନ୍ତନାଡ଼ି ପଦାକୁ ଆଣି ଥୋଇ ଦେଲେ । ବୁଝିବା ଲୋକେ ଠିକ ବୁଝୁଥିଲେ । ବିଜେଡି ବାଲାଏ ତ ମୁରୁକି ହସୁଥିଲେ । କି ବ୍ୟାଟିଂ କଲେ ସିଦ୍ଧାନ୍ତ ବୋଲି କେହି କେହି ପଚାରୁଥିଲେ । ଏମିତି ମାରିଲେ ଯେ, ତାମିଲ ଠିକାଦାରଙ୍କ ପାଞ୍ଜି ପଳାଇ ଆସିଲା ।

ଆଉ କେହି କେହି କହୁଥିଲେ, କେବଳ ଠିକାଦାର କାହିଁକି, ଏସବୁ କାମ ୫ଟି ଅଧିନରେ ହେଉଥିଲା । ତେଣୁ ୫ଟି ଦାୟିତ୍ୱରେ ଥିବା ତାମିଲ ବାବୁଙ୍କ କାରନାମା ବି ପଦାକୁ ଆଣି ଥୋଇ ଦେଲେ ସିଦ୍ଧାନ୍ତ । ଏହାପରେ ପାନୀୟଜଳ ପ୍ରକଳ୍ପ କାର୍ଯ୍ୟକାରିତା ନେଇ ଅନେକ ବିଧାୟକ ପ୍ରଶ୍ନ କଲେ । ବିଚରା ମନ୍ତ୍ରୀଙ୍କ ଅକଲ ଗୁଡ଼ୁମ ହୋଇଗଲା । କହିବେ କ’ଣ? ଅଫିସରମାନେ ଯାହା ଲେଖି ଦେଇଥିଲେ, ସେତିକି ପଢ଼ିଦେଇ ବସିଗଲେ । ନିଶ୍ୱାସ ଟେ ମାରିଲେ । କହିଲେ ଓ ସିଦ୍ଧାନ୍ତ ଭାଇ ହୀରୋ ଭଳି ଝାଳ କାଢ଼ି ଦେଲେ । ଏମିତି ମାରିଲେ ଯେ, ତାମିଲ ଭିଲେନ ମାନଙ୍କ ମଞ୍ଜି କାଢ଼ି ଦେଲେ । ଏବେ ମନ୍ତ୍ରୀ ଯଦି ନଦରାଣ୍ଡିବେ, ପ୍ରକଳ୍ପ ଆରମ୍ଭ ହେଉ ହେଉ ଫେଲ ମାରିବ ଓ ଦୁର୍ନୀତିକୁ ସମର୍ଥନ କଲେ ବୋଲି ଜଣାପଡ଼ିବ । ଯଦି ଦରାଣ୍ଡିବେ, ତାମିଲ ଭିଲେନ ସବୁ ପଦାରେ ପଡ଼ିବେ । ଦେଖାଯାଉ ମନ୍ତ୍ରୀ ସିଦ୍ଧାନ୍ତଙ୍କ ଧୂଆଁଧାର ବ୍ୟାଟିଂରେ ତାମିଲ ଭିଲେନ ମାନଙ୍କୁ ଆଉଟ କରୁଛନ୍ତି ନା ନିଜେ କ୍ୟାଚ ଧରି ସିଦ୍ଧାନ୍ତଙ୍କୁ ଚୁପ କରିଦେଉଛନ୍ତି?

ବ୍ରହ୍ମପୁର( ଦ କୁଇଭର ):- ସଂପ୍ରତି ସାଇବର ଠକ ବିଭିନ୍ନ ଉପାୟରେ ଜନସାଧାରଣଙ୍କ କଷ୍ଟ ଅର୍ଜିତ ଅର୍ଥକୁ କିଛି କ୍ଷଣ ମଧ୍ୟରେ ଲୁଟି ନେଉଛନ୍ତି । ବର୍ତ୍ତମାନ କିଛି ଦିନ ହେଲା ମୋବାଇଲ ର ୱାଟସଆପ ରେ ଏସବିଆଇ ଲୋଗୋ ଥାଇ ଏକ ଆପ ରେ ବିଭିନ୍ନ ଲିଙ୍କ ଆସି ଲୋକଙ୍କୁ ଭ୍ରମିତ କରୁଛି । ଯାହାକୁ ନେଇ ସାଇବର ଠକଙ୍କ ଠାରୁ ନିଜକୁ କିଭଳି ଦୂରରେ ରଖିବେ ସେ ନେଇ ଏକ ସଚେତନତା ଭିଡିଓ ବ୍ରହ୍ମପୁର ପୋଲିସ ପକ୍ଷରୁ ଜାରି କରାଯାଇଛି ।

ଆଳି(ଦ କୁଇଭର): ଆଳି ନିର୍ବାଚନ ମଣ୍ଡଳୀର ବାଳକାଟୀ ଠୁ କୋଳିଢ଼ିଅ ରାସ୍ତା ନିର୍ମାଣରେ କାମ କମ ଲୁଟ ଅଧିକ ଚାଲିଛି । ଏହି ଲୁଟକୁ ଆଖି ବୁଜି ଦେଉଛନ୍ତି ବିଭାଗୀୟ ଅଧିକାରୀ । ପ୍ରଶ୍ନ ପଚାରିଲେ ଅଧିକାରୀମାନେ ଠିକାଦାର ପାଇଁ ଓକିଲାତି କରିବା ସହ ନାଲି ଆଖି ଦେଖାଉଛନ୍ତି । ଖବର ବୁଝୁ ବୁଝୁ ଜଣାପଡ଼ିଲା ଯେ, କାମର ଠିକାଦାର ହେଉଛନ୍ତି ଆଳି ବିଧାନସଭାର ବିଜେପି ପ୍ରାର୍ଥୀ କୃଷ୍ଣଚନ୍ଦ୍ର ପଣ୍ଡାଙ୍କ ପୁଅ । ଏବେ ବୁଝା ପଡ଼ିଲା, ଅଫିସରମାନେ କାହିଁକି ଏହି କାମରେ ଓଳିସାହି କୁକୁର ଭଳି ହେଉଛନ୍ତି । ବାପାଙ୍କ ରାଜନୈତିକ ପତିଆରାରେ ପୁଅଙ୍କର ଚାଲିଛି ଲୁଟତରାଜ । ରାସ୍ତା କାମକୁ ର.. ଠ.. କି କରିଦେଇ ବିଲ ନେଇ ପାର ହୋଇଯିବାକୁ କରିଛନ୍ତି ଯୋଜନା ।

ଏବେ ଆସିବା ପ୍ରସଙ୍ଗକୁ । କଟକ-ଚାନ୍ଦବାଲି ରାସ୍ତାର ବାଳକାଟୀ ଠାରୁ ଖଣ୍ଡିଆପାଟଣା ଦେଇ କୋଳିଢ଼ିଅ ଗାଁକୁ ଥିବା ୫ କିଲୋମିଟର ରାସ୍ତାର ମରାମତି ପାଇଁ ଦାବି କରିଥିଲେ ଲୋକେ । ନିର୍ବାଚନ ପୂର୍ବରୁ ଦାବି ଯୋଗୁ ଏହି କାମ ପାଇଁ ୪କୋଟି ଟଙ୍କା ମଞ୍ଜୁରୀ ହୋଇଥିଲା । କିନ୍ତୁ ନିର୍ବାଚନ ଆଚରଣ ବିଧି ଯୋଗୁ କାମ ବନ୍ଦ ରହିଥିଲା । ଏବେ ୧ମାସ ହେବ କାମ ଆରମ୍ଭ ହୋଇଛି । ଗ୍ରାମ୍ୟ ଉନ୍ନୟନ ବିଭାଗ ଅଧିନରେ ହେଉଥିବା ଏହି ରାସ୍ତା କାମ ଅତି ନିମ୍ନମାନର ହେଉଛି । କାମକୁ ଦେଖି ଲୋକେ ପ୍ରଶ୍ନ କରୁଛନ୍ତି । ବନ୍ଧ ତଳୁ ମାଟି ଉଠାଇ ରାସ୍ତାରେ ପକାଉଥିବାରୁ ବନ୍ଦ ମରାମତି ହେବ କ’ଣ ଦୁର୍ବଳ ହେଉଥିବା ଲୋକେ କହୁଛନ୍ତି । କାମ ପାଇଁ କ’ଣ ରହିଛି ନିଦେ୍ର୍ଦଶନାମା ଓ କି ପ୍ରକାର କାମ ହେଉଛି ସେନେଇ ଲୋକେ ଗ୍ରାମ୍ୟ ଉନ୍ନୟନ ବିଭାଗର କନିଷ୍ଠଯନ୍ତ୍ରୀଙ୍କୁ ପଚାରିଥିଲେ । କାମର ମାନ ଓ ଉପଯୁକ୍ତ ତଥ୍ୟ ଦେବା ପରିବର୍ତ୍ତେ ଠିକାଦାର ସପକ୍ଷରେ ଓକିଲାତି କରିଥିଲେ । ବେଶି ପ୍ରଶ୍ନ କରୁଥିବା ଲୋକଙ୍କୁ ନାଲି ଆଖି ବି ଦେଖାଇଥିଲେ ।

କନିଷ୍ଠଯନ୍ତ୍ରୀଙ୍କ ନାମରେ ଅଭିଯୋଗ କରିବା କଥା କହିବା ପରେ ଯନ୍ତ୍ରୀ ଜଣକ ନିଜର ଅସହାୟତା ଦର୍ଶାଇଥିଲେ । ତାଙ୍କ କଥା ଠିକାଦାର ଶୁଣୁ ନଥିବା ଓ କ୍ଷମତା ଦେଖାଇ କାମ କରୁଥିବା କହିଥିଲେ । ଏନେଇ ଉପରିସ୍ଥ ଅଧିକାରୀଙ୍କୁ ଜଣାଇଥିଲେ ବି ସେମାନେ କାଳେ ନୀରବ ରହିବାକୁ କହିଛନ୍ତି । ତେବେ ପ୍ରଶ୍ନ ଉଠୁଛି ଠିକାଦାରଙ୍କ ପାଇଁ ବିଜେପିର ଲବି ରହିଛି ନା ଅଫିସରମାନେ ବିଜେପିକୁ ବଦନାମ କରିବାକୁ ଏପରି କରୁଛନ୍ତି । ଏଦିଗରେ ଗ୍ରାମ୍ୟ ଉନ୍ନୟନ ମନ୍ତ୍ରୀ ନଜର ଦେବାକୁ ସ୍ଥାନୀୟ ଲୋକେ ଦାବି କରିଛନ୍ତି । ଦେଖାଯାଉ ଏହି କାମ ନେଇ ସରକାରୀ ସ୍ତରରେ କିଛି ପଦକ୍ଷେପ ନିଆଯାଉଛି ନା ଏପରି ଲୁଟକୁ ସୁଯୋଗ ଦିଆଯାଉଛି?

ମୟୁରଭଞ୍ଜ( ଦ କୁଇଭର ):- ମୟୁରଭଂଜ ଜିଲ୍ଲା ଠାକୁରମୁଣ୍ଡା ବ୍ଲକ୍ ଅନ୍ତର୍ଗତ ତାଳପଦା ପଞ୍ଚାୟତ ସରାଷପୋଶି ଗ୍ରାମ ନିକଟ ଦେଇ ଯାଇଥିବା ଝରଣା କୂଳରେ ଆଜି ସକାଳେ କୌଣସି ସୂତ୍ରରୁ ସେଠାରେ ଦେଶୀ ମଦ ତିଆରି ହେଉଥିବା ଖବର ପାଇ ଅବକାରୀ ବିଭାଗ ଓ ଠାକୁରମୁଣ୍ଡା ଥାନା ପୋଲିସ ମିଳିତ ଚଢ଼ାଉ କରି ମହୁଲି ମଦ ପ୍ରସ୍ତୁତି ନିମନ୍ତେ ଥିବା ପୋଚ ନଷ୍ଟ କରିବା ସହିତ ମହୁଲି ମଦ କୁ ଜବତ କରିଛନ୍ତି ।ଏହି ଗ୍ରାମ ମଧ୍ୟ ଦେଇ ଯାଇଥିବା ଝରଣା କୂଳରେ ମହୁଲି ମଦ ପ୍ରସ୍ତୁତ କରି ଚୋରା ରେ ମଦ ବିକ୍ରି ହେଉଥିବା ର ଅବକାରୀ ବିଭାଗ ନିକଟରେ ସୂଚନା ମିଳିଥିଲା। ଅବକାରୀ ଥାନା ଓଆଇସି ଭାରତୀ ନାଏକ ଙ୍କ ନେତୃତ୍ୱରେ ଅବକାରୀ କର୍ମଚାରୀ ଓ ଠାକୁରମୁଣ୍ଡା ଥାନା କର୍ମଚାରୀ ମିଳିତ ଭାବେ ରବିବାର ଝରଣା କୁଳ ରେ ମହୁଲି ମଦ ପ୍ରସ୍ତୁତି ଚାଲିଥିବା ସ୍ଥାନ ଉପରେ ଚଢ଼ାଉ କରିଥିଲେ।ଅବକାରୀ ଓ ପୋଲିସ କର୍ମଚାରୀ ଙ୍କୁ ଦେଖି ଚୋରା ବେପାରୀ ମାନେ ସେଠାରୁ ଖସି ପଳାଇ ଯାଇଥିଲେ।ଘଟଣାସ୍ଥଳ ରେ ମିଳିଥିବା ୨୮ କୁଇଣ୍ଟାଲ୍ ମହୁଲ ପୋଚକୁ ବିଭାଗ କର୍ମଚାରୀ ମାନେ ନଷ୍ଟ କରିଥିବା ବେଳେ ୬୦ ଲିଟର ମହୁଲି ମଦକୁ ଜବତ କରିଥିଲେ।ଏଥି ସହିତ ମଦ ପ୍ରସ୍ତୁତ ନିମନ୍ତେ ବ୍ୟବହୃତ ସାମଗ୍ରୀ କୁ ଜବତ କରିଥିଲେ।ଏନେଇ ଠାକୁରମୁଣ୍ଡା ଅବକାରୀ ଥାନା ପୋଲିସ ୧୫୦/୨୪ ଅନୁଯାୟୀ ମାମଲା ରୁଜ୍ଜୁ କରିଛି। ତେବେ ଠାକୁରମୁଣ୍ଡା ଠାରେ ଅବକାରୀ ବିଭାଗ ପକ୍ଷରୁ ବାରମ୍ବାର ଦେଶୀ ମଦ ଜବତ୍ ହେଲେ ସୁଦ୍ଧା କୌଣସି ଅଭିଯୁକ୍ତ ଗିରଫ ନହୋଇ ଫେରାର ହୋଇଯାଇଥିବା ରୁ ଅବକାରୀ ବିଭାଗକୁ ନେଇ ଏବେ ବିଭିନ୍ନ ବୁଦ୍ଧିଜୀବୀ ମହଲରେ ଆଲୋଚନା ଜୋର ଧରିଛି ।

ପୁରୀ( ଦ କୁଇଭର ):- ନୌସେନା ଦିବସରେ ନୌବୀରମାନେ ପୁରୀ ସମୁଦ୍ରର ଅଥଳ ଜଳରାଶିରେ ଅପରେସନ୍ କୌଶଳ ଦେଖାଇଛନ୍ତି। ନୌସେନାର ନୌବୀରମାନେ ୧୫ଟି ଯୁଦ୍ଧପୋତ, ୪୦ ଏୟାରକ୍ରାଫ୍ଟ୍ ଏହି ଯୁଦ୍ଧ କୌଶଳ ପ୍ରଦର୍ଶନ କରିଛନ୍ତି। ଭାରତୀୟ ନୈସନାର ଦକ୍ଷତାକୁ ଉପରେ ପୂରା ବିଶ୍ବବାସୀ ନଜର ରଖିଛନ୍ତି। ଜଳଭାଗରେ ବମ୍‌ ବ୍ରଷ୍ଟ ମାନୁଏଭର, ବ୍ୟାନର ଫର୍ମେସନରରେ ଚେତକ, ବୁଡ଼ାଜାହାଜର କଳାପ୍ରଦର୍ଶନ ଓ ଆକାଶମାର୍ଗରେ ନୌବୀରମାନଙ୍କର ପ୍ରଦର୍ଶନ ଦୃଦୟ ଛୁଇଁଛି। ଭାରତୀୟ ନୌସେନା ଦିବସ‌ ଅବସରରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ପୁରୀ ବେଳାଭୂମିରେ ଆୟୋଜିତ ସମାରୋହରେ ମୁଖ୍ୟ ଅତିଥି ଅଛନ୍ତି। ପ୍ରଥମ ଥର ପାଇଁ ଓଡ଼ିଶାରେ ଏତେ ବଡ଼ କାର୍ଯ୍ୟକ୍ରମ ହେଉଥିବାରୁ ଲୋକଙ୍କ ଭିତରେ ଉତ୍ସାହ ଖୁବ୍ ଅଧିକ ରହିଛି। ଉଦ୍ଭାବନ ଓ ସ୍ୱଦେଶୀକରଣ ଦ୍ୱାରା ଶକ୍ତି ଓ ସାମର୍ଥ୍ୟ ହେଉଛି ଏଥର ନୌସେନା ଦିବସର ଥିମ୍। ନୌସେନା ଦିବସ ପାଳନ ନେଇ ପୁରୀରେ ସୁରକ୍ଷାକୁ ବ୍ୟବସ୍ଥାକୁ କଡ଼ାକଡ଼ି କରାଯାଇଛି।ଭାରତୀୟ ନୌସେନା ଦିବସ‌ ଅବସରରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ପୁରୀ ବେଳାଭୂମିରେ ଆୟୋଜିତ ସମାରୋହରେ ମୁଖ୍ୟ ଅତିଥି ଅଛନ୍ତି। ପ୍ରଥମ ଥର ପାଇଁ ଓଡ଼ିଶାରେ ଏତେ ବଡ଼ କାର୍ଯ୍ୟକ୍ରମ ହେଉଥିବାରୁ ଲୋକଙ୍କ ଭିତରେ ଉତ୍ସାହ ଖୁବ୍ ଅଧିକ ରହିଛି। ଉଦ୍ଭାବନ ଓ ସ୍ୱଦେଶୀକରଣ ଦ୍ୱାରା ଶକ୍ତି ଓ ସାମର୍ଥ୍ୟ ହେଉଛି ଏଥର ନୌସେନା ଦିବସର ଥିମ୍। ନୌସେନା ଦିବସ ପାଳନ ନେଇ ପୁରୀରେ ସୁରକ୍ଷାକୁ ବ୍ୟବସ୍ଥାକୁ କଡ଼ାକଡ଼ି କରାଯାଇଛି।

ବ୍ରହ୍ମପୁର( ଦ କୁଇଭର ):- ଶନିବାର ସନ୍ଧ୍ୟାରେ କବିତା ସଂକଳନ ' ଅନ୍ତଃସ୍ଵର' ଆର୍ଯ୍ୟଭଟ୍ଟ, ବ୍ରହ୍ମପୁର ପରିସରରେ କବି ସାହିତ୍ୟିକ ଓ ପରିବେଶ ପ୍ରେମୀଙ୍କ ଏକ ଭବ୍ୟ ସମାବେଶ ରେ ଉନ୍ମୋଚିତ ହୋଇଯାଇଅଛି । ପରିବେଶବିତ ସୁଧୀର ରାଉତଙ୍କ ଲିଖିତ ଏହି କବିତା ସଙ୍କଳନ ' ଅନ୍ତଃସ୍ଵର' ର ଉନ୍ମୋଚନ ସମାରୋହରେ ବିଶିଷ୍ଟ ରାଜନୀତି ବିଶାରଦ ତଥା ବ୍ରହ୍ମପୁର ବିଶ୍ଵବିଦ୍ୟାଳୟର ପ୍ରାକ୍ତନ ପ୍ରଧ୍ୟାପକ ପ୍ରଫେସର ବିଷ୍ଣୁ ଚରଣ ଚୌଧୁରୀ ମୂଖ୍ୟ ଅତିଥି ଭାବେ ଯୋଗ ଦେଇ ଜଳବାୟୁ ପରିବର୍ତ୍ତନ ର ଭୟାବହ ପରିଣତି ବିଷୟରେ ଆଲୋଚନା କରି ଗାନ୍ଧୀବାଦ ରେ ଏହାର ଏହାର ସମାଧାନର ସୂତ୍ର ବିଷୟରେ ଆଲୋଚନା କରିବା ସହ ସୁଧୀର ରାଉତଙ୍କ ସମାଜ ପ୍ରତି ସଂବେଦନଶୀଳତା ଓ ପରିବେଶ ସୁରକ୍ଷା ଦିଗରେ ତାଙ୍କ ଅବଦାନ ବିଷୟରେ ଆଲୋଚନା କରିଥିଲେ।'ଅନ୍ତଃସ୍ଵର' ସମାଜକୁ ସୁଧାରିବା ଓ ପରିବେଶ ସୁରକ୍ଷାର ବାର୍ତ୍ତାବହ ହେବ ବୋଲି ଆଶା ପୋଷଣ କରିଥିଲେ ।

ବରିଷ୍ଠ ସାମ୍ବାଦିକ ସୁନୀଲ ମୋହନ ପଟ୍ଟନାୟକ କବିତା ଗୁଡିକର ସମୀକ୍ଷା କରି ପ୍ରତି କବିତାରେ ସମାଜ ପ୍ରତି ରହିଥିବା ମାର୍ମୀକ ନିବେଦନ ଓ ଏକ ଆଶାବାଦୀର ସ୍ଵପ୍ନ ବିଷୟରେ ଆଲୋଚନା କରି କବିତା ଗୁଡିକ ନିଶ୍ଚିତ ଭାବେ ଆଦୃତ ହେବ ବୋଲି ଆଶା ପୋଷିଥିଲେ।ବରିଷ୍ଠ ସାହିତିକା ଶ୍ରୀମତୀ ସୌଦାମିନୀ ମିଶ୍ର ସମ୍ମାନୀତା ଅତିଥିଭାବେ ଯୋଗଦେଇ କବିତାର ସାହିତ୍ୟିକ ଓ ପରିବେଶୀୟ ଦିଗ ବିଷୟରେ ଆଲୋଚନା କରି କବିତା ଗୁଡିକରେ ବିଶିଷ୍ଟ କବି ମାନଙ୍କର ଭାବନାର ସ୍ପର୍ଶ ରହି ସମାଜ ପାଇଁ ଏକ ବଳିଷ୍ଠ ବାର୍ତ୍ତା ବହନ କରିଥିବା ମତ ବ୍ୟକ୍ତ କରିଥିଲେ।ପ୍ର୍ ସଭାରେ କ୍ଷୀରସିନ୍ଧୁ ମହାନ୍ତି ସ୍ଵାଗତ ସମ୍ଭାଷଣ ଦେଇଥିଲେ ଓ ଆର୍ଯ୍ୟଭଟ୍ଟ ଫାଉଣ୍ଡେସନର ବରିଷ୍ଠ ସଦସ୍ୟ ଓ ଶିକ୍ଷାବିତ ଶ୍ୟାମସୁନ୍ଦର ଖାଡଙ୍ଗା ଧନ୍ୟବାଦ ଅର୍ପଣ କରିଥିଲେ। ସଭାରେ ବରିଷ୍ଠ ସାମ୍ବାଦିକ ହୃଷିକେଷ ମହାନ୍ତି, ବିଘ୍ନେଶ୍ୱର ସାହୁ ଙ୍କ ସମେତ ଗଣମାଧ୍ୟମର ଅନେକ କର୍ମକର୍ତ୍ତା , ଇ. ତେଜେଶ୍ଵର ରାଓ,ସବିତା ସାହୁକାର, କାହ୍ନୁଚରଣ ବିହାରୀଙ୍କ ସମେତ ବହୁ କବି ସାହିତ୍ୟିକ ଓ ପରିବେଶ ପ୍ରେମୀ ଯୋଗ ଦେଇଥିଲେ । କାର୍ଯ୍ୟକ୍ରମକୁ ସୁଶାନ୍ତ ମହାନ୍ତି, ଭୀମରାଜୁ ପାତ୍ର ଓ ମାଧବ ନାୟକ ପରିଚାଳନା କରିଥିଲେ ।

ଦ କୁଇଭର ବ୍ୟୁରୋ :- ବଙ୍ଗୋପସାଗରରେ ସୃଷ୍ଟି ହୋଇଥିବା ବାତ୍ୟା ‘ଫେଙ୍ଗଲ୍‌’ ତାମିଲନାଡ଼ୁ ଉପକୂଳ ଅତିକ୍ରମ କରିଛି। ଗତକାଲି ସନ୍ଧ୍ୟାରୁ ଆରମ୍ଭ ହୋଇଥିବା ଲ୍ୟାଣ୍ଡ୍‌ଫଲ୍‌ ପ୍ରକ୍ରିୟା ରାତି ପ୍ରାୟ ୨ଟା ପର୍ଯ୍ୟନ୍ତ ଜାରି ରହିଥିଲା। ସ୍ଥଳ ଭାଗ ଛୁଇଁବା ସମୟରେ ଘଣ୍ଟା ପ୍ରତି ୭୦ରୁ ୮୦ କିମି ବେଗରେ ପବନ ସହ ତୁହାକୁ ତୁହା ବର୍ଷା ଲାଗିରହିବାରୁ ଜନଜୀବନ ପ୍ରଭାବିତ ହୋଇଛି। ହଜାର ହଜାର ଘର ଭାଙ୍ଗିଛି। ଲକ୍ଷାଧିକ ଲୋକେ ପ୍ରଭାବିତ ହୋଇଛନ୍ତି। ଆଜି ରିପୋର୍ଟ ଲେଖାଯିବା ବେଳକୁ ଅବପାତ ରୂପରେ ତାମିଲନାଡ଼ୁ ଭିତରେ ରହିଥିଲା । ଗୋଟିଏ ବାତ୍ୟା ଯିବା ପରେ ଆଉ ଗୋଟିଏ ଘୂର୍ଣ୍ଣିଝଡ଼ ସୃଷ୍ଟି ହେବା ନେଇ ଆଶଙ୍କା ପ୍ରକାଶ ପାଇଛି। ଆସନ୍ତା ୫ ତାରିଖରେ ସୁମାତ୍ରା ନିକଟ ଦକ୍ଷିଣ-ପୂର୍ବ ବଙ୍ଗୋପସାଗରରେ ଆଉ ଏକ ଘୂର୍ଣ୍ଣିବଳୟ ସୃଷ୍ଟି ସହ ଘନୀଭୂତ ହେବ। ଏହା ଶ୍ରୀଲଙ୍କା କିମ୍ବା ଦକ୍ଷିଣ ତାମିଲନାଡ଼ୁ ମୁହାଁଇବ ବୋଲି ପାଣିପାଗ ବିଶେଷଜ୍ଞ ପ୍ରଫେସର ସୁରେନ୍ଦ୍ରନାଥ ପଶୁପାଳକ ପୂର୍ବାନୁମାନ କରିଛନ୍ତି।

ପ୍ରଫେସର ପଶୁପାଳକ କହିଛନ୍ତି ଯେ ଓଡ଼ିଶା ଉପରେ ଏହାର ସିଧା ପ୍ରଭାବ ପଡ଼ିବ ନାହିଁ। ସମ୍ଭବତଃ ତାପମାତ୍ରା ଅଧିକ ରହିବ। ତେବେ ଦକ୍ଷିଣ ଆଭ୍ୟନ୍ତରରେ ଆସନ୍ତା ୪ରୁ ୬ ତାରିଖ ମଧ୍ୟରେ ସର୍ବନିମ୍ନ ତାପମାତ୍ରା ପ୍ରାୟ ୪ ଡିଗ୍ରି କମିବ। ଏହି ସମୟରେ ଶୀତ ବଢ଼ିବ। ତେବେ ୭ରୁ ୯ ତାରିଖ ମଧ୍ୟରେ ରାତିର ତାପମାତ୍ରା ପ୍ରାୟ ୪ ଡିଗ୍ରି ପର୍ଯ୍ୟନ୍ତ ବୃଦ୍ଧି ପାଇବ। ଡିସେମ୍ବର ୨, ୩ ଓ ୯ ତାରିଖରେ ରାଜ୍ୟର ଅଧିକାଂଶ ଅଞ୍ଚଳରେ ପାଗ ମେଘୁଆ ରହିବ। ଉତ୍ତର ଉପକୂଳ ଓ ଆଭ୍ୟନ୍ତରରେ ୪ରୁ ୬ ତାରିଖ ମଧ୍ୟରେ ସର୍ବନିମ୍ନ ତାପମାତ୍ରା ପ୍ରାୟ ୪ ଡିଗ୍ରି କମିବା ହେତୁ ଶୀତ ବଢ଼ିବ। ଭୁବନେଶ୍ବର ସମେତ ଦକ୍ଷିଣ ଉପକୂଳରେ ଆସନ୍ତା ୫ ଦିନ ପର୍ଯ୍ୟନ୍ତ ତାପମାତ୍ରା ଅପରିବର୍ତ୍ତିତ ରହିବ। ୫ରୁ ୭ ତାରିଖ ମଧ୍ୟରେ କୁହୁଡ଼ି ହୋଇପାରେ ବୋଲି ସେ ଆକଳନ କରିଛନ୍ତି। ଅନ୍ୟପଟେ ଆସନ୍ତା ୨୪ ଘଣ୍ଟା ମଧ୍ୟରେ ଦକ୍ଷିଣ ଓ ଉପକୂଳର କେତେକ ସ୍ଥାନ ଏବଂ ୩ ଓ ୪ ତାରିଖରେ ଦକ୍ଷିଣ ଓଡ଼ିଶାରେ ହାଲୁକାରୁ ମଧ୍ୟମଧରଣର ବର୍ଷା ହୋଇପାରେ ବାକି ଜିଲ୍ଲାଗୁଡ଼ିକରେ କୋହଲା ପାଗ ଲାଗିରହିବ ବୋଲି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ସୂଚନା ମିଳିଛି l

ଭୁବନେଶ୍ୱର( ଦ କୁଇଭର ):- ବିଭିନ୍ନ ଚିଡ଼ିଆଖାନାରୁ ନନ୍ଦନକାନନ ପ୍ରାଣୀ ଉଦ୍ୟାନକୁ ଜେବ୍ରା, ଏସୀୟ ସିଂହ, ବଣ କୁକୁଡ଼ା ଓ ଚିତାବାଘ ଅଣାଯିବ। ଓଡ଼ିଶାର ଏହି ଏକମାତ୍ର ପ୍ରାଣୀ ଉଦ୍ୟାନକୁ ବିଶ୍ବ ପର୍ଯ୍ୟଟନ ମାନଚିତ୍ରରେ ସ୍ଥାନିତ କରିବାକୁ ଟନେଲ୍‌ ଆକ୍ବାରିୟମ୍‌ ନିର୍ମାଣ, କାଞ୍ଜିଆ ହ୍ରଦର ନବୀକରଣ, ବନ୍ୟଜନ୍ତୁ ବିନିମୟ କାର୍ଯ୍ୟକ୍ରମ, ଚିତାବାଘ, ଛୋଟ ବିରାଡ଼ି ପ୍ରଜାତିର ପ୍ରାଣୀ, ବିଦେଶୀ ବାନର ଜାତୀୟ ପ୍ରାଣୀଙ୍କ ନିମନ୍ତେ ଖୁଆଡ଼ ନିର୍ମାଣ କରିବାକୁ ଯୋଜନା ପ୍ରସ୍ତୁତ ହୋଇଛି। ସମସ୍ତ ସଫାରିଗୁଡ଼ିକର ପ୍ରବେଶ ପଥର ଉନ୍ନତୀକରଣ ଓ ରାଜ୍ୟ ଉଦ୍ଭିଦ ଉଦ୍ୟାନର ମୁଖ୍ୟ ଫାଟକର ଉନ୍ନତୀକରଣ, ପ୍ରଥମ ଫାଟକରୁ ଝରଣା ଛକ ପର୍ଯ୍ୟନ୍ତ ଘାସ ଗାଲିଚା, ପ୍ରାକୃତିକ ବ୍ୟାଖ୍ୟାନ କେନ୍ଦ୍ର ପ୍ରତିଷ୍ଠା ଦିଗରେ ପଦକ୍ଷେପ ନିଆଯାଉଛି।ଏବେ ପ୍ରାଣୀ ଉଦ୍ୟାନରେ ୧୬୮ ପ୍ରଜାତିର ୪,୨୪୨ଟି ବନ୍ୟପ୍ରାଣୀ ଅଛନ୍ତି। ସେଥିମଧ୍ୟରୁ ୭୮ ପ୍ରଜାତିର ୧,୮୭୧ଟି ପକ୍ଷୀ, ୫୪ ପ୍ରଜାତିର ୧,୯୮୦ ସ୍ତନ୍ୟପାୟୀ, ୩୦ ପ୍ରଜାତିର ୩୭୦ ସରୀସୃପ ଓ ୬ ପ୍ରଜାତିର ୨୧ଟି ଉଭୟଚର ପ୍ରାଣୀ ରହିଛନ୍ତି। ପର୍ଯ୍ୟଟକଙ୍କୁ ଆକୃଷ୍ଟ କରିବାକୁ ଏହା ପରିସରରେ ଶିଶୁ ରେଳଗାଡ଼ି, ରୋପ୍‌ୱେ, ୪ଟି ସଫାରି(ବାଘ, ସିଂହ, ଭାଲୁ ଓ ତୃଣଭୋଜୀ ପ୍ରାଣୀ) ରହିଛି। ବ୍ୟାଟେରି ଚାଳିତ ଗାଡ଼ିର ସୁବିଧା କରାଯାଇଛି। ଏହାବ୍ୟତୀତ ଦିବ୍ୟାଙ୍ଗ ଓ ବରିଷ୍ଠ ନାଗରିକମାନଙ୍କ ପାଇଁ ବିନା ଶୁଳ୍କରେ ପ୍ରବେଶ, ପରିଭ୍ରମଣ ପାଇଁ ଚକ ଲାଗିଥିବା ଗାଡ଼ିର ବ୍ୟବସ୍ଥା କରାଯାଇଛି।